ІІ тур конкурсу біяграфічных твораў «Слаўная кампанія: рэANIMAцыя»

Кафедра тэарэтычнага і славянскага літаратуразнаўства філалагічнага факультэта БДУ сумесна з рэдакцыяй часопіса «Маладосць» пры інфармацыйнай падтрымцы Нацыянальнага інстытута адукацыі аб’яўляе ІІ тур конкурсу біяграфічных твораў «Слаўная кампанія: рэANIMAцыя», прысвечаных беларускім пісьменнікам ХІХ стагоддзя.

З умовамі і патрабаваннямі знаёміць Інструкцыя, размешчаная на сайтах арганізатараў.

Спіс пісьменнікаў на ІІ тур, які змяшчае 12 пазіцый, прыводзіцца у Дадатку 1 да Інструкцыі.

Прыём заявак ад удзельнікаў з 22 красавіка па 31 ліпеня 2019 года. Форму заяўкі глядзіце ў Дадатку 2 да Інструкцыі.

Прыём тэкстаў адбываецца з 1 мая па 31 кастрычніка 2019 года.

Заяўкі і творы прымаюцца на адрас Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду..

Пераможцамі конкурсу будуць лічыцца аўтары чатырох найлепшых тэкстаў, адабраных журы. Узнагароджванне адбудзецца падчас урачыстай цырымоніі. Пераможцы атрымаюць дыпломы, падарункі і грашовыя прэміі. Лепшыя конкурсныя творы будуць змешчаны у зборніку, выданне якога плануецца ў выдавецтве «Мастацкая літаратура», або будуць надрукаваны на старонках часопіса «Маладосць».

Даведачная інфармацыя.

Кантакты:

Кафедра тэарэтычнага і славянскага літаратуразнаўства філалагічнага факультэта БДУ.

Запрудскі Ігар Мікалаевіч, дацэнт, +375 29 636 47 01, Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.

Міжнародны навуковы семінар ва ўніверсітэце Пасаў (Германія) – сумесны праект БДУ і ўніверсітэта Пасаў

29 – 30 сакавіка 2019 года ва ўніверсітэце Пасаў (Германія) адбыўся міжнародны навуковы семінар (workshop) “Contested Spaces and Symbolic Landscapes in Texts from the Early Modern Grand Duchy of Lithuania and its Neighbouring Regions” (“Спрэчныя прасторы і сімвалічныя ландшафты ў тэкстах з Вялікага Княства Літоўскага і памежных з ім рэгіёнаў у Ранні Новы час”), арганізаваны доктарам філалогіі Марыён Рутц (кафедра славянскіх літаратур і культур універсітэта Пасаў) і доктарам філалагічных навук, прафесарам Ж. В. Некрашэвіч-Кароткай (кафедра гісторыі беларускай літаратуры Беларускага дзяржаўнага ўніверсітэта). Правядзенне навуковага семінара стала магчымым дзякуючы дамове аб міжнародным супрацоўніцтве паміж Беларускім дзяржаўным універсітэтам і ўніверсітэтам Пасаў, а таксама дзякуючы фінансавай падтрымцы з боку нямецкага фонду падтрымкі навукі Fritz Thyssen Foundation. Папярэдняя дамоўленасць і арганізацыйная падрыхтоўка семінара ажыццяўлялася прафесарам Ж.В. Некрашэвіч-Кароткай падчас яе знаходжання ў навуковай камандзіроўцы ў Пасаў восенню мінулага года.

У навуковым семінары прынялі ўдзел прадстаўнікі адукацыйных і навукова-даследчых устаноў васьмі краін: акрамя ўдзельнікаў з Беларусі (Мінск) і Германіі (Грайфсвальд, Пасаў, Гейдэльберг), выступалі навукоўцы з Літвы (Вільнюс), Эстоніі (Тарту), Польшчы (Кракаў), Злучаных Штатаў Амерыкі (Берклі), Аўстрыі (Вена), Швейцарыі (Берн).

