BY
Гурток “Роднае слова” – гэта прыдатная форма арганізацыі навукова-даследчай работы студэнтаў (да 2015 года – 1-2 курсаў, зараз прыцягваюцца да работы жадаючыя студэнты ўсіх курсаў) філалагічнага факультэта, якiя маюць намер займацца навукова-даследчай працай у галiне мовазнаўства ўжо з першых дзён навучання на факультэце. Заняткі маюць на мэце, па-першае, паглыбiць лiнгвiстычныя веды студэнтаў пра сучасныя тэндэнцыi ў вывучэннi мовы, пазнаёміць іх з сусветнымі і айчыннымі дасягненнямі філалагічнай навукі, па-другое, удасканалiць або прывiць уменнi i навыкi вядзення навукова-даследчай работы i напiсання навуковых прац па актуальнай праблематыцы сучаснага мовазнаўства.
Праца ў гуртку “Роднае слова” скіравана не толькі на тое, каб задаволіць запатрабаванні студэнтаў у лінгвістычных ведах і забяспечыць засваенне імі пэўных моўных законаў, сфарміраваць у іх высокую моўную культуру, павагу і цікавасць да роднага слова, духоўнай спадчыны сваіх продкаў, традыцый айчыннага і сусветнага мовазнаўства, але і атрымаць рэальны вопыт вядзення навукова-даследчай работы, перадусім праз выкананне ўласных навукова-даследчых прац і іх апрабацыю праз выступленні на навуковых канферэнцыях і публікацыю ў навукова-метадычных выданнях.
Паколькі традыцыйна, планава да навукова-даследчай дзейнасці студэнты-філолагі да 2014 года прыцягваліся толькі з 3 курса праз удзел у навуковых спецыяльных семінарах і напісанне курсавых і дыпломных работ, гурток “Роднае слова” быў скіраваны на працу са студэнтамі 1-2 курсаў, для якіх гэта была ўнікальная магчымасць паспрабаваць свае сілы і зрабіць свае першыя крокі ў навуку пад пільным кіраўніцтвам выкладчыка-спецыяліста, рэалізаваць свой творчы патэнцыял праз удзел у канферэнцыях і іншых цікавых мерапрыемствах, а таксама пры адпаведным старанні – апублікаваць вынікі сваіх навуковых намаганняў у адкрытым друку ўжо на першым-другім курсах. Няхай студэнты-малодшакурснікі не заўжды могуць пакуль прымаць удзел у сур’ёзных міжнародных і рэспубліканскіх конкурсах навуковых студэнцкіх работ, але яны актыўна ўключаюцца ў працу студэнцкіх, рэспубліканскіх і нават некаторых міжнародных канферэнцый (падчас у сааўтарстве з кіраўніком), з цікавымі паведамленнямі і ўласнымі навуковымі назіраннямі выступаюць перад сваім калегамі-студэнтамі на занятках па курсе “Сучасная беларуская мова”, прымаюць актыўны ўдзел у жыцці факультэта, а ў далейшым – многія з іх працягваюць актыўна займацца навукай ужо у спецсемінарах, працягваюць навучанне ў магістратуры і аспірантуры.
У перыяд з 2003 па 2016 год уключна у працы гуртка “Роднае слова” прынялі ўдзел больш за 150 студэнтаў. За гэты час удзельнікамі гуртка падрыхтавана і апублікавана каля 70 студэнцкіх навуковых работ, як у айчынных, так і замежных выданнях; падрыхтавана 95 студэнцкіх навуковых дакладаў, прадстаўленых на студэнцкіх, рэспубліканскіх і міжнародных канферэнцыях.
Яшчэ адзін напрамак дзейнасці гуртка “Роднае слова” – папулярызацыя беларускай мовы сярод моладзі праз правядзенне адпаведнага зместу мерапрыемстваў, конкурсаў, гульняў, творчых сустрэч і інш.
Кіраўнік гуртка (з 1 верасня 2003 года па сённяшні дзень): Садоўская Анжаліка Леанідаўна – дацэнт кафедры сучаснай беларускай мовы філалагічнага факультэта БДУ, кандыдат філалагічных навук, дацэнт.
