7 мая на філалагічным факультэце ў 12-ы раз прайшоў “Лінгвістычны рынг”. Гэта неаўдыторнае мерапрыемства – віктарына па ўсіх раздзелах сучаснай рускай мовы, гістарычнай граматыкі і рускай дыялекталогіі, якое кафедра рускай мовы праводзіць для беларускіх студэнтаў другога курса спецыяльнасці “Руская філалогія” з 2008 года. Сёлета ўдзел у гульні прынялі Марыя Баранава, Аляксандра Бедзіна, Наталля Грэчная, Ірына Звягінцава, Ганна Клімянкова, Анастасія Лазарчык, Вікторыя Лазко, Ганна Лукашук, Вікторыя Палякова і Паліна Ходыш. Дзяўчаты ўпэўнена адказвалі на пытанні з усіх галін рускага мовазнаўства і ўпарта змагаліся за перамогу ў конкурсе. Лепшымі ў гэты раз сталі Вікторыя Палякова, Анастасія Лазарчык і Вікторыя Лазко, якая адважылася таксама згуляць у супергульню і бліскуча адказала на 9 з 10 каверзных пытанняў па гістарычнай граматыцы рускай мовы. Усе ўдзельніцы былі заахвочаны выкладчыкамі кафедры: прафесар Т. М. Валынец уручыла Ірыне Звягінцавай “Прыз глядацкіх сімпатый”, а загадчык кафедры прафесар І. С. Роўда падарыў студэнткам слоўнікі і навучальныя дапаможнікі па рускай мове.

Мерапрыемствы такога кшталту дапамагаюць устанавіць трывалыя кантакты паміж прафесарска-выкладчыцкім саставам універсітэта і студэнтамі, сустрэцца ў менш фармальных абставінах, матываваць студэнтаў да больш актыўнага ўдзелу ў навучальным працэсе.

14–16 красавіка студэнты 4-га курса спецыяльнасці «Класічная філалогія» БДУ Валерыя Скарабагатая, Арына Лаўрыновіч і Мікіта Варанцоў прадстаўлялі свой праект «Наша Радзіма на картах і гравюрах 16–17 стст.» (куратар праекта – старшы выкладчык кафедры класічнай філалогіі Дз. Г. Мінкевіч) на XIX Рэспубліканскай выставе навукова-метадычнай літаратуры, педагагічнага вопыту і творчасці.

Жаданне прыцягнуць увагу шырокай аўдыторыі да выдатных помнікаў нашай гісторыі і культуры знайшло свою магчымасць: аўтары культурна-адукацыйнага праекта пазнаёмілі наведвальнікаў выставы не толькі з падзеямі і рэаліямі айчыннай гісторыі, але і падрабязна расказалі пра працу над перакладам на беларускую мову лацінскіх легенд на картах і гравюрах, як нарадзілася ідэя прадставіць вынікі працы грамадскасці і падзяліліся сваімі даследчымі планы.

Унікальны досвед ператварэння музейнага экспаната ў актуальны адукацыйны праект выклікаў шчырую цікавасць у шырокай публікі. Рабяты атрымалі каштоўныя парады не толькі працягваць працу, але і падумаць пра прасоўванне яе вынікаў у навуковы і адукацыйны ўжытак. Госці экспазіцыі пажадалі аўтарам праекта выходзіць на больш высокі навуковы ўзровень, аб’яднаўшы працу філолагаў з досведам гісторыкаў і географаў.

30 красавіка адбыўся сход студэнтаў ІІІ курса спецыяльнасці «Беларуская філалогія» па выніках літаратурна-рэдакцыйнай практыкі. Сёлета вытворчай пляцоўкай для практыкантаў было абрана Рэспубліканскае ўнітарнае прадпрыемства «Выдавецтва “Адукацыя і выхаванне”», якое працуе пад прарэктаратам Міністэрства адукацыі Рэспублікі Беларусь. Першая група студэнтаў практыкавалася ў рэдакцыі вядомага навуковага і метадычнага часопіса «Роднае слова», другая – у рэдакцыі навукова-метадычнага часопіса «Беларуская мова і літаратура» (абодва выданні ўваходзяць у склад выдавецтва «Адукацыя і выхаванне»). Літаратурна-рэдакцыйная практыка доўжылася з 29 сакавіка па 24 красавіка 2021 года.

