20 мая 2022 года адбылася агульнаўніверсітэцкая патрыятычна-асветніцкая акцыя «Вязынка – 2022».

Сёлета ганаровымі гасцямі сталі студэнты Полацкага дзяржаўнага ўніверсітэта на чале з дэканам гуманітарнага факультэта ПДУ Аляксандрам Сяргеевічам Кірыенка.

Сваім меркаваннем пра мінулае мерапрыемства падзяліўся Аляксандр Сяргеевіч: «Дэлегацыя Полацкага дзяржаўнага ўніверсітэта выказвае шчырыя словы падзякі філалагічнаму факультэту Беларускага дзяржаўнага ўніверсітэта ў асобе дэкана факультэта Сяргея Аляксандравіча Важніка за прадстаўленую магчымасць наведаць штогадовы фестываль «Вязынка – 2022», які ў гэтым годзе прымеркаваны да юбілею з дня нараджэння Янкі Купалы і Якуба Коласа.

Свята і канцэрт пакінуў добры след у душы кожнага студэнта нашага ўніверсітэта. Было прыемна паразмаўляць са студэнтамі, якія дапамагалі праходзіць квэст, паслухаць выкладчыкаў філалагічнага факультэта БДУ, паспаборнічаць у дартс і перацягванні каната з дэканам філалагічнага факультэта. Маляўнічыя месцы Вязынкі назаўжды застануцца ў памяці і будуць вабіць сваёй прыгажосцю нашых студэнтаў у будучыні».

7 красавіка 2022 года на філалагічным факультэце адбылася творчая сустрэча з маладым беларускім празаікам, драматургам і сцэнарыстам – Уладай Альхоўскай, лаўрэатам прэстыжных Міжнародных конкурсаў («Автора — на сцену!», «Время драмы, 2019, зима», «Монодрама 2019» и др.). 

Арганізатарам сустрэчы выступіла прафесар кафедры рускай літаратуры Святлана Якаўлеўна Ганчарова-Грабоўская. У рамках спецкурса па сучаснай драматургіі Святлана Якаўлеўна правяла міні-лекцыю аб творчасці Улады Альхоўскай. Асаблівая ўвага была нададзена праблематыцы яе твораў, іх жанрава-стылявой спецыфіцы і аўтарскай індывідуальнасці.

Улада расказала аб тым, як стала пісьменніцай, падзялілася таямніцамі сваёй творчай лабараторыі.

На мерапрыемстве прысутнічалі выкладчыкі кафедры рускай літаратуры і яе загадчык – Людміла Леанідаўна Аўдзейчык. Студэнты таксама прынялі актыўны ўдзел у абмеркаванні і выказалі жаданне аб новай сустрэчы.

Беларусь рыхтуецца да вялікага юбілею. 7 ліпеня - 140 гадоў з дня нараджэння народнага паэта, класіка нацыянальнай літаратуры Янкі Купалы.
Вязынка прымала студэнтаў і выкладчыкаў Белдзяржуніверсітэта.

20 красавіка 2022 г. студэнты спецыяльнасці «Класічная філалогія» прынялі ўдзел у 74-й Усерасійскай (з міжнародным удзелам) навуковай канферэнцыі навучэнцаў і маладых вучоных. У секцыі «Грэка-рымская спадчына ў сусветнай культуры: традыцыі і сучаснасць» з дапамогай тэхналогіі Zoom выступілі студэнты 1-га курса спецыяльнасці «Класічная філалогія» з дакладамі: «Асаблівасці цытацыі грэчаскага тэксту Бібліі на прадметах рэлігійнага ўжытку (на прыкладзе энкалпіёна з калекцыі Мінскай духоўнай акадэміі)» (Уладзімір Грыцэвіч) і «Лацінамоўныя надпісы Нясвіжскага касцёла (Беларусь): досвед класіфікацыі» (Мацвей Драгун). Даследаванні праводзіліся ў рамках рэалізацыі праекта «Лаціна- і грэкамоўныя надпісы ў храмавай культуры Беларусі», які ўдзельнічае ў конкурсе на лепшы маладзёжны праект у БДУ.

Даклады беларускіх удзельнікаў выклікалі цікавасць аўдыторыі і ажыўленую дыскусію. Журы секцыі, у якое ўвайшлі супрацоўнікі кафедры класічнай філалогіі, рускай літаратуры і журналістыкі Інстытута філалогіі ПетрДУ, высока ацаніла даследаванні студэнтаў БДУ: даклад М. Драгуна заняў 2-е месца, даклад У. Грыцэвіча – 3-е месца. Матэрыялы дакладаў будуць апублікаваны ў Зборніку лепшых дакладаў канферэнцыі. Прыз глядацкіх сімпатый дастаўся М. Драгуну.

