Навуковыя чытанні, прысвечаныя 90- годдзю з дня нараджэння Івана Шамякіна

  Даследчык творчасці І. Шамякіна, вядомы пісьменнік і літаратуразнавец акадэмік НАН Беларусі У.В. Гніламёдаў у сваім выступленні "Іван Шамякін - пісьменнік дзвюх эпох" падкрэсліў, што менавіта з прыходам у літаратуру І. Шамякіна зараджаліся новыя тэндэнцыі мастацкага развіцця, а на фоне тагачаснай літаратуры, якая імкнулася да ўзнёслага апісання жыцця, па-асабліваму выглядаў першы раман І. Шамякіна "Глыбокая плынь". Жыццё ўвходзіла ў мастацкія творы ў сваім рэальным абліччы і асэнсоўвалася з ідэйных пазіцый новага часу, само ўплывала на мастацкасць твораў, падказваючы больш дакладную лінію ў развіцці вобразаў і сюжэтных калізій, патрабуючы наватарскіх пошукаў у галіне формы, адзначыў даследчык.

     У грунтоўным дакладзе "Раман "Крыніцы": гісторыя пераапрацоўкі і ацэнкі крытыкі" пра раман І. Шамякіна "Крыніцы" член-карэспандэнт НАН Беларусі М.І. Мушынскі прыйшоў да высновы, што паказ чалавека ў пэўнай грамадскай дзейнасці станавіўся надзвычай важным момантам літаратурнай творчасці, патлумачыўшы, што некаторую абмежаванасць галоўнага героя рамана І. Шамякіна "Крыніцы" Лемяшэвіча менш за ўсё варта адносіць да недахопаў і аўтарскіх пралікаў. У названым творы паказваюцца аб"ектыўныя грамадзянскія магчымасці перадавога сучасніка тых гадоў і тагачасная крытыка павінна была гэта ўлічваць.

    Загадчык кафедры тэорыі літаратуры філалагічнага факультэта прафесар В.П. Рагойша падзяліўся ўласнымі ўспамінамі пра сустрэчы з І. Шамякіным ("Сустрэча з Шамякіным"), падкрэсліўшы яго чалавечнасць, спагаду да маладзейшых творцаў, заўсёднае імкненне дапамагаць ў жыцці і творчасці. Адносна твораў І. Шамякіна даследчык заўважыў, што пісьменнік звяртаўся да падзей рознага гістарычнага перыяду, паступова ўсё больш рашуча набліжаючыся да сучаснасці.

     Даследчык творчасці І. Шамякіна прафесар М.А. Тычына ў сваім выступленні "Пісьменнік і час" зазначыў, што бясспрэчная заслуга пісьменніка ў тым, што ён паказаў свайго героя не ідэалізавана, а ў дакладна абумоўленай залежнасці ад абставін і часу, у цікавасці самога аўтара да "звычайных" праяў жыцця.

    У навуковых чытаннях, прысвечаных дзевяностагадоваму юбілею І. Шамякіна, прынялі ўдзел вядомыя даследчыкі творчасці пісьменніка, супрацоўнікі аддзела тэксталогіі НАН Беларусі, выкладчыкі кафедры беларускай літаратуры і культуры, студэнты філалагічнага факультэта. Студэнты першага курса беларускага аддзялення пазнаёмілі прысутных з "нечаканымі" творамі І. Шамякіна: вершамі перыяду Вялікай Айчыннай вайны "Маці" і "Беларусь", якія незадоўга да сустрэчы пабачылі свет на старонках рэспубліканскага друку.

     Вяла сустрэчу загадчык кафедры беларускай літаратуры і культуры прафесар Т.І. Шамякіна, дачка пісьменніка. Яна прапанавала прысутным камп"ютэрную прэзентацыю рэдкіх фотаздымкаў з уласнага архіва, а таксама падзялілася ўспамінамі пра бацьку.