Педагагічная практыка студэнтаў 5 курса

16 лютага 2017 года на Савеце філалагічнага факультэта ў ліку іншых пытанняў разглядаецца пытанне аб педагагічнай практыцы студэнтаў 5 курса (справаздачы агульных факультэцкіх кіраўнікоў). У гэтай сувязі яшчэ раз адзначым асобныя цікавыя бакі атрыманага практычнага вопыту. Характарыстыкі практыкантаў, падрыхтаваныя ва ўстановах адукацыі по выніках педагагічнай дзейнасці, сведчаць аб належным узроўні ведаў і практычных уменняў студэнтаў. Базавыя ўстановы адукацыі адпавядаюць мэтам і задачам педагагічнай практыкі студэнтаў (спецыяльнасцяў "Беларуская філалогія", "Руская філалогія", "Славянская філалогія").

Так, у водгуках ад адміністрацый ўстаноў будучага працаўладкавання зафіксавана, што студэнты падчас педагагічнай дзейнасці паказалі сябе добрасумленнымі, дысцыплінаванымі, з высокім узроўнем падрыхтаванасці, выкарыстоўвалі мэтазгодныя і перспектыўныя метады і прыёмы, новыя адукацыйныя тэхналогіі. Практыканты праявілі актыўнасць, адказнасць, любоў да дзяцей. За перыяд практыкі былі набытыя і ўдасканаленыя разнастайныя ўменні і навыкі практычнай дзейнасці, што заслугоўвае належнай высокай ацэнкі.

Вучэбныя заняткі і пазакласныя мерапрыемствы дазвалялі абудзіць, падтрымаць і абвастрыць у навучэнцаў цікавасць да мовы і літаратуры, узмацніць валоданне ўменнямі калектыўнай і індывідуальнай працы, матывацыю да атрымання новых ведаў па прадметах.

Асобныя кадры з фотагалерэі практыкі змясцілі тлумачэнні, перакананні і экспрэсію, адлюстраванне творчых, артыстычных здольнасцяў студэнтаў і канцэптуальнай задумы заняткаў, шчыльную апору на вучэбную кнігу і мультымедыя, касцюмаваныя ролевыя гульні і інсцэніроўкі народнага тэатру, выяўленчае мастацтва вучняў і практыкантаў, крылатыя ўзмахі ўказкі і шматзначнасць позірку, іскрысты гумар і пранікнёную сур'ёзнасць…

На выніковых сходах захапляльна і бліскуча абаранялі свае справаздачы-праекты амаль усе студэнты. Многія студэнты ў справаздачах рабілі сугучныя вывады: "Падчас праходжання практыкі ў якасці настаўніка-практыканта мовы і літаратуры я працавала са шчырым захапленнем і цікавасцю, але адчула складанасць і адказнасць гэтай працы".

Фестываль у Брадзанах “Вясёлае імя: Пушкін”

 

Выкладчыкі і студэнты БДУ ўзялі актыўны ўдзел у мерапрыемствах фестывалю з элементамі навуковай школы “Вясёлае імя: Пушкін”, які адбыўся 28-29 кастрычніка 2016 г. у Славакіі, ва Ўніверсітэце свв. Кірылы і Мефодзія г. Трнава і ў Музее А. С. Пушкіна ў Брадзанах. Арганізатарам фестывалю выступіў Уральскі дзяржаўны педагагічны ўніверсітэт (Екацярынбург), праект рэалізаваны пры падтрымцы ФЦП Міністэрства адукацыі і навукі па кірунку “Правядзенне кангрэсна-выставачных мерапрыемстваў, прэзентацыйнай дзейнасці, накіраванай на распаўсюджванне рускай мовы, адукацыі, навукі, гісторыі і культуры Расіі”.