Агульнае кіраўніцтва практыкай было ўскладзена на загадчыка кафедры беларускай літаратуры прафесара А. І. Бельскага. На ўстановачным сходзе (канферэнцыі) ён распавёў пра спецыфіку літаратурна-рэдакцыйнай практыкі, акрэсліў яе мэты і задачы, арганізацыю непасрэдна ў выдавецтве і інш. У першы дзень практыкі адбылася сустрэча студэнтаў з першым намеснікам выдавецтва «Адукацыя і выхаванне» Аляксандрам Львовічам Антаневічам і галоўным рэдактарам Міраславай Міхайлаўнай Шавыркінай, якія расказалі пра стан, рэаліі і перспектывы дзейнасці выдавецва, пазнаёмілі з творчымі праектамі і новымі выданнямі. Універсітэцкіх практыкантаў прывітаў дырэктар выдавецтва Мікалай Аляксандравіч Супрановіч, а потым адбылася экскурсія па ўстанове. Студэнты азнаёміліся з умовамі працы супрацоўнікаў аддзелаў (рэдактараў, карэктараў, вярстальшчыкаў, мастакоў), гісторыяй часопісаў «Роднае слова» і «Беларуская мова і літаратура», афіцыйным сайтам і інфармацыяй у сацсетках, стратэгіяй напаўнення нумароў, асноўнымі стадыямі цыкла падрыхтоўкі матэрыялаў да друку, дызайнам часопісаў. Карыснымі былі гутаркі з галоўным рэдактарам часопіса «Роднае слова» Наталляй Мікалаеўнай Шапран і адказным сакратаром часопіса «Беларуская мова і літаратура» Аленай Уладзіміраўнай Бельскай. У той жа дзень студэнты-філолагі атрымалі ад выдавецкіх кіраўнікоў практыкі індывідуальныя заданні, парады па рэдактарскай працы і карэктарскай праўцы.

Справаздачна-заліковы этап засведчыў плённасць і выніковасць выдавецкай практыкі. Студэнты актыўна ўключыліся ў працу, выканалі карэктарскую вычытку матэрыялаў, літаратурнае рэдагаванне тэкстаў і інш. Кіраўнікі практыкі рэдактар аддзела «Роднага слова» Крысціна Мікалаеўна Пучынская і адказны сакратар часопіса «Беларуская мова і літаратура» Алена Уладзіміраўна Бельская аддалі шмат часу працы з практыкантамі: знаёмілі іх з матэрыяламі на розных стадыях падрыхтоўкі, гаварылі пра спецыфіку і тэхналогіі рэдактарскай працы, давалі індывідуальныя кансультацыі і парады. Студэнты паспяхова выканалі ўсе атрыманыя заданні і даручэнні, іх працу і намаганні станоўча ацанілі кіраўнікі практыкі ад рэдакцый і кіраўнікі груп ад БДУ прафесар А. І. Бельскі і дацэнт У. Ю. Верына.

Завяршылася тыднёвая літаратурна-рэдакцыйная практыка і на завочным аддзяленні філфака. Яна мела азнаямленчы характар. Студэнты ІV курса практыкаваліся ў рэдакцыі часопіса «Роднае слова», у раённым друку: газетах «Нясвіжскія навіны» і «Да новых перамог» (г. Клецк). Кіраўнік практыкі дацэнт Л. А. Гедзімін адзначыла старанныя і адказныя адносіны студэнтаў-завочнікаў да працы. Ларыса Анатольеўна лічыць, што яны засвоілі карысныя навыкі ў тэхніцы рэдагавання тэкстаў, атрымалі першапачатковыя прафесійныя кампетэнцыі, неабходныя для рэдакцыйна-выдавецкай дзейнасці.