Віншуем нашых хлопцаў і жадаем ім далейшых поспехаў у навуковай дзейнасці!

12 мая 2022 г. на філалагічным факультэце Беларускага дзяржаўнага ўніверсітэта прайшоў навукова-метадычны семінар «Педагагічная дзейнасць В. П. Рагойшы», прысвечаны 80-годдзю з дня нараджэння і 55-годдзю навукова-педагагічнай дзейнасці Вячаслава Рагойшы, доктара філалагічных навук, прафесара, прафесара кафедры тэарэтычнага і славянскага літаратуразнаўства, акадэміка Міжнароднай акадэміі навук Еўразіі, загадчыка кафедры тэорыі літаратуры БДУ (1994–2016), выдатнага вучонага, педагога, грамадскага дзеяча, пісьменніка.

У працы семінара ўзялі ўдзел выкладчыкі філалагічнага факультэта, студэнты 2 і 3 курса спецыяльнасці «Славянская філалогія» (украінская, сербская, польская), аспіранты і дактаранты кафедры тэарэтычнага і славянскага літаратуразнаўства, галоўны рэдактар часопіса «Роднае слова».

Арганізатары свядома адышлі ад традыцыйнага рэгламенту семінара, пакінуўшы ад апошняга наяўнасць асноўнага праблемнага дакладу. Далейшая праграма ўяўляла сабой урачыстую імпрэзу.

Вёў семінар дэкан філалагічнага факультэта, кандыдат філалагічных навук, дацэнт Сяргей Важнік, які і адкрыў пасяджэнне. Ён адзначыў значнасць асобы Вячаслава Рагойшы для факультэта і ўсяго ўніверсітэта і зарыентаваў студэнтаў на знаёмства з багатай спадчынай юбіляра.

Вячаслаў Рагойша ў сваім выступленні пра ўласныя педагагічныя погляды паведаміў аб тым, як назапашваўся яго вопыт за гады працы на філалагічным факультэце, як шліфаваліся яго прынцыпы выкладання літаратуразнаўчых дысцыплін, як самым дзейсным ён стаў лічыць «смех тры разы за пару, каб студэнты адпачылі».

Старшы выкладчык кафедры тэарэтычнага і славянскага літаратуразнаўства Святлана Крылова пазнаёміла прысутных з прэзентацыяй «Да юбілею прафесара Вячаслава Рагойшы», якая складалася з фотаздымкаў з асабістага архіва юбіляра, размеркаваных у храналагічным парадку па этапах працы ў БДУ: ад выкладчыка кафедры гісторыі беларускай літаратуры да загадчыка кафедры тэорыі літаратуры і прафесара кафедры тэарэтычнага і славянскага літаратуразнаўства.

З выставай кніг «Набытак навукова-педагагічнай дзейнасці прафесара В. П. Рагойшы» пазнаёміла загадчык залы інфармацыйных рэсурсаў аддзела абслугоўвання філалагічнага і эканамічнага факультэтаў БДУ Жанна Карповіч. Яна падрабязна спынілася на ўсіх напрамках публікацыйнай спадчыны Вячаслава Рагойшы – як аўтара падручнікаў па беларускай літаратуры для школьнікаў, вучэбна-метадычных дапаможнікаў для студэнтаў-філолагаў, слоўнікаў для шырокага кола чытачоў, крытычных артыкулаў і перакладаў з украінскай мовы.

Свой творчы погляд на дапаможнікі прафесара Вячаслава Рагойшы выказалі студэнты 2 курса спецыяльнасці «Беларуская філалогія» Аляксандра Барычэўская, Юлія Гурыновіч і Дар’я Марчанка. Так, Юлія паказала значнасць «Паэтычнага слоўніка» Вячаслава Рагойшы ў форме казкі; Аляксандра разгледзела вучэбна-метадычны дапаможнік «Уводзіны ў літаратуразнаўства» з боку яго структуры і зместавага напаўнення; Дар’я ўзнёсла і натхнёна прарэкламавала кнігу «Мой трыглаў», прысвечаны творчасці Янкі Купалы, Якуба Коласа і Максіма Багдановіча.

Пра доўгачасовае плённае супрацоўніцтва с Вячаславам Рагойшам расказала галоўны рэдактар часопіса «Роднае слова» Наталля Шапран. Яна адзначыла, што безумоўная важнасць публікацый Вячаслава Рагойшы на старонках часопіса ў тым, што ён імкнуйся ўсе свае новыя напрацоўкі данесці найперш да настаўнікаў. І асобна адзначыла яго публікацыі мемуарнага характару апошніх гадоў, па якіх можна вывучаць гісторыю БДУ, філфака і ўсёй беларускай культуры.

