Выстава «Бабкі Ёжкі і ягабабачкі»

5 сакавіка ў 12.50 у кабінеце-музеі беларускай народнай культуры філалагічнага факультэта (К.Маркса, 31, 319 аўд.) адбудзецца адкрыццё інтэрактыўнай выставы, прысвечанай Міжнароднаму жаночаму дню 8 сакавіка, «Бабкі Ёжкі і ягабабачкі». На выставе будзе прадстаўлена больш за 50 работ майстра-лялечніка Галіны Жамчужнікавай (г. Гродна). Адкрыццё выставы будзе суправаджацца канцэртнай праграмай, у якой прымуць удзел супрацоўнікі філалагічнага факультэта БДУ. Арганізатар выставы — ГА "Саюз жанчын БДУ».

Аўтарскі вечар Максіма Замшава

23 лістапада студэнты 3 курса філалагічнага факультэта спецыяльнасці «Руская філалогія» наведалі аўтарскі вечар паэта, празаіка, літаратурнага крытыка, шэф-рэдактара «Літаратурнай газеты» Максіма Замшава.

Сустрэча пачалася з чытання вершаў на розныя тэмы самім аўтарам, што дазволіла слухачам належным чынам ацаніць творчасць паэта. Далей у нефармальнай абстаноўцы студэнты змаглі задаць свае пытанні. Студэнты-філолагі і Максім Замшаў дыскутавалі на тэму развіцця літаратуры дваццаць першага стагоддзя, пагаварылі пра ўклад аўтара ў плыні сучаснай паэзіі.

Напрыканцы вечара адміністрацыя «Белкнігі» падзякавала Максіму Замшаву за сустрэчу і падаравала памятныя сувеніры. Студэнты засталіся пад вялікім уражаннем ад сустрэчы і з задавальненнем наведаюць падобную імпрэзу яшчэ.

Святочны канцэрт «Для мам і мілых дам!»

ГА "Саюз жанчын БДУ», Пярвічная арганізацыя БДУ РГА «Белая Русь» запрашаюць 5 сакавіка 2019 года на святочны канцэрт «Для мам і мілых дам!», прысвечаны Міжнароднаму жаночаму дню,  з удзелам Узорнага аркестра эстрадна-сімфанічнай музыкі пад кіраўніцтвам Валерыя Быкава, дзіцячага ансамбля танца «Ліхтарынка» БДУ, а таксама маладых таленавітых вакалістаў.

Канцэрт адбудзецца ў 17.00 у актавай зале філалагічнага факультэта БДУ (вул. К. Маркса, 31).

Выстава "Культура Казахстана"

4 снежня у 12.45 на фiлалагiчным факультэце БДУ адбылося адкрыццё выставы "Культура Казахстана", прымеркаванай да Дня Культуры Рэспублiкi  Казахстан у Рэспублiцы Беларусь.

Дыскусійна-аналітычны клуб «COGITO»

22 лютага на базе Беларускага дзяржаўнага ўніверсітэта культуры і мастацтваў адбылося пасяджэнне міжуніверсітэцкага дыскусійна-аналітычнага клуба «COGITO», якое арганізавалі Вучэбна-навуковая лабараторыя беларускага фальклору і Цэнтр захавання спадчыны вуснай традыцыі беларусаў. У мерапрыемстве прынялі ўдзел фалькларысты і этнолагі БДУ, БДУКМ, БДПУ імя Максіма Танка, НАН Беларусі. Тэмай сёлетняй сустрэчы стала небяспека дэфармацыі фальклорнай памяці.

З прывітальным словам да ўдзельнікаў клуба звярнуўся загадчык кафедры этналогіі і фальклору БДУКМ В. Калацэй. Ён жа і распачаў дыскусію, распавёўшы пра праблемы захавання народных традыцый. Пра грамадскую і навуковую адказнасць фалькларыстаў, шаблоннасць мыслення некаторых навукоўцаў гаварыла вядучы навуковы супрацоўнік Вучэбна-навуковай лабараторыі беларускага фальклору, к.ф.н. Р. Кавалёва. Працяглую дыскусію выклікала выказванне к. гіст. н. С. Грунтова аб праблеме дэфармацыі традыцый, якія трапляюць пад ахову, і празмернай тэатралізаванасці абрадаў, якія захоўваюцца такім чынам.

Ад філалагічнага факультэта ў мерапрыемстве прынялі ўдзел супрацоўнікі Вучэбна-навуковай лабараторыі беларускага фальклору, к.ф.н., дацэнт кафедры тэорыі літаратуры Т. Лук’янава, к.ф.н., дацэнт кафедры раманскага мовазнаўства Г. Квачак.