Праграма фэстывалю складалася з навуковых дакладаў пра розныя аспекты пушкінскай спадчыны, прачытаныя даследнікамі з Балгарыі, Славакіі, Чэхіі, Украіны, Беларусі, Расіі. На Круглым стале, прысвечаным праблемам сучасных літаратурных музеяў, падзяліліся досведам сваёй працы калегі са Славакіі, Беларусі, Расіі. З цікавасцю былі ўспрыняты майстар-класы, якія прадэманстравалі форму відэа-праектаў пры вывучэнні творчасці Пушкіна ў школе. У рамках фэстывалю былі падведзены вынікі конкурсаў школьных эсэ пра Пушкіна, буктрэйлераў па яго творах, вынікі фотаконкурсу і конкурсу арт-праектаў. Завяршыўся фэст паэтычнымі чытаннямі, на якіх творы паэта прагучалі не толькі па-руску, але і ў перакладах на іншыя славянскія мовы.

Па-сапраўднаму пушкінская залатая восень спадарожнічала экскурсіям, з якіх адменнае ўражанне пакінула наведванне маўзалея сям’і Фрызенгофаў, дзе спачывае пыл Аляксандры Ганчаровай-Фрызенгоф, старэйшай сястры Наталлі Мікалаеўны, якая прыязджала калісьці ў Брадзаны разам з дзецьмі.

Фэстываль «Вясёлае імя: Пушкін» паказаў цікавасць да рускай культуры за мяжой. Навуковыя, педагагічныя і сяброўскія кантакты будуць працягнуты ў серыі супольных публікацый і будучых імпрэз, прысвечаных папулярызацыі рускай літаратуры ў Славакіі і іншых краінах.

Водгукі, матэрыялы конкурсаў буктрэйлераў, запісы інтервью на сайце УрДПУ http://uspu.ru/2012-08-09-05-38-24/nauchnoissledovatelskaja-dejatelnost/item/3297-pushkin.html

 

Літаратурная гасцёўня «Кожны чалавек носіць сваё неба з сабой», прысвечаная 86-годдзю з дня нараджэння Уладзіміра Караткевіча

У ДУА «Сярэдняя школа № 185 г. Мінска» студэнткамі 5 курса спецыяльнасці “Беларуская филалогія” В. І. Бароўскай  і А. В. Варывончык  напрыканцы лістапада праводзілася мерапрыемства ў форме літаратурнай гасцёўні пад назвай «Кожны чалавек носіць сваё неба з сабой», прысвечанае 86-годдзю з дня нараджэння Уладзіміра Караткевіча – беларускага паэта, празаіка, драматурга, кінасцэнарыста, публіцыста і перакладчыка, сапраўднага сына сваёй Бацькаўшчыны. Мерапрыемства ладзілася з вучнямі 8-х класаў, якія самі прымалі ў ім актыўны ўдзел – дэкламавалі вершы Уладзіміра Сямёнавіча: Камушэнка Аляксандра і Дрозд Яўгенія выразна расказалі верш «Лісце», Бурая Ксенія – верш «Мокрыя травы», а Гаранкоў Данііл і Янцэвіч Кацярына зачыталі цудоўны верш «Дзе мой край?».

Васьмікласнікі з  вялікай цікавасцю разглядалі фотаздымкі Уладзіміра Караткевіча, рэпрадукцыі яго замалёвак да ўласных твораў. На старонках мультымедыйнай прэзентацыі ўсе прысутныя маглі ўбачыць відэаматэрыялы пра жыццё і творчасць пісьменніка, а таксама выступ самаго Уладзіміра Сямёнавіча на яго 50-гадовым юбілеі. Пранікнёна прагучалі вершы паэта, пакладзеныя на музыку.

Напрыканцы мерапрыемства з вучнямі была праведзена крыжаванка, ключом у якой было прозвішча пісьменніка – «Караткевіч»; астатнія словы дзеці павінны былі адкрыць самі. Трэба сказаць, што васьмікласнікі вельмі хутка давалі правільныя адказы, што надзвычай узрадавала маладых практыкантаў.

