Адбылося ўзнагароджванне лаўрэатаў конкурсу «Слаўная кампанія: рэANIMAцыя»

Урачыстая цырымонія ўзнагароджвання лаўрэатаў конкурсу біяграфічных твораў «Слаўная кампанія: рэANIMAцыя», прымеркаванага да Году малой радзімы, адбылася ў час працы ХХVI Мінскай міжнароднай кніжнай выставы ў канферэнц-зале выставачнага цэнтра «БелЭкспа» (Мінск, пр. Пераможцаў, 14).

Конкурс меў наступныя асноўныя мэты: заахвочванне літаратараў да працы ў рэчышчы дакументальна-мастацкай творчасці і стварэнне якасных біяграфічных твораў, прысвечаных жыццяпісам беларускіх пісьменнікаў ХІХ стагоддзя. Сябрамі журы ад кафедры гісторыі беларускай літаратуры БДУ сталі: д.ф.н., прафесар Людміла Сінькова, к.ф.н., дацэнт Ірына Багдановіч, к.ф.н., дацэнт Ігар Запрудскі, а таксама галоўны рэдактар часопіса «Маладосць» Святлана Воцінава, ад Нацыянальнага інстытута адукацыі к.ф.н. Ірына Шаўлякова-Барзенка. (Больш падрабязна тут) Інфармацыя пра Конкурс была абвешчана ў рэспубліканскіх СМІ і на сайтах Арганізатараў. ІІІ этапы Конкурсу праводзіліся з 23 красавіка па 21 снежня 2018 года. Удзел у Конкурсе ўзялі 25 аўтараў з розных рэгіёнаў Беларусі.

Першыя 4 месцы занялі адпаведна Маргарыта Латышкевіч, Надзея Скрыпнік, Аліна Агрэніч і Таццяна Кохан, якія былі ўзнагароджаны ДЫПЛОМАМІ за подпісам Міністра інфармацыі Беларусі. Калегіяльна журы вырашыла заахвоціць яшчэ 6 удзельнікаў: Цімура Буйко, Уладзіміра Мажылоўскага, Міхаліну Бурвіну, Глеба Ганчарова, Ягора Конева і Таццяну Кіявіцкую. Яны атрымалі ГРАМАТЫ Выдавецкага дома «Звязда», якія ўручыў дырэктар – галоўны рэдактар гэтай установы Павел Сухарукаў. Усе лаўрэаты былі ўзнагароджаны таксама ПАДЗЯКАМІ дэкана філалагічнага факультэта БДУ Івана Роўды. Іх уручыў намеснік дэкана па навуковай рабоце Павел Навойчык, які выступіў з прывітальным словам на адкрыцці цырымоніі. Удзельнікаў конкурсу і прысутных прывіталі таксама П.Сухарукаў, які канстатаваў знакавасць конкурсу «Слаўная кампанія: рэANIMAцыя», Гюльнара Юсцінская (Нацыянальны інстытут адукацыі), д.ф.н. Ганна Кісліцына (Нацыянальная акадэмія навук), сябры журы І. Багдановіч і І. Шаўлякова-Барзенка.

Пасля цырымоніі ўзнагароджвання выступілі ўсе лаўрэаты Конкурсу. Яны шчыра падзяліліся сваімі ўражаннямі і цяжкасцямі, якія паўсталі пры напісанні твораў. «Я вельмі ўдзячны арганізатарам за ідэю конкурсу. Было б добра, каб ён увогуле стаў традыцыяй», – адзначыў вядомы пісьменнік і лаўрэат Конкурсу Ягор Конеў. На жаль, з 14 беларускіх пісьменнікаў ХІХ ст., прапанаваных арганізатарамі для дакументальна-мастацкага асэнсавання, толькі 5 былі прысвечаны творы, якія адпавядалі тром галоўным патрабаванням: адлюстраваць увесь жыццёвы і творчы шлях літаратара (а не эпізоды з яго біяграфіі), арыентавацца на займальнасць і чытацкія густы моладзевай аўдыторыі і прапанаваць тэкст высокай мастацкай вартасці. 5 лепшых твораў, якія адпавядаюць гэтым крытэрыям, – «Жыў-быў Вінцэсь» Т. Кіявіцкай пра Вікенція Равінскага, «Крыж ценю на каляінах» М. Латышкевіч пра Яна Баршчэўскага, «Успаміны» Т. Кохан пра Яна Чачота, «Пчала ў вязніцы» Ц. Буйко пра Пранціша Вуля і «Крыло, працятае стралой» Г. Ганчарова пра Янку Лучыну – склалі зборнік, рукапіс якога здадзены ў выдавецтва «Мастацкая літаратура» і павінен выйсці на працягу бягучага года. Галоўны рэдактар выдавецтва Віктар Шніп у выступленні адзначыў карыснасць Конкурсу як для развіцця сучаснай літаратуры, так і для захавання беларускай культуры. Асаблівая ўдзячнасць ад імя арганізатараў Конкурсу была выказана Міністру інфармацыі Беларусі Алесю Карлюкевічу і дацэнту кафедры гісторыі беларускай літаратуры Паўлу Навуменку за разуменне важнасці ініцыятывы і яе падтрымку.