Усе ўдзельнікі інтэрдысцыплінарнага навуковага семінара Пасау былі аб’яднаны цікавасцю да даследаванняў, датычных Вялікага Княства Літоўскага і памежжа, а менавіта даследаванняў сімвалічнага ландшафту спрэчных тэрыторый. Невыпадкова, што ўдзельнікамі варкшопа сталі прадстаўнікі кафедры гісторыі беларускай літаратуры філалагічнага факультэта Беларускага дзяржаўнага ўніверсітэта (доктар філалагічных навук, прафесар Ж. В. Некрашэвіч-Кароткая, кандыдат філалагічных навук, дацэнт У. Г. Кароткі, а таксама аспірантка А. У. Давыдава і магістрантка А. С. Герус). Навукоўцы кафедры ўжо даўно і плённа распрацоўваюць праблематыку Вялікага Княства Літоўскага ў галіне літаратура- і культуразнаўчых даследаванняў.

На адкрыцці навуковага семінара арганізатары звярнуліся да ўдзельнікаў з прывітальнымі словамі і прапанавалі незвычайны парадак работы на працягу мерапрыемства. Абмеркаванне дакладаў удзельнікамі (дыскусія) прадугледжвалася не пасля кожнага даклада, а пасля кожнага тэматычнага блока. На працягу двух дзён вялася праца васьмі тэматычных груп: “Назвы і палітыка”, “Прасторы Літвы”, “Русь, Ruthenia, Russia (Alba)”, “Вандроўкі ў замежныя прасторы”, “Канцэпцыі прасторы”, “Орша на (ментальнай) карце”, “Моўныя кантакты і прасторавыя адносіны”, “Сімвалічная тапаграфія”. Арганізатары сфарміравалі тэматычныя групы такім чынам, каб кожны з прысутных меў магчымасць паўдзельнічаць у абмеркаванні выступленняў, а тэмы выступленняў выклікалі інтарэс у слухачоў. Усе выступоўцы прадстаўлялі свае даклады на англійскай ці нямецкай мове. У ходзе навуковага семінара было прачытана 18 дакладаў, у якіх дакладчыкі падзяліліся вынікамі сваіх навуковых даследаванняў.

У канцы першага дня з мэтай стварэння спрыяльнай атмасферы навуковага супрацоўніцтва і інтэграцыі інтэрнацыянальных акадэмічных суполак ўдзельнікі варкшопа былі падзелены на тры групы для абмеркавання навуковых інтарэсаў прадстаўнікоў навукова-даследчых устаноў розных краін.

У другі дзень працягвалася праца ў тэматычных групах, пасля якой былі падведзены вынікі міжнароднай сустрэчы. Абраныя арганізатарамі тры ўдзельнікі варкшопа (Якуб Недзведзь, Она Даўкшэне, Штэфан Штрыглер) адзначылі ўнікальнасць міжнароднага праекта, які аб’яднаў літаратуразнаўчыя і гістарыяграфічныя дыскурсы ў дачыненні да тэкстаў, прыналежных да культурнай прасторы Вялікага Княства Літоўскага, з “прасторавымі даследаваннямі”. Рэферэнты падкрэслілі таксама высокі навуковы і арганізацыйны ўзровень мерапрыемства. Усе ўдзельнікі навуковага семінара выказалі зацікаўленасць у далейшым супрацоўніцтве. Па выніках навуковага семінара плануецца выданне зборніка навуковых артыкулаў на дзвюх (англійскай і нямецкай) мовах.

Прэзентацыя кнігі пра А.А. Лойку

10 мая 2019 года на філалагічным факультэце адбылася прэзентацыя кнігі «Чалавек з сонечнаю ўсмешкай» пра Алега Антонавіча Лойку — беларускага паэта, вучонага, педагога, члена-карэспандэнта НАН Беларусі, доктара філалагічных навук, прафесара, былога дэкана філалагічнага факультэта Беларускага дзяржаўнага ўніверсітэта. Падзея гэта была доўгачаканай і таму сталася сапраўдным святам, на якое прыйшлі і прыехалі сябры, калегі, землякі і шматлікія былыя студэнты Алега Антонавіча.

Мерапрыемства распачаў і вёў прафесар Алесь Бельскі, загадчык кафедры гісторыі беларускай літаратуры.

Сардэчна прывітаў гасцей і ўдзельнікаў прэзентацыі прафесар Іван Роўда, дэкан філалагічнага факультэта. Ён адзначыў ролю А. А. Лойкі ў развіцці філфака, гаварыў пра яго як выдатнага пісьменніка і грамадзяніна.

