II Рэспубліканская навукова-практычная канферэнцыя «Pаманiя: моўная і культурная спадчына-2021»

6 мая 2021 года на філалагічным факультэце ў завочным фармаце плануецца правядзенне II Рэспубліканскай навукова-практычнай канферэнцыі «Раманiя: моўная і культурная спадчына-2021». Канферэнцыю арганізуе кафедра раманскага мовазнаўства. Заяўкі на ўдзел у канферэнцыі і матэрыялы для размяшчэння ў электронным зборніку канферэнцыі прымаюцца да 20 красавіка 2021 года на e-mail: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.. З інфармацыйным лістом можна азнаёміцца тут.

ВІРТУАЛЬНАЯ ЛЕКЦЫЯ «ЭМІГРАНТКА, ПІСЬМЕННІЦА, ДАМА: ЖЫЦЦЁ І ТВОРЧАСЦЬ НАДЗЕІ ГАРАДЗЕЦКАЙ»

19 сакавіка 2021 г. у межах Школы юных філолагаў для яе ўдзельнікаў, а таксама для студэнтаў і магістрантаў філалагічнага факультэта Беларускага дзяржаўнага ўніверсітэта на платформе Zoom была праведзена віртуальная лекцыя з прэзентацыяй «Эмігрантка, пісьменніца, дама: жыццё і творчасць Надзеі Гарадзецкай».

Арганізавалі мерапрыемства загадчыца кафедры рускай літаратуры дацэнт Людміла Леанідаўна Аўдзейчык і дацэнт Людміла Віктараўна Камлюк-Ярашэнка. Падрыхтавала і прачытала лекцыю-прэзентацыю дацэнт Таццяна Пятроўна Сідарава.

Занятак атрымаўся атмасферным і пазнавальным. Таццяна Пятроўна распавяла слухачам пра вяртанне ў рускую культуру і літаратуразнаўства імя забытай пісьменніцы Рускага замежжа, літаратурнага крытыка, журналіста, багаслова Надзеі Данілаўны Гарадзецкай (1901–1985).

65 гадоў свайго жыцця пісьменніца правяла ў эміграцыі. Лектар расказала пра жыццёвыя перыпетыі Надзеі Гарадзецкай, якая, страціўшы родных у натоўпе бежанцаў з Крыма пасля эвакуацыі ў 1920 годзе, апынулася ў адзіноце. Югаславія, Македонія, Францыя, Велікабрытанія – маршруты гераіні. Сіла духу, моцная вера, падтрымка настаўнікаў і сяброў, сярод якіх – М. Бярдзяеў, архімандрыт Леў (Жылле), Б. Зайцаў, А. Купрын, дазволілі ёй прайсці шлях ад пасудамыйкі і пачаткоўкі-белетрысткі ў Парыжы да багаслова Оксфардскага ўніверсітэта (Н. Д. Гарадзецкая – першая жанчына-багаслоў Оксфарда) і прафесара Ліверпульскага ўніверсітэта, загадчыцы кафедры славістыкі, літаратурнага крытыка, пісьменніка.

Слухачы пазнаёміліся з мастацкай спадчынай Гарадзецкай: тры раманы, сотні апавяданняў і нарысаў; а таксама з яе рэлігійна-літаратурнымі працамі: «The humiliated Christin modern Russian thought» («Зняважаны Хрыстос у сучаснай рускай думцы» (Лондан, 1938 г.) і «Saint Tikhon Zadonsky, Inspirerof Dostoevsky» («Свяціцель Ціхан Задонскі, натхняльнік Дастаеўскага» (Лондан, 1951 г.), якія мелі істотнае значэнне ў справе місіі Праваслаўя на Захадзе.

Пачынаючыя філолагі з цікавасцю даведаліся пра тое, як дацэнт Т. П. Сідарава адкрыла для сябе імя Надзеі Гарадзецкай, ажыццявіўшы пераклад з англійскай мовы яе манаграфіі «The humiliated Christin modern Russian thought».

Сярод слухачоў былі замежныя магістранты, якія таксама пакінулі станоўчыя водгукі на лекцыю. Падобныя заняткі не толькі пашыраюць далягляд навучэнцаў, падтрымліваюць цікавасць да рускай літаратуры, але і, безумоўна, стымулююць іх навукова-даследчую дзейнасць.

