У гасцях у філолагаў – Серж Мінскевіч

Серж Мінскевіч, крэатыўны паэт і перакладчык, кандыдат навук, дактарант і супрацоўнік Нацыянальнай акадэміі навук Беларусі, 6 снежня завітаў да будучых спецыялістаў па рускай філалогіі з 4 курса філалагічнага факультэта БДУ – у тыя сцены, з якіх калісьці выйшаў выпускніком. Вядома, што любы прадмет лепш вывучаецца з ілюстрацыямі, і Серж артыстычна праілюстраваў сваёй асобай і вершамі вірлівую гісторыю беларускай літаратуры 1990-х – 2010-х гг. Аўтар кнігі “Я з Бум-Бам-Літа” (2008), Серж прыгадаў першыя крокі і працяг гэтага літаратурнага руху. Паэт расшыфраваў паняткі “Бум” і “Бам”, праспяваў пад сваю бардаўскую гітару зухаватыя песенькі і гімн знакамітай суполкі беларускіх авангардыстаў, прачытаў з кніжкі “Менскія / Мінскія санеты” (2002) вершы з адсылкай да Адама Міцкевіча, расказаў пра лёсы “слупоў” Бум-Бам-Літа. На імпрэзе студэнты пазнаёмілся таксама з кнігамі Сержа Мінскевіча “Праз ГалеРею. Транслёгічныя творы” (1994), “Сад замкнёных гор” (з калекцыі беларускай фантастыкі), з яскрава ілюстраванымі і вельмі дасціпнымі кніжкамі для дзяцей: казкамі “Чароўная крыніца, ці як навучыць дракона чысціць зубы”, “Вялікія прыгоды Какоса Маракоса”. Чыталіся вершы  і Алеся Туровіча, таксама былога філфакаўца і “транслагіста”, з Туровічавай кнігі “Корпус. Вершы, проза” (1998). Прагучалі і цакам сур’ёзныя санеты Сержа. Сустрэча была арганізавана супрацоўнікамі кафедры гісторыі беларускай літаратуры; яна была прысвечана 500-годдзю  беларускага кнігадрукавання. Лейтматывам імпрэзы быў заклік да творчасці: з часам усё мінае, але шчырая творчасць застаецца!

Конкурс чытальнікаў, прысвечаны 87-годдзю з дня нараджэння Уладзіміра Караткевіча

23 лістапада на філалагічным факультэце БДУ прайшоў конкурс чытальнікаў, прымеркаваны да 87-годдзя з дня нараджэння Уладзіміра Караткевіча. У гэтым годзе прынялі ўдзел 27 удзельнікаў з БДУ, юрыдычнага каледжа, каледжа паліграфіі, гімназіі №16 і СШ №21. Канкурсанты спаборнічалі ў трох узроставых катэгорыях.

1. У намінацыі «Лепшае чытанне твора У. Караткевіча» перамаглі: Касцючэнка Арсень (СШ №21); Грыбовіч Юлія (юрыдычны каледж); Яўген Чарнышоў (філфак).

 
2. У намінацыі «Лепшае выступленне з аўтарскім творам, прысвечаным В. Караткевічу» перамогу атрымала Саевіч Елізавета (СШ№21).
3. Лепшы пераклад твораў У. Караткевіча здзейснілі і творча прадставілі студэнткі філалагічнага факультэта Гун Лі Мэн і Ван Цяньцзяо.
4. Лепшую ілюстрацыя да твораў У. Караткевіча выбіралі прысутныя ў зале гледачы. Яны вызначылі пераможцам Дзмітрыя Лапцэвіча (гістфак).

Гледачы вызначалі пераможцу і ў намінацыі "Прыз глядацкіх сімпатый". Лепшай у гэтай катэгорыі апынулася Маргарыта Кудрова (каледж паліграфіі).

Каля Калядаў: серыя майстар-класаў

Перадкалядны час – гэта час своеасаблівы. Чароўны.

Час, калі ўсе мы – і дарослыя, і дзеці – чакаем цудаў. Час абнаўлення і перараджэння прыроды.

Час, калі сям’я збіраецца разам, каб разам распачаць гадавое кола.

Вучэбна-навуковая лабараторыя беларускага фальклору прапануе Вам не чакаць і зрабіць цуда сваімі рукамі!

Дзеля гэтага мы распрацавалі шэраг тэматычных – калядных – майстар-класаў, на якіх нашы супрацоўнікі-фалькларысты распавядуць пра цікавосткі народнай культуры і дапамогуць Вам далучыцца да спрадвечнага, да сваіх каранёў. І, апроч усяго іншага, павесяліцца.

Нашы перадкалядныя майстар-класы будуць праходзіць амаль тыдзень, з 19 па 22 снежня, пачатак штодзень з 15.00.

Заняткі будуць адбывацца ў ВНЛ БФ (вул. К.Маркса, 31, аўд. 39).

