Міжнародная канферэнцыя “Руская мова: сістэма і функцыянаванне” адбылася на філалагічным факультэце

16–17 кастрычніка 2019 года на філалагічным факультэце Беларускага дзяржаўнага ўніверсітэта адбылася VІІI Міжнародная навуковая канферэнцыя “Руская мова: сістэма і функцыянаванне (да 80-годдзя філалагічнага факультэта БДУ)”.

У канферэнцыі прынялі ўдзел прадстаўнікі Беларусі, Аўстрыі, В’етнама, Італіі, Кітая, Польшчы, Расіі, Украіны, Эстоніі агульнай колькасцю 68 чалавек. Сярод замежных удзельнікаў больш за ўсё навукоўцаў было з Расіі (гг. Масква, Арол, Варонеж, Майкоп, Ніжні Ноўгарад, Перм, Санкт-Пецярбург, Томск).

Удзельнікі канферэнцыі прадстаўлялі наступныя ВНУ і навукова-даследчыя інстытуты: Інстытут славістыкі Венскага ўніверсітэта, Балтыйскі федэральны ўніверсітэт імя І. Канта, Познаньскі ўніверсітэт імя А. Міцкевіча, Універсітэт знешняга гандлю г. Ханоя, Расійскі дзяржаўны педагагічны ўніверсітэт імя А.І. Герцэна, Пермскі дзяржаўны гуманітарна-педагагічны ўніверсітэт, Нацыянальны даследчы Томскі дзяржаўны ўніверсітэт, Нацыянальны даследчы Ніжагародскі дзяржаўны ўніверсітэт імя М.І. Лабачэўскага, Санкт-Пецярбургскі дзяржаўны ўніверсітэт, Маскоўскі дзяржаўны ўніверсітэт імя М.В. Ламаносава,  Варонежскі дзяржаўны ўніверсітэт, Арлоўскі дзяржаўны ўніверсітэт імя І.С. Тургенева; Беларускі дзяржаўны ўніверсітэт, Беларускі дзяржаўны медыцынскі ўніверсітэт, ДНУ «Цэнтр даследаванняў беларускай культуры, мовы і літаратуры НАН Беларусі», Мінскі дзяржаўны лінгвістычны ўніверсітэт, Магілёўскі дзяржаўны ўніверсітэт імя А.А. Куляшова, УА «Беларуская дзяржаўная акадэмія музыкі», УА ФПБ Міжнародны ўніверсітэт «МІПСА», Беларускі дзяржаўны педагагічны ўніверсітэт імя Максіма Танка, Брэсцкі дзяржаўны ўніверсітэт імя А.С. Пушкіна, Гродзенскі дзяржаўны ўніверсітэт імя Я. Купалы.

На адкрыцці канферэнцыі з прывітальным словам выступілі прарэктар БДУ па навуковай рабоце прафесар В.Р. Сафонаў, спецыяліст Прадстаўніцтва Рассупрацоўніцтва Н.І. Іпацьева, дэкан філалагічнага факультэта прафесар І.С. Роўда.

16 кастрычніка на пленарным пасяджэнні свае даклады прадставілі прафесары А.А. Лукашанец (Мінск), А. Крэчмер (Вена), Е.А. Чашчына (Познань), Е.І. Кастандзі (Тарту), В.М. Мусатаў (Арол), І.А. Сцярнін (Варонеж), Ц.Б. Радбіль (Ніжні Ноўгарад), І.С. Роўда (Мінск), Б.Ю. Норман (Мінск), Т.М. Валынец (Мінск), А.М. Калюта (Мінск), В.Д. Старычонак (Мінск).

17 кастрычніка праходзіла работа секцый па наступных навуковых напрамках:

  1. Руская мова ў дыяхранічным аспекце.
  2. Праблемы семантычнай інтэрпрэтацыі і намінацыі.
  3. Граматыка сучаснай рускай мовы: праблемы і перспектывы развіцця.
  4. Камунікатыўна-прагматычныя і кагнітыўныя аспекты вывучэння мовы.
  5. Новыя тэхналогіі ў выкладанні рускай мовы.
  6. Руская мова ў сучасным свеце: дынаміка моўных кантактаў.

Канферэнцыя прайшла на высокім навуковым узроўні. Прынята рашэнне працягваць правядзенне падобных канферэнцый, паколькі яны даюць магчымасць паглыбляць веды па рускай мове, яе гісторыі і сучасным стане, дазваляюць маладым лінгвістам апрабаваць свае даследаванні і садзейнічаюць умацаванню навуковых сувязей паміж лінгвістамі свету.

Па выніках канферэнцыі плануецца выданне зборніка матэрыялаў. 