Усе студэнты па выніках праходжання практыкі атэставаны. Разам з тым яны атрымалі шэраг парад па развіцці рэдактарскіх уменняў і навыкаў, па рэалізацыі ўласнага творчага пратэнцыялу і перспектыў у будучай прафесійнай дзейнасці.

6 красавіка студэнты філалагічнага факультэта спецыяльнасці «Рамана-германская (французская) філалогія» пад кіраўніцтвам дацэнта кафедры раманскага мовазнаўства БДУ В.У. Лапуновай прынялі ўдзел у заключным этапе Міжнароднай міжвузаўскай алімпіяды па дзелавой і эканамічнай французскай мове, які адбыўся ў БДЭУ. У алiмпiядзе ўдзельнічала 95 студэнтаў, якія прадстаўлялі БДУ, БДЭУ, БДТУ, Казанскi федэральны ўнiверсiтэт.

Студэнтка пятага курса А. Лабковiч ўзнагароджана дыпломам II ступені. Дыпломы ўручалі члены Арганізацыйнага камітэта: дэкан факультэта міжнародных бізнэс-камунікацый БДЭУ М. В. Мішкевіч і загадчык кафедры раманскіх моў БДЭУ М. А. Камарова.

На кафедры нямецкага мовазнаўства стартавала тандэмнае анлайн-навучанне студэнтаў філалагічнага факультэта працягласцю 5 вучэбных тыдняў. Мэта праекта – развіццё партнёрскіх адносін з нямецкімі ВНУ, матывацыя студэнтаў і паляпшэнне ведаў нямецкай мовы.

Партнёрам з нямецкага боку выступіў Лейпцыгскі ўніверсітэт (кафедра славянскага мовазнаўства і ўсходняй славістыкі). Кандыдат філалагічных навук Марыя Сулімава з Універсітэта г. Лейпцыг звярнулася з такой прапановай і выказала пажаданне сваіх студэнтаў наладзіць доўгатэрміновае супрацоўніцтва, бо каронавірусныя абмежаванні не дазваляюць студэнтам удзельнічаць у праграмах акадэмічнай мабільнасці. З боку філалагічнага факультэта ў праекце ўдзельнічаюць студэнты 1-га (працягваюць вывучаць мову пасля школы), 2-га (нямецкая мова як асноўная замежная) і 4-га (нямецкая мова як другая замежная) курсаў.

15 красавіка 2021 года прайшоў арганізацыйны анлайн-сход, на якім адбылося знаёмства тандэм-партнёраў. Студэнты з абодвух бакоў будуць атрымліваць тэмы для абмеркавання і заданні ў межах вучэбнага плана. Першыя водгукі студэнтаў станоўчыя. У будучым плануецца арганізацыя тандэмаў са студэнтамі іншых ВНУ ФРГ.

7 красавіка 2021 г. на філалагічным факультэце адбыўся круглы стол «Роля педагагічнай практыкі ў прафесійнай падрыхтоўцы студэнтаў-філолагаў», у якім прынялі ўдзел студэнты IV курса спецыяльнасцей «Славянская філалогія», «Руская філалогія (па накірунках)» і кіраўнікі педагагічнай практыкі. Студэнты падзяліліся вопытам, набытым падчас вытворчай практыкі, адзначылі вялікую ролю педагагічнай практыкі ў прафесійным станаўленні філолагаў як будучых настаўнікаў і выкладчыкаў.

Крысціна Бабровіч расказала пра станоўчыя ўражанні ад працы ў якасці настаўніка рускай мовы і літаратуры ў сярэдняй школе, пра цяжкасці, якія могуць сустрэцца падчас педагагічнай практыкі, і пра шляхі іх пераадолення, звярнула ўвагу на важнасць уменняў студэнтаў-практыкантаў тлумачыць новую тэму так, каб яе зразумелі ўсе вучні, падкрэсліла, што педагагічная практыка – гэта вельмі важны этап, які садзейнічае набыццю ведаў, уменняў і навыкаў, неабходных для далейшай якаснай педагагічнай дзейнасці.

