BY 
26 сакавіка на святой купалаўскай зямлі адбылося традыцыйнае мерапрыемства філалагічнага факультэта БДУ – патрыятычная акцыя «Вязынка – 2025» Сёлета свята было прысвечана адразу дзвюм важным датам: 80-годдзю Вялікай Перамогі і 100-годдзю надання Янку Купалу звання Народнага паэта Беларусі.
Свята пачалося з выканання гімна факультэта «БДУ і філфак» (словы К. Цыбульскага), а затым прагучаў студэнцкі гімн «Gaudeamus igitur» у беларускім перакладзе Леаніда Казакова і Жанны Некрашэвіч-Кароткай. Абодва нумары выканала студэнцкая капэла філалагічнага факультэта БДУ «Belcoro» пад кіраўніцтвам Людмілы Мельнікавай.
З прывітальным словам да прысутных звярнуліся дырэктар Дзяржаўнага літаратурнага музея Янкі Купалы Ганна Галінская і дэкан філалагічнага факультэта Сяргей Важнік.
Вядучыя нагадалі, што 250 беларускіх пісьменнікаў сталі ўдзельнікамі Вялікай Айчыннай вайны, многія змагаліся на франтах, у партызанскіх атрадах і падполлі, а іх творчасць стала часткай барацьбы за Перамогу.
Асаблівае месца ў праграме заняў Янка Купала – сімвал мужнасці і адзінства беларускага народа. Яго верш «Хлопчык і лётчык на вайне» пранікнёна прачытала Віялета Будзько, студэнтка факультэта і лаўрэат шматлікіх міжнародных конкурсаў.
Працягнуў праграму фрагмент з харэаграфічнай сюіты «У гарадскім садзе» ў выкананні артыстаў заслужанага аматарскага калектыву Рэспублікі Беларусь ансамбля танца «Крыжачок» – магістранта Кацярыны Лебедзевай і студэнта МДЭІ імя А. Д. Сахарава Дзмітрыя Бяляўскага. Калектыў-юбіляр сёлета адзначае 80-годдзе з дня заснавання.
Музычную частку ўпрыгожыла песня «Кацюша» ў выкананні капэлы «Belcoro», а затым на сцэну выйшлі студэнты з Туркменістана з нацыянальным танцам «"Куштдэпдзі», уключаным у спіс нематэрыяльнай культурнай спадчыны ЮНЕСКА. Джэнэт Байранаўна Гелдзіева, студэнтка з Туркменістана, выканала песню «Смуглянка».
Кітайская частка праграмы была прадстаўлена танга «Por Una Cabeza» у выкананні Лінь Тайюаня і песняй «Жыццё, як летнія кветкі» ў выкананні Чжан Юй.
Вялікая ўвага была нададзена беларускай народнай творчасці. Беларуская народная песня «Каваль» прагучала ў выкананні студэнтак з Туркменістана. Першакурснікі філалагічнага факультэта Арцём Салькоў і Анастасія Каласоўская выканалі народныя танцы «Верабей» і «Рэчанька», якія перадалі радасць жыцця і сілу духу беларускага народа.
Уласны верш «У жоўтым полі з каласамі» прачытала студэнтка-філолаг Ганна Ляцко, а Леанід Хрол выканаў песню «Пра тую вясну».
У конкурснай праграме “Жылі-былі класікі” перамагла каманда першакурснікаў “Зоркі Купалы”. Студэнты-філолагі наведалі Музей Янкі Купалы, дзе пазнаёміліся з унікальнай экспазіцыяй, прысвечаным жыццю і творчасці вялікага паэта.
Завяршылася мерапрыемства інструментальнай версіяй песні «Дзень Перамогі» на гітары ў выкананні Арцёма Васільева і харэаграфічнай кампазіцыяй «Майскі вальс», якую прадставілі курсанты ваеннага факультэта БДУ сумесна са студэнткамі філалагічнага факультэта.
Фінальным акордам стала ўрачыстае ўскладанне кветак да помніка Янкі Купалы – як сімвал падзякі і памяці аб героях, якія падарылі нам свет.
«Вязынка – 2025» аб’яднала студэнтаў і выкладчыкаў, у разуменні таго, што памяць аб мінулым, творчая спадчына і міжнацыянальнае адзінства з’яўляюцца найважнейшымі каштоўнасцямі філалагічнага факультэта і БДУ.