 

Адкрыты ўрок па італьянскай мове для дзяцей і падлеткаў

Кафедра раманскага мовазнаўства запрашае на адкрыты ўрок па італьянскай мове для дзяцей і падлеткаў, які адбудзецца 13 кастрычніка ў 10.00 па адрасе вул. Гікала, 4. Мерапрыемства праводзіцца сумесна з Мінскай абласной бібліятэкай імя А.С. Пушкіна і ANILS (Associazione Nazionale Lingue Straniere) пад патранажам Пасольства Італіі ў Мінску. У ходзе семінара студэнты творчага аб’яднання «Педагагічная майстэрня» філалагічнага факультэта БДУ прапануюць серыю майстар-класаў па італьянскай мове пад кіраўніцтвам вопытных педагогаў з Італіі і Беларусі. У цікавай і забаўляльнай форме ўдзельнікі засвояць формулы італьянскага вітання, даведаюцца пра цікавыя факты з гісторыі Італіі, навучацца рабіць падарункі з італьянскім каларытам.

Мерапрыемства-прэзентацыя “Унёсак кафедры тэарэтычнага і славянскага літаратуразнаўства ў гісторыю філалагічнага факультэта”

23 кастрычніка на філалагічным факультэце адбылася прэзентацыя “Унёсак кафедры тэарэтычнага і славянскага літаратуразнаўства ў гісторыю філалагічнага факультэта”, прымеркаваная да святкавання 80-годдзя філалагічнага факультэта БДУ.

Загадчык кафедры тэарэтычнага і славянскага літаратуразнаўства, кандыдат філалагічных навук, дацэнт Т.А. Марозава пазнаёміла гасцей мерапрыемства з гісторыяй і традыцыямі кафедры, расказала пра сваіх калег і спецыфіку іх навуковай дзейнасці. Загадчык аддзела абслугоўвання філалагічнага і эканамічнага факультэтаў Фундаментальнай бібліятэкі БДУ Ж.С. Карповіч прадставіла асноўныя выданні супрацоўнікаў кафедры з мабільнай кніжнай выставы. Сваімі ўспамінамі пра гісторыю стварэння кафедры падзяліўся прафесар, доктар філалагічных навук В.П. Рагойша, а вядучы навуковы супрацоўнік лабараторыі беларускага фальклору, кандыдат філалагічных навук, дацэнт Р.М. Кавалёва ўзгадала цікавыя моманты ўніверсітэцкіх фальклорных экспедыцый.

На мерапрыемстве прысутнічалі студэнты, аспіранты і выкладчыкі філалагічнага факультэта.

Універсіяда па італьянскай мове

Кафедра раманскага мовазнаўства Беларускага дзяржаўнага універсітэта сумесна з ANILS (Associazione Nazionale Insegnanti Lingue Straniere) арганізуе міжнародную Універсіяду па італьянскай мове. Першы тур праводзіць універсітэт-удзельнik 7-13 кастрычніка 2019 г., другі тур адбудзецца ў Мінску на фiлалагiчным факультэце БДУ 23-25 ​​кастрычніка 2019 г. Усе ўдзельнікі атрымаюць электронны сертыфікат. Рэгістрацыя тут (https://docs.google.com/forms/d/1p3NuFP9-aNTXVutaOkBc2HdbcC9HWi3BL0ItZiKq0Ac/edit).

Сачыце за намi: UniversiadiMinsk2019, UniversiadiMinsk2019, UniversiadiMinsk2019

Прэзентацыя «Філалагічнай адукацыі»

17 кастрычніка на філалагічным факультэце адбылася прэзентацыя навукова-метадычнага зборніка «Філалагічная адукацыя» (№ 3). Выданне зборніка аднавілася пасля пэўнага перапынку.

На прэзентацыю сабралася рэдакцыйная калегія «Філалагічнай адукацыі», у якую ўваходяць вядомыя вучоныя-філолагі, дыдакты і метадысты: загадчык кафедры беларускага мовазнаўства прафесар М. Р. Прыгодзіч, загадчык кафедры рыторыкі і методыкі выкладання мовы і літаратуры дацэнт І. У. Таяноўская, загадчык кафедры філалогіі Баранавіцкага дзяржаўнага ўніверсітэта дацэнт Т. М. Пучынская і інш.

На пачатку сустрэчы выступіў галоўны рэдактар зборніка загадчык кафедры гісторыі беларускай літаратуры прафесар А. І. Бельскі, які распавёў пра канцэпцыю і стратэгію развіцця навукова-метадычнага выдання. У абмеркаванні нумара бралі ўдзел дацэнты філфака А. Л. Верабей, В. Ю. Дылеўская, С. А. Шантаровіч, дактарант Н. А. Гулак і інш.