Наталля Шмаенкова і Яна Машкова адзначылі, што студэнты іх падгрупы ставілі перад сабой задачу не толькі вучыць школьнікаў беларускай мове і літаратуры, але і прывіваць любоў да гэтых прадметаў, таму імкнуліся рабіць урокі і інфарматыўнымі, і цікавымі, для чаго выкарыстоўвалі займальны матэрыял, праводзілі віктарыны, гульні і інш. Дзяўчаты расказалі пра вынікі маніторынгу чытацкіх інтарэсаў школьнікаў, праведзенага ў межах выканання задання па педагогіцы, і пра прафарыентацыйную работу з вучнямі старэйшых класаў сярэдняй школы № 38. Таксама яны звярнулі ўвагу на станоўчыя бакі і цяжкасці ў рабоце настаўніка.

Надзея Варанько, Дар’я Дзям’янава, Елізавета Маскаль падчас педагагічнай практыкі працавалі пад кіраўніцтвам Т. У. Рубанік і над творчым групавым праектам па прафарыентацыі, вынікам чаго з’явіўся дакументальны фільм пра філалагічны факультэт БДУ.

Андрыян Татарынаў падзяліўся меркаваннем наконт узаемаадносін практыкантаў і вучняў гімназіі, параўнаў асаблівасці выкладання рускай і беларускай мовы і літаратуры, унес прапанову знаёміць студэнтаў у працэсе вывучэння педагогікі са спецыфікай той дакументацыі, напрыклад класнага журнала, якую неабходна будзе весці настаўніку ў школе.

Уладзімір Палішчук звярнуў увагу на асаблівасці навучання рускай мове і літаратуры студэнтаў Юрыдычнага каледжа БДУ, расказаў пра творчыя заданні, якія прапаноўваліся на занятках, выказаў пажаданне замяніць у заданні па псіхалогіі характарыстыку аднаго вучня на характарыстыку ўсяго класа. Па меркаванні У. Палішчука, аналіз узаемаадносін у класным калектыве, праведзены ў пачатку педагагічнай практыкі, дапамог бы практыкантам у далейшай арганізацыі працы з вучнямі.

Алёна Касцова падзялілася вопытам праходжання практыкі ў Ліцэі БДУ, ахарактарызавала адрозненні навучання ў сярэдняй школе і ліцэі, асаблівасці правядзення заняткаў у профільных філалагічных класах, а таксама звярнула ўвагу на методыкі выкладання ў дыстанцыйным і аўдыторным фарматах навучання, падкрэсліўшы эфектыўнасць менавіта аўдыторнай формы. А. Касцова адзначыла высокі ўзровень ведаў ліцэістаў, які патрабуе і вельмі якаснай і фундаментальнай падрыхтоўкі студэнтаў-практыкантаў, што працуюць з такімі вучнямі.

Педагагічная практыка студэнтаў накірунку «Руская мова як замежная» была арганізавана на факультэце даўніверсітэцкай адукацыі і на філалагічным факультэце БДУ. Валерыя Вінглеўская і Дар’я Вячорка ахарактарызавалі спецыфіку выкладання рускай мовы як замежнай студэнтам розных нацыянальнасцей, падкрэслілі пэўную цяжкасць работы з навучэнцамі, якія валодаюць рускай мовай на розных узроунях, але часцей за ўсё на «нулявым», паказалі відэафрагмент занятку па рускай мове, праведзенага з кітайскімі студэнтамі.

Практычна ва ўсіх выступленнях і справаздачах былі словы падзякі настаўнікам і выкладчыкам базавых устаноў адукацыі г. Мінска: сярэдніх школ №№ 1, 38, гімназій №№ 5, 29, 31, Ліцэя БДУ, Юрыдычнага каледжа БДУ, факультэта даўніверсітэцкай адукацыі БДУ. Назіранні за працай настаўнікаў-філолагаў, знаёмства з іх педагагічным вопытам, кансультацыі, атрыманыя ад прафесіяналаў, дапамагалі практыкантам выпрацоўваць сваё бачанне будучай педагагічнай дзейнасці. Студэнты адзначылі, што яны вучыліся знаходзіць індывідуальны падыход да вучняў, спраўляцца з нетыповымі сітуацыямі, а таксама ўпэўніліся ў праўдзівасці наступных слоў А. Барбюса: «Школа – гэта майстэрня, дзе фарміруецца мысленне падрастаючага пакалення; трэба моцна трымаць яго ў руках, калі не жадаеш выпусціць з рук будучыню».

