Стажыроўка выкладчыкаў кафедры раманскага мовазнаўства ў Мілане

З 1 па 6 красавіка 2019 года выкладчыкі кафедры раманскага мовазнаўства (заг. кафедры Панцялеенка А.А., дацэнт Салеева М.В. і ст. выкладчык Івановіч К.А.) прайшлі стажыроўку ў Istituto Dante Alighieri di Milano, які з’яўляецца дзяржаўным цэнтрам па міжнароднай сертыфікацыі італьянскай мовы, а таксама валодае ліцэнзіяй універсітэта г. Сіены на правядзенне курсаў павышэння кваліфікацыі для выкладчыкаў.

Падчас стажыроўкі выкладчыкі атрымалі магчымасць азнаёміцца з асаблівасцямі вучэбна-метадычнай і навуковай працы цэнтра і тэндэнцыямі ў галіне сучаснай адукацыі ў Італіі, абмеркаваць цяжкасці ў выкладанні раманскіх моў кітайскім студэнтам, абмяняцца вопытам па выкарыстанні інавацыйных метадаў, у тым ліку з выкарыстаннем тэхналогій электроннага навучання. Удзел у рабоце стажыроўкі дазволіў дасягнуць дамоўленасцей:

– аб выдзяленні бясплатных двухтыднёвых стажыровак для лаўрэатаў алімпіяды па італьянскаq мове, якая праводзіцца кафедрай раманскага мовазнаўства;

– аб запрашэнні калег з Італіі для вочнага і дыстанцыйнага ўдзелу ў мерапрыемствах філалагічнага факультэта: канферэнцыях, круглых сталах, семінарах;

– аб распрацоўцы сумесных навуковых праектаў.

V Рэспубліканская навукова-практычная канферэнцыя маладых навукоўцаў: пошук і натхненне

22 сакавіка 2019 года на філалагічным факультэце прайшла V Рэспубліканская навукова-практычная канферэнцыя маладых навукоўцаў «Мова і літаратура ў ХХІ стагоддзі: актуальныя аспекты даследавання». У юбілейнай канферэнцыі, арганізаванай Саветам маладых вучоных філалагічнага факультэта, прынялі ўдзел больш за 70 дакладчыкаў з розных адукацыйных і навукова-даследчых устаноў нашай краіны: Беларускага дзяржаўнага ўніверсітэта, Беларускага дзяржаўнага медыцынскага ўніверсітэта, Беларускага дзяржаўнага ўніверсітэта культуры і мастацтваў, Брэсцкага дзяржаўнага ўніверсітэта імя А. С. Пушкіна, Гомельскага дзяржаўнага ўніверсітэта імя Францыска Скарыны, Гродзенскага дзяржаўнага ўніверсітэта імя Янкі Купалы, Магілёўскага дзяржаўнага ўніверсітэта імя А. А. Куляшова, Мінскага дзяржаўнага лінгвістычнага ўніверсітэта, Полацкага дзяржаўнага ўніверсітэта, Цэнтра даследаванняў беларускай культуры, мовы і літаратуры Нацыянальнай акадэміі навук Беларусі. У канферэнцыі таксама ўдзельнічалі школьнікі старэйшых класаў, якія цікавяцца мовай і літаратурай, а таксама маюць схільнасць да даследчай работы: свае даклады прадставілі вучні ДУА «Сярэдняя школа № 42 г. Мінска».

На адкрыцці канферэнцыі з прывітальным словам да ўдзельнікаў звярнуўся намеснік дэкана па навуковай рабоце кандыдат філалагічных навук, дацэнт Павел Іванавіч Навойчык.

Натхняльнае, цёплае выступленне П. І. Навойчыка стала ўжо слаўнай традыцыяй: менавіта Павел Іванавіч адкрыў першую канферэнцыю ў 2010 годзе, і вось ужо пятая сустрэча маладых філолагаў пачынаецца з яго прывітання. Намеснік дэкана падкрэсліў выключную ролю моладзі ў навуцы, заўважыў, што менавіта ў маладосці людзі не баяцца выйсці за межы добра вядомых ісцін і задаць сабе пытанне: а што там далей? Для развіцця навукі гэтае пытанне асабліва каштоўнае. Натхніў аўдыторыю і кароткі аповед П. І. Навойчыка пра дасціпную гіпотэзу наяўнасці ў людзей «гена геніяльнасці». 