На прэзентацыі кнігі выступілі народны мастак Беларусі Іван Міско, вядомыя беларускія пісьменнікі: ганаровы акадэмік НАН Беларусі, лаўрэат Дзяржаўнай прэміі Беларусі Васіль Зуёнак, лаўрэат Дзяржаўнай прэміі Беларусі Анатоль Вярцінскі, лаўрэат Дзяржаўнай прэміі Беларусі Мікола Мятліцкі, дзяржаўны дзеяч, Надзвычайны і Паўнамоцны пасол Анатоль Бутэвіч, дактары філалагічных навук, прафесары Святлана Мусіенка, Таццяна Дасаева, доктар філалагічных навук, прафесар Люблінскага ўніверсітэта імя М. Мары-Складоўскай Сяргей Кавалёў, намеснік дырэктара выдавецтва «Мастацкая літаратура» Віктар Шніп, былыя ўдзельнікі літаратурнага аб’яднання «Узлёт» Кастусь Цыбульскі, Уладзімір Мазго, Сяргей Чыгрын і інш.

Прысутныя паглядзелі відэасюжэт пра А. А. Лойку. Прэзентацыю аздобіла музыка: гучаў акардэон — любімы інструмент Алега Антонавіча (саліст — навучэнец ІІ курса Рэспубліканскай гімназіі-каледжа пры Беларускай акадэміі музыкі Антон Аўчыннікаў). Бібліятэкары наладзілі выставу кніг пісьменніка «Я ўсім хачу дабра…».

Прэзентацыя кнігі ўспамінаў і артыкулаў прайшла ў цёплай і сяброўскай атмасферы, у гэты дзень усіх яднала памяць пра беларускага Паэта і Настаўніка.

 

Педагогіка будучыні. Погляд з мінулага

22 красавіка на філалагічным факультэце прайшоў пашыраны семінар-кансультацыя, на якім з дакладам «Педагогіка будучыні. Погляд з мінулага» выступіла кандыдат філалагічных навук, дацэнт кафедры сацыяльна-гуманітарных дысцыплін ДУА «Інстытут пагранічнай службы Рэспублікі Беларусь» Марыя Вячаславаўна Шамякіна. На матэрыяле навукова-фантастычных твораў савецкага часу, а таксама прагнозах сацыёлагаў і філосафаў-футуролагаў другой паловы ХХ стагоддзя яна распавяла пра мастацкія і навуковыя ўяўленні сістэмы адукацыі будучыні, пра прагнозы, якія спраўдзіліся і не, а таксама адзначыла асаблівасці сучаснага інфармацыйнага грамадства.

Семінар арганізаваны ў межах працы Кансультацыйнага цэнтра па праблемах фальклору (кіраўнік Цэнтра – доктар філалагічных навук, прафесар Т.І. Шамякіна). Арганізатарамі мерапрыемства выступілі супрацоўнікі Вучэбна-навуковай лабараторыі беларускага фальклору і фалькларысты кафедры тэарэтычнага і славянскага літаратуразнаўства.

На мерапрыемстве прысутнічалі студэнты, аспіранты і выкладчыкі філалагічнага факультэта.

З 26 красавіка па 3 мая на філалагічным факультэце БДУ кафедра англійскага мовазнаўства праводзіла традыцыйны Тыдзень англійскай мовы

Тыдзень атрымаўся насычаным і выклікаў вялікую зацікаўленасць у студэнтаў 1 – 4 курсаў. У праграму Тыдня былі ўключаны разнастайныя пазнавальныя і ў той жа час забаўляльныя мерапрыемствы: арганізаваны круглыя сталы, прысвечаныя англійскаму і амерыканскаму этыкету, Дню нараджэння каралевы Велікабрытаніі, які святкаваўся 21 красавіка, цікавым фактам пра гісторыю і грамадства Аб’яднанага каралеўства і Аўстраліі; конкурс прэзентацый па тэме “Універсітэты свету”; усім жадаючым адчыніў свае дзверы караоке-клуб, дзе студэнты з задавальненнем спявалі англамоўныя песні, а таксама чытальня, дзе дэкламаваліся вершы пра каханне. Актыўны ўдзел у Тыдні прынялі як студэнты-беларусы, так і студэнты замежных краін. Тыдзень англійскай мовы пачаўся і скончыўся адкрытымі заняткамі з ужываннем інавацыйных форм і методык выкладання замежных моў старшых выкладчыкаў кафедры англійскага мовазнаўства М.Л. Савасцюк і Ю.А. Жукавай. На занятках былі прадстаўлены цікавыя творчыя праекты студэнтаў: відэафільмы на англійскай мове па тэмах “Жыццё беларускай моладзі”, створаныя студэнтамі 3 курса, і “Студэнт-філолаг БДУ” ад студэнтаў 2 курса рамана-германскага аддзялення.

