«КаляКалядаў»: серыя майстар-класаў на філалагічным факультэце БДУ

20 снежня 2019 года на філалагічным факультэце БДУ прайшла серыя майстар-класаў «КаляКалядаў». Свята трэці год запар арганізоўвае вучэбна-навуковая лабараторыя беларускага фальклору пры падтрымцы кафедры тэарэтычнага і славянскага літаратуразнаўства БДУ. Мэта мерапрыемстваў – пазнаёміць і далучыць да беларускіх калядных традыцый усіх жадаючых.

Майстар-класы праходзілі на базе вучэбна-навуковай лабараторыі беларускага фальклору. Госці сёлетняга мерапрыемства – навучэнцы 11 класа ліцэя БДУ – пазнаёміліся з асноўнымі каляднымі традыцыямі, даведаліся пра асаблівасці і гісторыю беларускай батлейкі, пра семантыку калядных масак. Пра ўсё гэта ім распавяла супрацоўніца ВНЛБФ Маргарыта Латышкевіч. Акрамя таго, нашы наведвальнікі мелі магчымасць увачавідкі пабачыць самаробную батлейку і паўдзельнічаць у калядным прадстаўленні. І, канешне, як сапраўдныя калядоўшчыкі, – атрымаць пачастункі ад гаспадароў.

Музычны вечар

15 мая ў зале інфармацыйных рэсурсаў філалагічнага і эканамічнага факультэтаў ФБ БДУ адбыўся музычны вечар. Аматары бардаўскай песні прыйшлі паслухаць выступленне ужо даўно знаёмых артыстаў.

Выкладчык кафедры нямецкага мовазнаўства Дзмітрый Мікалаевіч Каралёў зрабіў экскурс ў музычную гісторыю рамансаў.

У другім аддзяленні выступленне Вадзіма Мязецкага і Сяргея Антонава было прысвечана Вялікай Айчыннай вайне.

На філалагічным факультэце БДУ адбыўся літаратурна-музычны вечар «Сярэбраныя струны»

26 лістапада ў 18.00 кафедра рускай літаратуры філалагічнага факультэта БДУ правяла літаратурна-музычны вечар «Сярэбраныя струны», прымеркаваны да 80-годдзя роднага факультэта.

У вечары прынялі ўдзел выкладчыкі, студэнты-філолагі розных курсаў і спецыяльнасцей, замежныя навучэнцы, магістранты, а таксама госці з Беларускай дзяржаўнай акадэміі музыкі.

У святочнай і радаснай атмасферы творчых стасункаў прагучалі выдатныя рамансы Рахманінава, Мусаргскага і Чайкоўскага на вершы рускіх паэтаў, вядомыя арыі з опер, класічная музыка Іагана Себасцьяна Баха і Каміля Сен-Санса. Студэнты філалагічнага факультэта са свайго боку падрыхтавалі літаратурна-паэтычную частку канцэрта, у якую ўвайшлі яскравыя і разнастайныя творы вядомых рускіх паэтаў Сярэбранага веку: прагучалі вершы Уладзіміра Салаўёва, Мікалая Гумілёва, Ганны Ахматавай, Марыны Цвятаевай, Зінаіды Гіпіус, Уладзіміра Маякоўскага, былі прачытаны паэмы А. Блока «Дванаццаць» і Сяргея Ясеніна «Чорны чалавек». Студэнты-філолагі не толькі чыталі вершы, але і падрыхтавалі некалькі песень пад гітару: у выкананні Ірыны Звягінцавай і Марыі Страхаль прагучалі рамансы на вершы Марыны Цвятаевай «Мне нравится, что вы больны не мной» і Сяргея Ясеніна «Заметался пожар голубой».

Арганізавалі і правялі вечар загадчык кафедры рускай літаратуры Людміла Леанідаўна Аўдзейчык, выкладчык-канцэртмайстар БДАМ Святлана Сяргееўна Стэфаненка і студэнтка 1-га курса БДУ Аляксандра Бедзіна.

Гэта ўжо другое мерапрыемства, якое прайшло сёлета ў дадзеным фармаце. Усе ўдзельнікі і арганізатары сустрэчы спадзяюцца на тое, што музычна-паэтычныя вечары стануць добрай традыцыяй на філалагічным факультэце, бо што можа быць прыгажэйшым за музыку і паэзію!