Старшыня Савета маладых вучоных філалагічнага факультэта БДУ кандыдат філалагічных навук Вольга Уладзіміраўна Зуева падзякавала калегам за цікавасць да канферэнцыі і, ўспомніўшы пра тое, што камунікацыя моладзі адбываецца пераважна ў віртуальнай прасторы, адзначыла: каштоўнасць удзелу ў канферэнцыі не толькі ў апрабацыі навуковых гіпотэз, але і ў жывых зносінах з аднадумцамі.

На пленарным пасяджэнні выступілі аспірант філалагічнага факультэта БДУ Аляксандр Віктаравіч Яфімаў з дакладам «Барацьба з ідэалізмам і літаратуразнаўства: асобныя рэлікты ў сучаснай навуцы»; старшы выкладчык кафедры рускай мовы філалагічнага факультэта БДУ Ала Аляксандраўна Занкавец з дакладам «“Будзем мове вучыцца, пакуль смерць не лучыбба”: тыповыя памылкі вучняў у лінгвістычных заданнях па беларускай мове»; аспірант Гродзенскага дзяржаўнага ўніверсітэта імя Янкі Купалы Вольга Артураўна Грыневіч з дакладам «Сядзібная паэзія XVIII стагоддзя: тэкст і кантэксты»; аспірант Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Дзмітрый Уладзіміравіч Сківіцкі з дакладам «Тэарэтычная праблематыка развіцця беларускай тэалінгвістыкі ў межах славянскай тэалінгвістыкі». Кожнае выступлення суправаджалася дыскусіяй, часам вельмі гарачай.

У межах канферэнцыі працавалі восем секцый: «Тэарэтычная і функцыянальная граматыка», «Пытанні сучаснай лексікалогіі і фразеалогіі. Моўная карціна свету», «Сацыяльная лінгвістыка», «Мова і стыль мастацкай літаратуры», «Гісторыя моў і гісторыя мовазнаўства», «Узаемадзеянне моў і праблемы перакладу», «Тэорыя літаратуры. Гісторыя літаратуры. Сучасны літаратурны працэс», «Методыка выкладання мовы і літаратуры».

Тэматыка лінгвістычных дакладаў адлюстроўвае цікавасць маладых даследчыкаў да вывучэння сувязей мовы і нацыянальнай культуры, мовы і асобы, да сацыяльна-псіхалагічных аспектаў маўленчай дзейнасці. Літаратуразнаўцы звяртаюцца да пытанняў паэтыкі мастацкага твора, прапануюць новыя інтэрпрэтацыі класікі, цікавяцца літаратурным працэсам сярэдзіны ХХ – пачатку ХХІ стагоддзяў.

Старшыні секцый адзначылі праблемны характар, актуальнасць і навізну дакладаў, валоданне аўтарамі метадалогіяй філалагічных даследаванняў, высокі ўзровень дыскусій.

V Рэспубліканская навукова-практычная канферэнцыя маладых навукоўцаў «Мова і літаратура ў ХХІ стагоддзі: актуальныя аспекты даследавання» выявіла багаты патэнцыял нацыянальнай філалагічнай навукі. Безумоўна, канферэнцыя спрыяла развіццю навуковай думкі Беларусі і інтэграцыі беларускай даследчыцкай суполкі.

Па выніках канферэнцыі рыхтуецца зборнік навуковых прац.

Круглы стол «Роля жанчыны ў захаванні нацыянальных традыцый і сямейных каштоўнасцей»

ГА «Саюз жанчын БДУ» запрашае прыняць удзел у працы круглага стала «Роля жанчыны ў захаванні нацыянальных традыцый і сямейных каштоўнасцей», які адбудзецца 10 красавіка 2019 г. 16.00, г. Мінск, К. Маркса 31, аўдыторыя 210.