Вінцэнт Дунін-Марцінкевіч (1808 – 1884), Франц Савіч (1815 – 1845), Арцём Вярыга-Дарэўскі (1816 – 1884), Уладзіслаў Сырако́мля (1823 – 1862), Вінцэсь Каратынскі (1831 – 1891), Кастусь Каліноўскі (1838 – 1864), Альгерд Абуховіч (1840 – 1898), Францішак Багушэвіч (1840 – 1900), Эліза Ажэшка (1841 – 1910), Зоф’я Манькоўская (1847 – 1911), Войслаў Савіч-Заблоцкі (1850 – пасля1893), Адам Гурыновіч (1869 – 1894) чакаюць сваіх удзячных біёграфаў.

У красавіку 2019 года арганізатары Конкурсу маюць намер абвясціць яго другі тур.

Даведачная інфармацыя.

Ініцыятарам і арганізатарам Конкурсу выступіла кафедра гісторыі беларускай літаратуры філалагічнага факультэта БДУ сумесна з рэдакцыяй часопіса «Маладосць» Выдавецкага дома «Звязда» пры інфармацыйнай падтрымцы «Нацыянальнага інстытута адукацыі».

Конкурс праводзіўся ў 2018 годзе ў першы раз. Упершыню быў укладзены зборнік дакументальна-мастацкіх біяграфій беларускіх пісьменнікаў ХІХ стагоддзя.

Заяўкі на ўдзел у Конкурсе падалі 46 чалавек. На адрас арганізатараў былі дасланы тэксты 25 гісторыка-біяграфічных твораў.

З 10 лаўрэатаў Конкурсу жыццё 6 так ці інакш звязана з філалагічным факультэтам БДУ.

Кантакты:

Кафедра гісторыі беларускай літаратуры філалагічнага факультэта БДУ,

Запрудскі Ігар Мікалаевіч, дацэнт, +375 29 636 47 01, Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.

Тыдзень беларускай мовы

Філалагічны факультэт Беларускага дзяржаўнага ўніверсітэта з 21 па 28 лютага 2019 г. праводзіць Тыдзень беларускай мовы, прымеркаваны да Міжнароднага дня роднай мовы.

Праграма Тыдня беларускай мовы

21 лютага 2019 г., чацвер,

1245 – 1415

(аўд. 304)

Міжнародны дзень роднай мовы ў БДУ

Удзел прымуць:

кіраўніцтва ўніверсітэта і факультэта;

першы намеснік дырэктара па навуковай рабоце «Цэнтра даследаванняў беларускай культуры, мовы і літаратуры» Нацыянальнай акадэміі навук Беларусі, доктар філалагічных навук, прафесар, акадэмік НАН Беларусі Аляксандр Аляксандравіч Лукашанец;

намеснік дырэктара Нацыянальнага інстытута адукацыі па навукова-даследчай рабоце, доктар педагагічных навук Вольга Уладзіміраўна Зелянко;

паэт, празаік Анатоль Мікалаевіч Зэкаў;

узорны вакальна-харэаграфічны ансамбль «Жалейка» ДУА «Цэнтр тэхнічнай і мастацкай творчасці дзяцей і моладзі Фрунзенскага раёна г. Мінска «Зорка» (кіраўнік – Алёна Васільеўна Туміловіч);

ансамбль цымбалістаў Рэспубліканскай гімназіі-каледжа пры Беларускай дзяржаўнай акадэміі музыкі (кіраўнік – Таццяна Глотава);

курсанты ваеннага факультэта Беларускай дзяржаўнай акадэміі авіяцыі.