Традыцыйная выстава «Велiкодныя яйкi i паштоўкi»

Напярэдаднi Вялiкадня 24 красавіка на філалагічным факультэце ў кабiнеце-музеi беларускай культуры пачала сваю працу традыцыйная выстава «Велiкодныя яйкi i паштоўкi». На выставе прадстаўлены вырабы беларускiх, рускiх i ўкраiнскiх майстроў. Выстава працуе да 30 красавiка.

На філфаку адбылася вечарына «Аснежаныя рытмы»

Пятага снежня адбылася вечарына паэзіі і музыкі «Аснежаныя рытмы», прымеркаваная да 80-годдзя філалагічнага факультэта. На яе былі запрошаны шматлікія выпускнікі, педагогі-ветэраны, сённяшнія супрацоўнікі філфака, студэнты БДУ, навучэнцы ўстаноў агульнай і сярэдняй спецыяльнай адукацыі.

Распачаў вечарыну загадчык кафедры гісторыі беларускай літаратуры А.І. Бельскі, які нагадаў, што традыцыю творчых сустрэч на філфаку запачаткаваў прафесар, экс-дэкан філалагічнага факультэта, выдатны беларускі паэт А.А. Лойка. Потым госці і выпускнікі паглядзелі відэапрэзентацыю, прысвечаную выкладчыкам філалагічнага факультэта. Сардэчна прывітаў ветэранаў, гасцей і выпускнікоў дэкан факультэта прафесар І.С. Роўда.

Госцем сёлетніх «Аснежаных рытмаў» стаў паэт, кампазітар, спявак, выпускнік філфака 1986 года Станіслаў Коршак (Рыга). Ён выканаў песні на розных мовах, у тым ліку беларускія, прысвечаныя малой радзіме («Слаўся, наш Слуцк малады!», «Дзе клён стары хвалюе сэрца»), а таксама на тэму кахання («Ты ж мая мара», «Нарач яднае нас»). Яго выступленне стала прыкладам духоўнай мужнасці, жыццялюбства, высокай грамадзянскасці, патрыятызму, сыноўняй адданасці роднай Беларусі. Творчую эстафету перанялі маладыя паэты, студэнты ІV курса Алеся Адамовіч, Ксенія Бранчэль, Ксеня Вярынская, якія прачыталі ўласныя вершы, паказалі цудоўныя ўзоры паэтычнай творчасці і артыстызму.

На паэтычна-музычную вечарыну прыйшло шмат таленавітых і адораных навучэнцаў, пераможцаў і ўдзельнікаў рэспубліканскіх і абласных алімпіяд, творчых конкурсаў, якія мелі магчымасць пабачыць вядомых навукоўцаў і выкладчыкаў філалагічнага факультэта, па кнігах якіх вучацца, рыхтуюцца да ўрокаў, канферэнцый, алімпіяд: А. І. Бельскага, В. У. Праскаловіч, У. А. Навумовіча, І. Э. Багдановіч (яна ж кіраўнік студэнцкага літаратурнага гуртка «Альтанка»), А. Л. Вераб’я, П. І. Навуменку і інш. Сталічных вучняў сустракалі выкладчыкі, якія мэтанакіравана працуюць з адоранымі навучэнцамі, удзельнічаюць у школьным алімпіядным руху: А. А. Радзевіч, В. Ю. Дылеўская, С. А. Шантаровіч і інш. Сярод юных гасцей філфака былі навучэнцы Ліцэя БДУ, Мінскага дзяржаўнага абласнога ліцэя, гімназіі № 33 г. Мінска, ліцэя № 2 г. Мінска, сярэдніх школ № 118, 148 і інш. Завіталі да філфакаўцаў на свята паэзіі і музыкі больш як трыццаць навучэнцаў Мінскага дзяржаўнага аўтамеханічнага каледжа імя акадэміка М. С. Высоцкага.

На вечарыне прысутнічалі пісьменнікі Анатоль Бутэвіч, Людміла Забалоцкая, Анатоль Зэкаў, Зоя Падліпская, Алесь Гібок-Гібкоўскі, Наталля Кучмель і інш., старшыня Саюза жанчын БДУ Ірына Казакова, галоўны рэдактар часопіса «Роднае слова» Наталля Шапран, кандыдаты філалагічных навук Святлана Малюковіч, Таццяна Казакова, Ала Жардзецкая, Раман Дубашынскі і інш., дырэктары і намеснікі школ, настаўнікі-метадысты і настаўнікі вышэйшай катэгорыі, супрацоўнікі выдавецтваў «Мастацкая літаратура», «Адукацыя і выхаванне», Нацыянальнага інстытута адукацыі, музеяў, архіваў, часопісаў «Роднае слова», «Беларуская мова і літаратура», «Гісторыя і грамадазнаўства» і інш., выпускнікі філфака, вядомыя землякі паэта і спевака С. Коршака.