У канцы імпрэзы кожнаму з прысутных было прапанавана дадаць наступныя сказы:

1. Больш за ўсё мне спадабалася (не спадабалася)…

2. Я даведаў(ла)ся…

3. Самым цікавым было…

4. Больш за ўсё мне запомніўся верш/песня…

Многім больш за ўсё спадабаўся зварот да кранальнага выступлення самаго пісьменніка, а некаторым запомнілася песня «На Беларусі Бог жыве!» у сучаснай музычнай інтэрпрэтацыі. Таксама дзеці даведаліся многа новых і цікавых момантаў з біяграфіі Уладзіміра Караткевіча.

На свяце прысутнічалі Савасценя Святлана Мікалаеўна, класны кіраўнік 8 «В» класа, а таксама намеснік дырэктара школы па вучэбнай частцы Філіповіч Наталля Анатольеўна.

Дадатковае абмеркаванне мерапрыемства плануецца ажыццявіць 7 снежня 2016 г., у межах занятку па метадычнаму курсу.

Адміністрацыя школы, групавы кіраўнік ад філалагічнага факультэта БДУ адзначаюць высокі ўзровень падрыхтоўкі пяцікурсніц Бароўскай В. І. і Варывончык А. В.  і пры правядзенні ўрокаў у 8-х і 10-х класах.  Гэтыя ўрокі маюць рацыянальна абгрунтаваны характар, характарызуюцца  высокім узроўнем шчыльнасці ў арганізацыі дзейнасці.  З вялікай патрабавальнасцю адбіраецца дыдактычны матэрыял для кожнага ўрока, рыхтуюцца ўласнымі рукамі сродкі навучання. Таленавітыя студэнткі-практыканткі рэалізуюць асобасна арыентаваны, камунікатыўна-дзейнасны, тэкстаарыентаваны падыходы да навучання, выкарыстоўваюць разнастайныя сучасныя тэхналогіі (у тым ліку здароўезберагальныя).

Свята, прысвечанае 125-годдзю Міхаіла Булгакава

На філалагічным факультэце БДУ 18 мая па ініцыятыве кафедры рускай літаратуры адзначылі 125-годдзе Міхаіла Булгакава. Быў паказаны фільм-інтэрв'ю, створаны студэнтамі 3 курса, у якім выкладчыкі і студэнты адказвалі на пытанні пра любімы твор Булгакава, пра сваё стаўленне да экранізацыі яго твораў і значэнне творчасці вялікага пісьменніка. Шматгранны талент Майстра нікога не пакінуў абыякавым, у кожнага аказалася свая гісторыя ўзаемаадносін з яго творамі.
У праграме свята прагучала паведамленне аспіранткі кафедры рускай літаратуры Алены Кабзар «Фантастычны свет Булгакава ў экранізацыях», а таксама была праведзена віктарына па творах Булгакава, у якой удзельнічалі дзве каманды – выкладчыкаў і студэнтаў. Пытанні і заданні выклікалі непадробную цікавасць і жывы водгук аўдыторыі. На завяршэнне былі ўручаны прызы па выніках літаратурнага конкурсу імя Булгакава і прадэманстраваны дакументальны фільм пра пісьменніка. Нягледзячы на вясёлую і нязмушаную атмасферу свята, усе пагадзіліся з меркаваннем, што чытанне Булгакава – справа сур'ёзная. Яго творчасць любяць за стыль, сэнс, свабоду, за тое, што яна пашырае межы звыклага, за містыку, за фантазію. Але прачытанае трэба чуць, з ім трэба працаваць, яму трэба адпавядаць. І юбілей Булгакава для студэнтаў стаў яшчэ адной магчымасцю даведацца нешта новае пра любімага пісьменніка, пашырыць свой кругагляд.