У праграме:

- калядныя пачастункі па народных рэцэптах;

- калядныя дзявочыя варожбы (з архіўных фондаў ВНЛ БФ);

- утварэнне калядных цацак (“зоркі-жаданкі”);

- песні-калядкі.

А таксама – акцыя “Сэлфі ў каляднай масцы”.

Усе майстар-класы – бясплатныя, разлічаныя на дарослых і дзяцей ад 10 гадоў. Аднак, з прычыны абмежаванасці месцаў у групах, просьба папярэдне запісвацца.

Гэта можна зрабіць па тэлефоне (017) 380-57-46 або па электроннай пошце Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду. (лісты з паметай “Каля Калядаў”).

Шчыра запрашаем усіх у госці!

Выстава праваслаўных ікон, прысвечаная аднайменнаму хрысціянскаму святу «Пакровы»

Выстава праваслаўных ікон «Пакровы» адкрылася 13 кастрычніка ў Беларускім дзяржаўным універсітэце на філалагічным факультэце. Прымеркавана мерапрыемства да святкавання праваслаўнага свята «Пакровы», а таксама да святкавання Дня маці ў нашай краіне. З прывітальным словам выступілі: дэкан філалагічнага факультэта, прафесар Роўда І.С. і праваслаўны святар Аляксандр Шымбалёў. Пра асаблівасці свята, яго адбітку ў гісторыі нацыянальнай культуры выступіла старшыня ГА "Саюз жанчын БДУ», ​​прафесар БДУ Ірына Казакова. Наведвальнікі выставы мелі магчымасць даведацца пра легенды і фактах, звязаных з паходжаннем Мінскай цудатворнай іконы Багародзіцы і іконы Багародзіцы Жыровіцкай. Гасцямі выставы сталі прадстаўнікі Пасольства Рэспублікі Казахстан у Рэспубліцы Беларусі.

Выстава працягнецца да 20 кастрычніка.

View the embedded image gallery online at:
http://philology.bsu.by/by/news/culture#sigProId0d97239795

Майстар-клас расійскіх пісьменнікаў

11 снежня (панядзелак) у Мінск прыязджаюць вядомыя расійскія пісьменнікі, выкладчыкі літаратурнага інстытута ім. А.М.Горкага: Сяргей Есін, Сяргей Дзмітрэнка, Аляксандр Сегень і іншыя. У 16.00 у медыятэцы аддзела абслугоўвання філалагічнага і эканамічнага факультэтаў яны правядуць майстар-клас для творчай моладзі.

Запрашаем на мерапрыемства.

Тэматычная выстава “Родны Мінск – мая сталіца”

Фальклорна-этнаграфічны кабінет-музей беларускай культуры на філалагічным факультэце БДУ прадстаўляе тэматычную выставу “Родны Мінск – мая сталіца”, прысвечаную 950-годдзю горада Мінска. На выставе прадстаўлены кнігі, якія распавядуць пра гісторыю і культуру Мінска, бліжэй пазнаёмяць з яго старажытным і сучасным выглядам, адкрыюць цікаўным таямніцы мінулага горада на Свіслачы.

Кабінет-музей чакае гасцей на выставе “Родны Мінск – мая сталіца” у 319 аўдыторыі філалагічнага факультэта БДУ.

Міжнародны фестываль з элементамі навуковай школы «Жывая Азбука: руская дзіцячая літаратура ў славянскіх краінах»

6—9 кастрычніка 2017 г. у Сталічнай бібліятэцы Сафіі адбыўся Міжнародны фестываль з элементамі навуковай школы «Жывая Азбука: руская дзіцячая літаратура ў славянскіх краінах». У арганізацыйную групу фестывалю ўваходзіла дацэнт кафедры рускай літаратуры БДУ Ульяна Юр’еўна Верына. Прадстаўляем яе водгук аб мерапрыемстве.

Праграма была насычанай і размаітай, адрасаванай як дзецям, так і дарослым. У рамках «дзіцячай» часткі фестывалю адбыўся конкурс эсэ, ілюстрацый і буктрэйлераў, майстар-класы, гульні, сустрэчы з дзіцячымі паэтамі і перакладчыкамі Міхаілам Ясновым і Віктарам Самуілавым. Дзеці з цікавасцю слухалі паведамленні пра даўнейшыя азбукі, знаёміліся з гарадамі Расіі, прыродай Беларусі, Веткаўскай буквіцай, а для рускага і балгарскага паэтаў падрыхтавалі пацешныя сцэнкі.