Усе ахвотныя пазнаёміцца з жыццём і творчасцю Надзеі Данілаўны Гарадзецкай могуць зрабіць гэта, калі пяройдуць па спасылцы https://us02web.zoom.us/rec/play/FJT6TZ5G4843v_KdGUI9GP-mta3jY7Jo-S-FLEcLJRUJ9aVhnyBf8wVoBlHkf6kw_7h4YPDYdcFLMROE.93WiEEkP4W33XlKk

gorodetskaya2

Прафарыентацыі – прыярытэт

Кафедра гісторыі беларускай літаратуры мэтанакіравана і пастаянна праводзіць прафарыентацыйную дзейнасць. Выкладчыкі выкарыстоўваюць розныя формы прафарыентацыі – як традыцыйныя, так і ў анлайн-фармаце.

Асаблівая ўвага надаецца працы з адоранымі і таленавітымі навучэнцамі, узаемадзеянню, дыялогу, супрацоўніцтву з пераможцамі алімпіяд і творчых конкурсаў, з іх настаўнікамі. Загадчык кафедры гісторыі беларускай літаратуры прафесар Алесь Іванавіч Бельскі сёлета браў удзел у Рэспубліканскім конкурсе работ даследчага характару (канферэнцыі) навучэнцаў устаноў агульнай сярэдняй адукацыі па вучэбным предмеце «Беларуская літаратура», быў старшынёй журы. Заключны этап праходзіў 24 лютага ў Нацыянальным інстытуце адукацыі дыстанцыйна. А. І. Бельскі ва ўступным слове і ў час падсумавання вынікаў конкурсу сардэчна і цёпла вітаў удзельнікаў, запрашаў іх паступаць у Беларускі дзяржаўны ўніверсітэт на спецыяльнасці філалагічнага профілю, гаварыў пра тое, што ва ўніверсітэце створаны ўсе ўмовы для рэалізацыі творчага патэнцыялу асобы. 23 пераможцам рэспубліканскага конкурсу накіраваны віншавальныя лісты за подпісам дэкана філалагічнага факультэта БДУ.

Актыўна працуе з адоранымі і высокаматываванымі навучэнцамі дацэнт Ларыса Анатольеўна Гедзімін. У студзені 2021 г. яна працавала ў складзе журы на ІІ (гарадскім) этапе Рэспубліканскай алімпіяды па прадметах «Беларуская мова» і «Беларуская літаратура», дзе мела прафарыентацыйныя гутаркі з патэнцыяльнымі абітурыентамі, настаўнікамі гімназій і школ г. Мінска, адказвала на іх пытанні, заахвочвала старшакласнікаў да паступлення на філалагічны факультэт БДУ. У сакавіку дацэнт Л. А. Гедзімін рыхтавала каманду г. Мінска да ІІІ этапу (заключнага) Рэспубліканскай алімпіяды па прадметах «Беларуская мова» і «Беларуская літаратура». Апрача гэтага, яна падтрымлівае пастаянныя кантакты з сярэднімі школамі № 28 і № 93 г. Мінска, гімназіяй № 15 г. Мінска, у якой летась выступала на першым уроку 1 верасня ў ХІ класе. Сёлета яна ладзіла індывідуальныя кансультацыі для адораных і здольных навучэнцаў, матывавала іх да выбару прафесіі. Ларыса Анатольеўна – пастаянны ўдзельнік Мінскага гарадскога фестывалю «Мой Мінск – мая сталіца – творчасці і таленту крыніца!», уваходзіць у журы конкурсу чытальнікаў твораў беларускай літаратуры «Мастацкае слова».