“Візітоўкі першакурснікаў”

Памятаем, некалькі тыдняў таму назад першакурснікі філалагічнага факультэта пабывалі на Мінскім моры, атрымаўшы сапраўдны зарад эмоцый і энергіі на будзённую, плённую работу студэнта: шматлікія лекцыі, практычныя заняткі, семінары, кантрольныя работы і мноства бяссонных студэнцкіх начэй на падрыхтоўку. Каб дапамагчы хлопцам і дзяўчатам крыху пераключыць увагу са штодзённага вучэбнага працэсу, Студэнцкі саюз філалагічнага факультэта на чале з Анастасіяй Елісеевай арганізаваў традыцыйнае ўжо маштабнае мерапрыемства “Візітоўкі першакурснікаў”, скіраванае на творчую самапрэзентацыю і раскрыццё ўсебаковых студэнцкіх талентаў.

3 лістапада 2016 года ў актавай зале нашага факультэта не засталося пустых месцаў, бо кожнаму, як студэнтам, так і выкладчыкам, хацелася ўбачыць, што ж было падрыхтавана стараннымі намаганнямі перашакурснікаў на працягу амаль месяца. Куратары груп, а таксама “цэнзары” мерапрыемства Конеў Ілля, Аўчыннікаў Уладзіслаў і Бабак Раман вельмі перажывалі за каманды, бо ўжо з першых рэпетыцый стала відавочным, што кожная каманда вартая перамогі! Кожная мае сваю адметнасць, як кажуць, сваю разынку.

Вядучыя Ганна Бенько і Іван Жукаў таксама актыўна падтрымлівалі кожную каманду на працягу ўсяго мерапрыемства і дапамагалі вырашаць любыя пытанні выступоўцам. Адну за другой яны аб’яўлялі каманды, якія выходзілі на сцэну і дэманстравалі ўдзячным гледачам свае шматгранныя таленты. Так, напрыклад, першы блок мерапрыемства адкрывала каманда 8-й англійскай групы (куратары Гуль Таццяна, Чамяроўская Кацярына), якая распавядала пра няпросты лёс звычайнай прыбіральшчыцы. За вобраз цёткі Валі Краўцэвіч Юлія атрымала прыз у намінацыі “лепшая жаночая роля”.

Наступнымі выступалі гарачыя хлопцы і дзяўчаты з 19-й усходняй групы (куратары Кавалёва Кацярына, Ціханенка Валерыя). Выступленне ўразіла вялікай колькасцю танцавальных пастаноў. Гісторыя аб сямі тыповых аднагрупніках, якую расказала гэта каманда, была блізкая кожнаму прысутнаму ў зале. За цудоўную пастаноўку каманда атрымала прыз глядацкіх сімпатый.

Куратары 10-й нямецкай групы Жылко Улада і Істраніна Юлія прадставілі гледачам відэа, якое вучыць кожнага студэнта, асабліва першакурсніка, як неабходна правільна вырашаць розныя складаныя сітуацыі, звязаныя з вучэбным працэсам.

Гісторыя пра Чарлі Чапліна завяршала першы блок мерапрыемста (12-я італьянская група, куратар – Мурашка Аляксей).  Асабліва хочацца адзначыць, што ў выступленні гэтай групы прыняў удзел дацэнт нашага факультэта Навумовіч Уладзімір Аляксандравіч, які цудоўна прадэкламаваў верш Барыса Пастэрнака “Свеча горела”.

Другі блок адкрыла 5-я руская група (куратары Шляхціна Марыя, Ярашчук Яўгенія) і распавяла нам рэальную гісторыю пра  падрыхтоўку да візітовак – гісторыю, якая адбываецца на філфаку штогод, вылучала ў пастаноўцы момант, калі трэба несці гатовы сцэнарый цэнзарам. Каманда ўразіла тым, як шчыра можна смяяцца над сваімі ўласнымі памылкамі, і тым самым унесла ў свой нумар павучальны элемент.

Вельмі нестандартна падышла да паказу рэальнай сітуацыі 13-я славянская група (куратары Краўчанка Валерыя, Сцяпанава Лізавета, Бардзенюк Лізавета). Нежывыя рэчы (студэнцкі білет, помнік Францыску Скарыну, аўтамат для пячаткі дакументаў) раптам ажылі! Першакурснікі паказалі жыццё неадушаўлёных прадметаў на філфаку цікава і з гумарам.

