СХОД СТУДЭНТАЎ-ПРАКТЫКАНТАЎ НА ФІЛФАКУ

27 сакавіка прайшоў установачны сход студэнтаў 3 курса стацыянара і 4 курса завочнай формы навучання спецыяльнасці «Беларуская філалогія» па арганізацыйных і метадычных пытаннях вытворчай (літаратурна-рэдакцыйнай) практыкі. Арганізатар факультэцкай практыкі Алесь Іванавіч Бельскі, загадчык кафедры гісторыі беларускай літаратуры, адзначыў, што стажыроўка ў выдавецтвах і рэдакцыях СМІ дае студэнтам магчымасць далучыцца да прафесійнай дзейнасці, авалодаць пэўнымі практычнымі ведамі і кампетэнцыямі ў літаратурна-рэдакцыйнай працы, прадэманстраваць свае прафесійныя і творчыя здольнасці. У якасці вытворчых пляцовак сёлета абраны Выдавецкі дом «Звязда», выдавецтва «Адукацыя і выхаванне» Міністэрства адукацыі Рэспублікі Беларусь, Упраўленне рэдакцыйна-выдавецкай работы БДУ. Кіраваць групамі студэнтаў будуць прафесар А. І. Бельскі, дацэнты кафедры гісторыі беларускай літаратуры Л. В. Алейнік і І. Э. Багдановіч. У выдавецкіх установах за практыкантамі будуць замацаваны вопытныя рэдактары, супрацоўнікі часопісаў «Полымя», «Маладосць», «Беларуская мова і літаратура». Некалькі студэнтаў выказалі жаданне набываць практычны досвед у рэгіянальных СМІ. У канцы красавіка плануецца справаздачны сход па выніках літаратурна-рэдакцыйнай практыкі.

 

Студэнты філалагічнага факультэта на свяце біятлона

Студэнты філалагічнага факультэта на чале са старшым выкладчыкам кафедры фізвыхавання і спорту Пяхота Кацярынай Іванаўнай з вясновым настроем на «зімовым» свяце па біятлоне ў РЦАП «Раўбічы», дзе 2 сакавіка праходзіць фінальны этап Кубка Беларускай федэрацыі біятлона.

Cустрэча з прадстаўнікамі працадаўцаў

Кафедрай сучаснай беларускай мовы 19 сакавіка 2019 г. у 18.45 (аўд. 47) была арганізавана сустрэча «Мы выбіраем, нас выбіраюць…» з прадстаўнікамі патэнцыяльных працадаўцаў Юліяй Алейчанка, беларускай пісьменніцай, літаратурным крытыкам, перакладчыкам, рэдактарам аддзела паэзіі часопіса «Полымя», выпускніцай філалагічнага факультэта, і Настассяй Мядзелка, літаратурным рэдактарам Выдавецкага дома «Сегмент», таксама выпускніцай філалагічнага факультэта.

Сустрэча была прызначана найперш для студэнтаў, якія атрымліваюць кваліфікацыю «Літаратурна-рэдакцыйны супрацоўнік», але былі запрошаны студэнты ўсіх спецыяльнасцей, бо закраналіся вельмі актуальныя для саіскальнікаў вакансій у рэдакцыях і выдавецтвах пытанні:

  • Структура і змест рэзюмэ (абодва запрошаныя спецыялісты падкрэслілі, што біяграфія і рэзюмэ – не тоесныя, хаця і сумежныя тэксты). Н. Мядзелка адзначыла, што недастаткова проста перадаць папяровае рэзюмэ працадаўцу, трэба “абараніць” прадстаўленыя факты, уменні, здольнасці на сумоўі, пры неабходнасці прадэманстраваць навыкі работы з тэкстам (рэдактарская праўка, карэктура, частковы пераклад і пад.);
  • Ю. Алейчанка ў выглядзе міні-віктарыны прадэманстравала студэнтам, што пры працаўладкаванні неабходна ведаць гісторыю і кірункі работы ўстановы, на вакансію якой саіскальнік прэтэндуе (вельмі дарэчнымі былі падрыхтаваныя ў якасці прызоў за правільныя адказы нумары часопіса «Полымя»).

Студэнты прадэманстравалі зацікаўленасць праблематыкай сустрэчы, задавалі дарэчныя пытанні, многія будучыя маладыя спецыялісты далі правільныя адказы на пытанні міні-віктарыны Ю. Алейчанка.

Улічваючы карысны вопыт нашых выпускнікоў, якія наведваюць факультэт ужо ў якасці прадстаўнікоў патэнцыяльных працадаўцаў, у далейшым такія сустрэчы плануецца зрабіць сістэматычнымі.

Адзіны дзень бяспекі

1 сакавіка 2019 года ў рамках Адзінага дня бяспекі філалагічны факультэт сумесна са Штабам грамадзянскай абароны правёў вучэнні па пажарнай бяспецы. Спецыяліст аддзела пажарнай бяспекі ўпраўлення аховы працы і па надзвычайных сітуацыях БДУ расказала студэнтам, што неабходна рабіць у выпадку ўзнікнення пажару, а таксама правяла практычны інструктаж па выкарыстанні вогнетушыцеляў. Мэтай дадзеных вучэнняў з'яўляецца прадухіленне гібелі людзей ад знешніх прычын у Рэспубліцы Беларусь.