Дацэнт Ірына Эрнстаўна Багдановіч 24 сакавіка брала ўдзел ва ўрачыстым падвядзенні вынікаў Рэспубліканскага анлайн-конкурсу чытальнікаў «О, Беларусь, мая шыпшына», прысвечанага 120-годдзю з дня нараджэння Уладзіміра Дубоўкі. Конкурс праходзіў з 1 кастрычніка па 15 лістапада 2020 г. У ім прынялі ўдзел 880 чалавек з усёй Беларусі, а таксама з-за мяжы. Удзельнікі, а гэта пераважна былі вучні сярэдніх і старшых класаў, дасылалі відэаролік чытання выбранага імі верша У. Дубоўкі. Дацэнт кафедры і паэтка І. Э. Багдановіч уваходзіла ў склад журы. Цырымонія падвядзення вынікаў адбылася ў Нацыянальнай бібліятэцы Беларусі. У ёй узялі ўдзел блізу 80 чалавек – пераможцы ў розных намінацыях. Старшакласнікі прыехалі на ўрачыстасць з розных рэгіёнаў разам са сваімі настаўнікамі. У ходзе свайго выступлення Ірына Эрнстаўна зрабіла акцэнт на прафарыентацыю, запрасіўшы пераможцаў конкурсу, у першую чаргу сёлетніх выпускнікоў, на філалагічны факультэт, дзе ў іх будуць усе ўмовы для плённага паглыбленага вывучэння творчасці У. Дубоўкі і ўсёй беларускай літаратуры, дзе яны змогуць развіваць свае творчыя здольнасці і стаць прафесійнымі філолагамі. Гэта выклікала жывую цікавасць і рэзананс: некаторыя з выступоўцаў потым таксама апелявалі да запрашэння дацэнта І. Багдановіч і раілі старшакласнікам ім скарыстацца.

Кафедра ў бліжэйшы час плануе правесці прафарыентацыю ва ўстановах адукацыі не толькі Мінска, але і за межамі сталіцы. Прафесар А. І. Бельскі штогод прыязджае на родную Капыльшчыну, дзе ў сваёй прафарыентацыйнай дзейнасці абапіраецца на дапамогу настаўніцы беларускай мовы і літаратуры гімназіі № 1 імя Героя Савецкага Саюза М. В. Рамашкі, выпускніцы філфака БДУ Людмілы Уладзіміраўны Лазоўскай, дырэктара Літаратурнага музея Кузьмы Чорнага Людмілы Іосіфаўны Ніжэвіч (у гэтым музеі для наведвальнікаў аформлены куток з інфармацыйных буклетаў пра філфак БДУ, газеты «Універсітэт» і інш.). Дацэнт Л. А. Гедзімін традыцыйна выступае ў Барунскай сярэдняй школе Ашмянскага раёна (дарэчы, на 2 курсе спецыяльнасці «Беларуская філалогія» ўжо вучацца тры выпускніцы гэтай установы), дацэнт І. І. Шматкова плануе сустрэчу з выпускнікамі Сваткаўскай сярэдняй школы Мядзельскага раёна і інш.

Бельскі4

Бельскі1

НАНБ

Гедзімін1

Гедзімін

005.

040.

 

Цыкл анлайн-лекцый па беларускай культуры для выкладчыкаў і студэнтаў Пекінскага ўніверсітэта мовы і культуры

У межах міжнароднага навукова-культурнага супрацоўніцтва прафесар кафедры гісторыі беларускай літаратуры філалагічнага факультэта БДУ доктар філалагічных навук Казакова Ірына Валер’еўна праводзіць цыкл анлайн-лекцый па беларускай культуры для выкладчыкаў і студэнтаў Пекінскага ўніверсітэта мовы і культуры факультэта рускай мовы. 25 сакавіка 2021 года ў 14.00 прайшла першая лекцыя, прысвечаная беларускай сямейнай абраднасці, – «Традыцыйная вясельная абраднасць беларусаў і суправаджаючая яе паэзія». З боку кітайскіх навукоўцаў у праекце ўдзельнічае дэкан факультэта рускай мовы Пекінскага ўніверсітэта мовы і культуры кандыдат філалагічных навук, прафесар Гуань Юйхун.

 

Сустрэча-дыялог з аўтарам новай кнігі пра У. Караткевіча

У рамках вучэбных заняткаў 30 сакавіка адбылася сустрэча-дыялог з аўтарам кнігі «Блізкае і дарагое: выбраныя артыкулы пра Уладзіміра Караткевіча» кандыдатам філалагічных навук, дацэнтам Анатолем Леанідавічам Вераб’ём. Кніга пабачыла свет у выдавецтве «Беларуская навука» (2020), навуковы рэдактар – акадэмік НАН Беларусі У.В. Гніламёдаў.