Пра паэтычную зорку Вячаслава Рагойшы нагадалі студэнты 3 курса спецыяльнасці «Славянская (украінская) філалогія» Вера Гаманко, Марыя Дзенісенка і Дар’я Валадзько, якія прачыталі яго вершы «Па дарозе ў Стоўбцы», «Партрэт каханай» і «Земляком сваім я ганаруся», напісаныя ў далёкія 1960-я гады.

«Што пасееш – тое і пажнеш»: так называлася заключная частка імпрэзы, у якой абароненыя вучні Вячаслава Рагойшы расказалі аб сваім Настаўніку. Так, Ірына Лапцёнак, дактарант кафедры тэарэтычнага і славянскага літаратуразнаўства БДУ, кандыдат філалагічных навук, дацэнт, намеснік дырэктара Інстытута павышэння кваліфікацыі і перападрыхтоўкі кадраў Беларускага дзяржаўнага ўніверсітэта культуры і мастацтваў, звярнула ўвагу на тое, як Настаўнік прывіў ёй любоў да перакладу і архіўнай працы і прывёў да вывучэння творчасці Язэпа Семяжона, перакладчыцкая дзейнасць якога стала аб’ектам яе вывучэння ў кандыдацкай, а цяпер і доктарскай дысертацыях.

Марыя Шамякіна, кандыдат філалагічных навук, член Саюза пісьменнікаў Беларусі, падкрэсліла надзвычайную карысць літаратурна-крытычных, даведачных і тэарэтычных прац Вячаслава Рагойшы для рэдактарскай справы і прывяла прыклады з асабістага рэдактарскага вопыту супрацоўніцтва з пісьменнікамі. Парады, дадзеныя Настаўнікам, дапамагалі ёй у складаных сітуацыях знаходзіць агульную мову з вядомымі літаратарамі пры рэдагаванні іх твораў.

Вынікам праведзенага семінара стала ўсведамленне надзвычайнай важнасці і значнасці асобы прафесара Вячаслава Рагойшы ў развіцці філалогіі і адукацыі Беларусі.

У Год гістарычнай памяці Беларускі дзяржаўны ўніверсітэт праводзіць сярод студэнтаў Міжнародны конкурс відэапраектаў «Этот День Победы...», прысвечаны 77-й гадавіне Перамогі ў Вялікай Айчыннай вайне 1941–1945 гг.

Да ўдзелу ў конкурсе запрашаюцца студэнты вышэйшых навучальных устаноў Рэспублікі Беларусь і замежных краін.  Прымаюцца індывідуальныя або калектыўныя работы (не больш за тры аўтары).  Конкурс праводзіцца ў завочным фармаце.

Для ўдзелу ў конкурсе трэба да 3 мая 2022 года падаць на электронны адрас аргкамітэта Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду. заяўку (ўзор заяўкі прыведзены на сайце конкурсу) з указаннем спасылкі на відэахостынг YouTube (або іншы відэахостынг), у якім размешчана конкурсная работа.

Падвядзенне вынікаў конкурсу адбудзецца 6 мая.  Журы вызначае пераможцаў у дзевяці намінацыях:

✔ "Лепшае гістарычнае даследаванне";

✔ «Самы патрыятычны відэапраект»;

✔ "Лепшы музычны відэапраект";

✔ "Лепшы паэтычны відэапраект";

✔ «Лепшы празаічны відэапраект»;

✔ "Лепшы драматургічны відэапраект";

✔ «Самае прафесійнае відэа»;

✔ «Самае эмацыянальнае відэа»;

✔ «Самае крэатыўнае відэа».

Пераможцы ўзнагароджваюцца памятнымі дыпломамі.  Вынікі конкурсу і работы пераможцаў размяшчаюцца на афіцыйным сайце конкурсу і сайце філалагічнага факультэта.

Падрабязная інфармацыя прадстаўлена на сайце конкурсу: https://sites.google.com/view/bsu-victory-day.

12 мая 2022 года ў Двары галоўнага корпуса БДУ адбылася ўрачыстая цырымонія абнаўлення Дошкі гонару Беларускага дзяржаўнага ўніверсітэта.

Па традыцыі на Дошку гонару кожны год заносяцца імёны супрацоўнікаў і навучэнцаў БДУ за заслугі і дасягненні ў адукацыйнай, навуковай, метадычнай, інавацыйнай, кіраўніцкай і спартыўнай дзейнасці.