Літаратурна-музычная кампазіцыя ў выкананні студэнтаў і замежных стажораў філалагічнага факультэта «Я слаўлю мову як яднання дар …» распавядзе пра ролю роднай мовы ў полікультурным асяроддзі. Творчыя нумары прагучаць на мовах, якія прафесійна вывучаюцца ў БДУ.

22 лютага 2019 г., пятніца,

1245 – 1415

(аўд. 304)

Інтэлектуальна-пазнавальная гульня «Філалогія і Я» з удзелам студэнтаў 1 курса спецыяльнасцей «Беларуская філалогія», «Руская філалогія» і «Славянская філалогія». Студэнтаў чакаюць «Рэкламны», «Вітальны», «Паэтычны», «Эўрыстычны», «Крэатыўны», «Фразеалагічны», «Літаратурны», «Песенны», «Музычны» конкурсы.

25 лютага 2019 г., панядзелак,

1245 – 1405

(аўд. 307)

Лінгвістычна- дыскусійная гасцёўня на тэму

«Яны змаглі, а ТЫ зможаш?»

 

Філолаг і бізнес? Ці гэта не фантазія?

«НЕ!» – адказвае былая студэнтка філфака, а сёння дырэктар ТАА «Славянскія мовы і культуры» І. Р. Зімнева.

«НЕ!» – упэўнена кажуць студэнты 3 курса рамана-германскай і ўсходняй філалогій, натхнёныя дацэнтам кафедры тэарэтычнай і інстытуцыянальнай эканомікі Л. І. Шумскай.

Маеш сумненні? Хочаш пераканацца? Прыходзь на фестываль бізнес-праектаў студэнтаў філалагічнага факультэта.

26 лютага 2019 г., аўторак,

1245 – 1405

(аўд. 47)

Беларускія прозвішчы: таямніцы паходжання і значэння

(прэзентацыя кнігі В. П. Лемцюговай, І. А. Гапоненка

«Корни наших фамилий/Карані нашых прозвішчаў» –

Мінск: Выдав. дом «Звязда», 2018. – 672 с.)

Да ўдзелу запрошаны:

дырэктар Інстытута мовазнаўства імя Якуба Коласа Нацыянальнай акадэміі навук Беларусі Ігар Лявонавіч Капылоў;

ксёндз-магістр, пробашч Касцёла Святога Сымона і Святой Алены Уладзіслаў Завальнюк;

беларусавед Валянціна Карлаўна Раманцэвіч.

27 лютага 2019 г., серада,

1245 – 1415

(аўд. 304)

Дзень беларускага перакладу

«Дзе слова шукае Слова...»: замежная літаратура ў беларускіх перакладах

Удзел прымуць:

выкладчыкі кафедры замежнай літаратуры і выпускнікі-перакладчыкі з замежных моў філалагічнага факультэта БДУ;

вучні ДУА «СШ № 197» г. Мінска;

танцавальна-спартыўны клуб «Фаварыт» Першамайскага раёна г. Мінска (кіраўнік – Аляксандр Шаблоўскі).

Адбудзецца прэзентацыя кніг замежных аўтараў у перакладах на беларускую мову, да выдання якіх спрычыніліся супрацоўнікі і выпускнікі кафедры замежнай літаратуры ў якасці перакладчыкаў, аўтараў прадмоў, рэдактараў, мастакоў. Слухачам будзе прапанаваны агляд кніжных серый перакладной літаратуры і тэматычных інфармацыйных рэсурсаў.

28 лютага 2019 г., чацвер,

1245 – 1405

(аўд. 210)

Дзень беларускай дзяржаўнасці

 

Публічная лекцыя «Беларуская дзяржаўнасць: ад вытокаў да сучаснасці» вядомага беларускага гісторыка, археолага, грамадскага дзеяча, дэпутата Палаты прадстаўнікоў Нацыянальнага сходу Рэспублікі Беларусь, старшыні Пастаяннай камісіі па адукацыі, культуры і навуцы, прафесара Ігара Аляксандравіча Марзалюка.