Віншуем пераможцаў Конкурсу мастацкіх перакладаў з кітайскай мовы «Люстэрка слоў»!

17 красавіка 2019 г. кафедра кітайскай філалогіі Беларускага дзяржаўнага ўніверсітэта пры падтрымцы Пасольства Кітайскай Народнай Рэспублікі ў Рэспубліцы Беларусь арганізавала і правяла цырымонію ўзнагароджвання пераможцаў конкурсу мастацкіх перакладаў з кітайскай мовы «Люстэрка слоў» сярод навучэнцаў, студэнтаў і слухачоў курсаў.

З прывітальным словам да ўдзельнікаў мерапрыемства звярнуліся дэкан філалагічнага факультэта І.С.Роўда, які адзначыў выключную ролю перакладаў у папулярызацыі класічнай і сучаснай кітайскай літаратуры, першы сакратар аддзела адукацыі Пасольства КНР у РБ Лі Вэньхуа, якая падкрэсліла важнасць дадзенага конкурсу, а таксама зацікаўленасць кітайскага боку ў эфектыўным развіцці партнёрскіх адносінаў у сферы адукацыі і культуры, галоўны рэдактар часопіса “Маладосць” С.Д.Воцінава, якая расказала аб спецыфіцы рэцэпцыі кітайскай літаратуры ў Беларусі. Паэт, публіцыст і перакладчык М.М.Мятліцкі падзяліўся са студэнтамі сакрэтамі тэхналогіі мастацкага перакладу; доктар філалагічных навук, прафесар В.П.Рагойша падкрэсліў важнае значэнне перакладаў у літаратурным працэсе дзвюх краін у ХХ-ХХI стст. Загадчык кафедры кітайскай філалогіі Хмяльніцкі М.М. адзначыў, што конкурс мастацкіх перакладаў стане традыцыйным мерапрыемствам кафедры кітайскай філалогіі.

У літаратурна-творчым спаборніцтве прынялі ўдзел больш за 20 удзельнікаў – навучэнцаў сэрэдніх і вышэйшых навучальных устаноў краіны. Аўтарытэтнае журы, у склад якога ўвайшлі супрацоўнікі кафедры кітайскай філалогіі, перыядычных выданняў і творчых аб’яднанняў Беларусі, вызначыла наступных пераможцаў:  у намінацыі «Лепшы мастацкі пераклад кітайскай паэзіі на беларускую мову»  дыплом I ступені атрымаў студэнт другога курса спецыяльнасці «Усходняя (кітайская) філалогія» БДУ Баравік Мікіта Андрэевіч, дыплом II ступені – аспірант Рэспубліканскага інстытута вышэйшай школы Казанцаў Яўген Яўгенавіч; у намінацыі «Лепшы мастацкі пераклад кітайскай паэзіі на рускую мову» дыплом I ступені атрымала студэнтка першага курса факультэта міжнародных адносінаў БДУ Тонкіх Мая Ўладзіміраўна, дыплом II ступені –  студэнтка чацвёртага курса спецыяльнасці «Усходняя (кітайская) філалогія» БДУ Чабан Аляксандра Аляксандраўна; у намінацыі «Лепшы мастацкі пераклад  кітайскай прозы на беларускую мову» дыплом I ступені атрымала студэнтка трэцяга курса факультэта кітайскай мовы і культуры МДЛУ Шчагрыковіч Таццяна Аляксееўна, дыплом II ступені – вучаніца 11 класа ДУА «Гімназія з беларускай мовай навучання №23 г.Мінска» Голуб Яна Сяргееўна, дыплом III ступені – студэнтка трэцяга курса спецыяльнасці «Усходняя (кітайская) філалогія» БДУ Семянчук Арына Аляксандраўна; у намінацыі «Лепшы мастацкі пераклад кітайскай прозы на рускую мову» дыплом I ступені атрымала студэнтка трэцяга курса спецыяльнасці «Усходняя (кітайская) філалогія»  БДУ Харавец Яна Аляксандраўна, дыплом II ступені –  студэнтка трэцяга курса факультэта міжнародных адносінаў БДУ  Бышавец Ганна Сяргееўна, дыплом III ступені – студэнтка пятага курса спецыяльнасці «Усходняя (кітайская) філалогія» БДУ Дзенісёнак Святлана Валер’еўна.