Перакладчыцкія масты: малая радзіма Джаваніна Гуарэскі

13 сакавіка на філалагічным факультэце БДУ адбылося мерапрыемства «Перакладчыцкія масты: малая радзіма Джаваніна Гуарэскі», якое падвяло вынікі перакладчыцкага конкурсу. Мерапрыемства праводзілася сярод студэнтаў ˗ удзельнікаў творчага аб’яднання «Перакладчыцкая майстэрня» кафедры раманскага мовазнаўства. Для перакладу былі прадстаўлены раней неперакладзеныя апавяданні са зборніка «Малы свет» Джaванiнa Гуарэскi.

Старшыня журы Салееў В. А. ˗ заслужаны дзеяч культуры РБ ˗ падтрымаў працу кафедры раманскага мовазнаўства ў падрыхтоўцы спецыялістаў па мастацкім перакладзе. Ён адзначыў складанасць, важнасць і неадназначнасць гэтай прафесіі, выказаў шэраг пажаданняў па ўдасканаленні майстэрства студэнтаў у галіне стылістыкі рускай мовы і ў цэлым агульнага культурнага ўзроўню.

Старшыня Беларускага літаратурнага саюза «Полацкая галіна» А.М.Зайцаў падкрэсліў, что конкурс садзейнічаў развіццю беларускай перакладчыцкай школы. Падчас уручэння дыпломаў ўдзельнікам конкурсу ён пажадаў маладым перакладчыкам поспехаў на літаратурнай ніве. Акрамя таго, запрасіў студэнтаў удзельнічаць у конкурсе аўтараў літаратурнага фестывалю «Славянская ліра», які адбудзецца ў чэрвені 2019 г.

Госць з Італіі, сучасны паэт Гафрэда Муратджа выказаў падзяку студэнтам за інтарэс да італьянскай мовы і літаратуры і прадставіў свае паэтычныя творы на тэму падарожжа, якія прапанаваў для перакладу з магчымасцю наступнай публікацыі.

Напрыканцы загадчык кафедры Панцялеенка А.А. адзначыла, што падобныя мерапрыемствы стануць для кафедры традыцыйнымі, а лепшыя працы будуць апублікаваны ў зборніку кафедры раманскага мовазнаўства.

Выставу «Станаўленне рэспублікі і роля БДУ ў яе развіцці» наведалі студэнты філалагічнага факультэта

27 лютага студэнты 1 курса спецыяльнасці «Беларуская філалогія» наведалі выставу «Станаўленне рэспублікі і роля БДУ ў яе развіцці», прысвечаную 100-гадоваму юбілею БССР. Студэнты мелі магчымасць пазнаёміцца з экспазіцыяй, якая адлюстроўвае гісторыю БДУ ў 20-30-я гг. ХХ ст. Сярод іх – копія Дэкрэта аб стварэнні БДУ, навуковыя выданні, у тым ліку часопіс «Працы БДУ», падручнікі і папкі для сшыткаў, дыпломы першых выпускнікоў БДУ і асабістыя рэчы выбітных навукоўцаў, якія мелі дачыненне да стварэння нашай ВНУ (напрыклад, акуляры У. І. Пічэты).

Першакурснікі даведаліся, што 25 лютага 1919 г. быў падпісаны Дэкрэт аб стварэнні БДУ, да стагоддзя якога і прымеркавана дадзеная экспазіцыя.

8 студэнтаў філалагічнага факультэта з Кітая узнагароджаны падзякай Міністэрства адукацыі Рэспублікі Беларусь

Студэнты-філолагі Дуань Хуажуй, Лю Шылун, Цянь Хуэй, Ян Сунянь, Цяо Хайчэн, Лю Юань, Чжан Цзые, Інь Мінцзя атрымалі падзякі Міністэрства адукацыі Рэспублікі Беларусь. Узнагароджанне адбылося 13 сакавіка падчас урачыстай сустрэчы Міністра адукацыі Ігара Карпенкі з кітайскімі грамадзянамі, якія навучаюцца ва ўстановах адукацыі нашай краіны і маюць высокія дасягненні ў вучобе, навукова-даследчай і грамадскай дзейнасці. Сустрэча праходзіла ў межах Года адукацыі Беларусі ў Кітаі.

У канцэртнай праграме мерапрыемства Беларускі дзяржаўны ўніверсітэт прадставілі студэнты філалагічнага факультэта Чжан Сюнь, Дуань Хуажуй, Лю Шылун і студэнт ФМА Лі Тунмань, якія прачыталі вершы на беларускай мове (кіраўнік – дацэнт кафедры прыкладной лінгвістыкі  М. В. Свірыдовіч).