У межах круглага стала прагучаць даклады навукоўцаў з філалагічнага, гістарычнага факультэтаў, ФФСН БДУ. Мэта мерапрыемства – актуалізаваць праблему ўкладу жанчын у захаванне і перадачу нацыянальных традыцый, паказаць значэнне іх прац у рэалізацыі задач сацыяльнага развіцця і дэмаграфічнай палітыкі, фарміраванні каштоўнаснай асновы выхавання новага пакалення. Дадзены круглы стол – адно з юбілейных мерапрыемстваў, прысвечаных святкаванню 20-годдзя ГА «Саюз жанчын БДУ». Па выніках працы круглых сталоў і дыскусій будзе выдадзены электронны дэпаніраваны зборнік навуковых матэрыялаў і размешчаны ў электроннай бібліятэцы БДУ.

Адкрытая лекцыя-дыскусія «Пімен Панчанка: сын ці пасынак эпохі?»

21 сакавіка загадчык кафедры гісторыі беларускай літаратуры БДУ прафесар Алесь Іванавіч Бельскі прапанаваў увазе студэнтаў і калег адкрытую лекцыю-дыскусію «Пімен Панчанка: сын ці пасынак эпохі?». Звычайна лекцыйныя тэмы маюць фармулёўкі «Жыццё і творчасць...», «Жыццёвы і творчы шлях...». Прафесар А. І. Бельскі прапаноўвае абнаўляць падыходы да выкладання беларускай літаратуры, больш актыўна звяртацца да новых форм, метадаў і тэхналогій навучання. Ён стварыў лекцыю праблемна-дыскусійнага характару, сінтэтычнага і інтэрактыўнага тыпу. У гэтым яму дапамагла інавацыйная пляцоўка на філалагічным факультэце — аўдыторыя «Народныя паэты і пісьменнікі Беларусі» і створаны аднайменны інтэрнэт-сайт, які змяшчае разнастайныя навуковыя, вучэбна-метадычныя і мультымедыйныя матэрыялы для забеспячэння адукацыйна-выхаваўчага працэсу.

На лекцыі паспяхова рэалізавана стратэгія актыўнага навучання: была створана праблемная сітуацыя, пры яе абмеркаванні і вырашэнні скарыстаны метад крытычнага мыслення, задзейнічаны эўрыстычныя прыёмы, мультымедыйныя сродкі і інфармацыйна-пошукавыя сістэмы. У ходзе лекцыйных заняткаў была прадэманстравана праца ў аўдыторыі з інфармацыяй на стэндах, узаемадзеянне з інтэрнэт-сайтам (біяграфія народнага паэта, метадычныя і навукова-даследчыя матэрыялы, бібліяграфічны спіс і інш.). Кожны з чатырох кадрапланаў змяшчаў спецыяльна падрыхтаваны відэаролік, у канцы адбылося знаёмства з кніжна-бібліяграфічнай выставай. Апрача студэнтаў 3 курса спецыяльнасці «Беларуская філалогія», якім адрасавалася лекцыя, у аўдыторыі прысутнічалі выкладчыкі і аспіранты, якія атрымалі карысны педагагічны вопыт і, галоўнае, далучыліся да супольнага асэнсавання актуальнай праблемы стаўлення да літаратурнай спадчыны.

Навуковыя чытанні,  прысвечаныя 70-годдзю з дня нараджэння прафесара Любові Адамаўны Антанюк

26 красавіка (пятніца) 2019 г. на філалагічным факультэце адбудуцца навуковыя чытанні,  прысвечаныя 70-годдзю з дня нараджэння прафесара Любові Адамаўны Антанюк.

Тэматыка навуковых чытанняў:

  • • Навуковая спадчына Л. А. Антанюк;
  • • Тэрміналогія беларускай мовы: стан, даследаванне, перспектыўныя напрамкі развіцця;
  • • Спецыяльная лексіка беларускай мовы: сучасны стан і гісторыя фарміравання;
  • • Метадычныя аспекты выкладання спецыяльнай лексікі беларускай мовы ва ўстановах вышэйшай адукацыі.

Запрашаем усіх зацікаўленых!

Больш падрабязная інфармацыя тут

Міжнародны навукова-метадычны анлайн-семінар «Актуальныя пытанні класічнай філалогіі»

Міжнародны навукова-метадычны анлайн-семінар «Актуальныя пытанні класічнай філалогіі» адбыўся 15 сакавіка 2019 г. у кабінеце грэчаскай філалогіі (філалагічны факультэт БДУ).