Пасля вечарыны шэраг педагогаў даслала водгукі са словамі падзякі за праведзенае мерапрыемства. «Дзякуй вялікі за запрашэнне і свята для дзяцей, ім вельмі спадабалася. Годна, яскрава, запамінальна», — напісала А. К. Пекач, настаўнік-метадыст ліцэя № 2 г. Мінска.

Выстава «Бабкі Ёжкі і ягабабачкі»

5 сакавіка ў 12.50 у кабінеце-музеі беларускай народнай культуры філалагічнага факультэта (К.Маркса, 31, 319 аўд.) адбудзецца адкрыццё інтэрактыўнай выставы, прысвечанай Міжнароднаму жаночаму дню 8 сакавіка, «Бабкі Ёжкі і ягабабачкі». На выставе будзе прадстаўлена больш за 50 работ майстра-лялечніка Галіны Жамчужнікавай (г. Гродна). Адкрыццё выставы будзе суправаджацца канцэртнай праграмай, у якой прымуць удзел супрацоўнікі філалагічнага факультэта БДУ. Арганізатар выставы — ГА "Саюз жанчын БДУ».

Адкрыццё выставы “Беларуская лялька”

12 лістапада 2019 года ў кабінеце-музеі беларускай традыцыйнай культуры філалагічнага факультэта БДУ адбылося адкрыццё выставы “Беларуская лялька”, прымеркаванай да аднайменнага свята, якое адзначаецца 15 лістапада. У арганізацыі выставы прымалі ўдзел студэнты 2 курса спецыяльнасці “Славянская філалогія”.


 

Святочны канцэрт «Для мам і мілых дам!»

ГА "Саюз жанчын БДУ», Пярвічная арганізацыя БДУ РГА «Белая Русь» запрашаюць 5 сакавіка 2019 года на святочны канцэрт «Для мам і мілых дам!», прысвечаны Міжнароднаму жаночаму дню,  з удзелам Узорнага аркестра эстрадна-сімфанічнай музыкі пад кіраўніцтвам Валерыя Быкава, дзіцячага ансамбля танца «Ліхтарынка» БДУ, а таксама маладых таленавітых вакалістаў.

Канцэрт адбудзецца ў 17.00 у актавай зале філалагічнага факультэта БДУ (вул. К. Маркса, 31).

На філалагічным факультэце адбылося пасяджэнне жаночага клуба «Ефрасіння»

25 кастрычніка 2019 г. на філалагічным факультэце БДУ адбылося чарговае пасяджэнне жаночага клуба «Ефрасіння», прымеркаванае да 80-годдзя філалагічнага факультэта. Тэма пасяджэння – «Яблычная восень». Кіраўнік клуба, Мар’яна Рыгораўна Груздзіловіч, як заўсёды, здзівіла і парадавала крэатыўным падыходам. Віктарына, прысвечаная філфаку, цікавыя факты пра яблыні і яблыкі, песні, прызы, падарункі, яблычная пасціла, пірагі і яблычная гарбата – усё гэта зрабіла сустрэчу незабыўнай. Беларуская, англійская, руская і лацінская – на ўсіх мовах гучалі добрыя пажаданні філалагічнаму факультэту, на ўсіх мовах захапляліся цудоўнай яблычнай восенню…

Дыскусійна-аналітычны клуб «COGITO»

22 лютага на базе Беларускага дзяржаўнага ўніверсітэта культуры і мастацтваў адбылося пасяджэнне міжуніверсітэцкага дыскусійна-аналітычнага клуба «COGITO», якое арганізавалі Вучэбна-навуковая лабараторыя беларускага фальклору і Цэнтр захавання спадчыны вуснай традыцыі беларусаў. У мерапрыемстве прынялі ўдзел фалькларысты і этнолагі БДУ, БДУКМ, БДПУ імя Максіма Танка, НАН Беларусі. Тэмай сёлетняй сустрэчы стала небяспека дэфармацыі фальклорнай памяці.