У ходзе выступленняў закраналіся актуальныя дыдактычна-метадычныя пытанні падрыхтоўкі спецыялістаў-філолагаў, праблемы інавацыйнага навучання, выкарыстання сучасных адукацыйных рэсурсаў і тэхналогій, выхавання культуры студэнтаў і інш. Вылучаны крэатыўныя ідэі і прапановы па фарміраванні зместу чарговага нумара зборніка.

У трэцім нумары змешчаны праблемныя артыкулы В. У. Праскаловіч «Інавацыйная адукацыйная прастора філолага: рэаліі і перспектывы», А. В. Руцкай, М. У. Грынько «Літаратурная адукацыя і асоба педагога (да пытання прафесіяналізацыі ў сучасных умовах)», П. П. Жаўняровіча «Марфалагічная ўнармаванасць назоўніка: рэдактарскі і адукацыйны аспекты». У раздзеле «Дыдактыка і тэхналогіі» надрукаваны артыкулы А. І. Бельскага «Актывізацыя самастойнай навукова-даследчай і творчай дзейнасці студэнтаў у кантэксце педагагічных ідэй Ф. А. Бельскага», Т. М. Пучынскай «Фарміраванне прафесійнай кампетэнтнасці студэнтаў на занятках па методыцы выкладання беларускай літаратуры». Запачаткавана новая рубрыка «Асоба ў адукацыі», дзе М. Р. Прыгодзіч робіць агляд творчай спадчыны прафесара В. П. Краснея, А. Э. Сабуць ушаноўвае памяць І. В. Жука — тэарэтыка, літаратуразнаўца, педагога.

Прэзентацыя паклала пачатак шэрагу мерапрыемстваў, якія ладзіць кафедра гісторыі беларускай літаратуры да юбілею філалагічнага факультэта. Наступнае мерапрыемства — прэзентацыя зборніка прац студэнтаў, магістрантаў і аспірантаў «Маладая плынь».

 

Запрашаем на курсы філалагічнага факультэта

Філалагічны факультэт запрашае слухачоў на курсы па падрыхтоўцы да ЦТ

  • руская / беларуская мовы,
  • руская / беларуская літаратура,
  • англійская мова

і навучальныя курсы па мовах:

  • англійскай,
  • нямецкай,
  • італьянскай,
  • французскай,
  • польскай,
  • новагрэцкай.

Больш падрабязная інфармацыя тут.

На філалагічным факультэце адбудуцца адкрытыя лекцыі прафесара І. А. Сцерніна

Доктар філалагічных навук прафесар Іосіф Абрамавіч Сцярнін прачытае адкрытыя лекцыі на філалагічным факультэце БДУ.

Прафесар І. А. Сцярнін – дырэктар Цэнтра камунікатыўных даследаванняў Варонежскага дзяржаўнага ўніверсітэта, прафесар кафедры агульнага мовазнаўства і стылістыкі Варонежскага дзяржаўнага ўніверсітэта, заслужаны дзеяч навукі Расійскай Федэрацыі, член савета Расійскай псіхалінгвістычнай асацыяцыі, старшыня Варонежскай асацыяцыі экспертаў-лінгвістаў, член міжнароднай прагмалінгвістычнай асацыяцыі.

Сфера навуковых інтарэсаў прафесара І. А. Сцерніна – тэорыя мовы, тэорыя маўленчай камунікацыі, кантрастыўная лінгвістыка, кагнітыўная лінгвістыка, маўленчае ўздзеянне, камунікатыўныя паводзіны народаў свету, псіхалінгвістыка, мова і мысленне, лінгвакрыміналістыка, псіхалінгвістычная лексікаграфія.

Тэмы і расклад лекцый:

  1. Псіхалінгвістыка і семантыка – 17 кастрычніка 12.45, аўд. 304.
  2. Стасункі з мужчынамі і жанчынамі – 17 кастрычніка 14.25, аўд. 304.

Запрашаюцца ўсе зацікаўленыя!

На філалагічным факультэце адбылася праграма павышэння кваліфікацыі «Лацінская мова і ўводзіны ў антычную культуру»

З 17 па 25 чэрвеня 2019 года на філалагічным факультэце прайшлі курсы павышэння кваліфікацыі «Лацінская мова і ўводзіны ў антычную культуру».