Загадчык кафедры гісторыі беларускай літаратуры прафесар Алесь Іванавіч Бельскі распачаў заняткі ў нетрадыцыйнай форме. Ён адзначыў, што педагагічная эўрыстыка актуалізуе дыялог як галоўную, вызначальную форму камунікацыі, выступіў у ролі мадэратара, коратка спыніўся на творчых дасягненнях госця-выступоўцы, вядомага даследчыка творчасці Уладзіміра Караткевіча (1930–1984).

Апошнія трыццаць гадоў навуковай і педагагічнай дзейнасці А.Л. Вераб’я звязаны з філалагічным факультэтам БДУ. Кніга «Блізкае і дарагое: выбраныя артыкулы пра Уладзіміра Караткевіча» атрымалася канцэптуальнай, змястоўнай, яна ўключае чатыры раздзелы: «Праблемы жыцця і творчасці», «Беларускі літаратурны кантэкст», «Сусветны літаратурны кантэкст», «Рэгіянальны кантэкст». Анатоль Леанідавіч ахарактарызаваў асобу і шматгранную дзейнасць У. Караткевіча, вылучыў найбольш значныя творы ў яго спадчыне, распавёў пра «свайго» Караткевіча. А потым у студэнтаў была магчымасць задаць вядомаму і кампетэнтнаму караткевічазнаўцу пытанні: «Ці этычна друкаваць лісты пісьменніка?», «Якія новыя творы Караткевіча адшуканы?» і інш.

У межах літаратурнай сустрэчы адбылася прэзентацыя 19-га тома Збору твораў Уладзіміра Караткевіча. Дадзенае выданне складаецца з лістоў пісьменніка (Мінск : Мастацкая літаратура, 2020; Частка 1; падрыхтоўка тэкстаў, каментарыі А. Вераб’я, Г. Кажамякіна; рэд. тома А. Бельскі). Падрыхтоўка навукова-каментаванага выдання Збору твораў У. Караткевіча ў 25 т. здзяйсняецца на базе філалагічнага факультэта БДУ. Каардынатар праекта – А. Л. Верабей. Цяпер рыхтуецца 20-ы том, у які ўвойдзе другая частка эпісталярыю У. Караткевіча.

ScanImage1  ScanImage2

IMG 5380

IMG 5630

IMG 5644

 

Творчае аб’яднанне «Педагагічная майстэрня» запрашае на навучанне

Творчае аб’яднанне «Педагагічная майстэрня» кафедры раманскага мовазнаўства ў супрацоўніцтве з асацыяцыяй выкладчыкаў замежных моў ва Усходняй Еўропе (ANILSEST) аб’яўляе набор на бясплатнае двухмесячнае навучанне па сучасных тэхналогіях выкладання італьянскай мовы на базе філалагічнага факультэта.

Экспертамі гэтага курса выступяць Алеся Аляксандраўна Панцялеенка, загадчыца кафедры раманскага мовазнаўства, П’ер Паола Беттоні, старшыня ANILSEST, і Крысціна Ск’явон, міністэрскі лектар, загадчыца аддзела Культуры і Друку Пасольства Італіі ў Мінску. У структуру курса ўваходзяць тэарэтычныя заняткі і практыка выкладання са школьнікамі. Удзельнікі праекта атрымаюць магчымасць будаваць аргументацыю сваіх педагагічных рашэнняў разам з экспертамі праекта. Выкладанне на рускай і італьянскай мовах у вочным і дыстанцыйным фарматах. Набор кандыдатаў адбываецца на конкурснай аснове. Удзельнікам праекта будзе выдадзены адпаведны сертыфікат.

Запісацца для ўдзелу ў праекце неабходна да 25.03.2021 тут

ЭПОХА РОЎДЫ

1 красавіка 2021 года адбылося пашыранае пасяджэнне савета філалагічнага факультэта з удзелам рэктара БДУ Андрэя Караля, першага прарэктара Дзмітрыя Мядзведзева, прарэктара па вучэбнай рабоце і адукацыйных інавацыях Аксаны Здрок, на якім калектыву быў прадстаўлены новы дэкан філалагічнага факультэта – кандыдат філалагічных навук дацэнт Сяргей Аляксандравіч Важнік.