Вэбінар аб’яднаў спецыялістаў па класічнай філалогіі  з МДУ імя М.В. Ламаносава (г. Масква), ПетрДУ (г. Петразаводск), КФУ імя У.І. Вярнадскага (г. Сімферопаль) і БДУ. Праблемнае поле вэбінара ˗ новыя формы і метады ў выкладанні класічных моў у сучасным свеце.

Ад БДУ выступіла праф. Н.Б. Мячкоўская з дакладам «Грэка-лацінскія кантынуанты: лёсы слоў як дакументы гісторыі і як факты лінгвістыкі ўніверсалій», у якім расказала пра спецыфіку новага курса для магістрантаў «Грэка-лацінская тэрміналогія ў сучаснай навуковай лексіцы». Дац. В.Г. Пракапчук і дац. К.А. Тананушка ў дакладзе «Выкарыстанне магчымасцей дыстанцыйнага навучання пры выкладанні дысцыпліны “Лацінская мова” (на прыкладзе спецыяльнасці “Беларуская філалогія”)» падзяліліся вопытам працы на адукацыйным партале філалагічнага факультэта (https://eduphil.bsu.by) з выкарыстаннем інфармацыйна-камунікацыйных тэхналогій (прэзентацыя).

Удзельнікі анлайн-семінара пагадзіліся, што ў выкладанні класічных моў наспела неабходнасць выйсця за межы традыцыйнай схемы навучання і больш шырокага ўжывання новых форм і метадаў, у прыватнасці, выкарыстання эўрыстычных заданняў пры арганізацыі кіраванай самастойнай працы ў дыстанцыйнай форме.

VII Мінскі фестываль моў

31 сакавіка 2019 года філалагічны факультэт БДУ ужо ў сёмы раз сабраў мінскіх аматараў замежных моў і лінгвістыкі на Фестываль моў.

Як заўсёды, на Фестывалі знаўцы моў у фармаце кароткіх і займальных 45-хвілінных лекцый знаёмілі прысутных з фанетыкай, граматыкай і гісторыяй моў, чыталі вершы, спявалі песні, расказвалі пра культуру носьбітаў гэтых моў. У гэтым годзе было прадстаўлена роўна 50 моў. Упершыню ў Мінску ў межах Фестывалю прагучалі прэзентацыі мірандскай (мова на поўначы Партугаліі), баскскай (мова на мяжы Іспаніі і Францыі, якая не мае роднасных), авестыйскай (сакральная мова зараастрыйцаў), арчынскай (мова аднаго аула ў Дагестане), грэнландскай (мова буйнейшага ў свеце вострава), старажытнаскандынаўскай (продак усіх сучасных паўночнагерманскіх моў) і саамскіх моў (група фіна-вугорскіх моў, распаўсюджаных на поўначы Еўропы). Італьянскую мову ў гэтым годзе прадстаўляў яе носьбіт Андрэа дзі Стэфана з Мілана, іспанскі гутарковы клуб правёў венесуэлец Хасэ Піньера, а пра мову хіндзі і штучную мову эсперанта прыехаў расказаць дацэнт кафедры біялагічнай хіміі Гомельскага дзяржаўнага медыцынскага ўніверсітэта Аляксандр Коваль. У гэтым годзе сярод лектараў было асабліва шмат удзельнікаў, якія спецыяльна прыехалі ў Мінск з розных гарадоў і краін на Фестываль: літоўскі гутарковы клуб і старажытнаанглійскую мову «прывезлі» з Масквы, латышскую – з Санкт-Пецярбурга, малыя мовы Еўропы – з Чэлябінска, каталонскую – з Алікантэ (Іспанія), ідыш – з Ены (Германія), а беларускую мову вачыма замежніка прадставіў славіст Рубэн Бівальд з Гісэна (Германія).

Яшчэ адной асаблівасцю Фестывалю гэтага года стала вялікая колькасць лекцый – 24. Больш за 250 чалавек прыйшлі паслухаць лекцыю маскоўскага фалькларыста і антраполага Аляксандры Архіпавай пра савецкія таемныя мовы, каля 200 чалавек – лекцыю магістра ўніверсітэта Трэнта (Італія) Ксеніі Дзмітрыевай пра білінгвізм з пункту гледжання нейралінгвістыкі.

З поўнай праграмай Фестывалю можна азнаёміцца на яго сайце.