Выстава "Культура  Кітая"

6 лістапада ў 15.50 на філалагічным факультэце БДУ адбылося  адкрыццё выставы "Культура Кітая". На выставе прадстаўлена звыш 50 экспанатаў, якія знаёмяць наведвальнікаў з рознымі аспектамі культуры і мастацтва гэтай краіны. Наведвальнікі выставы маюць магчымасць убачыць кнігі, прысвечаныя кітайскаму фальклору, кітайскай нацыянальнай кухні, асноўным славутасцям краіны. Таксама прадстаўлены лялькі ў нацыянальным кітайскім адзенні, маскі пекінскай оперы, вееры, святочныя надпісы, малюнкі па шоўку, таямнічыя драконы, велічныя тыгры, вясёлыя панды. Цэнтральнае месца займае экспазіцыя кітайскай і беларускай вышыўкі. У культурах абодвух народаў вышыўка адыгрывае вельмі значную ролю. Што агульнае маюць і чым адрозніваюцца беларуская і кітайская вышыўкі наведвальнікі даведаліся на адкрыцці выставы. (Арганізатар выставы - прафесар кафедры тэорыі літаратуры, доктар філалагічных навук Ірына Валер'еўна Казакова). У першы ж дзень наведвальнікамі выставы сталі звыш 120 студэнтаў і супрацоўнікаў БДУ. Экскурсіі па экспазіцыях праводзяцца на трох мовах (рускай, беларускай і кітайскай) па жаданні наведвальнікаў. Выстава працягне сваю работу да 14 лістапада.

 

Cемінар «Прафесія: перакладчык»

7 лютага на філалагічным факультэце БДУ прайшоў семінар «Прафесія: перакладчык», зладжаны ў супрацоўніцтве кафедры тэорыі літаратуры і міністэрства інфармацыі. Мерапрыемства прайшло ў межах XXVI Мінскай міжнароднай кніжнай выставы-кірмашу і сімпозіума «Пісьменнік і час».

Адкрывала сустрэчу выступленне намесніка дэкана філалагічнага факультэта па вучэбна-метадычнай рабоце М.М. Хмяльніцкага. Загадчык кафедры тэорыі літаратуры Т.А. Марозава распавяла пра дасягненні калег у галіне мастацкага перакладу, падрабязна спыніўшыся на дзейнасці В.П. Рагойшы, Т.В. Кабржыцкай, Т.І. Шамякінай, І.А. Чароты, М.П. Кенькі.

Выкладчык кафедры кітайскай філалогіі В.  Жукавец пазнаёміла гасцей з уласным даследаваннем па беларуска-кітайскіх літаратурных сувязях. А загадчык аддзелам абслугоўвання філалагічнага і эканамічнага факультэтаў фундаментальнай бібліятэкі БДУ Ж.С. Карповіч прадэманстравала забяспечанасць студэнтаў-філолагаў, будучых перакладчыкаў, метадычнай і мастацкай літаратурай.

У сваю чаргу, госці факультэта выступілі са сціслымі паведамленнямі, у якіх падзяліліся ўласным вопытам і акрэслілі спецыфіку перакладчыцкай практыкі ў замежжы, а таксама падарылі факультэту некаторыя свае выданні.

Мадэрыравала сустрэчу супрацоўніца вучэбна-навуковай лабараторыі беларускага фальклору кафедры тэорыі літаратуры М.Ю. Латышкевіч.

Пасля дакладаў і дыскусіі ўдзельнікаў чакаў спектакль беларускай батлейкі «Жалобная комедия об Адаме и Еве», зладжаны ўзорным тэатрам лялек «Солнышко» культурна-спартыўнага цэнтра Мінскага аддзялення Беларускай чыгункі (рэжысёр – Святлана Дземчанка, мастак – Надзея Якаўлева). Важна адзначыць, што спектакль быў заснаваны на адаптаваным тэксце п’есы Сімяона Полацкага. Надзея Якаўлева, аўтар батлейкі, таксама трохі распавяла гасцям пра народны лялечны тэатр на Беларусі і адказала на пытанні зацікаўленых.

Выстава «Аўтэнтычная спадчына ўсходняй Беларусі»

30 кастрычніка 2018 года ў кабінеце-музеі беларускай народнай культуры  філалагічнага факультэта  БДУ адбылася выстава «Аўтэнтычная спадчына ўсходняй Беларусі».