«Дарослая», навуковая частка таксама адрознівалася разнастайнасцю. Былі прадстаўлены даклады дацэнта Сафійскага ўніверсітэта імя св. Клімента Охрыдскага Галіны Петкавай, прафесара УрДПУ Ніны Баркоўскай, дацэнта УрДПУ Вольгі Багдасаран, выкладчыка Ўніверсітэта свв. Кірылы і Мяфодзія г. Трнава (Славакія) Мар'яны Фігедыавай, дацэнта Беларускага дзяржаўнага ўніверсітэта Ульяны Верынай. У дакладах казалася аб праблемах выкладання рускай мовы і літаратуры ў розных краінах, сучасных тэндэнцыях у літаратуры для дзяцей і падлеткаў. Абмеркаванне паказала, што ёсць праблемы, агульныя для Расіі, Беларусі, Балгарыі, Славакіі: гэта недастатковы ўзровень навучальнай літаратуры і школьнага выкладання, скарачэнне курсаў рускай літаратуры, фарміраванне адвольнага кола імёнаў і твораў, што ўваходзяць у абавязковыя праграмы, і інш. Аднак, як было адзначана М.Д. Ясновым, у крызісныя перыяды дзіцячая літаратура перажывае росквіт. Гэтак і ў пачатку ХХI ст. пісьменнікі і перакладчыкі адгукнуліся на праблемы ў культуры, грамадстве, адукацыі стварэннем выбітных твораў, а выданне кніг для дзяцей ператварылася ў адменнае мастацтва: афармляльніцкія падыходы сталі выдасканаленымі, а паліграфічныя рашэнні – канцэптуальнымі.

Больш падрабязна пра фестываль, яго праграму і конкурсы можна даведацца з матэрыялаў адмыслова створанага сайта http://festivalazbuka.ru . Асвятляў працу фестывалю і сайт Сталічнай бібліятэкі Сафіі http://www.libsofia.bg/page/posts/zhivata-azbuka-5647.php.

Хочацца выказаць удзячнасць калегам кафедры літаратуры і методыкі яе выкладання УрДПУ і асабіста Ніне Ўладзіміраўне Баркоўскай за магчымасць удзелу ў фестывалі. Можна спадзявацца, што ўсталяваныя навуковыя і сяброўскія кантакты будуць плённымі, а наперадзе нас чакаюць новыя супольныя праекты.

Віншуем!

3 верасня падчас святкавання Дня беларускага пісьменства на вялікай сцэне ў Полацку адбылося ўрачыстае ўзнагароджанне прызёраў рэспубліканскага конкурсу «Нацыянальная літаратурная прэмія». Як вядома, дыплом, сімвал прэміі і грашовая прэмія штогод уручаюцца ў сямі намінацыях: "Лепшы твор (зборнік твораў) паэзіі", "Лепшы твор прозы", "Лепшы твор драматургіі", "Лепшы твор публіцыстыкі", "Лепшы дэбют", "Лепшы твор для дзяцей і юнацтва", "Лепшы твор літаратурнай крытыкі і літаратуразнаўства".

У намінацыі «Лепшы дэбют» перамагла выпускніца, а зараз – супрацоўніца філалагічнага факультэта БДУ Маргарыта Латышкевіч з яе зборнікам апавяданняў «Яблыкі». Заўважым, што першая прэзентацыя кнігі адбылася менавіта на філфаку.

Шчыра віншуем Маргарыту з гэтай перамогай і зычым ёй новых творчых поспехаў!

Музычны вечар «Мне не шкада…»

15 лістапада ў 19.00 літаратурна-музычная гасцёўня запрашае на музычны вечар «Мне не шкада…». Спявак і кампазітар Сяргей Антонаў і выкладчык кафедры нямецкага мовазнаўства Дзмітрый Каралёў выканаюць бардаўскія, народныя песні, шансон і іншыя песні.
Месца сустрэчы: вул. К.Маркса, 31, медыятэка к. 71.

Прэзентацыя кніжнай выставы, прысвечанай 75-годдзю прафесара кафедры тэорыі літаратуры В.П. Рагойшы

8 чэрвеня ў медыятэцы аддзела абслугоўвання філалагічнага і эканамічнага факультэтаў Фундаментальнай бібліятэкі БДУ (вул. К. Маркса, 31, п. 71) адбудзецца прэзентацыя кніжнай выставы, прысвечанай 75-годдзю прафесара кафедры тэорыі літаратуры В.П. Рагойшы. На выставе будуць прадстаўлены манаграфіі навукоўца, пераклады, матэрыялы канферэнцый, артыкулы, а таксама літаратура пра жыццё і творчасць вучонага.

Запрашаем усіх у 14.00.

Фестываль творчасці Д.Р.Р. Толкіена «Ноч у Міжзем’і»

20 кастрычніка ў медыятэцы аддзела абслугоўвання філалагічнага і эканамічнага факультэтаў ФБ БДУ адбыўся фестываль творчасці Д.Р.Р. Толкіена. Асноўным арганізатарам мерапрыемства стаў беларускі фандом «Властелин колец». На мерапрыемства прыйшла вялікая колькасць аматараў творчасці англійскага пісьменніка. Праводзіліся розныя тэсты і інтэлектуальныя конкурсы і гульні.

Да мерапрыемства была падрыхтавана кніжная выстава «Фантастычны свет Ж.Р.Р. Толкіена»

View the embedded image gallery online at:
http://philology.bsu.by/by/news/culture#sigProId423774d7da