Вынікі конкурсу творчых работ студэнтаў «Культурная спадчына антычнасці і сучаснасць»

Падведзены вынікі традыцыйнага агульнаўніверсітэцкага конкурсу творчых прац студэнтаў «Культурная спадчына антычнасці і сучаснасць», арганізаванага ГА «Саюз жанчын БДУ» і кафедрай класічнай філалогіі БДУ. Мэтай конкурсу з’яўляецца развіццё асобы студэнта, актывізацыя яго творчага мыслення і пазнавальных здольнасцей, развіццё ўменняў разглядаць вывучаныя з’явы і пытанні з розных пунктаў погляду. Аналізуючы ўплыў антычнай спадчыны на еўрапейскую і беларускую культуру, студэнты, якія вывучаюць лацінскую мову і антычную літаратуру, падрыхтавалі ўласныя творчыя «адукацыйныя прадукты», якія патрабавалі ад іх як пошукавай дзейнасці, так і намаганняў творчага ўяўлення. Мерапрыемства выклікала вялікую цікавасць сярод навучэнцаў. Свой погляд на рэцэпцыю антычнасці ў сучасным культурным асяроддзі прадставілі студэнты філалагічнага, юрыдычнага, гістарычнага, біялагічнага факультэтаў, факультэта сацыякультурных камунікацый і інш. Папярэдні прагляд прац ажыццяўлялі супрацоўнікі кафедры класічнай філалогіі. Для ўдзелу ў конкурсе было адабрана 90 прац. У склад журы конкурсу ўвайшлі: старшыня ГА «Саюз жанчын БДУ» праф. кафедры гісторыі беларускай літаратуры І. В. Казакова; супрацоўнікі кафедры класічнай філалогіі БДУ: дац. В. Г. Пракапчук, дац. К. А. Тананушка, дац. Я. У. Прыстаўка, дац. К. В. Стрыга, дац. А. У. Кірычэнка, ст. выкл. Ю. А. Сядзініна-Баркоўская, ст. выкл. Н. В. Пратасевіч, выкл. А. У. Давыдава.

Журы адзначыла захопленасць студэнтаў заяўленай тэмай, крэатыўны падыход і выдатныя творчыя здольнасці. Без сумневу, падчас конкурсу прадуктыўна вырашаецца задача пашырэння культуразнаўчых гарызонтаў пазнання студэнтаў. Напрыклад, на плакаце «Ars una, species mille» студэнтка 2 курса філалагічнага факультэта М. Благачынная праілюстравала лацінскі афарызм маляўнічай падборкай выбітных твораў сусветнага жывапісу. Студэнт 2 курса філалагічнага факультэта К. Лазоўскі ў эсэ «Што б Вы зрабілі на месцы Энэя, які пакінуў Дыдону?» дасціпна выкарыстоўвае тэхніку прыняцця рашэнняў «Квадрат Дэкарта». Студэнтка 2 курса філалагічнага факультэта М. Кузняцова ў яскравым і эмацыянальным цыкле вершаў «Недолог век пифийского авлода…» дэманструе выдатнае веданне літаратуры і культуры Старажытнай Грэцыі.

Выстава конкурсных прац і ўзнагароджанне дыпламантаў конкурсу прайшлі на філалагічным факультэце БДУ 21 снежня 2018 г. Уручэнне дыпломаў суправаджалася яскравай слайд-прэзентацыяй, якая дэманстравала працы пераможцаў. У намінацыі «Малюнак» дыплом I ступені атрымала А. Косціна (ФСК, 1 курс), дыплом II ступені – Л. Саліева (юрыдычны факультэт, 1 курс) і Н. Варанько (філалагічны факультэт, 2 курс), дыплом III ступені – А. Сергіенка (ФСК, 1 курс) і А. Базык (юрыдычны факультэт, 1 курс). У намінацыі «Графіка» дыплом I ступені атрымала Г. Герман (філалагічны факультэт, 1 курс), дыплом II ступені – А. Лаўрыненка (юрыдычны факультэт, 1 курс) і П. Цвяткова (юрыдычны факультэт, 1 курс), дыплом III ступені – А. Канановіч (юрыдычны факультэт, 1 курс) і У. Абаева (філалагічны факультэт, 1 курс). У намінацыі «Плакат» дыплом I ступені атрымала М. Благачынная (філалагічны факультэт, 2 курс). У намінацыі «Прыкладная творчасць» дыплом I ступені атрымала Д. Часнакова (ФСК, 1 курс), дыплом II ступені – Д. Кахавец (філалагічны факультэт, 2 курс), дыплом III ступені – У. Грынько, І. Каструкоў (юрыдычны факультэт, 1 курс) і Л. Шыкула (юрыдычны факультэт, 1 курс). У намінацыі «Паэзія» дыплом I ступені атрымалі Д. Вераб’ёва (філалагічны факультэт, 1 курс) і М. Кузняцова (філалагічны факультэт, 3 курс), дыплом II ступені – В. Ускова (філалагічны факультэт, 1 курс) і Г. Бубен (філалагічны факультэт, 1 курс), дыплом III ступені – К. Пашукевіч (філалагічны факультэт, 2 курс) і М. Варанцоў (філалагічны факультэт, 2 курс). У намінацыі «Эсэ» дыплом I ступені атрымаў К. Лазоўскі (філалагічны факультэт, 2 курс), дыплом II ступені – А. Фраленкова (юрыдычны факультэт, 1 курс), дыплом III ступені – Д. Багатка (юрыдычны факультэт, 1 курс).