МІЖНАРОДНАЯ НАВУКОВАЯ КАНФЕРЭНЦЫЯ «КІТАЙСКА-БЕЛАРУСКІЯ МОЎНЫЯ, ЛІТАРАТУРНЫЯ І КУЛЬТУРНЫЯ СУВЯЗІ: ГІСТОРЫЯ І СУЧАСНАСЦЬ»

Кафедра кітайскай філалогіі Беларускага дзяржаўнага ўніверсітэта запрашае Вас прыняць удзел у Міжнароднай навуковай канферэнцыі “Кітайска-беларускія моўныя, літаратурныя і культурныя сувязі: гісторыя і сучаснасць”.

Канферэнцыя адбудзецца 17-18 мая 2019 года ў г. Мінску (пленарнае пасяджэнне: вул.Захарава, 28, Беларускае таварыства дружбы і культурнай сувязі з замежнымі краінамі; секцыйныя пасяджэнні: вул.К.Маркса, 31, корпус філалагічнага факультэта БДУ).

Больш падрабязная інфармацыя тут

Cерыя майстар-класаў па італьянскай мове для дзяцей

8 лютага ў межах XXVI Мінскай міжнароднай кніжнай выставы-кірмашу на стэндзе Пасольства Італьянскай Рэспублікі ў Мінску і выдавецтва «Loescher» адбылася серыя майстар-класаў па італьянскай мове для дзяцей. Чатыры міні-заняткі працягласцю 15 хвілін кожнае правялі студэнты 5 курса спецыяльнасці «Рамана-германская (італьянская) філалогія» Андрэева А., Літоўская Н., Аўчыннікаў В. і Парашчанка Д. пад кіраўніцтвам загадчыка кафедры раманскага мовазнаўства  Панцялеенка А. А. На занятках дзеці вывучылі назвы кветак, садавіны і гародніны на італьянскай мове, пагулялі, выкарыстоўваючы набытыя веды. Майстар-класы прайшлі ў займальнай форме, выклікалі вялікую зацікаўленасць і новыя ўражанні як у саміх студэнтаў, так і ў дзяцей. З гэтага бачна, што мерапрыемствы дадзенага характару накіраваны на распаўсюджванне інтарэсу да вывучэння італьянскай мовы і папулярызацыі італьянскай культуры.

Аспірантка філфака атрымала стыпендыю Прэзідэнта Рэспублікі Беларусь

Сярод 18 аспірантаў БДУ, якія атрымалі стыпендыю Прэзідэнта Рэспублікі Беларусь на 2019 год, ‒ Вольга Круглова, аспірантка кафедры гісторыі беларускай літаратуры філалагічнага факультэта.

28 лютага на кафедры паспяхова прайшло першаснае абмеркаванне кандыдацкай дысертацыі В.В. Кругловай на тэму «Творчасць Янкі Лучыны ў кантэксце станаўлення беларускай літаратуры ХІХ стагоддзя». У канцы мінулага года адбылася творчая камандзіроўка Вольгі Кругловай у Варшаўскі ўніверсітэт, яна плённа працавала ў замежных архівах і бібліятэках. На сёння аспірантка мае 26 навуковых публікацый, з іх ‒ 8 у рэцэнзаваных выданнях. В. Круглова брала ўдзел у 11 міжнародных і рэспубліканскіх навуковых канферэнцыях.

Срэценскі літаратурна-паэтычны вечар

Срэценскі літаратурна-паэтычны вечар адбыўся 15 лютага ў 19.00 на кафедры рускай літаратуры філалагічнага факультэта БДУ.

У ім прынялі ўдзел пачынаючыя і ўжо вядомыя беларускія паэты, выкладчыкі, студэнты і выпускнікі філалагічнага факультэта, а таксама госці з іншых навучальных устаноў. У цёплай камернай атмасферы прагучалі паэтычныя творы Вольгі Маркітантавай, Даны Корсік, Таццяны Светашовай, Кацярыны Стройлавай, Дарыі Скіруха, Таццяны Барысюк. Сапраўдным упрыгожваннем вечара стала выкананне выдатных рускіх рамансаў студэнтамі Беларускай дзяржаўнай акадэміі музыкі: Надзеі Міцэвіч, Дар’і Тарасевіч і Самары Хассун пад кіраўніцтвам выкладчыка-канцэртмейстара Святланы Сяргееўны Стэфаненка.