На філалагічным факультэце адбылося адкрыццё кабінета грэчаскай філалогіі

12 сакавіка 2019 г. на філалагічным факультэце БДУ адбылося ўрачыстае адкрыццё кабінета грэчаскай філалогіі (аўд. 207).

У мерапрыемстве прынялі ўдзел Ганаровы консул Грэцыі ў Беларусі Павел Георгіевіч Тапузідзіс, рэктар БДУ Андрэй Дзмітрыевіч Кароль, дэкан філалагічнага факультэта Іван Сямёнавіч Роўда, загадчык кафедры класічнай філалогіі Вольга Генрыхаўна Пракапчук, студэнты і выкладчыкі філалагічнага факультэта.

Рэктар БДУ А. Д. Кароль падкрэсліў унікальнасць кафедры класічнай філалогіі, пры якой будзе дзейнічаць кабінет, і адзначыў, што «тэхнічнае забеспячэнне кабінета дазволіць выкарыстоўваць сучасныя інавацыйныя тэхналогіі, а студэнту – рэалізаваць свае адукацыйныя мэты, лепш пазнаць сябе».

Ганаровы консул Грэцыі ў Беларусі П. Г. Тапузідзіс адзначыў, што знаёмства з культурай, гісторыяй і традыцыямі іншай краіны немагчыма без валодання яе мовай, і выказаў упэўненасць, што намаганні выкладчыкаў і тэхнічнае забеспячэнне кабінета дапамогуць студэнтам авалодаць грэчаскай мовай.

Са словамі падзякі Ганароваму консулу і кіраўніцтву БДУ за падтрымку ў адкрыцці кабінета грэчаскай філалогіі звярнуўся дэкан філалагічнага факультэта І. С. Роўда. Дэкан адзначыў, што сёння студэнты спецыяльнасці «Класічная філалогія» – адзіныя ў Беларусі, хто вывучае старажытна- і навагрэчаскую мовы, – змогуць займацца ў шматфункцыянальнай навучальнай аўдыторыі інавацыйнага тыпу. Забяспечанасць сучаснай мультымедыйнай тэхнікай дазволіць студэнтам ажыццяўляць праектна-даследчую дзейнасць, а выкладчыкам – праводзіць заняткі ў крэатыўнай форме.

Загадчык кафедры класічнай філалогіі В. Г. Пракапчук выказала ўпэўненасць, што кабінет стане пляцоўкай для правядзення розных адукацыйных, навуковых і культурных мерапрыемстваў, рэалізацыі шматлікіх даследчых і творчых праектаў, звязаных з Грэцыяй.

Таксама на цырымоніі выступілі студэнты-класікі, якія па-грэчаску падзякавалі Ганароваму консулу, а затым прадэкламавалі першыя радкі «Іліяды» Гамера на старажытнагрэчаскай, навагрэчаскай і беларускай мовах.

Напрыканцы дацэнт кафедры класічнай філалогіі Д. М. Гоман прадэманстраваў прэзентацыю да Дня незалежнасці Грэцыі, які адзначаецца 25 сакавіка.

Кабінет грэчаскай філалогіі абсталяваны смарт-тэлевізарам для паказу прэзентацый, вучэбных відэаролікаў і фільмаў з камп’ютара, флэш-карты і мабільнага тэлефона. Вялікую карысць для праектнай практыка-арыентаванай дзейнасці студэнтаў будзе мець і шматфункцыянальная прылада, якая сумяшчае ў сабе каляровы прынтар, сканар і ксеракс. Наглядныя матэрыялы (стэндавыя панэлі з грэчаскім алфавітам і парадыгмамі спражэння і скланення, карта Грэцыі, выявы выдатных мясцін) дапамогуць выкладчыкам аптымізаваць вучэбны працэс. Арыгінальная модульная мэбля кабінета прадугледжвае мноства варыянтаў рассадкі, як для індывідуальнай працы, у міні-групах, так і за круглым сталом. Невялікае памяшканне перад новым кабінетам будзе выкарыстоўвацца як пакой для самападрыхтоўкі студэнтаў да заняткаў.

Адкрыццё кабінета будзе садзейнічаць умацаванню культурных і навуковых сувязяў паміж Грэцыяй і Беларуссю, актывізацыі навуковых кантактаў у акадэмічнай супольнасці дзвюх краін.