Самым крэатыўным праектам конкурсу была прызнаная сумесная праца Л. Лойка (ФСК, 1 курс) і К. Швец (філалагічны факультэт, 1 курс) пад назвай «Хвалі», прысвечаная творчасці Сапфо, якая атрымала дыплом I ступені (тут).

 

Студэнты філалагічнага факультэта на Рэспубліканскім навукова-практычным семінары

У мэтах узмацнення духоўна-маральных асноў працы з моладдзю ў ходзе вышэйшай прафесійнай падрыхтоўкі, а таксама яе метадычнай накіраванасці студэнты філалагічнага факультэта БДУ прынялі ўдзел у Рэспубліканскім навукова-практычным семінары па праблемах духоўна-маральнага развіцця навучэнцаў у сучаснай адукацыйнай прасторы на праваслаўных традыцыях і каштоўнасцях беларускага народа (з улікам рэгіянальнага сацыякультурнага кластара). Мерапрыемства адбылося 24 кастрычніка 2018 г. на базе Нацыянальнай бібліятэкі Беларусі, у Зале адукацыйных тэхналогій.

Удзел студэнтаў у дадзеным мерапрыемстве арганізавала кафедра рыторыкі і методыкі выкладання мовы і літаратуры, супрацоўнікі якой рэгулярна выступаюць у якасці кансультантаў інавацыйных праектаў па актуальных пытаннях развіцця адукацыі, у тым ліку – па ўкараненні мадэлі станаўлення і развіцця даследчай кампетэнцыі вучняў на аснове духоўнай і культурнай спадчыны.

У рэфлексійных водгуках студэнты падзяліліся сваімі яркімі ўражаннямі аб семінары:

"Мы пачулі пра маральна-этычнае выхаванне чалавека, яго духоўнае развіццё і метады працы з дзецьмі ў навучальных установах. Семінар аказаўся вельмі займальным, карысным і пазнавальным для нас".

"Я ўдзячная арганізатарам за такую магчымасць дакрануцца да ведаў аб духоўнай культуры нашага народа. Цудоўныя прэзентацыі, разумныя людзі і хвалюючае адчуванне моманту судакранання да гісторыі зрабілі гэты ўдзел выдатным".

Вечар французскай мовы i культур франкамоўных краiн

11 снежня 2018 г. студэнты 1-га i 3-га курсаў спецыяльнасцi «Рамана-германская (французская) фiлалогiя» пад кiраўнiцтвам дацэнта В.У. Лапуновай прынялi ўдзел у пазнавальна-забаўляльным вечары французскай мовы i культур франкамоўных краiн  «Каляды ў БДЭУ». Студэнты-раманiсты фiлалагiчнага факультэта былi задзейнiчаны ў пастаноўцы музычных нумароў i арганiзацыi вiктарын. Студэнтка 3-га курса спецыяльнасцi «Рамана-германская (французская) фiлалогiя» Плешкова Юлiя атрымала дыплом за арыгiнальную аўтарскую трактоўку рок-кампазiцыi “L’assasymphonie”.

Справаздачна-выбарны сход студэнцкага актыву БРСМ

22 кастрычніка 2018 года на філалагічным факультэце адбыўся справаздачна-выбарны сход студэнцкага актыву БРСМ. Былі падведзены вынікі працы Камітэта за 2017-2018 год. Мінулы навучальны год стаў для нашага факультэта прадуктыўным на творчую дзейнасць і перамогі.

