X Міжнародная навуковая канферэнцыя "Мова і соцыум"

Удзельнікамі першай канферэнцыі ў 1994 г. былі 8 чалавек. Цяпер гэта прадстаўнічая міжнародная канферэнцыя, якая збірае ўдзельнікаў з многіх універсітэтаў розных краін свету. У гэтым годзе ў канферэнцыі прынялі ўдзел прадстаўнікі больш як з 20 універсітэтаў з 5 краін свету – Расіі, Украіны, Польшчы, Казахстана і, вядома, з Беларусі.

Канферэнцыя працавала па наступных напрамках:

- Праблемы макра- і мікрасацыялінгвістыкі.

- Моўная сітуацыя. Моўная палітыка .

- Сацыякультурныя аспекты даследавання мовы.

- Мова. Свядомасць. Камунікацыя.

- Метафара ў мове і ў розных відах мастацтва.

- Лінгвакрыміналістыка.

- Руская і беларуская мовы ў інтэрнэт-прасторы.

- Методыка выкладання рускай мовы як замежнай.

- Дзелавая руская мова і дакументная лінгвістыка.

- Мовы для спецыяльных мэтаў.

Адкрыў канферэнцыю дэкан філалагічнага факультэта проф. І.С. Роўда, са «Словам пра прафесара Л.М. Чумак » выступіла заг. кафедры прыкладной лінгвістыкі дац. Л.Ф. Гербік . З вялікай цеплынёй аўдыторыя прыняла аповяд дачкі Л.М. Чумак – Дар'і Вячаславаўны , якая падрыхтавала прэзентацыю пра жыццё і творчасць Людмілы Мікалаеўны , аб яе захапленнях , аб жыццёвых устаноўках, аб творчых памкненнях.

На пленарным пасяджэнні выступілі вядомыя навукоўцы: праф. Н. Б. Мячкоўская (Беларусь), праф. В. Жэлязны (Польшча), член-кар. НАН РБ А. А. Лукашанец (Беларусь), праф. Л. В. Рычкова (Беларусь), дац. Л. Ф. Гербік і дац. В. Я. Елісеева (Беларусь) , праф. І. С. Скарапанава (Беларусь) , доктар У. Семяновска (Польшча) , праф. В. В. Арлова (Расія), дац. Л. В. Зіневіч і дац. В. У. Красавіна (Украіна), дац. І. Э. Фядотава (Беларусь).

Удзельнікі канференцыі працавалі ў 5 секцыях:

1. Сацыякультурныя аспекты даследавання мовы.

2. Мова. Свядомасць. Камунікацыя.

3. Метафара ў мове і ў розных відах мастацтва.

4. Мова для спецыяльных мэтаў. Дзелавая руская.

5. Методыка выкладання рускай мовы як замежнай.

Былі праведзены 2 круглыя сталы: «Руская мова як замежная ў сучасным кантэксце», «Лінгвакрыміналістыка. Лінгвістыка дыскурсу».

У дакладзе С.І. Лебядзінскага былі ўзнятыя пытанні развіцця рускай мовы як замежнай у Беларусі, а выпускнік філалагічнага факультэта БДУ Т.С. Дамброўскі распавёў пра тое, што ў Лодзінскім універсітэце, як і ў БДУ, праводзіцца актыўная прафарыентацыйная праца сярод школьнікаў – арганізуюцца Дні русістыкі ў рамках Фестывалю навукі, тэхнікі, мастацтва. Школьнікі далучаюцца да свету рускай мовы; пасля шматлікія ўдзельнікі гэтага Фестывалю становяцца студэнтамі Інстытута рускай мовы Лодзінскага ўніверсітэта.Госці з Польшчы распавялі таксама аб цікавай вучэбнай і навуковай рабоце, якая праводзіцца на базе лабараторыі дыдактыкі Інстытута рускай мовы.

Вялікая цікавасць была праяўлена і да працы Круглага стала па лінгвакрыміналістыцы, вядучым якога стаў кандыдат філалагічных навук, намеснік начальніка ДУ "Навукова-практычнага цэнтра Дзяржаўнага камітэта судовых экспертыз Рэспублікі Беларусь» І. Г. Дода, і да працы Круглага стала па лінгвістыцы дыскурсу, працу якога ўзначаліла праф. І.Ф Ухванава-Шмыгава. Былі разгледжаны задачы развіцця гэтых новых перспектыўных напрамкаў лінгвістыкі, якія адкрываюць перад даследчыкамі-філолагамі новыя перспектывы ў навуковай і практычнай дзейнасці.