Адкрыты навукова-практычны семінар "ПРАБЛЕМЫ ВЫВУЧЭННЯ МІФАЛОГІІ І ФАЛЬКЛОРУ"

25 кастрычніка 2016 года кафедра тэорыі літаратуры сумесна з ВНЛ беларускага фальклору правялі адкрыты семінар “Праблемы вывучэння міфалогіі і фальклору”. Сваю зацікаўленасць праблематыкай мерапрыемства выказалі не толькі спецыялісты БДУ, але і з іншых навуковых устаноў. Прысутнічалі выкладчыкі Беларускага дзяржаўнага ўніверсітэта культуры і мастацтваў, Беларускай дзяржаўнай акадэміі музыкі, супрацоўнікі і аспіранты  Цэнтра даследаванняў беларускай культуры, мовы і літаратуры НАН Беларусі. Семінар вяла кандыдат філалагічных навук,  дацэнт кафедры тэорыі літаратуры Вольга Віктараўна Прыемка.

Загадчык аддзела абслугоўвання эканамічнага і філалагічнага факультэтаў БДУ Жанна Сцяпанаўна Карповіч расказала пра апошнія паступленні кніг, даведачнай літаратуры ў бібліятэку БДУ, у тым ліку кніг выкладчыкаў кафедры тэорыі літаратуры.

З дакладам “Міфы масавай свядомасці ў СМІ” выступіла доктар філалагічных навук, загадчык кафедры тэорыі літаратуры БДУ Таццяна Іванаўна Шамякіна. Даклад прысвечаны сацыяльным і палітычным міфам у СМІ, квазінавуцы ў электронных СМІ і перыёдыцы, аналізу тэлевізійных праграм. Даклад выклікаў шырокую дыскусію.

Пра міфафалькларыстыку ў кантэксце інтэграцыйнай фалькларыстыкі распавяла кандыдат філалагічных навук, дацэнт, вядучы навуковы супрацоўнік вучэбна-навуковай лабараторыі беларускага фальклору БДУ Рыма Мадэстаўна Кавалёва. Яна не толькі падрабязна спынілася на задачах і праблемах міфафалькларыстыкі, але прааналізавала яе перадгісторыю, вылучыла і апісала міфасферы.