Акрамя таго, на сходзе адбыліся выбары сакратара і камітэта БРСМ. Шляхам адкрытага галасавання і адзінагалосным рашэннем сакратаром БРСМ філалагічнага факультэта была абрана студэнтка 2 курса рамана-германскай (англійскай) філалогіі Марыя Цітова.

Па выніках сходу быў сфарміраваны камітэт, у які ўвайшлі студэнты, якія здолелі праявіць сябе з самых першых дзён вучобы ў БДУ, гатовыя да новых пачынанняў і перамог!

Конкурс творчых работ “Выбіраю філфак”

З 28 кастрычніка па 28 лістапада бягучага навучальнага года праводзіўся конкурс творчых работ “Выбіраю філфак”. Гэты конкурс штогод праводзіцца сярод  студэнтаў 4 курса спецыяльнасці “Беларуская філалогія”, ён стаў ужо традыцыйным спосабам творча падзякаваць роднай  Alma Mater, а разам з тым заахвоціць будучых абітурыентаў да паступлення і вучобы на філалагічным факультэце. У конкурсе прынялі ўдзел усе студэнты выпускнога курса (19 чалавек), задачай якіх было ў разнастайных формах (вершы, проза, гульня слоў, літаратурная апрацоўка вядомых тэкстаў, сінтэз тэкставых і выяўленчых сродкаў і інш.) стварыць рэкламу філалагічнага факультэта. Работы ацэньваліся як па змесце, так і па форме (у тым ліку і па іх арыгінальнасці) не толькі самімі студэнтамі, але  і выкладчыкамі. Вынікі конкурса: 1 месца заняла Сокал Таццяна Анатольеўна, 2 месца – Пясоцкі Уладзімір Анатольевіч, 3 месца – Тумаш Надзея Фёдараўна.

Віншуем пераможцаў і ўсіх удзельнікаў !!

Дзякуем студэнтам за крэатыўнасць і неабыякавасць да роднай мовы і факультэта!!

1 месца

2 месца

3 месца

 

Місія-жыць!

Каманда БРСМ філалагічнага факультэта заняла 1 месца ў намінацыі “Лепшая тэатральная пастаноўка сярод студэнтаў устаноў вышэйшай адукацыі” конкурсу антынаркатычных пастановак “Місія – жыць” Мінскай гарадской арганізацыі ГА “БРСМ”.

Віншуем!

КУЛЬТУРНАЯ АКЦЫЯ «МОЙ РОДНЫ КУТ…» ДА ГОДА МАЛОЙ РАДЗІМЫ Ў БЕЛАРУСІ

Лістапад месяц распачаўся на філалагічным факультэце шэрагам мерапрыемстаў, прысвечаных Году малой радзімы ў Беларусі. Рэалізацыю культурнай акцыі «Мой родны кут…», ініцыятарам якой стала кафедра сучаснай беларускай мовы, распачалі студэнты малодшых курсаў пад кіраўніцтвам дацэнта А.Л. Садоўскай.

Брукаваныя вуліцы Мінска, велічныя касцёлы Гародні, старыя сады ля Сафіі ў сівым Полацку... Маленькія гарадкі і ціхія вёсачкі, дзе ўсё нагадвае пра дзяцінства... Людзі, якія ствараюць адчуванне ўтульнасці і бяспекі... Гэта –  наша малая радзіма, мясціны, дзе жыве сэрца. Мерапрыемствы да года малой радзімы сталі сапраўдным святам для ўсіх удзельнікаў. Гэта было шчырае памкненне даведацца больш пра розныя куткі Беларусі, распавесці пра свой родны кут і аддаць даніну павагі зямлі, якая ўскарміла…

Студэнтамі першага курса спецыяльнасці «Славянская філалогія» быў рэалізаваны праект «Зямля, на якой пашчасціла нарадзіцца: падарожжа па малой радзіме». Праз свае мультымедыйныя праекты і шчырыя апавяданні студэнты падзяліліся разнастайнымі цікавосткамі, паданнямі, сваімі думкамі пра малую радзіму. Выступленні суправаджаліся незабыўнымі эмоцыямі і вызначаліся крэатыўным падыходам да падачы матэрыялу: студэнты прапанавалі аўдыторыі падрыхтаваныя ўласнымі намаганнямі відэаролікі і прэзентацыі, вершы сваіх знакамітых землякоў і ўласныя паэтычныя і празаічныя мініяцюры.