Лепшыя пераклады ўдзельнікаў конкурсу мастацкіх перакладаў з кітайскай мовы “Люстэрка слоў” будуць апублікаваны ў майскім нумары часопіса “Маладосць”. Пераможцы творчага спаборніцтва атрымалі каштоўныя прызы, а ўладальнікі дыпломаў першай ступені будуць ўганараваны штогадовай стыпендыяй Пасольства Кітайскай Народнай Рэспублікі ў Рэспубліцы Беларусь.

Конкурс мастацкіх перакладаў з кітайскай мовы “Люстэрка слоў” прайшоў на высокім узроўні і засведчыў вылікую цікавасць да традыцыйнай і сучаснай славеснасці Кітая сярод моладзі нашай краіны.

З лепшымі перакладамі ўдзельнікаў конкурсу “Люстэрка слоў” можна азнаёміцца тут.

 

Фальклорна-этнаграфічнае мерапрыемства «Сцяжынкамі роднай зямлі»

2 мая на філалагічным факультэце БДУ адбылося фальклорна-этнаграфічнае мерапрыемства «Сцяжынкамі роднай зямлі», якое традыцыйна ладзіцца ў другім семестры навучальнага года для студэнтаў-першакурснікаў. Сёлета яно прымеркавана да Года малой радзімы. Арганізатарамі выступілі фалькларысты кафедры тэарэтычнага і славянскага літаратуразнаўства і супрацоўнікі вучэбна-навуковай лабараторыі беларускага фальклору.

Пры падрыхтоўцы мерапрыемства арганізатары ставілі перад сабой тры асноўныя задачы: натхніць студэнтаў-першакурснікаў на творчае знаёмства са скарбамі беларускага фальклору, выклікаць цікавасць да нашай нацыянальнай фальклорнай спадчыны і пазнаёміць з асаблівасцямі працы фалькларыстаў.

З прывітальным словам да гасцей і ўдзельнікаў мерапрыемства звярнуўся намеснік дэкана па навуковай рабоце П.І. Навойчык. Ён падкрэсліў важнасць справы збірання фальклору і захавання народнай культуры, узгадаў сваю фальклорную практыку, а таксама адзначыў ролю В.Дз. Ліцьвінкі ў папулярызацыі народнай творчасці. Затым выступілі стваральнікі фільма «Дзякуй, што нарадзіўся...», прысвечанага памяці вядомага фалькларыста В.Дз. Ліцьвінкі. Яны расказалі пра гісторыю стварэння фільма, пра Васіля Дзмітрыевіча, якім яго ведалі і памятаюць, пасля чаго студэнты і запрошаныя госці паглядзелі першую частку фільма.

У заключнай частцы мерапрыемства студэнтка другога курса спецыяльнасці “Беларуская філалагія” Міхаліна Бурвіна падзялілася сваім вопытам праходжання фальклорнай практыкі, адзначыла прыемныя моманты, а таксама цяжкасці, з якімі давялося сутыкнуцца пры збіранні фальклору і афармленні справаздачных матэрыялаў. Прыемным заключным момантам стала перадача ў бібліятэчную калекцыю вучэбна-навуковай лабараторыі беларускага фальклору фальклорна-этнаграфічных выданняў ад гасцей мерапрыемства.

У БДУ ўпершыню прайшоў конкурс дэкламацыі антычнай паэзіі «Ad Melpomenen»

15 красавіка на філалагічным факультэце прайшоў адкрыты конкурс дэкламацыі антычнай паэзіі «Ad Melpomenen» («Да Мельпамены»), арганізаваны кафедрай класічнай філалогіі.

Конкурс дэкламацыі сабраў аматараў антычнай паэзіі: у ім прынялі ўдзел амаль сорак чалавек. Тут былі і малодшыя школьнікі, і вучні больш сталага ўзросту, і студэнты амаль усіх спецыяльнасцей філалагічнага факультэта БДУ. У атмасферы сяброўства і нязмушанасці ўдзельнікі конкурсу дэманстравалі свае таленты: на філалагічным факультэце можна было пачуць і гекзаметры Гамера на старажытнагрэчаскай, беларускай і рускай мовах, і вершы на латыні, і шмат цудоўных перакладаў. Пераадольваючы нясмеласць, канкурсанты чыталі свае ўласныя творы, адухоўленыя Антычнасцю. Журы, у склад якога ўвайшлі загадчык кафедры класічнай філалогіі В. Г. Пракапчук, дацэнт К. А. Тананушка, дацэнт Я. У. Прыстаўка, ст. выкладчык Ю. А. Сядзініна-Баркоўская, ст. выкладчык Д. Г. Мінкевіч, выкладчык А. У. Давыдава, пасля працяглага абмеркавання назвала імёны пераможцаў. А гэта:

у намінацыі «Арыгінал» (дэкламацыя арыгінальнага антычнага паэтычнага твора на лацінскай ці старажытнагрэчаскай мове) – Марыя Кузняцова (3 курс, «Руская філалогія», дыплом I ступені), Мікіта Варанцоў (2 курс, «Класічная філалогія», дыплом II ступені), Вікторыя Янушкевіч (1 курс, «Славянская філалогія», дыплом III ступені);

у намінацыі «Літаратурны пераклад» (дэкламацыя літаратурнага перакладу антычнага паэтычнага твора на беларускую ці рускую мову) – Яніна Ждановіч (5 клас, ДУА «Сярэдняя школа №70», дыплом I ступені), Дар’я Вераб’ёва (1 курс, «Руская філалогія», дыплом II ступені), Валерыя Міцкун (2 курс, «Рамана-германская філалогія», дыплом III ступені), Лізавета Шаховіч (1 курс, «Славянская філалогія», дыплом III ступені);

у намінацыі «Уласны пераклад» (дэкламацыя ўласнага перакладу антычнага паэтычнага твора) – Марыя Кузняцова (3 курс, «Руская філалогія», дыплом I ступені);

у намінацыі «Аўтарскі тэкст» (дэкламацыя ўласнага паэтычнага твора на антычную тэматыку) – Марыя Кузняцова (3 курс, «Руская філалогія», дыплом I ступені), Марыя Пятрэнка (1 курс, «Беларуская філалогія», дыплом II ступені), Дар’я Талалаева (1 курс, «Беларуская філалогія», дыплом III ступені);

у намінацыі «Фрыстайл» (дэкламацыя літаратурнага паэтычнага твора на антычную тэматыку) – Андрэй Мудрак (1 клас, ДУА «НПК “Дзіцячы садок – Пачатковая школа № 468 г. Мінска”», дыплом I ступені), Яна Пруднікава (7 клас, ДУА «Сярэдняя школа № 66», дыплом II ступені), Паліна Чэпік (10 клас, ДУА «Сярэдняя школа № 66», дыплом III ступені).

Прыз глядацкіх сімпатый за лепшы відэаролік (https://youtu.be/s0YPNyyoiHI) атрымаў Андрэй Мудрак (1 клас, ДУА «НПК “Дзіцячы садок – Пачатковая школа № 468 г. Мінска”»).

Кафедра класічнай філалогіі шчыра дзякуе ўсім удзельнікам конкурсу і чакае таленавітых аматараў антычнай паэзіі ў наступным годзе! Асаблівую падзяку за дапамогу ў арганізацыі конкурсу кафедра выказвае Наталлі Іванаўне Вернікоўскай, настаўніцы рускай мовы і літаратуры ДУА «Сярэдняя школа № 66».

 

Навуковыя чытанні, прысвечаныя 70-годдзю з дня нараджэння прафесара Любові Адамаўны Антанюк

26 красавіка 2019 г. на філалагічным факультэце прайшлі навуковыя чытанні, прысвечаныя 70-годдзю з дня нараджэння прафесара Любові Адамаўны Антанюк. Арганізатарамі мерапрыемства выступілі кафедра беларускага мовазнаўства Беларускага дзяржаўнага ўніверсітэта, кафедра дзяржаўнага кіравання сацыяльнай сферай і беларусазнаўства Акадэміі кіравання пры Прэзідэнце Рэспублікі Беларусь, Інстытут мовазнаўства імя Якуба Коласа НАН Беларусі, на якіх у розны час працавала прафесар Л.А.Антанюк.

