Праграма "Погляд на Беларусь"

Выкладчык кафедры кітайскай філалогіі філалагічнага факультэта БДУ Чжан Хуншань стаў героем праграмы "Погляд на Беларусь" тэлеканала Беларусь 24 ад 2 мая 2018 года. У праграме таксама прымала ўдзел навуковы кіраўнік Чжана Хуншаня, доктар філалагічных навук, прафесар кафедры тэорыі літаратуры  Ірына Валер'еўна Казакова.

Выстава "Дамскія штучкі"

16 сакавіка 2018 года адбылося ўрачыстае адкрыццё выставы "Дамскія штучкі". На выставе было прадстаўлена больш за 100 экспанатаў: ўпрыгожванні, вееры, сумачкі і іншыя жаночыя аксэсуары з 12 стран. Былі прадстаўлены эксклюзіўныя аўтарскія працы беларускіх майстроў, у прыватнасці, працы прызнанага майстра-наватара ў тэхніцы фрывалітэ Юліі Мікалаеўны Цярэнцьевай. Мерапрыемства мела асветніцкі і адукацыйны характар. Наведвальнікі выставы даведаліся шмат новага і цікавага з аповеду старшыні Рады ГА "Саюз жанчын БДУ", доктара філалагічных навук, прафесара кафедры тэорыі літаратуры Ірыны Валер'еўны Казаковай пра гісторыю розных упрыгожванняў і аксэсуараў, іх семантыку і сімволіку, рытуальныя і абрадавыя функцыі, а таксама пра сучасныя тэндэнцыі. Выстава выклікала вялікую цікавасць у студэнтаў і супрацоўнікаў універсітэта.

Прэзентацыя кніжнай выставы Рымы Мадэстаўны Кавалёвай

23 красавіка ў медыятэцы аддзела абслугоўвання філалагічнага і эканамічнага факультэтаў ФБ БДУ адбылася прэзентацыя кніжнай выставы кандыдата філалагічных навук, дацэнта, вядучага навуковага супрацоўніка,  фалькларыста, Рымы Мадэстаўны Кавалёвай. На прэзентацыі прысутнічалі студэнты першага курса славянскага аддзялення філалагічнага факультэта, супрацоўнікі вучэбна-навуковай лабараторыі беларускага фальклору, калегі Рымы Мадэстаўны. На юбілейнай выставе былі прадстаўлены манаграфіі, вучэбныя дапаможнікі, выпускі фалькларыстычных даследаванняў, складальнікам і аўтарам якіх з'яўляецца Рыма Мадэстаўна,  а таксама публікацыі, якія ўвайшлі ў навуковыя зборнікі і матэрыялы канферэнцый.

Загадчык ААФЛФіЭФ ФБ БДУ Карповіч Жанна Сцяпанаўна адкрыла прэзентацыю.  Пра сувязі вучонага з бібліятэкай распавяла вядучы бібліятэкар Ірына Уладзіміраўна Васючэнка. Шмат добрых слоў пра сваю калегу было сказана кандыдатам філалагічных навук, дацэнтам кафедры тэорыі літаратуры Вольгай Віктараўнай Прыемка. Рыма Мадэстаўна падрабязна спынілася на выданні, што нядаўна выйшла ў выдавецтве БДУ «Интегративная фольклористика» (Минск, 2018) і кнізе «Курочка Ряба и другие : что-то вроде уроков воспитания» (Минск, 2013), якая выклікала цікавасць у многіх прысутных.

Фальклорна-этнаграфічнае мерапрыемства “Сцяжынкамі роднай зямлі”

 

15 сакавіка 2018 года на філалагічным факультэце БДУ адбылося фальклорна-этнаграфічнае мерапрыемства “Сцяжынкамі роднай зямлі”, правядзенне якога ў другім семестры навучальнага года стала ўжо традыцыйным. Яго арганізатарамі выступілі кафедра тэорыі літаратуры, якая забяспечвае выкладанне вучэбных дысцыплін “Фалькларыстыка” і “Славянская міфалогія” на першым курсе ў студэнтаў спецыяльнасцей “беларуская філалалогія” і “руская філалогія”, і вучэбна-навуковая лабараторыя беларускага фальклору, якая дапамагае ў падрыхтоўцы і правядзенні абавязковай фальклорнай практыкі для студэнтаў-першакурснікаў адзначаных спецыяльнасцей.