МІЖВУЗАЎСКАЯ СТУДЭНЦКАЯ АЛІМПІЯДА ПА ФРАНЦУЗСКАЙ МОВЕ

19 лютага на філалагічным факультэце БДУ прайшоў другі тур Міжвузаўскай студэнцкай алімпіяды па французскай мове, у якім прынялі ўдзел 50 студэнтаў, якія прадстаўлялі ФМА і філалагічны факультэт БДУ, БДЭУ, МДЛУ. Арганізатарам алімпіяды выступіла кафедра раманскага мовазнаўства філалагічнага факультэта БДУ. Першы тур праходзіў завочна ў ВНУ навучання студэнтаў. Другі тур уключаў заданне на разуменне відэарэпартажа і вуснае выказванне на французскай мове.

Удзельнікі былі ўзнагароджаны дыпломамі рознай ступені. Дыпломамі I ступені ўзнагароджаны студэнтка філалагічнага факультэта БДУ Краснова М. і студэнтка перакладчыцкага факультэта МДЛУ Валек Е. Уладальнікамі «срэбра» сталі студэнтка філалагічнага факультэта БДУ Чахава А. і студэнтка факультэта камерцыі і турыстычнай індустрыі БДЭУ Яцук В. «Бронзу» атрымала студэнтка ФМА БДУ Яцкова Е. і студэнтка МЭО БДЭУ Пігаль А. Спецыяльнай граматай за лепшае вуснае выказванне ўзнагароджана студэнтка перакладчыцкага факультэта МДЛУ Кулеш К. Дыпломы ўручалі члены Арганізацыйнага камітэта: загадчык кафедры раманскага мовазнаўства БДУ Панцялеенка А.А., дацэнт кафедры раманскага мовазнаўства БДУ Лапунова В.У., дацэнт кафедры раманскага мовазнаўства БДУ Саўко М.У., старшы выкладчык кафедры раманскіх моў Тучынскі А.В.

Плануецца, што лінгвістычнае спаборніцтва будзе праводзіцца штогод.

 

Універсітэцкі этап рэспубліканскага конкурсу «Каралева Вясна БДУ-2019»

5 сакавіка ў Ліцэі БДУ адбыўся ўніверсітэцкі этап рэспубліканскага конкурсу «Каралева Вясна БДУ-2019». Дзесяць лепшых прадстаўніц нашага ўніверсітэта змагаліся за галоўны тытул гэтай вясны і праявілі ўсю сваю арыгінальнасць і крэатыў у творчых нумарах, дэфіле і інтэлектуальным конкурсе. Гасцей мерапрыемства чакала цікавая канцэртная праграма, насычаная не толькі грандыёзнымі выступленнямі саміх удзельніц, але і яскравымі нумарамі запрошаных зорак. Ганаровым госцем конкурсу стала заслужаная артыстка Рэспублікі Беларусь Алёна Ланская. Таксама на дадзеным мерапрыемстве прысутнічаў прарэктар БДУ Іван Іванавіч Янушэвіч.

У канцы вечара былі падведзены вынікі самага маштабнага і чароўнага конкурсу гэтай вясны. Тытул «Каралева Вясна БДУ-2019» атрымала студэнтка 2-га курса Інстытута Бізнесу Юлія Ганчарова. Званне «Віцэ-Каралева Вясна БДУ-2019» атрымала студэнтка 2-га курса біялагічнага факультэта Анастасія Таранава. Студэнтка 3 курса філалагічнага факультэта Дар’я Кучынская перамагла ў намінацыі «Каралева глядацкіх сімпатый». Віншуем Дар’ю і жадаем ёй новых ідэй у далейшай рэалізацыі сваіх творчых задум!

 

«Альтанка» збірае творчых студэнтаў

Адбылося першае пасяджэнне студэнцкага літаратурнага гуртка «Альтанка», які сёлета аднавіў працу пры кафедры гісторыі беларускай літаратуры БДУ.

На пачатку сустрэчы прысутных прывітаў прафесар Алесь Іванавіч Бельскі, загадчык кафедры гісторыі беларускай літаратуры. Ён распавёў пра літаратурныя традыцыі ў БДУ і на філалагічным факультэце, пра дзейнасць літаб’яднання «Узлёт», якім доўгі час кіраваў беларускі паэт і ўніверсітэцкі прафесар Алег Антонавіч Лойка.

«Альтанка» ˗ літаратурны гурток на філфаку, які быў створаны на пачатку новага ХХІ стагоддзя. Студэнты актыўна выступалі на беларускім радыё, у бібліятэках і іншых установах, выдалі паэтычны альманах «Альтанка» (2011).

І вось «Альтанка» зноў збірае творчых студэнтаў, якія пішуць вершы і спрабуюць сілы ў паэтычным перакладзе. Кіраўнік літаратурнага гуртка ˗ беларуская паэтка і дацэнт БДУ Ірына Эрнстаўна Багдановіч. Творчы актыў гуртка ˗ студэнты Яўгенія Пракапчук, Кася Стаўрова, Ксеня Вярынская і інш.

Чарговае пасяджэнне літаратурнага гуртка «Альтанка» адбудзецца 13 сакавіка на кафедры гісторыі беларускай літаратуры (каб. 56). Пачатак у 20.00. Чакаем творча адораных і крэатыўных маладых аўтараў, усіх, хто піша вершы, перакладае і любіць паэзію!