Кафедра англійскага мовазнаўства запрашае студэнтаў вышэйшых навучальных устаноў Рэспублікі Беларусь прыняць удзел у конкурсе відэаролікаў «Каб палюбіць, трэба ўбачыць ...» (To Love It, You Should See It...), прысвечаным вывучэнню і папулярызацыі выдатных мясцін Беларусі.

Стаць удзельнікам конкурсу можа любы студэнт, які валодае англійскай мовай. Для ўдзелу трэба:

• зняць відэаролік (прысвечаны гісторыі, культуры і магчымым напрамкам развіцця Беларусі) на англійскай мове хронаметражом да 7 хвілін;
• загрузіць сваю працу на відэахостынг YouTube або любы сэрвіс захоўвання файлаў: Яндэкс Дыск, Google Дыск, воблака Mail.ru і пад.;
• да 21 мая 2021 года накіраваць спасылку на загружаны відэаролік і заяўку на ўдзел у адным лісце на электронны адрас кафедры англійскага мовазнаўства філалагічнага факультэта БДУ Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду. з пазнакай «На конкурс To Love It, You Should See It».

4 чэрвеня 2021 года журы вызначыць пераможцаў ў сямі намінацыях: «Лепшае культуралагічнае даследаванне», «Лепшае гістарычнае даследаванне», «Лепшая відэаэкскурсія», «Беларусь вачамі замежных студэнтаў», «Самае эмацыйнае відэа», «Самае крэатыўнае відэа», «Прыз глядацкіх сімпатый».

Азнаёміцца з Палажэннем аб конкурсе можна тут.

17 сакавіка на філалагічным факультэце ў анлайн-фармаце адбыўся семінар «Ladidattica a distanzaintegrale», прысвечаны праблемам выкладання італьянскай мовы ў эпоху цыфравізацыі адукацыі. Семінар быў арганізаваны кафедрай раманскага мовазнаўства і італьянскай асацыяцыяй выкладчыкаў замежных моў ва Усходняй Еўропе (ANILSEST) для студэнтаў-iтальянiстаў старэйшых курсаў і праводзіўся на італьянскай мове.

З прывітальным словам да ўдзельнікаў звярнулася Алеся Аляксандраўна Панцялеенка, загадчыца кафедры раманскага мовазнаўства. Яна падкрэсліла важнасць захавання і развіцця традыцый супрацоўніцтва з міжнароднымі арганізацыямі, пажадала ўдзельнікам плённай працы.

Аўтар і вядучы семінара П’ер Паола Беттонi, старшыня ANILSEST, падзякаваў удзельнікам за выяўленую цікавасць да семінара і прыступіў да разгляду найбольш вострых праблем, звязаных з выкладаннем італьянскай мовы ў цяперашні час. Ён падзяліўся вопытам італьянскіх педагогаў ў развіцці дыстанцыйнага фармату навучання, абазначыў цяжкасці і перспектывы гэтага кірунку ў адукацыі. У прыватнасці, распавёў пра спосабы прадстаўлення відэаматэрыялу, адзначыў магчымасці выкарыстання чата на занятках па замежнай мове, у дыскусійнай форме раскрыў пытанне выкарыстання інтэрактыўных практыкаванняў на прыкладзе выдавецтва «Loescher».

У фінале арганізатары семінара анансавалі новы сумесны праект, які прадугледжвае бясплатнае двухмесячнае навучанне па сучасных тэхналогіях выкладання італьянскай мовы на базе філалагічнага факультэта. Экспертамі гэтага курса выступяць Алеся Аляксандраўна Панцялеенка, П’ер Паола Беттонi і Крысціна Ск’явон, міністэрскі лектар, загадчыца аддзела Культуры і Друку Пасольства Італіі ў Мінску. Запісацца на трэнінг можна тут (да 25.03.2021). Больш інфармацыі вы можаце знайсці тут.