Андрэй Кароль падзякаваў прафесару Івану Роўду за шматгадовую працу, скіраваную на рэалізацыю задач па развіцці БДУ, захаванне лепшых навуковых традыцый і падрыхтоўку некалькіх пакаленняў высокакваліфікаваных спецыялістаў, і ў пацвярджэнне сваіх слоў уручыў Івану Сямёнавічу падзячны ліст  і каштоўны падарунак. Рэктар адзначыў, што пасля прыходу ў 2002 годзе  на пасаду дэкана менавіта Іван Роўда вывеў падраздзяленне на першую пазіцыю сярод факультэтаў дадзенага профілю ў нашай краіне.

Прафесар Іван Роўда ў адказ выказаў шчырую ўдзячнасць свайму калектыву, падзякаваў калегам за сумесную шматгадовую і прадуктыўную працу, пажадаў ім здароўя, адзінства, паразумення, а ўсяму факультэту – далейшага развіцця.

Намеснікі дэкана Вольга Крычко і Мікалай Хмяльніцкі ад імя выкладчыкаў, супрацоўнікаў і студэнтаў філалагічнага факультэта  падзякавалі Івану Сямёнавічу, адзначылі шматграннасць і шчодрасць яго асобы, выказалі надзею на далейшае супрацоўніцтва і сутворчасць.

У зваротах да Івана Роўды неаднаразова ўзгадвалася слова «эпоха». Тлумачальныя слоўнікі вызначаюць яго як “працяглы перыяд з якімі-небудзь асаблівасцямі, а таксама як важны, значны перыяд жыцця”.

Эпохай Роўды мы па праву называем перыяд з 2002 па 2021 гады, калі прафесар, доктар філалагічных навук Іван Сямёнавіч Роўда ўзначальваў філалагічны факультэт. Што такое Эпоха Роўды для філалагічнага факультэта і для ўніверсітэта ў цэлым? Гэта умацаванне і інтэнсіўнае развіццё буйнога цэнтра фундаментальнай філалагічнай адукацыі ў краіне, адкрыццё новых напрамкаў і спецыяльнасцей, разнастайнае заахвочванне навуковай работы студэнтаў і выкладчыкаў, зацікаўлены водгук на новае і ўдумлівае яго ўкараненне, плённае супрацоўніцтва з амбасадамі розных краін, студэнцкі абмен, адкрыццё новых кабінетаў і класаў, ажыццяўленне мноства рэспубліканскіх і міжнародных праектаў. І гэта яшчэ далёка не ўсё.

Што такое Эпоха Роўды для людзей, звязаных з філалагічным факультэтам хаця б на працягу некалькіх гадоў, – студэнтаў, выкладчыкаў, супрацоўнікаў, запрошаных гасцей навуковых канферэнцый і бацькоў юных філолагаў? Гэта асабісты чалавечы ўдзел, глыбокае перажыванне за іншага, гатоўнасць дапамагчы ў цяжкай сітуацыі, талент знайсці дакладны адказ на самае складанае пытанне, з якім звяртаюцца.

Іван Сямёнавіч Роўда нарадзіўся 13 чэрвеня 1953 года ў горадзе Мядзелі Мінскай вобласці. Пасля заканчэння школы ў 1970 годзе паступіў на філалагічны факультэт Беларускага дзяржаўнага ўніверсітэта імя У. І. Леніна – і з гэтага часу ўсё жыццё І. С. Роўды звязана з факультэтам і ўніверсітэтам. У 1975 г. Іван Сямёнавіч атрымаў дыплом філолага (спецыяльнасць «Беларуская і руская мова і літаратура»), а ўжо ў 1980 г. абараніў кандыдацкую дысертацыю «Міжмоўная аманімія ва ўмовах руска-беларускага і беларуска-рускага білінгвізму», падрыхтаваную пад кіраўніцтвам прафесара П. П. Шубы. Працаваў на кафедры рускай мовы, выкладаў у беларускіх і замежных студэнтаў. У 1996 годзе абараніў доктарскую дысертацыю «Лексічныя лакуны і сродкі іх кампенсацыі (супастаўляльнае сістэмна-функцыянальнае даследаванне беларускай і рускай моў)». У хуткім часе  пасля абароны І. С. Роўда прыступіў да працы на пасадзе намесніка дэкана філалагічнага факультэта па навуковай рабоце і міжнародных сувязях. У 1997 годзе абраны на пасаду прафесара кафедры рускай мовы, а з 1999 г. стаў  загадчыкам кафедры рускай мовы.