Леся-Стэфанія Міхалевіч з пяшчотай распавяла пра дзяцінства ў родным Мінску і пра людзей, якія стварылі гэты цуд – адчуванне шчасця і захаплення жыццём. Менавіта яны для Лесі-Стэфаніі – яе малая радзіма. Юлія Шлемен пазнаёміла аднагрупнікаў з родным Бабруйскам: гэта было незабыўнае падарожжа па вулачках і скверах, знаёмства з адметнымі скульптурнымі і архітэктурнымі збудаваннямі, з цікавымі звычкамі жыхароў горада і гісторыяй сваёй сям’і. Вікторыя Янушкевіч распавяла гісторыю Гальшан ад імя Белай Панны, Уладзіслаў Тарановіч зацікавіў слухачоў духоўным жыццём Драгічына, а Ніна Мяшкова пазнаёміла з адметнасцямі Белаазёрска. Марына Кекелева захапляльна расказала пра Уваравічы, а Яна Іванюк і Наталля Карнацэвіч – пра чароўны Мінск. Удзельнікам спадабаліся і мінскія цікавосткі Святланы Дзірвук, шчырыя словы Валерыі Леу пра Капыль, легенды Мінска Лізаветы Шаховіч. Кожнае выступленне было непаўторным, вельмі крэатыўным і захапляльным.

 На базе другога курса спецыяльнасці «Беларуская філалогія» адбылася пазнавальная гульня-віктарына «Паклон табе, мой родны краю!..». Кожны тур гульні быў напоўнены разнастайнымі звесткамі пра знакамітыя месцы Беларусі, іх гісторыю і традыцыі рэгіёнаў. У першым туры пад назвай «Мясціны, якімі можа ганарыцца Беларусь», удзельнікі павінны былі з дапамогай цікавых фактаў вызначыць мясціну ці славуты будынак, якія з’яўляюцца бясспрэчнай каштоўнасцю Беларусі. Студэнты падзялілія на дзве каманды: «Гражына» і «Дзяўчынкі з мінулага і Павел». Абедзве каманды з вялікім азартам давалі адказы на пытанні, але па выніках першага тура каманда «Дзяўчынкі з мінулага...» ўсё ж вырвалася наперад. Другі тур быў прысвечаны архітэктурным помнікам нашай краіны. Ён асабліва ўразіў студэнтаў, бо абудзіў успаміны пра малую радзіму ў сэрцы кожнага з прысутных. Надалей удзельнікам віктарыны былі прапанаваны цытаты з твораў, якія славутыя паэты і пісьменнікі прысвяцілі сваёй малой радзіме – гарадам  і вёскам Беларусі. Пераможцамі віктарыны сталі «Дзяўчынкі з мінулага і Павел», аднак абедзве каманды прадэманстравалі глыбокія веды пра гісторыю і сучаснасць сваёй краіны. Удзельнікі атрымалі вялікае задавальненне ад гульні і  ўзбагацілі свой кругагляд.

Акцыя «Мой родны кут…»  на філалагічным факультэце БДУ працягваецца да канца лістапада.

Семінарскія заняткі “Станаўленне і развіццё метадычнай думкі на Беларусі”

10 кастрычніка студэнты 1-га і 4-га курсаў спецыяльнасці “Беларуская філалогія” наведалі Нацыянальную бібліятэку Беларусі. У рамках Міжнароднай выставы “Беларусь і Біблія” адбыліся семінарскія заняткі па тэме “Станаўленне і развіццё метадычнай думкі на Беларусі”, арганізаваныя прафесарам кафедры рыторыкі і методыкі выкладання мовы і літаратуры Праскаловіч Вольгай Уладзіміраўнай і дацэнтам Саматыя Ірынай Мікалаеўнай. Удзел у мерапрыемстве прыняла загадчык кафедры, кандыдат педагагічных навук, дацэнт Таяноўская Ірына Уладзіміраўна.

Беларуская методыка навучання мове і літаратуры мае сваю гісторыю і багатую спадчыну. Дзейнасць Францыска Скарыны правамоцна разглядаць не толькі як пачатак кнігадруку, але і як дзейнасць, якая заклала асновы арганізацыі мэтанакіраванага навучання грамаце (чытанню і пісьму).