Праграма курсаў была распрацавана кафедрай класічнай філалогіі сумесна з факультэтам павышэння кваліфікацыі і перападрыхтоўкі спецыяльна для выкладчыкаў лацінскай мовы ўстаноў вышэйшай і сярэдняй спецыяльнай адукацыі. Слухачамі курсаў сталі выкладчыкі лацінскай мовы з Брэста, Гомеля, Мінска, Магілёва, Слуцка, Новасібірска. Лекцыі і практычныя заняткі былі прысвечаны гісторыі старажытнагрэчаскай мовы, рэцэпцыі антычнай культуры, лацінскай лексікалогіі ў дыяхранічным аспекце, лацінскай медыка-біялагічнай тэрміналогіі, методыцы выкладання лацінскай мовы ў сістэмным аспекце (лектары – праф. А.В. Гарнік, дац. В.Г. Пракапчук, дац. А.У. Кірычэнка, дац. К.В. Стрыга). Слухачы адзначылі актуальнасць і спецыялізаваны характар праведзеных курсаў павышэння кваліфікацыі, а таксама высокі прафесіяналізм лектараў.

Прэзентацыя падручніка “Введение в славянскую филологию”

18 кастрычніка 2019 г. на філалагічным факультэце адбылася прэзентацыя падручніка “Введение в славянскую филологию”, прымеркаваная да святкавання 80-годдзя філалагічнага факультэта БДУ.

 Падручнік напісаны калектывам аўтараў, сярод якіх выкладчыкі кафедры тэарэтычнага і славянскага мовазнаўства, а таксама супрацоўнікі Інстытута славістыкі Венскага ўніверсітэта. Падручнік з’яўляецца абноўленым варыянтам кнігі “Введение в славянскую филологию” А.Я. Супруна, асобныя часткі якой уключаны ў прадстаўленым выданні. Вопытам працы над падручнікам падзяліліся А. А. Кожынава, А. М. Калюта, Г. Г. Крэчмар, Н. В. Івашына. У ліку ганаровых гасцей на прэзентацыі прысутнічала жонка А. Я. Супруна прафесар МДЛУ Г. П. Кліменка.

I Міжнародная навукова-практычная канферэнцыя «Раманія: моўная і культурная спадчына – 2019»

16 мая 2019 г. на філалагічным факультэце прайшла I Міжнародная навукова-практычная канферэнцыя «Раманія: моўная і культурная спадчына – 2019», арганізаваная кафедрай раманскага мовазнаўства.

Канферэнцыя выклікала жывую зацікаўленасць як у айчынных раманістаў (на ёй былі прадстаўлены даклады выкладчыкаў, аспірантаў і магістрантаў розных ВНУ Беларусі), так і замежных калег (у ёй прынялі ўдзел даследчыкі з Украіны, Славакіі, Літвы, Італіі, Бельгіі, Іспаніі). Праблемнае поле канферэнцыі ахоплівала шырокае кола пытанняў, якія тычацца перспектыўных напрамкаў сучаснай раманістыкі. У межах канферэнцыі працавалі тры секцыі, на якіх разглядаліся праблемы лінгвістыкі, літаратуразнаўства, перакладу і методыкі навучання раманскім мовам: «Кагнітыўна-дыскурсіўныя аспекты вербальнай камунікацыі: параметры, стратэгіі і тактыкі дыскурсу», «Лінгвакультуралагічныя аспекты перакладу і пытанні іспанскай, італьянскай, партугальскай і французскай літаратуры», «Лінгвакраязнаўчы і сацыякультурны кампаненты ў практыцы навучання замежным мовам». Многія даклады выклікалі ажыўленыя дыскусіі і абмен думкамі па актуальных пытаннях дадзенай галіны філалагічнай навукі. Мяркуецца, што канферэнцыя стане рэгулярнай і будзе спрыяць развіццю беларускай раманістыкі.

Адкрытая лекцыя «Актуальныя праблемы сучаснай рускай арфаграфіі» лінгвіста У. М. Пахомава адбудзецца на філалагічным факультэце

11 кастрычніка 2019 г. у 12.45 на філалагічным факультэце БДУ (вул. К. Маркса, 31, аўд. 210) адбудзецца адкрытая лекцыя «Актуальныя праблемы сучаснай рускай арфаграфіі» Уладзіміра Маркавіча Пахомава.

Уладзімір Маркавіч Пахомаў – кандыдат філалагічных навук, навуковы супрацоўнік аддзела культуры рускага маўлення Расійскай акадэміі навук, член Арфаграфічнай камісіі Расійскай акадэміі навук, член Экспертнага савета Татальнай дыктоўкі, галоўны рэдактар ​​партала «Грамота.ру».

Вядомы расійскі вучоны раскажа, што такое пісьменнасць і непісьменнасць, пра слабыя месцы, якія існуюць у сучасным рускім правапісе, а таксама пра важнасць пісьменнасці ў лічбавую эпоху.

Запрашаюцца ўсе, каму цікавыя пытанні сучаснай арфаграфіі, пытанні маўленчых норм і жывога развіцця сучаснай рускай мовы.

Дадатковая інфармацыя – па тэлефоне (8017) 328-62-85, кафедра рускай мовы.