У гэтым годзе з ліку супрацоўнікаў і студэнтаў філалагічнага факультэта гэтага гонару ўдастоены намеснік дэкана Вольга Крычко, студэнтка 2 курса спецыяльнасці «Беларуская філалогія», кіраўнік Студэнцкай Прэс-службы факультэта Юлія Гурыновіч і студэнт 3 курса спецыяльнасці «Рамана-германская (англійская) філалогія» Абдылла Тайханаў.

Ганарымся вамі і жадаем поспехаў у далейшай працоўнай, вучэбнай і творчай дзейнасці.

29–30 верасня 2022 г. на філалагічным факультэце Беларускага дзяржаўнага ўніверсітэта адбудзецца Х Міжнародная навуковая канферэнцыя «Мова – Літаратура – Культура», прысвечаная 140-годдзю з дня нараджэння народных паэтаў Беларусі Янкі Купалы і Якуба Коласа.

Форма правядзення – вочная, але ў выпадку неспрыяльнай эпідэміялагічнай сітуацыі фармат канферэнцыі можа быць пераведзены часткова ў завочна-дыстанцыйную форму.

Запрашаем навуковых супрацоўнікаў, выкладчыкаў, аспірантаў, магістрантаў прыняць удзел у канферэнцыі. Для ўдзелу ў канферэнцыі неабходна па адрасе Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду. (з пазнакай Канферэнцыя – 2022) да 19.09.2022 г. даслаць у аргкамітэт заяўку і тэкст даклада. Па выніках канферэнцыі плануецца выданне зборніка навуковых артыкулаў, электронны варыянт якога будзе размешчаны ў Электроннай бібліятэцы БДУ.

Спадзяёмся, што канферэнцыя стане пляцоўкай для абмену вопытам даследчыкаў-філолагаў у галіне беларускага літаратуразнаўства і мовазнаўства, будзе спрыяць развіццю і ўмацаванню навуковых кантактаў.

З інфармацыйным лістом можна азнаёміцца тут.

4 мая 2022 года кафедрай гісторыі беларускай літаратуры праведзена некалькі мерапрыемстваў, прысвечаных святу Вялікай Перамогі.

У гэты дзень адбылося ўскладанне кветак у Мемарыяльнай зале ў гонар Герояў Савецкага Саюза, якія загінулі за вызваленне Беларусі ў гады Вялікай Айчыннай вайны (Плошча Перамогі).

Прафесар кафедры І. В. Казакова прачытала студэнтам 1 курса адкрытую лекцыю «Фальклор Вялікай Айчыннай вайны», у ходзе якой гаварылася пра ўвасабленне ў творах мужнасці і гераізму беларускага народа ў барацьбе з ворагам, пачуцця свабодалюбства і палымянай любові да роднага краю.

Увазе студэнтаў і выкладчыкаў філфака быў прапанаваны відэасалон «Беларусь памятае», дэманстравалася відэа, прагучалі словы тых, хто шануе памяць пра вайну.

28 сакавіка 2022 года на філалагічным факультэце прайшло пасяджанне метадычнага аб’яднання настаўнікаў рускай мовы і літаратуры. Пасяджанне было арганізавана кафедрай рускай мовы і Упраўленнем па адукацыі адміністрацыі Цэнтральнага раёна горада Мінска. У мерапрыемстве прымалі ўдзел 20 настаўнікаў –  кіраўнікоў метадычных аб’яднанняў школ і гімназій. Калег з сярэдняй школы цёпла павітаў загадчык кафедры рускай мовы прафесар Іван Сямёнавіч Роўда, а старшы выкладчык кафедры Ала Аляксандраўна Занкавец расказала настаўнікам пра прыярытэтныя кірункі работы кафедры, абмеркавала магчымасць далейшага супрацоўніцтва. Пасяджанне РМА на базе профільнага факультэта – гэта новая форма ўзаемадзеяння сярэдняй і вышэйшай школы. Кафедра рускай мовы ўжо атрымала запрашэнні правесці такія мерапрыемствы ад іншых раёнаў горада Мінска і плануе пашыраць геаграфію метадычных кантактаў.

Урачысты сход і канцэрт майстроў мастацтва пройдзе 6 мая ў Палацы Рэспублікі. Пачатак - а 17 гадзіне.

На плошчы Дзяржаўнага сцяга 8 мая адбудзецца ўрачысты рытуал - ушанаванне дзяржаўных сімвалаў.

У ходзе рэспубліканскай акцыі "Беларусь памятае" 9 мая запланавана шэсце пакаленняў. Сфарміраваная калона ўдзельнікаў пройдзе да манумента Перамогі і ўскладзе вянкі.

Падрабязная інфармацыя на сайце БелТА.