9-я англійская група (куратары Сныткіна Юлія, Францішава Яўгенія), якая завяршала другі блок, прэзентавала на сцэне гісторыю студэнта з вёскі, яго цяжкасці і выпрабаванні. А таксама група расказала кранальную гісторыю пра сувязь пакаленняў на філфаку.

Трэці блок распачала 14-я славянская група: разам са сваімі куратарамі Дуднік Марыяй і Катушкінай Анастасіяй яны вырашылі дагадзіць адразу тром цэнзарам, сумясціўшы ў сваім выступленні новае, камічнае і кранальнае. Навамодны філфакаўскі варыянт усім вядомай «Applepen» “разарваў” залу гучным смехам. Прыз за лепшую мужчынскую ролю атрымаў Віктар Есін.

11-я французская група (куратары Галоўчык Вікторыя, Кавалеўская Марына) змагла пераканаць студэнтаў з мінулага, што адсутнасць перамен на філфаку мае свае плюсы. Агітацыя прайшла пад лозунгам: «Не трэба прыгожа апранацца, калі не здымаеш паліто».

Жмайлік Марыя і Карцава Ганна, куратары першай беларускай групы, вырашылі пераўвасобіць сарамлівых дзяўчат у вядомых пісьменнікаў і паэтаў і ўнеслі ў іх вобразы штосьці сучаснае. Так, напрыклад, Максім Багдановіч, Максім Горкі, Уільям Шэкспір, Іаган Гётэ з’явіліся дзяўчыне-абітурыентцы ў сне, чыталі рэп пра філфак як аб месцы для творчых людзей.

Хутка скончыліся нумары першакурснікаў, адзнакі былі выстаўлены, і журы неабходна было падлічыць балы, каб аб’явіць пераможцаў. Пакуль журы вызначала лепшых з лепшых, куратарская служба ўзнагародзіла дыпломамі пераможцаў у конкурсе відэа. Перамогу тут атрымалі дзяўчаты 1 беларускай групы з відэа пад назвай “Судный день”. Таксама была ўзнагароджаная 8-я англійская група, якая перамагла ў конкурсе на лепшы фотаздымак сваёй каманды.

За гэты час паспелі прыйсці да высноў члены журы. Усе з нецярплівасцю чакалі вынікаў! Па падліках журы, якое ўзначальваў дэкан І.С. Роўда, бясспрэчную перамогу атрымала 14-я славянская група, якая набрала максімальны бал – 58. За імі па колькасці балаў –  12-я італьянская група – 49 балаў і 8-я англійская  – 48 балаў. Святочную атмасферу ў зале дапамаглі стварыць нашы замежныя студэнткі, якія праспявалі песню на рускай мове.

Было бачна, што першакурснікі атрымалі захапленне ад сваіх выступленняў, настрой іх быў бадзёрым і вясёлым. Кожны год моладзь дэманструе, што філалагічны факультэт – надзвычай творчы і тут няма калі сумаваць.

Сустрэча студэнтаў-славістаў з першым сакратаром пасольства Украіны ў Беларусі і пісьменнікамі

На філалагічным факультэце адбылася сустрэча студэнтаў-славістаў з першым сакратаром пасольства Украіны ў Беларусі Гуцала Марыяй Грыгор’еўнай і пісьменнікамі Наталкай Бабінай і Уладзіславам Ахроменкам. Ад кіраўніцтва факультэта і выкладчыкаў у сустрэчы бралі ўдзел намеснік дэкана, выкладчык украінскай літаратуры дацэнт Навойчык П.І. і выкладчык украінскай мовы дацэнт Валатоўская Н.А.