БДУ з’яўляецца адзінай ВНУ ў Беларусі, якая рыхтуе спецыялістаў па старажытнагрэчаскай і навагрэчаскай мовах. У БДУ на філалагічным факультэце спецыяльнасць «Класічная філалогія» адкрыта ў 1994 годзе. За гэты перыяд адбылося шэсць выпускаў спецыялістаў – гэта больш за 90 філолагаў-класікаў.

Выпускнікі працуюць на гуманітарных факультэтах вядучых навучальных устаноў краіны (у медыцынскіх універсітэтах, каледжах), аддзелах рэдкіх кніг Нацыянальнай бібліятэкі і Навуковай бібліятэкі НАН Беларусі, а таксама ў Нацыянальным архіве. Выпускнікі супрацоўнічаюць з турфірмамі і з’яўляюцца гідамі ў Грэцыі, ажыццяўляюць пераклады з навагрэчаскай мовы для Беларускай гандлёва-прамысловай палаты, іншых устаноў і прыватных асоб.

Адкрыты конкурс дэкламацыі антычнай паэзіі «Ad Melpomenen» («Да Мельпамены»)

Каб адчуць прыгажосць і адвечнасць антычнай паэзіі, можна неяк увечары пагартаць томік Гамера альбо Гарацыя, але каб адчуць сапраўдную асалоду ад велічных гекзаметраў ці ад кплівых ямбаў, іх абавязкова трэба пачуць на ўласныя вушы! А яшчэ лепей прачытаць іх уголас, адчуўшы сябе амаль што элінскім песняром ці дасведчаным рымскім патрыцыем.   Конкурс дэкламацыі адбудзецца 15 красавіка ў 14.30 на філалагічным факультэце БДУ (вул. К. Маркса, 31, аўд. 210). Кафедра класічнай філалогіі запрашае ўсіх, хто цікавіцца антычнай паэзіяй, прыняць удзел у наступных намінацыях:

«Арыгінал»: дэкламацыя арыгінальнага антычнага паэтычнага твора на лацінскай або старажытнагрэчаскай мове;

«Літаратурны пераклад»: дэкламацыя літаратурнага перакладу антычнага паэтычнага твора на беларускай альбо рускай мове;

«Уласны пераклад»: дэкламацыя ўласнага перакладу антычнага паэтычнага твора;

«Аўтарскі тэкст»: дэкламацыя ўласнага паэтычнага твора на антычную тэматыку;

«Фрыстайл»: дэкламацыя літаратурнага паэтычнага твора на антычную тэматыку.

Рэгістрацыя ўдзельнікаў конкурсу ажыццяўляецца да 13 красавіка.  Падрабязная інфармацыя аб умовах конкурсу на старонцы кафедры  (graecolatini.by/admelpomenen.htm).

Арганізатары конкурсу таксама прапануюць усім зацікаўленым пазмагацца за Прыз глядацкіх сімпатый і з гэтай мэтай запісаць і запампаваць на Youtube уласны аматарскі відэаролік з запісам сваёй дэкламацыі. Пераможца будзе вызначаны журы пасля падліку набраных ролікам «лайкаў».

Тыдзень роднай мовы

З 21 па 28 лютага на філалагічным факультэце прайшоў Тыдзень роднай мовы.

У чацвер адбылося ўрачыстае адкрыццё Тыдня роднай мовы. Падрыхтаваная студэнтамі нашага факультэта канцэртная праграма падарыла прысутным шанец пачуць 16 моў свету, 15 з якіх вывучаюцца на філфаку. За такую магчымасць студэнтам падзякавалі і ганаровыя госці імпрэзы: прарэктар па выхаваўчай рабоце і сацыяльных пытаннях І.І. Янушэвіч, дэкан філалагічнага факультэта І.С. Роўда, акадэмік НАН Беларусі А.А. Лукашанец, намеснік дырэктара па навукова-даследчай рабоце Нацыянальнага інстытута адукацыі В.У. Зелянко і паэт А.М. Зэкаў.