Пры падрыхтоўцы мерапрыемства арганізатары ставілі перад сабой тры асноўныя задачы: натхніць студэнтаў-першакурснікаў на творчае знаёмства са скарбамі беларускага фальклору, выклікаць цікавасць да нашай нацыянальнай фальклорнай спадчыны і ўвачавідкі адчуць усю прыгажосць гучання аўтэнтычных народных песень.

Арганізатары імпрэзы прысвяцілі яе Году малой радзімы, якім абвешчаны 2018 год у нашай краіне. Кіраўнік дзяржавы А. Р. Лукашэнка растлумачыў, што прыняцце такога важнага рашэння выклікалі разважанні аб важнасці малой радзімы ў лёсе кожнага чалавека. “Яна шматаблічная. Для адных гэта родны горад, вуліца ў горадзе або невялікі дворык, вёска, дзе прайшлі лепшыя дзіцячыя гады, для іншых – кавалачак дзікай прыроды, які радаваў вока і дарыў пачуццё напоўненасці і спакою”, – падкрэсліў Аляксандр Лукашэнка.

Мы ўпэўнены, што праведзенае мерапрыемства “Сцяжынкамі роднай зямлі” здольнае далучыць як да сваёй асабістай малой радзімы, так і праз фальклор – да розных куточкаў Беларусі, каб убачыць і ўсвядоміць багацце нашай традыцыйнай культуры.

Фалькларысты кафедры тэорыі літаратуры і вучэбна-навуковай лабараторыі беларускага фальклору філалагічнага факультэта знаходзяцца ў пастаянным пошуку новых форм правядзення гэтага мерапрыемства. Пастаяннай застаецца толькі яго назва – “Сцяжынкамі роднай зямлі”. Калі ў мінулыя гады студэнтаў перад праходжаннем фальклорнай практыкі знаёмілі з важнейшымі святамі і абрадамі каляндарнага і сямейнага цыклаў праз майстар-класы, відэалекторыі, сустрэчы з вядучымі фалькларыстамі краіны, то ў гэтым годзе арганізатары вырашылі сумясціць інфармацыйную і ілюстрацыйную часткі.

На мерапрыемстве прысутнічалі студэнты-першакурснікі спецыяльнасцей “беларуская філалогія” і “руская філалогія”, сярод якіх асобную групу склалі студэнты-замежнікі з Туркменіі і Кітая, выкладчыкі філалагічнага факультэта, а таксама запрошаныя госці, сярод якіх – былыя выпускніцы філалагічнага факультэта БДУ Рэгіна Гамзовіч (журналіст, грамадскі эксперт у галіне нематэрыяльнай культурнай спадчыны) і Любоў Сацура (настаўніца беларускай мовы і літаратуры, на пенсіі). На аб’яву аб мерапрыемстве, размешчаную на сайтах філалагічнага факультэта і БДУ, адгукнуліся СМІ: да нас завіталі журналісты з тэлеканала “Мінск ТВ” і з газеты БДУ “Універсітэт”. Рэпартаж аб мерапрыемстве з інтэрв’ю з Таццянай Іванаўнай Шамякінай і Таццянай Аляксандраўнай Пладуновай быў паказаны ў вячэрніх навінах “24 гадзіны” тэлеканала “СТВ” у 19.30 у гэты ж дзень, 15 сакавіка 2018 года.

З прывітальным словам да гасцей і ўдзельнікаў мерапрыемства звярнулася Таццяна Іванаўна Шамякіна, загадчык кафедры тэорыі літаратуры, доктар філалагічных навук, прафесар, якая нагадала аб важных напрамках работы, якая вядзецца на філалагічным факультэце і ва ўніверсітэце па выхаванні ў студэнтаў павагі і цікаўнасці да скарбаў беларускага фальклору, нацыянальнай традыцыйнай культуры ў цэлым.

Затым выступіла Ірына Юр’еўна Смірнова, малодшы навуковы супрацоўнік аддзела фалькларыстыкі і культуры славянскіх народаў Цэнтра даследавання беларускай культуры, мовы і літаратуры НАН Беларусі, якая прадставіла відэапрэзентацыю “Народны касцюм у тэрмінах”. Напачатку Ірына Юр’еўна зрабіла агляд усіх вядомых, тэрытарыяльна замацаваных нацыянальных строяў беларусаў, дэталёва засяродзіўшыся на неглюбскім строі. Расказваючы пра гэты від касцюма, дакладчык звярнула ўвагу не толькі на яго складнікі з адмысловымі назвамі, але і на віды і спосабы іх вырабу, што асабліва тычылася вышыўкі і элементаў упрыгожвання.