Навуковыя чытанні, прысвечаныя 90-годдзю Д.Я. Бугаёва

Выкладчыкі і студэнты, а таксама госці філалагічнага факультэта БДУ сустрэліся 26 лютага на навуковых чытаннях, прысвечаных 90-годдзю Дзмітрыя Якаўлевіча Бугаёва (1929 – 2017). Прафесар, лаўрэат Дзяржаўнай прэміі БССР імя Якуба Коласа, узнагароджаны Ганаровай граматай Вярхоўнага Савета БССР, член СП СССР (1961) і Беларускага ПЕН-цэнтра (1989), вядучы літаратурны крытык і літаратуразнаўца нашай краіны, Д.Я. Бугаёў 44 гады працаваў на кафедры беларускай літаратуры БДУ, куды быў запрошаны з Акадэміі навук у 1964 г.

Добрую славу ўніверсітэта, яго аўтарытэт мацуюць выбітныя вучоныя, якія выкладаюць у яго сценах. Пра гэта гаварылі дэкан філалагічнага факультэта прафесар І.С. Роўда і яго намеснікі,  дацэнты П.І. Навойчык і М.М. Хмяльніцкі. Калегі Д. Бугаёва па працы на кафедры беларускай літаратуры, прафесары В.П. Рагойша, Т.І. Шамякіна,  дацэнт А.Л. Верабей, вучоны сакратар Інстытута мовазнаўства НАН РБ В.У. Міцкевіч, старшы выкладчыкТ.В. Бельская (Каваленка) прыгадалі найбольш вядомыя манаграфічныя працы Дзмітрыя Бугаёва, звязаныя з увядзеннем у навуковы ўжытак той спадчыны, якая была выкасавана з гісторыі беларускай літаратуры ў 1930-я гг., а сёння з’яўляецца хрэстаматыйнай класікай. Пра педагагічны талент і пасіянарнасць асобы Д. Бугаёва-крытыка гаварыла былая аспірантка Дзмітрыя Якаўлевіча, прафесар факультэта журналістыкі Г.К. Тычко. У чытаннях таксама ўдзельнічалі прафесары Л.Д. Сінькова, І.В. Казакова, А.І. Бельскі (загадчык кафедры гісторыі беларускай літаратуры), дацэнты І.Э. Багдановіч, Л.В. АлейнікВ.У. Барысенка (з МДЛУ), к.ф.н. І.Ч. Часнок, аспірантка Н. Зуева, студэнты філалагічнага факультэта.

Cустрэча з аўтарам падручнікаў па італьянскай мове Габрыэлай Дзебета

6 лютага на філалагічным факультэце БДУ адбылася сустрэча з аўтарам падручнікаў па італьянскай мове Габрыэлай Дзебета ў рамках штогадовай Мінскай міжнароднай кніжнай выставы-кірмашу. Семінар адбыўся дзякуючы супрацоўніцтву выдавецкага дома "Loescher", Пасольства Італіі ў Мінску і кафедры раманскага мовазнаўства філалагічнага факультэта БДУ.

У дыскусіі прынялі ўдзел выкладчыкі з розных краін, прадстаўнікі беларускіх, расійскіх і ўкраінскіх школ і ўстаноў вышэйшай адукацыі. Лектар падзялілася аўтарскай методыкай стварэння комплексу практыкаванняў для навучання італьянскай мове на прыкладзе падручнікаў "Caleidiscopio italiano", "La lingua italiana e le sue regole", адказаўшы на пытанні «што вывучаць», «як вывучаць», «калі вывучаць». Размова ішла аб структуры падручніка, пра складанасці апрацоўкі аўтэнтычнага матэрыялу і аб дасягнутых выніках.

 

Cемінар-кансультацыя па праблемах фальклору

25 лютага на філалагічным факультэце прайшоў пашыраны семінар-кансультацыя па праблемах фальклору, на якім з дакладам «Актуалізацыя экстэнсіўнага ведання народнай культуры» выступіў прафесар кафедры этналогіі і фальклору Беларускага дзяржаўнага ўніверсітэта культуры і мастацтваў А.У. Рагуля. Ён падрабязна распавёў пра асноўныя экзістэнцыялы народнай культуры, яе этычныя і эстэтычныя ідэалы.

Семінар арганізаваны ў межах працы Кансультацыйнага цэнтра па праблемах фальклору (кіраўнік Цэнтра – доктар філалагічных навук, прафесар Т.І. Шамякіна). Арганізатарамі мерапрыемства выступілі супрацоўнікі Вучэбна-навуковай лабараторыі беларускага фальклору і фалькларысты кафедры тэорыі літаратуры.