На наступны дзень інтэлектуальна-пазнавальная гульня «Філалогія і Я» працягнула шэраг святочных мерапрыемстваў. Першакурснікі спецыяльнасцей «Беларуская філалогія», «Руская філалогія», «Славянская (руска-беларуская) філалогія» спаборнічалі ў наступных намінацыях: «Рэклама», «КВЗ», «Міні-паэма пра беларускую мову», «Песня з 10 лінгвістычнымі тэрмінамі», «Беларуская мова і літаратура». Заслужаную перамогу атрымала 1-ая беларуская група. Напісаная яе старастай песня «Глядзець на свет праз флексію нулявую…» стала сапраўдным гімнам групы і яшчэ доўга будзе гучаць у галаве ўсіх гасцей мерапрыемства.

25 лютага для студэнтаў адчыніла дзверы лінгвістычна-дыскусійная гасцёўня «Яны змаглі, а Ты зможаш?» Юныя філолагі пераканаліся, што любоў да слова і бізнес выдатна працуюць разам. Госці сустрэчы на асабістым досведзе даказалі, што філолаг – прафесія ўніверсальная. У ліку спікераў была выпускніца філфака, а сёння дырэктар «Цэнтра славянскіх моў і культур» Ірына Зімнева, а таксама дацэнт кафедры тэарэтычнай і інстытуцыянальнай эканомікі Любоў Шумская. Спікеры падзяліліся ўласным досведам, а пасля студэнты-філолагі прэзентавалі свае бізнес-планы: ад ідэі пракату ровараў да стварэння літаратурнай кавярні.

На наступны дзень студэнтаў і гасцей факультэта чакала прэзентацыя кнігі В.П. Лемцюговай і І.А. Гапоненка «Карані нашых прозвішчаў». Сярод іншых на мерапрыемства быў запрошаны і дырэктар Інстытута мовазнаўства Ігар Лявонавіч Капылоў. Ён выказаў трапную думку: «Для таго, каб захаваць мову, патрэбна захаваць сувязь пакаленняў. Гэта было пацверджана яго аповедам пра Валянціну Пятроўну Лемцюгову і яе дачку Гапоненка Ірыну Алегаўну. На жаль, Валянціна Пятроўна не дажыла да выхаду ў свет кнігі, якая была напісана ў суаўтарстве з дачкой, але Ірына Алегаўна, гаворачы пра гісторыю стварэння кнігі, выказала спадзеў: «Хочацца верыць, што гэта не канец, а толькі пачатак навуковага даследавання».

27 лютага стала Днём беларускага перакладу. На філфаку адбылася прэзентацыя новых беларускіх перакладаў твораў знакамітых замежных пісьменнікаў. Сярод новых выданняў – серыі перакладаў «Паэты Планеты» і «Драматургі свету», беларускамоўная версія кнігі Джэйн Остэн «Пыха і перадузятасць». Падчас прэзентацыі не забылі і пра выкладчыкаў філалагічнага факультэта, якія зрабілі вялікі ўнёсак у справу беларускага перакладу.

28 лютага Тыдзень роднай мовы завяршыўся Днём беларускай дзяржаўнасці. Тэматычную лекцыю для студэнтаў прачыталі загадчык кафедры гісторыі Беларусі Новага і Найноўшага часу, кандыдат гістарычных навук, дацэнт Макарэвіч Віталій Сяргеевіч і загадчык кафедры гісторыі Беларусі старажытнага часу і сярэдніх вякоў, кандыдат гістарычных навук, дацэнт Падалінскі Уладзімір Аляксеевіч. Заключная імпрэза Тыдня роднай мовы прайшла для прысутных пазнавальна і натхняльна, што да вывучэння гісторыі свайго краю.

Такім чынам, за тыдзень студэнты і госці філфака ўпэўніліся ў надзвычайнай шматграннасці філалогіі, а таксама яе чароўнай здольнасці аб’ядноўваць такіх розных, не падобных адзін да аднаго аматараў слова.

 

Festival Européen Latin Grec прыйшоў на філфак

Сёлета ў Еўрапейскім лаціна-грэчаскім фестывалі ў Ліёне (Францыя) ўпершыню прынялі ўдзел выкладчыкі і студэнты кафедры класічнай філалогіі БДУ. Беларускі фільм, прысвечаны дэкламацыі «Іліяды» Гамера, быў уключаны арганізатарамі ў плэй-ліст фестывалю пад нумарам адзін.