29 красавіка 2021 г. а 15 гадзіне на адукацыйным партале філалагічнага факультэта БДУ (https://eduphil.bsu.by/course/view.php?id=1980) ў раздзеле “Кафедра тэарэтычнага і славянскага літаратуразнаўства” адбудзецца выхаваўча-натхняльнае мерапрыемства «Віртуальная вандроўка “Сцяжынкамі роднай зямлі”». Мерапрыемства праводзіцца ў межах падрыхтоўкі да фальклорнай практыкі студэнтаў 1 курса спецыяльнасцей “Беларуская філалогія” і “Руская філалогія”. Арганізатарамі выступаюць кафедра тэарэтычнага і славянскага літаратуразнаўства і Вучэбна-навуковая лабараторыя беларускага фальклору.

У праграме – прагляд відэафільмаў пра важнейшыя “кропкі” беларускага народнага календара (зімовы цыкл (“Каляды”) і пераходнае свята “ад зімы да вясны” (“Масленка”), веснавы цыкл (“Вялікдзень” і яго лакальная з’ява “Валачобніцтва”; “Юр’е”, “Радаўніца”, “Сёмуха”), летні (“Купалле”), восеньскі (“Дзяды”) і асноўныя святы сямейна-абрадавага комплексу беларусаў (асобныя этапы вяселля) з розных куткоў Беларусі. Відэафільмы запісаны як аматарамі традыцыйнай культуры, так і прафесіяналамі (у прыватнасці, вядомым этнолагам і фальклырстам З. Мажэйка). У асобным раздзеле “Матэрыялы вучэбна-навуковай лабараторыі беларускага фальклору” прадстаўлены аўдыязапісы студэнтаў філалагічнага факультэта БДУ розных гадоў, запісаныя імі падчас фальклорнай практыкі. Для будучых практыкантаў яны могуць стаць узорам для набыцця навыкаў запісу фальклорных твораў ад інфармантаў (носьбітаў фальклору).

Запрашаем усіх зацікаўленых!

Дарагія студэнты, якія вывучаюць італьянскую мову, кафедра раманскага мовазнаўства запрашае вас на семінар “L’ITALIANO CON LA DIDATTICA DIGITALE INTEGRATA”, арганізаваны ў межах супрацоўніцтва з ANILS (асацыяцыяй выкладчыкаў замежных моў, г. Турын, Італія). Аўтар і вядучы семінара – П’ер Паола Беттоні, кіраўнік філіяла ANILS ва Усходняй Еўропе.

Падчас сустрэчы вы даведаецеся, як стаць паспяховым рэпетытарам, якія стратэгіі выкарыстоўваць пры працы з дзецьмі школьнага ўзросту, якія тэхналогіі дапамагаюць развіццю ўласных лічбавых кампетэнцый. Працягласць семінара – 30–40 хвілін.

Сустрэча адбудзецца 17 сакавіка ў 10.30 у дыстанцыйным фармаце. Для атрымання доступу да семінара неабходна зарэгістравацца па спасылцы http://surl.li/neqy.

Усе студэнты атрымаюць сертыфікат ANILS аб удзеле ў семінары.

16 красавіка 2021 года на філалагічным факультэце БДУ адбылася сустрэча дэкана Сяргея Аляксандравіча Важніка з актывістамі студэнцкага самакіравання.

Удзельнікі сустрэчы абмеркавалі актуальныя пытанні арганізацыі адукацыйнага працэсу, выказалі ідэі па ўпарадкаванні ўнутранага дворыка факультэта. Акрамя таго, падрабязна пагаварылі пра бліжэйшыя значныя мерапрыемствы, якія будуць праводзіцца студэнцкімі арганізацыямі. Асаблівая ўвага была звернута на мерапрыемствы да 100-годдзя БДУ.

Сустрэча прайшла ў сяброўскай атмасферы. Ва ўсіх студэнтаў была магчымасць выказацца наконт пытанняў, якія іх хвалююць, падзяліцца ідэямі і ўнесці свае прапановы.