Гуцала М.Г. пазнаёміла прысутных з апошнімі навінамі культурнага жыцця Украіны і ўкраінскай дыяспары ў Беларусі, а таксама з мерапрыемствамі, якія плануе правесці пасольства, і перадала ў якасці падарунка кабінету ўкраінскай філалогіі вучэбна-метадычную і мастацкую літаратуру. Яна заахвоціла студэнтаў спецыяльнасці “Славянская (украінская) філалогія” да карыстання фондамі бібліятэкі пасольства. Пісьменніца Наталка Бабіна прэзентавала 3-ці нумар беларуска-ўкраінскага літаратурнага альманаха “Справа”, у якім змешчаны творы беларускіх і ўкраінскіх аўтараў, а таксама матэрыялы на гаворках поўдня Беларусі, якія вельмі набліжаны да ўкраінскай мовы. Уладзіслаў Ахроменка расказаў пра сваю творчую дзейнасць, а таксама прадставіў пераклад рамана “Тэорыя змовы” на ўкраінскую мову.

Абмеркаванне надзённых пытанняў беларуска-ўкраінскага літаратурнага і культурнага супрацоўніцтва прайшло ў атмасферы шчырасці і сяброўскага ўзаемапаразумення і было несумненна карысным для абодвух бакоў.

Конкурс чытальнікаў, прысвечаны 86-годдзю з дня нараджэння У. Караткевіча

25 лістапада на філалагічным факультэце БДУ прайшоў конкурс чытальнікаў, прымеркаваны да 86-годдзя з дня нараджэння Уладзіміра Караткевіча. Ужо другі год запар аддзел абслугоўвання філалагічнага і эканамічнага факультэтаў ФБ БДУ сумесна з Вучэбна-навуковай лабараторыяй беларускага фальклору арганізоўваюць гэты конкурс. У ім акрамя студэнтаў БДУ (філфак і гістфак) прынялі ўдзел выступоўцы з гімназіі №16 г. Мінска, Рэспубліканскага музычнага каледжа і юрыдычнага каледжа БДУ. Пераможцаў вызначала журы, у складзе якога былі: к.ф.н., дацэнт Анатоль Леанідавіч Верабей, к.ф.н., дацэнт Уладзімір Аляксандравіч Навумовіч, к.ф.н., дацэнт Міхаіл Паўлавіч Кенька, старшыня гарадскога аддзялення Саюза пісьменнікаў Беларусі Міхаіл Паўлавіч Пазнякоў, а таксама намеснік галоўнага рэдактара часопіса «Маладосць» Дзмітрый Шулюк.

У гэтым годзе школьнікі і студэнты спаборнічалі асобна.

У першай намінацыі «Лепшае чытанне твора Ул. Караткевіча» сярод школьнікаў месцы размеркаваліся наступным чынам:

1. Злата Апалонік (гімназія №16, 8 "В")

2. Яна Луферчык (юрыдычны каледж БДУ)

3. Святлана Аўсяннікава (гімназія №16, 8 "Г")

Прыз глядацкіх сімпатый дастаўся вучню 7 “Б” класа Рэспубліканскага музычнага каледжа Максіму Вяргею, які вельмі артыстычна прачытаў верш «Заяц варыць піва».

Сярод студэнтаў першае месца заняла Яўгенія Пракапчук - студэнтка 2 курса філалагічнага факультэта. Як і ў мінулым годзе, меркаванне гледачоў і меркаванне журы супала. Яўгенія атрымала таксама прыз глядацкіх сімпатый. На другім месцы - Дзіяна Харытановіч, студэнтка 3 курса філалагічнага факультэта. Трэцім стаў Яўген Чарнышоў студэнт 5 курса філалагічнага факультэта.

У другой намінацыі «Лепшае выступленне з аўтарскім творам, прысвечанае Ул. Караткевічу» першай стала Марыя Крупская (гімназія №16)

У намінацыі  "Лепшая ілюстрацыя да твораў  Ул. Караткевіча" перамога дасталася студэнтцы 5 курса філфака Марыны Шэвель.