29 лістапада 2002 года – дакладная дата пачатку апісанай намі эпохі. У гэты дзень прафесар Іван Сямёнавіч Роўда ўрачыста заняў пасаду дэкана філалагічнага факультэта.

Праца Івана Сямёнавіча дэканам – гэта каласальная праца чалавека, які ўсю сваю інтэлектуальную, душэўную, фізічную энергію аддае сваёй справе – развіццю факультэта і ўніверсітэта. Развіццю, абнаўленню, адпаведнасці тым сацыяльным задачам, якія стаяць перад намі сёння і якія ў сучасным свеце хутка змяняюцца. Пры жывым інтарэсе да новага Іван Сямёнавіч клапатліва захаваў тое няўлоўнае і бясцэннае, што называецца па-рознаму: «асобая атмасфера», «асобы дух факультэта» – і што дапамагае ўсім нам адчуваць адзінства і ўсведамляць пазачасавую, якая не залежыць ні ад якіх абставін, значнасць нашай агульнай працы. Працы, сутнасцю якой з’яўляецца трансляцыя культуры, увасобленай ў жывым слове, ад чалавека да чалавека.

Іван Сямёнавіч – гэта прыклад кіраўніка, які разумее, якім складана ўладкаваным, тонкім арганізмам з’яўляецца калектыў навуковых супрацоўнікаў, выкладчыкаў, студэнтаў – асабліва філолагаў, людзей гуманітарнага складу.

Філалагічны факультэт выказвае  глыбокую і шчырую ўдзячнасць прафесару Івану Сямёнавічу Роўду, зычыць яму здароўя, сілы, натхнення і задавальнення ад далейшай працы ў Alma Mater.

PBK 6455

PBK 6478

PBK 6483

PBK 6495

PBK 6505

ПУЦЯВОДНАЕ СЛОВА, або Ў ЛАБІРЫНТАХ РОДНАЙ МОВЫ

Тыдзень роднай мовы на філалагічным факультэце працягваецца.

23 лютага студэнты 1 курса спецыяльнасці “Славянская філалогія” пад кіраўніцтвам дацэнта А.Л. Садоўскай зладзілі турнір-віктарыну “Пуцяводнае слова”. У ходзе гэтага інтэлектуальнага спаборніцтва студэнты выявілі сваю падрыхтаванасць у пяці намінацыях: “Фанетыка”, “Лексікалогія”, “Фразеалогія”, “Прыказкі і прымаўкі” і “Гісторыя беларускай мовы”. Да таго ж віктарына патрабавала ад удзельнікаў здольнасці да імправізацыі і хуткіх адказаў, шырокага кругагляду і эрудыцыі.

Падарожжа па лабірынтах роднай мовы паказала, наколькі багатая і разнастайная моўная культура беларускага народа. Яна ўвасоблена ў адметных беларускіх гуках, самабытных словах і словазлучэннях, трапных фразеалагізмах, мудрых прымаўках і прыказках!

Гэтыя моўныя скарбы раскрываюць нам гісторыю народа, сведчаць пра яго сацыяльны інтэлект, далучаюць нас да маральных і эстэтычных каштоўнасцей, створаных нашым народам за стагоддзі, дапамагаюць зразумець яго філасофію, мастацкія вобразы, авалодаць сакрэтамі яго моватворчай дзейнасці.

У выніку каманда “Радзівіліяда” перамагла “Эстэтаў”, аднак ніхто не застаўся пакрыўджаным: усе ўдзельнікі і прысутныя атрымалі задавальненне ад спаборніцтва эрудытаў і заахвочвальныя прызы - салодкія падарункі ад кафедры беларускага мовазнаўства.

Па завяршэнні мерапрыемства ўдзельнікі з радасцю падзяліліся ўражаннямі. “Мне вельмі спадабалася! Пытанні і заданні былі для нас цікавымі і займальнымі. Некаторыя з іх былі зусім няцяжкімі, але і ацэньваліся мінімальным балам, а над некаторымі давялося ламаць галаву, але ж і адказы ўзнагароджваліся найвышэйшым балам! – расказала студэнтка з каманды-пераможцы Марта Дубінец. – Думаем, такія мерапрыемствы трэба праводзіць часцей, бо яны скіраваны на згуртаванне аднагрупнікаў і, канешне, на паглыбленне нашых ведаў па роднай мове”.

