RU 8 красавіка 2024 года на філалагічным факультэце БДУ былі падведзены вынікі праходжання вучэбнай педагагічнай адаптацыйнай і педагагічнай перадыпломнай практык, якія праходзілі ва ўстановах агульнай сярэдняй і вышэйшай адукацыі г. Мінска і Мінскай вобласці.
На выніковым сходзе прысутнічалі студэнты 2-га і 4-га курсаў спецыяльнасці “Беларуская філалогія (па напрамках)”, загадчык, кафедры рыторыкі і методыкі выкладання мовы і літаратуры, кандыдат філалагічных навук А. А. Акушэвіч, групавыя кіраўнікі: прафесар В. У. Праскаловіч, дацэнт І. М. Саматыя, выкладчык А.Э.Бурак, а таксама старшы выкладчык кафедры агульнай і медыцынскай псіхалогіі К. І. Цюхай.
На канферэнцыі адбылася зацікаўленая размова пра навучанне беларускай мове і літаратуры ў сучасных умовах.
У межах мерапрыемства праходзіў агляд творчых справаздач. Чацвёртакурснікі прэзентавалі сваю навучальную ўстанову, дзе праходзілі практыку, дзяліліся набытым вопытам выкладання беларускай мовы і літаратуры, прыводзілі прыклады сваіх метадычных знаходак. Такая арганізацыя канферэнцыі была карыснай і для другакурснікаў, якія падчас азнаямляльна-адаптацыйнай практыкі наведвалі ўрокі настаўнікаў-метадыстаў і практыкантаў-чацвёртакурснікаў. Такім чынам рэалізавалася практыкаарыетаванасць навучання методыцы выкладання мовы і літаратуры.
Цікавым было выступленне Анастасіі Новікавай і Анастасіі Маліноўскай. Другакурснікі назіралі і аналізавалі ўрокі розных дыдактычных сістэм: традыцыйнага, развіццёвага і асобасна-арыентаванага навучання. На ўроках настаўнікаў-наватараў Кушаль Караліны Дзмітрыеўны і Крукоўскай Алены Валяр’янаўны (УА “Мінская дзяржаўная гімназія-каледж мастацтваў”) студэнты пазнаёміліся з арыгінальнымі інтэрактыўнымі метадамі навучання, у тым ліку з выкарыстаннм штучнага інтэлекту: на этапе матывацыі і мэтавызначэння, на этапе актуалізацыі уменняў і навыкаў; ацанілі выкарыстанне эмацыянальнасці як эфектыўнага прыёму засваення вучэбнага матэрыялу і інш.
Падчас наведвання ўрокаў ў ДУА “Сярэдняя школа №136 г. Мінска”, ДУА “Рэспубліканская гімназія-каледж пры Беларускай дзяржаўнай акадэміі музыкі” другакурснікі пераканаліся, што дарэчнымі з’яўляюцца ўсе метады асобасна-арыентаванага навучання, бо навучэнцы ўдзельнічаюць ў вызначэнні спосабу засваення вучэбнага матэрыялу. Цікавымі былі назіранні за станаўленнем практычнага вопыту чацвёртакурснікаў.
Такім чынам, пасля праходжання педагагічнай практыкі студэнты яшчэ раз пераканаліся, што нічога не вартая ніякая школа, ніякі ўніверсітэт, калі няма практычнага ўмення; што “педагог – гэта не толькі выхавацель, педагог – гэта сябар, чалавек, які дапамагае нашаму грамадству падымацца на найвышэйшую прыступку культуры” (Якуб Колас) і “каб з карысцю вучыць іншых, трэба найперш вучыцца самому педагогу, вучыцца да глыбокай старасці” (Я.А.Патон).