Да ўвагі студэнтаў!

З мэтай дапамогі ў пошуку перашага працоўнага месца, на сайце БДУ ствараецца база дадзеных выпускнікоў для працадаўцаў (www.cv.bsu.by). Запрашаем студэнтаў 3-4 курсаў размясціць сваё рэзюмэ на гэтым рэсурсе. Для таго, каб інфармацыя пра вас, вашых прафесійных навыках і кампетэнцыях трапіла на старонкі сайта, неабходна запоўніць спецыяльную форму з персанальнымі дадзенымі, прыкласці файл з уласным фотаздымкам і тэкставы файл, які змяшчае ўласна рэзюмэ, напісанае ў адвольнай форме. Падрыхтаваную інфармацыю неабходна адправіць на адрас: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду..
 

РЭСПУБЛІКАНСКІ ФЕСТЫВАЛЬ ТЭАТРАЛЬНАГА МАСТАЦТВА СЯРОД СТУДЭНТАЎ (НА КІТАЙСКАЙ МОВЕ)

Кафедра кітайскай філалогіі філалагічнага факультэта пры падтрымцы Пасольства Кітайскай Народнай Рэспублікі ў Рэспубліцы Беларусь праводзіць Рэспубліканскі фестываль тэатральнага мастацтва на кітайскай мове сярод студэнтаў устаноў вышэйшай адукацыі, прысвечаны 95-годдзю з дня заснавання Беларускага дзяржаўнага ўніверсітэта. Удзельнікі фестывалю прадэманструюць акцёрскія і творчыя здольнасці, а таксама веды і навыкі ў галіне кітайскай мовы і літаратуры, нацыянальнай культуры.

Мерапрыемства адбудзецца 11 лістапада 2016 года на філалагічным факультэце Беларускага дзяржаўнага універсітэта ў 16.00 (вул. К.Маркса, 31, актавая зала, першы паверх).

15 Міжнародны конкурс сярод студэнтаў па кітайскай мове “Мая мара пра Кітай”

Віншуем Расаеву Зінаіду Андрэеўну і Царову Святлану Васільеўну, студэнтак філалагічнага факультэта спецыяльнасці “Усходняя (кітайская) філалогія”, якія атрымалі Дыпломы другой і трэцяй ступені ў Беларускім адборачным туры 15-га Міжнароднага конкурсу сярод студэнтаў па кітайскай мове “Мая мара пра Кітай”.

28 мая 2015 года пад эгідай Пасольства Кітайскай Народнай Рэспублікі ў Рэспубліцы Беларусь адбыўся Беларускі адборачны тур 15-га Міжнароднага конкурсу сярод студэнтаў па кітайскай мове “Мая мара пра Кітай”, у якім прынялі ўдзел трынаццаць студэнтаў з розных устаноў адукацыі Рэспублікі Беларусь. У дадзеным мерапрыемстве на працягу многіх гадоў актыўна ўдзельнічаюць і студэнты філалагічнага факультэта БДУ спецыяльнасці “Усходняя філалогія”, дэманструючы высокія вынікі. І гэты год не стаў выключэннем: Расаева Зінаіда Андрэеўна, студэнтка V курса, Царова Святлана Васільеўна і Аляксееў Уладзіслаў Уладзіміравіч, студэнты IV курса, прадэманстравалі цудоўнае веданне кітайскай мовы і культуры, а таксама свае творчыя здольнасці.