Беларускі інтэлектуал характарызаваў “Біблію” як аснову ўсіх сямі вызваленых навук. “Бивлия руска, выложена доктором Франциском Скориною из славного града Полоцька” служыла галоўнай мэце – “людем посполитым к доброму научению”. Нават загаловак паказвае, што сучасны асобаснаарыентаваны падыход у навучанні ідзе ад нашага знакамітага асветніка.

Ф. Скарына выступае як моцны аўтарытэт, які шмат ведае, а таму і робіць. Ён навучае ўсяму, што лічыць патрэбным, абапіраючыся на свае веды і навуку. Гэта своеасабліва выказанае “я” асветніка можна было адчуць праз грунтоўны аповед экскурсавода.

Заняткі ў Музеі кнігі Нацыянальнай бібліятэкі Беларусі былі арганізаваны з выкарыстаннем метадаў актыўнай камунікацыі, інтэрактыўных і эўрыстычных метадаў навучання.

Студэнты-філолагі сталі не толькі слухачамі, якія ўспрымаюць інфармацыю, назіральнікамі, якія глядзяць на ўнікальныя экспанаты, але таксама актыўнымі ўдзельнікамі працэсу пазнання Кнігі Кніг – Бібліі. Актыўнае і інтэрактыўнае навучанне – гэта, перш за ўсё, дыялогавае навучанне, падчас якога ажыццяўляецца ўзаемадзеянне і эмацыянальная еднасць усіх удзельнікаў суразмоўя. Студэнты мелі магчымасць праявіць і свае крэатыўныя здольнасці. У рамках выставачнага праекта “Беларусь і Біблія” студэнты-філолагі асвоілі тэхніку ксілаграфіі, змаглі сваімі рукамі стварыць адбіткі на паперы, зробленыя з гравюр Скарыны. Змаглі ўявіць сябе праз фотаздымак самім Францыскам Скарынам.

Падчас музейна-бібліятэчных заняткаў адбылася творчая сустрэча з Алесем Аляксандравічам Сушам, намеснікам дырэктара Нацыянальнай бібліятэкі Беларусі па навуковай і выдавецкай дзейнасці, кандыдатам культуралогіі, даследчыкам і папулярызатарам спадчыны Францыска Скарыны.

У выніку арганізаванага эўрыстычнага дыялогу чацвёртакурснікі, якія цяпер засвойваюць методыку выкладання мовы і літаратуры, змаглі наглядна пераканацца ў тым, што дыдактычныя прынцыпы, закладзеныя Ф. Скарынам, вельмі сучасныя. Пры стварэнні вучэбнай літаратуры для школы выкарыстоўваюць яго прыёмы: а) прэзентацыя новай літары адпаведным малюнкам-асацыяцыяй; б) выкарыстанне невялікага фармату вучэбнай кнігі; в) даступнасць у падачы матэрыялу; г) выкарыстанне перакладных і тлумачальных слоўнікаў у падручніках па мове; д) падача літар не толькі ў прамым, але і адваротным парадку з мэтай іх хутчэйшага запамінання і інш.

У студэнтаў таксама з’явілася ўнікальная магчымасць пазнаёміцца з факсімільным узнаўленнем першага ў свеце “Буквара”, беларускага “Буквара”. 2018-ы праходзіць у Беларусі пад знакам 400-годдзя “Буквара”. Як адзначыў Алесь Суша, амаль ні ў аднаго з беларускіх даследчыкаў раней не было магчымасці ўбачыць унікальнае выданне на свае вочы. На радзіме ні аднаго асобніка не захавалася: іх проста “зачыталі да дзірак”, як часта бывае з вучэбнымі выданнямі.

Прафесар кафедры рыторыкі і методыкі выкладання мовы і літаратуры Праскаловіч Вольга Уладзіміраўна (дарэчы, адзін з удзельнікаў міжнароднага праекта “Буквар”) засяродзіла ўвагу студэнтаў на значэнні першага “Буквара” ў развіцці сучаснай букварыстыкі, методыкі пачатковага навучання.

Праведзеныя заняткі не ў звыклай абстаноўцы аўдыторыі, а ў Музеі кнігі Нацыянальнай бібліятэкі Беларусі вызначаюцца навізной, міждысцыплінарнасцю, накіраваны на крэатыўнае развіццё студэнтаў, стымуляванне іх чытацкай актыўнасці, фарміраванне гонару за дасягненні і багатыя традыцыі айчыннай кніжнай, метадычный і акадэмічнай культуры.

