Прэзентацыя новых кніг супрацоўнікаў кафедры замежнай літаратуры

13 сакавіка2013 годана філалагічным факультэце БДУ адбылася прэзентацыя новых кніг супрацоўнікаў кафедры замежнай літаратуры.

Загадчыца кафедры культуралогіі БДУ, дацэнт кафедры замежнай літаратуры філалагічнага факультэта Галіна Веніямінаўна Сініла прапанавала ўвазе выкладчыкаў і студэнтаў вучэбны дапаможнік “Гісторыя нямецкай літаратуры XVIII стагоддзя” – унікальнае выданне, першае на ўсходнеславянскай прасторы фундаментальнае даследаванне такога кшталту, а таксама манаграфіі “Песня Песняў у кантэксце сусветнай культуры” і “Эклесіяст і яго рэцэпцыя ў сусветнай культуры”, прысвечаныя біблійным кнігам, што паўплывалі на літаратуру наступных стагоддзяў. Падчас прэзентацыі былі прачытаны арыгінальныя і перакладныя паэтычныя творы выбітных аўтараў розных эпох.

Старшыня Беларускага ПЭН-Цэнтру, выкладчык Андрэй Валер’евіч Хадановіч пазнаёміў аўдыторыю са сваёй кнігай “Дэжа вю: перавыбранае”. Аўтар прапанаваў слухачам некаторыя творы, што сведчаць аб этапах яго мастацкай эвалюцыі. Таксама былі прачытаны вершы Максіма Танка, абраныя Андрэем Хадановічам для паэтычнай кнігі “Абвяржэнне” як адны з найбольш значных тэкстаў класіка беларускай літаратуры.

Кафедра замежнай літаратуры выказвае шчырую падзяку Святлане Якаўлеўне Ганчаровай-Грабоўскай, Ірыне Сцяпанаўне Скарапанавай, Сяргею Васільевічу Логішу, Кацярыне Пятроўне Любецкай, якія разам са студэнтамі далучыліся да прэзентацыі, а таксама загадчыцы кафедры класічнай філалогіі Галіне Іванаўне Шаўчэнка і Анатолю Леанідавічу Вераб’ю.

{gallery}2013-03-15{/gallery}