BY 
Выдатны дзеяч рускай і сусветнай культуры Мікалай Рэрых пісаў аб тым, што мастацтва аб'яднае чалавецтва. Мастацтва адзінае і непадзельнае. Мастацтва мае шмат галін, але корань адзіны. Кожны адчувае ісціну прыгажосці. Для ўсіх павінна быць адчынена брама святой крыніцы. Святло мастацтва асвеціць незлічоныя сэрцы новым каханнем. Спачатку несвядома прыйдзе гэтае пачуццё, але пасля яно ачысціць усю чалавечую свядомасць. І колькі маладых сэрцаў шукаюць нешта сапраўднае і прыгожае.
Натхніўшыся ідэямі вялікага рускага мастака, пісьменніка і філосафа, ст. выкладчык кафедры раманскага мовазнаўства Ніна Аляксандраўна Цыбульская ў рамках тэмы «Жывапіс Францыі/Беларусі. Беларускія мастакі Парыжскай школы» арганізавала і правяла інтэрактыўныя заняткi для студэнтаў 3 курса спецыяльнасці «Рамана-германская (французская) філалогія». Заняткі прайшлі ў Нацыянальным мастацкім музеі Рэспублікі Беларусь.
У калекцыі еўрапейскага мастацтва Нацыянальнага мастацкага музея збор твораў майстроў французскай школы, храналагічныя рамкі якога ахопліваюць перыяд з XVII па ХХ стагоддзе, - адзін з найбольш значных па якасці і колькасці экспанатаў. На працягу многіх стагоддзяў французская школа была найбуйнейшай еўрапейскай мастацкай школай. Францыя дала свету готыку, знакамітых майстроў Паўночнага Адраджэння; французскія мастакі XVII стагоддзя, нароўнi з італьянскімі майстрамі, сталі буйнымі прадстаўнікамі стылю барока, а такія стылі і напрамкі, як класіцызм і ампір, ракако і мастацтва Асветы, з'яўляюцца дасягненнямі французскага мастацтва.
Збор французскага мастацтва Нацыянальнага мастацкага музея Рэспублікі Беларусь уключае ў сябе нямала цікавых, пераважна жывапісных і графічных твораў, на прыкладзе якіх можна паслядоўна і паўнацэнна прадэманстраваць развіццё выяўленчага мастацтва Францыі і яго ўплыў на іншыя еўрапейскія школы.
У калекцыі музея захоўваецца шэраг сапраўдных шэдэўраў, створаных такімі вялікімі майстрамі французскай школы, як Жан Франсуа дэ Труа, Алексіс Грыму, Клод-Жозэф Вернэ, Гюбер Робер, Жан-Батыст Рэньё, Мары Луіза Элізабэт Віжэ-Лебрэн, Франсуа Жэрар і інш. французскай кніжнай ілюстрацыі канца XIX - пачатку XX стагоддзя.
Пасля заканчэння цікавых і займальных заняткаў была арганізавана рэфлексія – важны механізм самаўдасканалення асобы, які забяспечвае фарміраванне ўменняў асэнсоўваць і аналізаваць свой унутраны стан, а таксама сваю дзейнасць і яе вынікі.
Вось некаторыя адказы нашых студэнтаў:
«Заняткi па-за універсітэтам падалiся мне выдатным спосабам унесці разнастайнасць у аўдыторныя пары і прадэманстраваць на практыцы матэрыял, які вывучаецца. Супрацоўніца музея правяла выдатную і цікавую лекцыю, адказала на пытанні, якія нас цікавяць, дзякуючы чаму ў галаве адклалася шмат патрэбнай інфармацыі» (Любоў Бярозкіна).
«Хачу выказаць падзяку за правядзенне заняткаў у Нацыянальным мастацкім музеі Рэспублікі Беларусь. Для мяне гэта быў новы, цікавы і пазітыўны вопыт. Наведванне музея - найлепшы спосаб вывучэння выяўленчага мастацтва. Дадзенае мерапрыемства выдатна падыходзіць для паглыблення ў кантэкст еўрапейскага мастацтва розных перыядаў» (Лізавета Косарава).
«Наведванне Нацыянальнага мастацкага музея Рэспублікі Беларусь пакінула пасля сябе вялікую колькасць пазітыўных уражанняў. Мы пазнаёміліся з творчасцю мастакоў і скульптараў эпохі барока, класіцызму, імпрэсіянізму і атрымалі шмат новай і цікавай інфармацыі, якая дапамагла нам лепш разабрацца ў тэме» (Аляксандра Гайдук).
«Наведванне музея было выдатным вопытам, які дапамог даведацца больш пра мастацтва. Не ў кожнага знойдзецца добрая база ведаў на гэтую тэму, таму маглі ўзнікнуць цяжкасці з разуменнем усіх стыляў мастацтва, якія мы закраналі на парах па французскай мове. Было цікава слухаць экскурсавода, атрымліваць новыя веды і разглядаць цудоўныя карціны мастацкага музея!» (Ірына Апаланік).
Заняткi былi арганізаваны ў межах развіцця сумесных адукацыйных праектаў кафедры раманскага мовазнаўства з Нацыянальным мастацкім музеем Рэспублікі Беларусь (куратар праекта – загадчык аддзела замежнага мастацтва Пракоп'ева Святлана Іванаўна).