Сімвалічна і тое, што першакурснікі, якія толькі пачынаюць авалодваць культурай акадэмічнай вучобы, змаглі пазнаёміцца з храмам ведаў, адчуць аўру гэтага храма, каб на працягу сваіх студэнцкіх гадоў знаходзіць там сучасныя веды і натхненне на іх прымяненне ў будучай прафесіі – беларускага філолага.

 

Студэнткі філалагічнага факультэта пакарылі Міжуніверсітэцкі паэтычны форум

16 лістапада ў зале факультэта журналістыкі прайшоў фінал Міжуніверсітэцкага паэтычнага форума.

Студэнты прымалі ўдзел у спаборніцтвах у дзвюх намінацыях ‒ «Аўтар» і «Чытач». Папярэдне канкурсанты прайшлі адборачныя этапы, па выніках якіх у фінал ад філалагічнага факультэта ў катэгорыю «Аўтар» прайшоў Варанцоў Мікіта, а ў катэгорыю «Чытач» ‒ Іванчыкава Юлія, а таксама актывісткі Творчага саюза філалалагічнага факультэта Анісава Арына і Дуброўская Мар’яна. У катэгорыі  «Чытач» другое месца было прысуджана Анісавай Арыне з вершам Эдуарда Асадава «Артыстка». У гэтай катэгорыі першае месца і званне пераможца атрымала Дуброўская Мар’яна, першакурсніца нашага факультэта, з вершам «Здравствуйте, мне 17» Уладзіміра Лістамірава.

Ганарымся нашымі студэнткамі і чакаем ад іх новых перамог!

Сустрэча студэнтаў з прадстаўнікамі кампаніі ААТ “Бел Хуавэй Тэхнолаждыс”

24 кастрычніка 2018 г. у 14.25 (аўд.113) кафедра кітайскай філалогіі арганізуе сустрэчу студэнтаў старшых курсаў спецыяльнасці “Усходняя (кітайская) філалогія” з прадстаўнікамі кампаніі ААТ “Бел Хуавэй Тэхнолаждыс”, якая з’яўляецца лідарам беларускага рынку па пастаўках тэлекамунікацыйных сістэм, сетак і тэлекамунікацыйнага абсталявання, а таксама першым рэзідэнтам Беларуска-Кітайскага індустрыяльнага парка “Вялікі Камень”.

Мэта мерапрыемства – прэзентацыя кампаніі ААТ “Бел Хуавэй Тэхнолаждзіс” для арганізацыі праходжання студэнтамі філалагічнага факультэта БДУ вытворчай пратыкі і стажыровак с наступным працаўладкаваннем.

План сустрэчы:

1) Уступнае слова HR-дырэктара, паказ відыё аб міжнароднай карпарацыі “Хуавэй” глабальна, а таксама аб беларускім офісе.

2) Выступленне высокакваліфікаванага спецыяліста аб ведах і якасцях, неабходных для працы ў кампаніі “Хуавэй” (PR спецыяліст, спецыяліст па продажу, спецыяліст цэнтра даследаванняў)

3) Выступленне HR спецыяліста з прэзентацыяй праграм практык і стажыровак для студэнтаў спецыяльнасці «Усходняя (кітайская) філалогія».

4) Запаўненне рэзюмэ для ўдзелу у конкурсе на праходжванне інтэрншып-праграмы зацікаўленымі студэнтамі.

Штогадовы конкурс творчых прац студэнтаў «Культурная спадчына антычнасці і сучаснасць»

Запрашаем студэнтаў усіх факультэтаў БДУ да ўдзелу ў штогадовым конкурсе творчых прац студэнтаў «Культурная спадчына антычнасці і сучаснасць». Канкурсанты могуць дасылаць вершаваныя пераклады, эсэ, вершы, малюнкі, плакаты і іншыя працы на антычную тэматыку. Творчыя працы прымаюцца да 1 снежня на кафедры класічнай філалогіі філалагічнага факультэта БДУ (вул. К. Маркса, 31, каб. 208) ці па электроннай пошце Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду..

Конкурс накіраваны на папулярызацыю і вывучэнне антычнай спадчыны, а таксама выяўленне яе ўплыву на еўрапейскую і беларускую культуру. Арганізатарамі конкурсу з’яўляюцца кафедра класічнай філалогіі БДУ і ГА “Саюз жанчын БДУ”.