Пасля з мастацкай пастаноўкай “Вяселле на лельчыцкім Палессi” выступілі фальклорныя калектывы “Этнасуполка” і “Агнявец” з Беларускага дзяржаўнага ўніверсітэта культуры і мастацтваў. Напачатку мастацкі кіраўнік Таццяна Аляксандраўна Пладунова (старшы выкладчык кафедры этналогіі і фальклору БДУКМ) і канцэртмайстар Вячаслаў Андрэевіч Красулін (выкладчык кафедры этналогіі і фальклору БДУКМ) паведамілі пра гісторыю стварэння дадзенай праграмы і згадалі пра экспедыцыі, падчас якіх і былі запісаны вясельныя песні. А потым палілася песня – працяглая, спрадвечная, сапраўдная, наша родная беларуская песня. І пачалося свята, падчас якога ўсе прысутныя ўвачавідкі пазнаёміліся з асноўнымі складнікамі мясцовага беларускага вяселля, якія суправаджаліся песнямі і танцамі: пляценне вянка нявесты, злучэнне маладых, выкуп, пасад, віншаванні маладых падчас застолля, расплятанне касы, танцы.

Напрыканцы з заключным словам да прысутных звярнулася Рыма Мадэстаўна Кавалёва, вядучы навуковы супрацоўнік вучэбна-навуковай лабараторыі беларускага фальклору, кандыдат філалагічных навук, дацэнт, якая згадала пра свой асабісты вопыт збірання фальклорных твораў у якасці навуковага кіраўніка студэнцкіх фальклорных экспедыцый і дала наказ будучым практыкантам на плённую збіральніцкую работу.

Арганізатары фальклорна-этнаграфічнага мерапрыемства “Сцяжынкамі роднай зямлі” ўпэўнены, што ўбачанае і пачутае пакінула незабыўнае ўражанне ў душах і сэрцах усіх, каму пашчасціла стаць сведкам такога сапраўднага свята. Праз яго зроблены першы (або чарговы) крок да спасціжэння багаццяў нашай традыцыйнай культуры.

Больш фотаздымкаў тут

Пасяджэнне італьянскага кінаклуба

Кафедра раманскага мовазнаўства запрашае ўсіх аматараў італьянскага кіно на чарговае пасяджэнне італьянскага кінаклуба, якое адбудзецца 25.04.2018  ў 19.00, аўд.304.

Глядзім і абмяркоўваем фільм аднаго з самых вядомых сучасных  італьянскіх кінарэжысёраў Паала ВIРДЗI "Усё жыццё наперадзе", 2008. (Paolo Virzì, Tutta la vita davanti, 2008). Фільм дэманструецца на італьянскай мове без субтытраў. Працягласць: 1 ч 55 мін.

Уваход вольны.

Дзякуем за арганізацыю мерапрыемства дацэнта кафедры раманскага мовазнаўства Сяргея Васільевіча Логіша, загадчыцу аддзела культуры і друку амбасады Італіі ў Рэспубліцы Беларусь спадарыню Крысьціну Ск'явон, італьянскіх лектараў Вінчэнца Сантора і Гафрэда Муратжа

І ФІЛФАКАННСКІ ФЕСТЫВАЛЬ КАРОТКАМЕТРАЖНАГА КІНО “КІТАЙ У БЕЛАРУСІ”

15 сакавіка 2018 года Рэспубліканскі інстытут кітаязнаўства імя Канфуцыя і кафедра кітайскай філалогіі філалагічнага факультэта Беларускага дзяржаўнага ўніверсітэта падвялі вынікі І Філфаканнскага фестывалю кароткаметражнага кіно “Кітай у Беларусі”, мэтай якога з’яўлялася дэманстрацыя таго, дзе і як прадстаўлена кітайская культура ў Беларусі. У гэты дзень на філалагічным факультэце адбыўся адкрыты прагляд ролікаў і ўзнагароджванне пераможцаў дадзенага мерапрыемства. Для прагляду былі адабраны шэсць работ, прадстаўленых камандамі філалагічнага факультэта БДУ (спецыяльнасць “Кітайская філалогія”), навучэнцамі Інстытута Канфуцыя УА “Гомельскі дзяржаўны ўніверсітэт імя Ф.Скарыны”, студэнтамі з Кітая, а таксамі школьнікамі г.Ваўкавыска і г.Оршы. У склад журы былі запрошаны спецыялісты ў галіне кіно і рэжысуры, знаўцы і аматары кітайскай культуры.

