Кафедра раманскага мовазнаўства

Кафедра раманскага мовазнаўства была створана на філалагічным факультэце ў 2002 годзе і стала першай у краіне кафедрай раманістыкі філалагічнага профілю. Цягам амаль дваццаці гадоў яна з’яўляецца выпускаючай па спецыяльнасцях «Рамана-германская (італьянская) філалогія» і «Рамана-германская (французская) філалогія».

Студэнты, якія абралі дадзены кірунак універсітэцкай адукацыі, атрымліваюць сур’ёзную шматузроўневую падрыхтоўку па практыцы замежнай мовы, вывучаюць яе тэарэтычныя, культуралагічныя і гістарычныя аспекты (фанетыку, лексікалогію, граматыку, стылістыку, гісторыю мовы), методыку выкладання абранай мовы, набываюць навыкі вуснага і пісьмовага перакладу. Акрамя лекцыйных і практычных заняткаў, навучальны план прадугледжвае таксама праходжанне педагагічнай і перакладчыцкай практыкі з мэтай асваення практычных навыкаў для будучай прафесійнай дзейнасці.

Вельмі важным аспектам, які дапаўняе ўласна навучальны працэс, сталі і міжнародныя кантакты кафедры: дзякуючы плённым сувязям з культурнымі і адукацыйнымі ўстановамі Італіі і Францыі, а таксама ўдзелу ў праграмах міжнароднага абмену «Эразмус», многія студэнты і выкладчыкі кафедры змаглі прайсці курсы навучання і павышэння прафесійнай кваліфікацыі ва ўніверсітэтах гэтых краін.

Атрымаўшы кваліфікацыю «Філолаг. Выкладчык французскай / італьянскай мовы. Перакладчык», выпускнікі дадзенага профілю філалагічнай падрыхтоўкі паспяхова інтэгруюцца ў сучасную прафесійную супольнасць у якасці выкладчыкаў сярэдніх і вышэйшых навучальных устаноў, рэдактараў, перакладчыкаў тэхнічнай, мастацкай літаратуры і IT-праектаў, – у тыя шматлікія вобласці гуманітарнай і тэхнічнай дзейнасці, у якіх неабходны глыбокія і трывалыя веды замежных моў. За час існавання кафедры яе выпускнікамі сталі больш за 500 студэнтаў, якія падрыхтавалі дыпломныя і магістарскія праекты па розных аспектах раманскага і параўнальнага мовазнаўства, мастацкага перакладу, методыцы выкладання раманскіх моў.

Важным складнікам дзейнасці кафедры з’яўляюцца і навуковыя даследаванні ў галіне раманскага і супастаўляльнага мовазнаўства, лінгвакультуралогіі, інавацыйных методык у выкладанні раманскіх моў. Навукова-даследчая работа вялася па тэмах «Замежная мова як сродак пазнання культуры: тэарэтычны і практычны аспекты (на матэрыяле французскай і італьянскай моў)» (2003–2007 гг.), «Раманскія мовы ў кантэксце дыялогу еўрапейскіх культур (на матэрыяле французскай і італьянскай моў)» (2008–2013 гг.), «Раманскія мовы на мяжы ХХ–XXI стст.: cістэма і функцыянаванне (на матэрыяле французскай і італьянскай моў)» (2013–2015 гг.), «Раманскія мовы ў славянскім моўным арэале: праблемы ўзаемадзеяння (на матэрыяле французскай і італьянскай моў)» (2016–2020 гг.), «Моўная і культурная спадчына Раманіі: традыцыі і перспектывы даследавання» (з 2021 г.). У рамках навуковых тэм было падрыхтавана больш за 400 публікацый, выкладчыкі кафедры прынялі ўдзел у больш чым 100 навуковых канферэнцый у Беларусі і за яе межамі. Да актыўнай навуковай дзейнасці далучаюцца і студэнты, якія выконваюць курсавыя, дыпломныя і магістарскія даследаванні, а таксама штогод удзельнічаюць у студэнцкай навуковай канферэнцыі. Акрамя таго, на базе кафедры праводзіцца міжнародная навуковая канферэнцыя «Раманія: моўная і культурная спадчына», удзел у якой прымаюць філолагі і лінгвісты Беларусі, Італіі, Францыі, Расіі, Украіны, Літвы і іншых краін.

Улічваючы, што асноўнай спецыфікай дзейнасці кафедры з’яўляецца выкладанне дысцыплін філалагічнага цыкла, найбольш істотным яе вынікам з’яўляецца падрыхтоўка вучэбных і вучэбна-метадычных дапаможнікаў, якія адлюстроўваюць розныя аспекты выкладання раманскіх моў.

Для больш мэтанакіраванага забеспячэння матэрыяламі па вывучаемых дысцыплінах быў створаны сайт «Італьяністыка ў Беларусі», існуюць тэматычныя групы ў сацсетках Instagram і Facebook, ёсць шырокі бібліятэчны фонд выданняў на італьянскай і французскай мовах, які ўключае найноўшыя вучэбныя дапаможнікі краін вывучаемай мовы і мастацкія тэксты італьянскіх і французскіх пісьменнікаў.