На мерапрыемстве прысутнічалі студэнты, магістранты і выкладчыкі філалагічнага факультэта.

 

Штогадовы «Калядны дабрачынны баль»

12 снежня на філалагічным факультэце БДУ адбыўся штогадовы «Калядны дабрачынны баль», арганізаваны Творчым саюзам філфака. Удзельнікамі сталі студэнты розных факультэтаў нашага ўніверсітэта, а таксама курсанты ваеннага факультэта Беларускай дзяржаўнай акадэміі авіяцыі.

Баль адкрыў дэкан філалагічнага факультэта Роўда Іван Сямёнавіч. Гасцей віталі прарэктар па выхаваўчай рабоце і сацыяльных пытаннях Янушэвіч Іван Іванавіч і палкоўнік Говін Андрэй Аляксандравіч, прарэктар па дзяржаўнай авіяцыі, начальнік ваеннага факультэта Беларускай Дзяржаўнай акадэміі авіяцыі. У мерапрыемстве ўзялі ўдзел намеснікі дэкана В.П.Крычко і П.І.Навойчык, намеснік начальніка ваеннага факультэта БДАА палкоўнік Буцько Валерый Мікалаевіч. Асвятлялі падзею карэспандэнты «Белорусской военной газеты “Во славу Родины”».

Вечар запомніўся цёплай і ўтульнай атмасферай, музыкай і танцамі. На працягу месяца студэнткі філалагічнага факультэта і курсанты ваеннага факультэта пад кіраўніцтвам харэографаў студэнтак філфака Кацярыны Жук і Арыны Зярнятка рыхтавалі «Вальс дэбютантак» і «Танга». Кульмінацыяй вечара стаў выбар «Караля і Каралевы балю». Імі сталі Андрэй Іваніцкі, вучань ДУА «Сярэдняя школа № 38 г. Мінска», і Улада Громава, вучаніца ДУА «Гімназія № 41 г. Мінска». Асаблівасцю мерапрыемства стаў удзел гасцей у бяспройгрышнай латарэі. Атрыманыя падчас балю сродкі накіраваны на лячэнне 13-гадовай Надзеі Ахрэмчык. Акрамя латарэі была арганізавана акцыя «Жыццё і слова для Надзі», у рамках якой усе госці балю маглі напісаць Надзеі свае пажаданні. Цёця Надзеі, студэнтка філалагічнага факультэта Лідзія Алькіна адзначыла: «Я назірала за кожным, хто пісаў, за іх эмоцыямі, хуткасцю пісьма, нахілам галавы, за іх задуменнасцю і ўсмешкамі. У гэтым было столькі дабра і чараўніцтва! Мне здаецца, што гэта зробіць сваю справу. Вера ў выздараўленне Надзі ў кожным радку. Гэта неверагодна. Дзякуй!»

Варта падкрэсліць, што праект «Калядны дабрачынны баль» Творчага саюза філалагічнага факультэта з'яўляецца штогадовым удзельнікам конкурсу «Лепшы маладзёжны праект БДУ» і сустракае гасцей ужо ў восьмы раз, з'яўляючыся традыцыйным дабрачынным мерапрыемствам філалагічнага факультэта.

«Калядны дабрачынны баль» падарыў гасцям адчуванне пераднавагодняга цуду і радасці.

Аспірант кафедры гісторыі беларускай літаратуры – пераможца Міжнароднага літаратурнага конкурсу

Аляксандр Яфімаў, аспірант кафедры гісторыі беларускай літаратуры, стаў пераможцам Міжнароднага літаратурнага конкурсу «Першацвет». Арганізатары гэтага творчага конкурсу  – Міністэрства інфармацыі Беларусі, Выдавецкі дом «Звязда», выдавецтва «Мастацкая літаратура» і Саюз пісьменнікаў Беларусі.

У творчым спаборніцтве бралі ўдзел прадстаўнікі з Беларусі, Украіны, Расіі і Іспаніі, было пададзена больш як 100 заявак. Аляксандр Яфімаў увайшоў у шэраг лепшых празаікаў, яго творы змешчаны ў калектыўны зборнік «Першацвет», які выйшаў у выдавецтве «Мастацкая літаратура» і быў прэзентаваны на XXVI Мінскай міжнароднай кніжнай выставе-кірмашы, якая прайшла з 6 па 10 лютага.