Гран-пры атрымаў ролік “У пошуках кітайскай кухні”, які быў падрыхтаваны студэнтамі другога курса спецыяльнасці “Кітайская філалогія” філалагічнага факультэта БДУ пад кіраўніцтвам Верхаводка Мар’яны. За лепшую аператарскую работу прыз атрымаў студэнт з Кітая Чжао Вэньці (ролік “Кітайскі чай у Мінску”). Акрамя таго, былі адзначаны работы ў намінацыях “За папулярызацыю традыцый кітайскай культуры”, “За волю да перамогі”, а таксама “Прыз глядацкіх сімпатый”. Ролікі пераможцаў будут размешчаны на сайце Рэспубліканскага інстытута кітаязнаўства імя Канфуцыя БДУ.

​Арганізатары фестывалю прынялі рашэнне працягнуць правядзенне конкурса кароткаметражнага кіно “Кітай у Беларусі”.

АЎСТРЫЙСКА-БЕЛАРУСКІ МУЗЫЧНЫ ВЕЧАР

25 красавіка ў медыятэцы аддзела абслугоўвання філалагічнага і эканамічнага факультэтаў з вялікім поспехам прайшоў аўстрыйска-беларускі музычны вечар.

Арганізатарамі мерапрыемства выступілі кафедра нямецкага мовазнаўства і Фундаментальная бібліятэка БДУ. Работнікі бібліятэкі падрыхтавалі выставу «Беларусь-Аўстрыя: новыя грані супрацоўніцтва».

Вядучыя канцэрта – старшыя выкладчыкі Д.М. Каралеў і С.Э. Бабок – аб'яўлялі нумары адначасова на нямецкай і беларускай мовах. Сярод выступоўцаў былі студэнты і выкладчыкі філалагічнага факультэта і факультэта міжнародных адносін: М. Груздзіловіч, В. Янковіч, Я. Тарэлка,  В. Касьянаў, А. Багдановіч, Д. Сенькевіч, В. Грак, У. Тычыніна, М. Палюховіч і іншыя.

Са сваімі кампазіцыямі перад публікай выступілі вядомыя мінскія барды: С. Антонаў, В. Мязецкі, І. Вінцкевіч.

Асаблівую цікавасць выклікала выступленне групы студэнтаў філалагічнага факультэта ў складзе: А. Веракшы, Х. Баеравай, Э. Танаян, К.Сітнікавай.

Гучалі песні на вершы Я. Купалы, Р. Барадуліна, П. Панчанкі, беларускія і аўстрыйскія народныя песні, балады. Студэнтам спадабаліся песні ў стылі рамантычнага рока і «Austropop».

Вечар завяршыла музычная група «DACH». Бурнымі апладысментамі прысутныя, сярод якіх быў  і прадстаўнік Аўстрыі,  падзякавалі ўсіх тых, хто выступаў на канцэрце.

Калядныя сустрэчы на філфаку “Традыцыі святкавання Новага года ў розных краінах свету”

20 снежня на філалагічным факультэце ў кабінеце-музеі беларускай народнай культуры адбылося святочнае мерапрыемства "Калядныя сустрэчы на філфаку», арганізаванае ГА "Саюз жанчын БДУ», ​​у рамках работы клуба «Ефрасіння», і першаснай арганізацыяй БДУ РГА «Белая Русь».
Удзельнікі сустрэчы пазнаёміліся з традыцыямі святкавання Новага года ў розных краінах. Аб беларускіх традыцыях распавяла доктар філалагічных навук, прафесар кафедры тэорыі літаратуры Ірына Валер'еўна Казакова. Фальклорна-этнаграфічны студэнцкі калектыў

 «Багач», якім вось ужо больш за 10 гадоў кіруе Ірына Валер'еўна, прадставіў беларускі традыцыйны абрад "Каляды".
Аб традыцыях святкавання Новага года ў Кітаі распавёў выкладчык кафедры кітайскай філалогіі Чжан Хуншань. З англійскімі традыцыямі гасцей свята пазнаёміла старшы выкладчык кафедры англійскага мовазнаўства Мар'яна Рыгораўна Груздзіловіч. А пра чэшскія традыцыі расп

авяла старшы выкладчык кафедры гісторыі беларускай літаратуры Таццяна Віктараўна Бельская.