З вітальнымі словамі да ўдзельнікаў чытанняў звярнуліся загадчык кафедры беларускага мовазнаўства прафесар Мікалай Прыгодзіч і намеснік дэкана філалагічнага факультэта Павел Навойчык. Пасяджэнне працягнулі дырэктар Інстытута мовазнаўства імя Якуба Коласа НАН Беларусі Ігар Капылоў, загадчык аддзела сучаснай беларускай мовы гэтай жа ўстановы прафесар Валянціна Русак, загадчык кафедры дзяржаўнага кіравання сацыяльнай сферай і беларусазнаўства Акадэміі кіравання пры Прэзідэнце Рэспублікі Беларусь прафесар Святлана Лапіна, дэкан філалагічнага факультэта Беларускага дзяржаўнага педагагічнага ўніверсітэта імя Максіма Танка прафесар Васіль Старычонак. З вуснаў выступоўцаў удзельнікі чытанняў пачулі шчырыя ўспаміны пра Любоў Адамаўну і расказ пра зробленае ёю для беларускага мовазнаўства.

Асаблівасцю гэтых навуковых чытанняў стала тое, што ў іх прынялі ўдзел блізкія Любоў Адамаўны – муж і трое яе дзяцей з сем’ямі. Дачка, Марына Георгіеўна Антанюк-Пруто, расказала прысутным і паказала ў падрыхтаванай разам з братам прэзентацыі не вядомага мовазнаўцу прафесара Л.А.Антанюк, а звычайную жанчыну – жонку і маці. Цёплы і лёгкі настрой на чытаннях – найлепшае прызнанне і памяць пра Любоў Адамаўну.

Па выніках правядзення чытанняў у хуткім часе плануецца выданне зборніка навуковых артыкулаў.

Грандыёзны BRIGHT FESTIVAL на стадыёне «Дынама»

11 мая 2019 года ў 15.00 на стадыёне «Дынама» (вул. Кірава, 8) адбудзецца пачатак Еўрапейскіх гульняў - BRIGHT FESTIVAL. У межах мерапрыемства будзе арганізавана праца спартыўных пляцовак ад федэрацый спорту Беларусі, інтэрактыўных пляцовак арганізацый моладзі БДУ, сустрэча з зоркамі беларускага спорту, песенныя і танцавальныя батлы, прадстаўленне творчых праектаў моладзі і шмат іншага.Грандыёзны BRIGHT FESTIVAL на стадыёне «Дынама»

У 18:00 пачнецца музычная праграма, гасцямі якой стануць Святлана Лабада» «Ляпіс-98» «J:МОРС» і «Каста».

На педагагічных і рытарычных пляцоўках Рэспубліканскай выставы: да вопыту ўдзелу філалагічнага факультэта БДУ

У межах работы філалагічнага факультэта Беларускага дзяржаўнага ўніверсітэта па актуальных напрамках развіцця сучаснай агульнафілалагічнай і камунікатыўнай культуры навучэнцаў, актывізацыі ўзаемасувязяў паміж рознымі ўзроўнямі адукацыйнай сістэмы кафедра рыторыкі і методыкі выкладання мовы і літаратуры прыняла ўдзел у наведванні і рабоце XVIII Рэспубліканскай выставы навукова-метадычнай літаратуры, педагагічнага вопыту і творчасці навучэнскай моладзі з 16 па 19 красавіка 2019 г. Выкладчыкі кафедры ўдзельнічалі ў падборы выданняў для экспазіцыі, у арганізацыі наведвання выставы студэнтамі і ў працы журы (сумесна з кафедрай рускай мовы) рэспубліканскага конкурсу рытарычнага майстэрства навучэнцаў устаноў агульнай сярэдняй адукацыі, які быў прысвечаны Году малой радзімы і 75-годдзю вызвалення Беларусі ад нямецка-фашысцкіх захопнікаў. Конкурс быў арганізаваны пры падтрымцы Прадстаўніцтва Рассупрацоўніцтва ў Рэспубліцы Беларусь – Расійскага цэнтра навукі і культуры ў Мінску. Праводзіўся прафесійны аналіз разнастайных змястоўных, структурных, моўных, выканальніцкіх бакоў у выступленнях вучняў школ і гімназій, ступені выразнасці, пераканаўчасці, арыгінальнасці вучнёўскіх выказванняў.

Вывучаны перспектыўны педагагічны і маўленчы вопыт можа знайсці адлюстраванне на занятках са студэнтамі розных спецыяльнасцяў па методыках выкладання філалагічных дысцыплін, рыторыцы, тэхніцы маўлення, тэорыі рытарычных жанраў і  іншых вучэбных дысцыплін універсітэцкай рыторыка-метадычнай падрыхтоўкі.