Місія фестывалю – папулярызацыя антычнай культурнай спадчыны. Адным з традыцыйных, найбольш важных і маштабных мерапрыемстваў з’яўляюцца публічныя чытанні антычных тэкстаў, якія праводзяцца дыстанцыйна ўдзельнікамі фестывалю ў розных краінах. Кожны год тэмай мерапрыемстваў становіцца адзін з найбуйнейшых твораў Антычнасці. Festival Européen Latin Grec 2019 прысвечаны «Іліядзе» Гамера. Сёлета неўміручыя радкі прагучалі ў выкананні выкладчыкаў, студэнтаў, навучэнцаў і энтузіястаў з пяці кантынентаў. У публічных чытаннях прынялі ўдзел прадстаўнікі буйных універсітэтаў, такіх як Оксфард, Франкфурцкі ўніверсітэт, Варшаўскі ўніверсітэт, Каліфарнійскі ўніверсітэт, Універсітэт Паўночнай Караліны, Нацыянальны ўніверсітэт Аўстраліі і інш., а таксама каледжаў, гімназій і школ. Вершы Гамера прагучалі на старажытнагрэчаскай, лацінскай, англійскай, італьянскай, французскай, нямецкай, рускай, польскай, чэшскай, японскай, кітайскай, карэйскай і іншых мовах.

19 сакавіка ў кабінеце грэчаскай філалогіі філалагічнага факультэта БДУ прайшла адкрытая лекцыя «Гамер і яго паэмы “Іліяда” і “Адысея”», якую выкладчыкі кафедры і студэнты II курса спецыяльнасці «Класічная філалогія» арганізавалі для навучэнцаў ДУА СШ № 66. У адпаведнасці з прынцыпам «роўны навучае роўнага» студэнты распавялі школьнікам пра вялікага Гамера і яго творчасць, прадэманстраваўшы ў прэзентацыі творы антычнага вазапісу, еўрапейскага жывапісу і сучаснага кінематографа на сюжэты «Іліяды». Дацэнт кафедры Я. У. Прыстаўка ажывіў пачатковыя радкі «Іліяды» на старажытнагрэчаскай мове з дапамогай рэканструкцыі эпічнага спеву.

Таксама перад школьнікамі быў выкананы адзін з самых эмацыйных эпізодаў «Іліяды» – «Спатканне Гектара з Андрамахай» у перакладзе на беларускую мову Ю. Дрэйзіна. У ролі дэкламатараў выступілі старшы выкладчык Ю. А. Сядзініна-Баркоўская, дацэнт Я. У. Прыстаўка і студэнты М. Варанцоў, А. Кунцэвіч, К. Пашукевіч і К. Сянько.

Матэрыялы адкрытай лекцыі сталі асновай фільма, створанага для Festival Européen Latin Grec 2019 дацэнтам кафедры класічнай філалогіі К. А. Тананушкам. У ролік увайшлі ўрыўкі з I, VI і XXII песень «Іліяды» на старажытнагрэчаскай мове і ў перакладах на беларускую мову Б. Тарашкевіча і Ю. Дрэйзіна. Тэкст дэкламавалі выкладчыкі кафедры, магістранты і студэнты спецыяльнасці «Класічная філалогія». Кіраўніком праекта выступіла заг. кафедры класічнай філалогіі В. Г. Пракапчук. Вынік работы быў размешчаны на YouTube-канале Festival Européen Latin Grec (https://www.youtube.com/playlist?list=PL_s7Vs109jqIhAY_2zW-WqfYRDrqdVbUK).

Festival Européen Latin Grec быў заснаваны ў 2005 годзе. Партнёрамі мерапрыемства з’яўляюцца міжнародныя грамадскія арганізацыі, установы адукацыі, музеі, у тым ліку Асацыяцыя Athéna – міжнародная грамадская арганізацыя, якая падтрымлівае тых, хто цікавіцца антычнымі цывілізацыямі; Асацыяцыя выкладчыкаў класічных моў і антычнай культуры ARELAL; Ліёнскі музей выяўленчых мастацтваў і інш. Праграма фестывалю ўключае канферэнцыі, тэматычныя экспазіцыі ў музеях, спектаклі, кінапаказы, гульні, конкурсы, рэканструкцыі, спартыўныя мерапрыемствы.