Арганізатар ˗ прафесар кафедры тэорыі літаратуры, доктар філалагічных навук Ірына Валер’еўна Казакова’еўна Казакова ˗ азнаёміла наведвальнікаў з адметнасцямі гісторыка-культурнай спадчыны рэгіёна. Гасцям былі прадстаўлены прадметы побыту ўсходніх беларусаў, узоры вышыўкі, ткацтва, саломапляцення дадзенай мясцовасці. Студэнтам была прадстаўлена магчымасць самастойна збіць масла, пакарыстацца калаўротам, ткацкім станком, папрасаваць бялізну без сучаснага праса. Вялікую цікавасць выклікалі таксама рэцэпты нацыянальнай кухні, асабліва выпечка хатняга хлеба.

Творчы вечар Маргарыты Латышкевіч

23 студзеня 2019 года ў Цэнтральнай гарадской бібліятэцы імя Янкі Купалы адбылася юбілейная імпрэза пісьменніцы і супрацоўніцы Вучэбна-навуковай лабараторыі беларускага фальклору Маргарыты Латышкевіч. Цэнтрам творчай сустрэчы была прэзентацыя зборніка прозы “Наш дом”, які выйшаў у 2018 годзе (выдавецтва “Мастацкая літаратура”, серыя “Час 21”).

Цягам імпрэзы аўтарка чытала вершы, распавядала пра прыпынкі свайго літаратурнага падарожжа, пра кнігі, жыццё ды творчасць. Прагучала таксама і апавяданне “Яблыкі”, якое ў 2016 годзе дало старт аднайменнаму зборніку малой прозы, узнагароджанаму Нацыянальнай літаратурнай прэміяй (у намінацыі “Дэбют”). Акрамя гэтага, былі абвешчаны пераможцы святочнай акцыі, зладжанай да імпрэзы. Пяць чытачоў, што паспелі першымі адказаць на пытанне па фантастычнай аповесці “Над Вугерай – дождж”, атрымалі экзэмпляр “яблычнага” зборніка з аўтографам аўтара.

Павіншаваць пісьменніцу, апроч чытачоў, з’явіліся і калегі. Маладыя паэткі Кацярына Захарэвіч і Марына Дубень выступілі ў якасці чытальнікаў вершаў Маргарыты, а пісьменніца Іна Фралова ўручыла ёй памятны дыплом ад Саюза пісьменнікаў ды сказала колькі цёплых словаў.

У заканчэнні сустрэчы кожны з гасцей змог атрымаць на памяць сувенірную картку з аўтографам і малюнкам.

Творчая вечарына "Вобраз маці ў культурах розных народаў"

9 кастрычніка 2018 года, напярэдадні святкавання  ў нашай краіне Дня маці, на філалагічным факультэце БДУ 
адбылася творчая вечарына "Вобраз маці ў культурах розных народаў" з удзелам беларускіх і замежных студэнтаў і супрацоўнікаў філалагічнага факультэта.
Арганізатарамі імпрэзы сталі старшы выкладчык кафедры англійскага мовазнаўства Марыяна Рыгораўна Груздзіловіч і прафесар кафедры тэорыі літаратуры  Ірына Валер'еўна Казакова.

Серыя святочных майстар-класаў КаляКалядаў-2018

На філалагічным факультэце БДУ з 19 па 21 снежня 2018 года прайшла серыя майстар-класаў “КаляКалядаў”. Свята другі год запар арганізоўвае вучэбна-навуковая лабараторыя беларускага фальклору пры падтрымцы кафедры тэорыі літаратуры БДУ. Мэта сёлетніх мерапрыемстваў – пазнаёміць і далучыць да беларускіх калядных традыцый замежных студэнтаў.

Майстар-класы праходзілі на базе вучэбна-навуковай лабараторыі беларускага фальклору. На прыцягу трох дзён госці мерапрыемства мелі магчымасць пагадаць, паспрабаваць калядныя стравы, паслухаць і паспяваць калядныя песні, навучыцца рабіць папяровых анёлкаў. Акрамя таго, у чацвер, 20 снежня, перад студэнтамі з мастацкай праграмай “Каляда на Тураўскім Палессі (в. Тонеж)” выступіў фальклорны гурт “Этнасуполка” (Беларускі дзяржаўны ўніверсітэт культуры і мастацтваў, кіраўнік – старшы выкладчык кафедры этналогіі і фальклору Т.А. Пладунова). Каляднымі прысмакамі па народных рэцэптах пачаставала гасцей загадчык кафедры тэорыі літаратуры Т.А. Марозава.