Слова 1

Слова 2

Слова 3

Акцыя «Паэтычнае стагоддзе» філалагічнага факультэта БДУ

БДУ – гэта Alma Mater класікаў беларускай літаратуры. На філалагічным факультэце БДУ вучыліся і працавалі 8 з 17 Народных паэтаў і пісьменнікаў Беларусі. Філалагічны факультэт БДУ запрашае да ўдзелу ў акцыі «Паэтычнае стагоддзе». Напярэдадні слаўнага стогадовага Юбілею разам стварыць паэтычны летапіс нашага ўніверсітэта: адлюстраваць у паэтычным слове гісторыю ўніверсітэта з моманту яго заснавання да дзён сённяшніх; успомніць паэтычную гісторыю свайго факультэта; прысвяціць свой паэтычны твор Юбілею БДУ.

Калі Вы пішаце вершы, то мы запрашаем Вас прачытаць іх і тым самым павіншаваць наш універсітэт са знамянальнай датай, распавёўшы аб нашым універсітэце, студэнтах, выкладчыках, буднях або мерапрыемствах. Калі ў Вас няма здольнасцей да вершаскладання, але Вы хацелі б узяць удзел у праекце, мы прапануем прачытаць ўжо напісаныя вершы, звязаныя з БДУ.

Здымкі для праекта будуць праходзіць з красавіка па кастрычнік на базе філалагічнага факультэта. З мэтай стварэння якасных відэаматэрыялаў з добрым гукавым суправаджэннем, запіс будзе ажыццяўляцца непасрэдна арганізатарамі. Відэаролікі ўдзельнікаў акцыі будуць размяшчацца ў медыяпрасторы БДУ.

Для ўдзелу ў праекце неабходна запоўніць прымацаваную гугл-форму https://docs.google.com/forms/d/1Kq3UPGrw1xtAKj0vH1v_am49rXP7q1166OjH-yUUqUI/edit . З пытаннямі можна звяртацца на пошту праекта: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду., а таксама да галоўнага арганізатара – старшыні Творчага саюза філалагічнага факультэта БДУ Еўтушкевіч Анастасіі (+375445473988).

Узрост, геаграфія, колькасць удзельнікаў неабмежаваныя! Давайце разам у вершах павіншуем першы ўніверсітэт краіны са 100-годдзем!

ФІРАНКІ, ЗНІЧКА, БРОЎКА, ДАБРАБЫТ, АБО “СЛОВА Х”

Ужо традыцыйна ў лютым на нашым факультэце праводзіцца Тыдзень роднай мовы. У гэтым годзе для трэцякурснікаў беларускай філалогіі ён пачаўся даволі незвычайна – з займальнай гульні “Слова Х”. У своеасаблівым “Аlias” па-беларуску студэнты тлумачылі словы, фразеалагізмы і нават імёны вядомых пісьменнікаў ды грамадскіх дзеячаў з дапамогай асацыяцый, не выкарыстоўваючы пры гэтым аднакарэнныя лексемы.

Для правядзення гульні прысутныя падзяліліся на дзве каманды. На ўсё пра ўсё ў кожнай з іх была адна хвіліна, па сканчэнні якой скрынка з карткамі пераходзіла ў рукі сапернікаў. У выніку “Тутэшыя” адгадалі на 24 словы больш за “Сланечнік”. Але ўсе аднадушна вырашылі, што перамагло сяброўства.

Пасля падвядзення вынікаў Анжаліка Леанідаўна Садоўская ад імя кафедры беларускага мовазнаўства яшчэ раз павіншавала студэнтаў з Міжнародным днём роднай мовы, які адзначаўся 21 лютага, а таксама пачаставала смачнымі цукеркамі.

Безумоўна, такая форма мерапрыемства аказалася цудоўнай ідэяй весела ды з карысцю распачаць Тыдзень беларускай мовы!

слова икс

78-я навуковая канферэнцыя студэнтаў і аспірантаў БДУ

22 красавіка 2021 года на філалагічным факультэце адбудзецца пасяджэнне секцый 78-й навуковай канферэнцыі студэнтаў і аспірантаў БДУ.

Заяўкі прымаюцца на сайце sci.bsu.by (толькі для філалагічнага факультэта). Апошні дзень рэгістрацыі – 16 красавіка.