BY Філалагічны факультэт Беларускага дзяржаўнага ўніверсітэта з 20 па 24 лютага 2012 г. праводзіць Тыдзень беларускай мовы, прымеркаваны да Міжнароднага дня роднай мовы.
20.02.2012 (панядзелак, 1245– 1415) “У гасцях на філфаку”
Да ўдзелу запрошаны літаратуразнавец, гісторык, пісьменнік, журналіст, доктар філалагічных навук, прафесар, ганаровы старшыня Міжнароднай асацыяцыі беларусістаў А. І. Мальдзіс; дырэктар Дырэкцыі замежнага вяшчання Беларускага радыё, паэт Н. Я. Гальпяровіч. Гутарка пойдзе аб гісторыка-сацыяльных праблемах вяртання музейных, бібліятэчных і архіўных каштоўнасцей з-за межаў Беларусі, а таксама ролі сродкаў масавай інфармацыі ў папулярызацыі нацыянальнай культуры, мовы, традыцый.
21.02.2012 (аўторак, 1000 – 1200) Міжнародны дзень роднай мовы
Афіцыйнае адкрыццё Тыдня беларускай мовы з удзелам рэктара БДУ акадэміка С.У. Абламейкі.
Прапануецца літаратурна-музычная кампазіцыя “Табе складаю шчыры свой санет, прапрадзедаў маіх жывая мова…” Будуць прачытаны вершы на мовах, якія вывучаюцца на філалагічным факультэце, а таксама ўласныя вершы студэнтаў, прысвечаныя роднай мове.
Да ўдзелу таксама запрошаны дырэктар Інстытута мовы і літаратуры імя Якуба Коласа і Янкі Купалы, старшыня Міжнароднага камітэта славістаў прафесар, член-карэспандэнт НАН Беларусі А.А. Лукашанец, паэт-песеннік, аўтар Дзяржаўнага гімна Беларусі У.І. Карызна, узорны харэаграфічны ансамбль “Першацвет” і інструментальны ансамбль “Чабарок” СШ № 71 г. Мінска (кіраўнік М.Я. Клімовіч).
22.02.2012 (серада, 1245 – 1415) “Філалогія і Я”
Інтэлектуальна-пазнавальная гульня з удзелам студэнтаў 1 курсаў спецыяльнасцей “Беларуская філалогія” і “Славянская філалогія”.
23.02.2012 (чацвер, 1245 – 1415) Дзень беларускай філалогіі
Тэма: “Беларуская мова ў кантэксце іншых славянскіх моў”
Сустрэча з галоўным навуковым супрацоўнікам аддзела славістыкі і тэорыі мовы НАН РБ, ганаровым доктарам Сафійскага ўніверсітэта, замежным членам Македонскай Акадэміі навук, старшынёй таварыства “Беларусь-Балгарыя”, акадэмікам Міжнароднай акадэміі навук Еўразіі прафесарам доктарам філалагічных навук Г.А. Цыхуном.
24.02.2012 (пятніца, 1245– 1415) Дзень беларускага перакладу
Тэма: “Святое Евангелле і праблемы яго перакладу на беларускую мову”.
Да ўдзелу запрошаны старшыня “Камісіі па перакладзе літургічных тэкстаў і рэлігійнай літаратуры”, сааўтар слоўніка сучаснай беларускай мовы і энцыклапедычнага слоўніка рэлігійнай лексікі беларускай мовы, кандыдат гістарычных навук, магістр тэалогіі, перакладчык Уладыслаў Завальнюк.