 

Выстава "Захоўваюць нас ад бяды анёлы..."

Ужо стала добрай традыцыяй праводзіць у БДУ выставы, прымеркаваныя да Вялікіх хрысціянскіх свят. У гэтым годзе галоўнай фігурай экспазіцыі стала фігура анёла. Цэнтральная частка экспазіцыі - анёлы з кнігамі або чытаючыя анёлы. Ёсць на выставе анёлы-музыкі, анёлы кахання, дзеці-гарэзы, а таксама калядныя і велікодныя анёлы. Вельмі прыгожая і кранальная экспазіцыя - анёлы, якія моляцца. Усяго на выставе прадстаўлена больш за 50 фігурак анёлаў з 12 краін.

У гасцях у філолагаў – Серж Мінскевіч

Серж Мінскевіч, крэатыўны паэт і перакладчык, кандыдат навук, дактарант і супрацоўнік Нацыянальнай акадэміі навук Беларусі, 6 снежня завітаў да будучых спецыялістаў па рускай філалогіі з 4 курса філалагічнага факультэта БДУ – у тыя сцены, з якіх калісьці выйшаў выпускніком. Вядома, што любы прадмет лепш вывучаецца з ілюстрацыямі, і Серж артыстычна праілюстраваў сваёй асобай і вершамі вірлівую гісторыю беларускай літаратуры 1990-х – 2010-х гг. Аўтар кнігі “Я з Бум-Бам-Літа” (2008), Серж прыгадаў першыя крокі і працяг гэтага літаратурнага руху. Паэт расшыфраваў паняткі “Бум” і “Бам”, праспяваў пад сваю бардаўскую гітару зухаватыя песенькі і гімн знакамітай суполкі беларускіх авангардыстаў, прачытаў з кніжкі “Менскія / Мінскія санеты” (2002) вершы з адсылкай да Адама Міцкевіча, расказаў пра лёсы “слупоў” Бум-Бам-Літа. На імпрэзе студэнты пазнаёмілся таксама з кнігамі Сержа Мінскевіча “Праз ГалеРею. Транслёгічныя творы” (1994), “Сад замкнёных гор” (з калекцыі беларускай фантастыкі), з яскрава ілюстраванымі і вельмі дасціпнымі кніжкамі для дзяцей: казкамі “Чароўная крыніца, ці як навучыць дракона чысціць зубы”, “Вялікія прыгоды Какоса Маракоса”. Чыталіся вершы  і Алеся Туровіча, таксама былога філфакаўца і “транслагіста”, з Туровічавай кнігі “Корпус. Вершы, проза” (1998). Прагучалі і цакам сур’ёзныя санеты Сержа. Сустрэча была арганізавана супрацоўнікамі кафедры гісторыі беларускай літаратуры; яна была прысвечана 500-годдзю  беларускага кнігадрукавання. Лейтматывам імпрэзы быў заклік да творчасці: з часам усё мінае, але шчырая творчасць застаецца!

Візіт Рэктара Вышэйшай школы падрыхтоўкі кадраў Дзяржавы і Урады Рэспублікі Куба ў кабінет-музей беларускай культуры

21 сакавіка, у межах візіту ў Беларускі дзяржаўны ўніверсітэт, кабінет-музей беларускай культуры на філалагічным факультэце наведала Рэктар Вышэйшай школы падрыхтоўкі кадраў Дзяржавы і Урады Рэспублікі Куба прафесар Мэрсэдэс Дэльгада Фернандэс.

Пра традыцыі беларускай культуры высокай госці распавяла старшыня Рады ГА "Саюз жанчын БДУ, доктар філалагічных навук, прафесар кафедры тэорыі літаратуры філалагічнага факультэта Ірына Валер'еўна Казакова. Кубінскую госцю сустракалі, па традыцыі, хлебам-соллю і беларускімі народнымі песнямі ўдзельнікі фальклорна-этнаграфічнага студэнцкага калектыву "Багач" (мастацкі кіраўнік - І.В. Казакова). На памяць спадарыня Мэрсэдэс Дэльгада Фернандэс павязе з сабою саламяную "папараць-кветку" (выраб сучасных беларускіх майстроў), падараваную ёй ГА "Саюз жанчын БДУ".