Літаратурная гасцёўня да Дня маці “Галоўнае слова”

15 кастрычніка куратарам групы студэнтаў 2 курса спецыяльнасці “Беларуская філалогія”, дацэнтам кафедры гісторыі беларускай літаратуры Ірынай Шматковай была наладжана літаратурная гасцёўня да Дня маці “Галоўнае слова”.

Ірына Ігараўна рапавяла пра беларускіх паэтаў і пісьменнікаў, у творчасці якіх вобраз маці прадстаўлены найбольш выразна; пазнаёміла студэнтаў з фотаздымкамі беларускіх паэтэс з іх сынамі і вершамі, прысвечанымі ім. Пасля студэнты прадэманстравалі суквецце сваіх творчых здольнасцей: Кухальская Анастасія і Дубава Аліна прадставілі прэзентацыю “Вобраз маці ў жыцці і творчасці Рыгора Барадуліна”, Качан Вікторыя падзялілася сваім эсэ-разважаннем “Маці ў маім жыцці”, Бахун Алеся ўразіла аўтарскім перакладам верша С. Ясеніна “Ліст да маці” на беларускую мову: “Ты жыва яшчэ, мая родная? // Жывы і я. Здароў табе, здароў! // Няхай блішчыць над тваёю хаткай, // Тое вячэрняе невыказнае святло…”, Касіловіч Яўгенія пранікнёна праспявала акапэла песню Віктара Кліменкі “Сірата”, Вакуліч Сафія (аўтар слоў) і Маслава Яўгенія (аўтар музыкі) пад гітару выканалі кампазіцыю асабістага сачынення “Зноў едзе вагон блакітны”, а Шкляр Марыя, сябра факультэцкага літаратурнага аб’яднання “Альтанка”, пазнаёміла аднагрупнікаў са сваім новым вершам, прысвечаным маці: “Маё мора і сонца - мой свет, // Найцяплейшая з усіх планет, // Мама, маці, матуля мая, // Ведай: шчыра люблю цябе я…”.

Разнастайнасць творчых здольнасцей выступоўцаў яшчэ раз паказала – на філалагічным факультэце вучацца самыя таленавітыя студэнты!