НАВУКОВАЯ СТАЖЫРОЎКА СТУДЭНТАЎ КЛАСІЧНАГА АДДЗЯЛЕННЯ НА ФАКУЛЬТЭЦЕ “ARTES LIBERALES” ВАРШАЎСКАГА ЎНІВЕРСІТЭТА

Пяць студэнтаў III курса спецыяльнасці “Класічная філалогія” – Ангеліна Герус, Алена Капліч, Крысціна Качур, Сяргей Лунскі, Анастасія Шылава – з 1-га па 30-е мая 2016 г. прайшлі навуковую стажыроўку ў Варшаўскім універсітэце на факультэце “Artes Liberales”. Значнай часткай стажыроўкі былі семінары, канверсаторыумы і лекцыі разам з польскімі студэнтамі. Нашы студэнты займаліся у прафесара Роберта Сухарскага (курсы “Гісторыя старажытнагрэчаскай мовы”, “Чытанне старажытных аўтараў”), прафесара Адама Зюлкоўскага (“Структура наратыва аналаў: Livius, “Ab urbe condita”), прафесара Маўгажаты Бароўскай (“Антычная культура”), у доктара Ганны Паўлоўскай (“Культура рэвалюцыі і Антычнасць”), прафесара Катажыны Марцінек (“У пошуках міфалагічных істот і монстраў”). Сваімі ўражаннямі дзеліцца Ангеліна Герус:

“Нам пашчасціла цэлы май правесці ў Варшаве. Спачатку мы, калі ўбачылі расклад, а разам з ім – колькасць святаў, хітравата перамігваліся і ўсміхаліся, бо былі ўпэўнены: атрымліваем сапраўдныя вакацыі замест навуковай стажыроўкі. Але адпачыць амаль не было часу. Тым не менш, гэты цудоўны месяц падарыў кожнаму з нас зусім асаблівы вопыт, новыя мэты і цёплыя ўспаміны пра Варшаўскі ўніверсітэт і саму польскую сталіцу.

Наша невялікая група класікаў-стажораў накіравалася за мяжу, каб з яшчэ большай руплівасцю працаваць над уласным праектам, які мы ствараем пад кіраўніцтвам В. Г. Пракапчук на спецсемінары: пераклад з лацінскай мовы на беларускую фрагментаў з трактата Квінтыліяна “Institutio oratoria”. Няцяжка здагадацца, якое пытанне стала па-сапраўднаму нас пераследваць: “З якой жа нагоды ў такім выпадку патрэбна ехаць ў суседнюю Польшу?” А нагода была: цудоўныя бібліятэкі і каштоўныя парады замежных спецыялістаў-класікаў.

На занятках было вельмі цікава, і апроч новых ведаў мы атрымлівалі і мора задавальнення. Магчыма, таму, што там заўсёды было месца для эксперыментаў: разам з тэкстамі Лукіяна і Еўрыпіда мы па-старажытнагрэчаску чыталі Гары Потэра, альбо (з іншым выкладчыкам) абмяркоўвалі сувязь якой-небудзь міфалагічнай пачвары з пэўным мультфільмам ці дзіцячай казкай, альбо спрабавалі замяніць адно слова на іншае ў тэксце Лівія і растлумачыць, чаму аўтар піша менавіта так. А магчыма, таму, што нам заўсёды даводзілася нешта параўноўваць, шукаць, абгрунтоўваць – а гэта падобна на сапраўднае “паляванне” на адказ. Стажыроўка ў іншай краіне дазваляе крыху інакш паглядзець і на свае веды і здольнасці, і на дысцыпліны, якія вывучаеш. І ізноў у іх закахацца.

Гэта быў шэраг вельмі прыемных знаёмстваў: з Варшавай, яе ўніверсітэцкім жыццём, з факультэтам “Artes Liberales”, разам з яго выкладчыкамі і студэнтамі, з буйнымі міжнароднымі канферэнцыямі “Chasing Mythical Beasts… The Reception of Creatures from Graeco-Roman Mythology in Children’s & Young Adults’ Culture as a Transformation Marker” і “Heredes et scruta tores: attitudes towards Antiquity in the Renaissance and in the Early Modern Period”, польскай кухняй, музеямі, узбярэжжам Віслы і ўтульнымі вуліцамі. Прыемныя знаёмствы, якія за трыццаць дзён зрабілі нас крыху больш прафесіянальнымі, крыху больш упэўненымі, адкрытымі і мэтанакіраванымі”.