З прывітальным словам да ўдзельнікаў клуба звярнуўся загадчык кафедры этналогіі і фальклору БДУКМ В. Калацэй. Ён жа і распачаў дыскусію, распавёўшы пра праблемы захавання народных традыцый. Пра грамадскую і навуковую адказнасць фалькларыстаў, шаблоннасць мыслення некаторых навукоўцаў гаварыла вядучы навуковы супрацоўнік Вучэбна-навуковай лабараторыі беларускага фальклору, к.ф.н. Р. Кавалёва. Працяглую дыскусію выклікала выказванне к. гіст. н. С. Грунтова аб праблеме дэфармацыі традыцый, якія трапляюць пад ахову, і празмернай тэатралізаванасці абрадаў, якія захоўваюцца такім чынам.

Ад філалагічнага факультэта ў мерапрыемстве прынялі ўдзел супрацоўнікі Вучэбна-навуковай лабараторыі беларускага фальклору, к.ф.н., дацэнт кафедры тэорыі літаратуры Т. Лук’янава, к.ф.н., дацэнт кафедры раманскага мовазнаўства Г. Квачак.

Падвядзенне вынікаў і ўзнагароджанне пераможцаў Конкурса на лепшы літаратурны твор, прысвечаны жанчыне

5 лістапада 2019 года на філалагічным факультэце БДУ адбылося падвядзенне вынікаў і ўзнагароджанне пераможцаў Конкурса на лепшы літаратурны твор, прысвечаны жанчыне. Конкурс быў прымеркаваны да 80-годдзя філалагічнага факультэта БДУ. Арганізатарамі мерапрыемства выступілі кафедра гісторыі беларускай літаратуры філалагічнага факультэта і ГА «Саюз жанчын БДУ». 

Дыпломам першай ступені ўзнагароджаны Паваляеў Сяргей Анатольевіч, к.ф.н., дацэнт кафедры філасофіі і метадалогіі навукі ФФСН, член Саюза пісьменнікаў Расіі, за цыкл вершаў, прысвечаных жанчынам. Журы конкурса адзначыла створаны аўтарам шматгранны лірічны вобраз жанчыны і высокае версіфікатарскае майстэрства паэта. Дыпломам другой ступені ўзнагароджана Бандаровіч Вераніка Уладзіміраўна, к.ф.н, дацэнт, член Беларускага саюза журналістаў, запрошаны выкладчык факультэта журналістыкі за распрацоўку тэмы любові (кахання) у прозе і вобраза лірычнай гераіні-жанчыны. Дыплом трэцяй ступені атрымаў Навагродскі Тадэвуш Антонавіч, д.г.н., прафесар, загадчык кафедры этналогіі, музеялогіі і гісторыі мастацтваў гістарычнага факультэта за стварэнне кранальнага, лірычнага вобраза маці і раскрыццё тэмы малой радзімы ў паэтычным творы.

Сярод студэнцкай творчасці журы конкурса адзінагалосна прызнала лепшым твор студэнткі 1 курса філалагічнага факультэта спецыяльнасці «Беларуская філалогія» Мурзіч Эльвіры Аляксандраўны. Яна была ўзнагароджана спецыяльным дыпломам за ўвасабленне ў паэтычным творы вобраза адной з самых выбітных беларускіх паэтак  ХХ стагоддзя - Яўгеніі Янішчыц, а таксама за патрыятычнае стаўленне да беларускай мовы і літаратуры. Самым арыгінальным быў названы твор студэнткі 2 курса філалагічнага факультэта спецыяльнасці «Беларуская філалогія» Басалыга Паліны Сяргееўны.  Яна ўзнагароджана спецыяльным дыпломам за лірыка-філасофскую замалёўку, пасланне ўсім сучасным жанчынам з яскравым, запамінальным наказам, а таксама за арыгінальную форму твора. Усе пераможцы конкурса атрымалі цудоўныя кніжныя выданні ў падарунак ад ГА «Саюз жанчын БДУ». Астатнія ўдзельнікі конкурса былі таксама ўзнагароджаны памятнымі дыпломамі і кнігамі.

Арганізатары выказваюць вялікую падзяку Прэс-службе і Цэнтру карпаратыўных камунікацый БДУ за інфармацыйную падтрымку конкурса на афіцыйным сайце ўніверсітэта і ў сацсетках.