Тыдзень роднай мовы

21 лютага адбылося ўрачыстае адкрыццё Тыдня роднай мовы. З вітальнымі словамі выступілі прарэктар Беларускага дзяржаўнага ўніверсітэта па вучэбнай рабоце і інтэрнацыяналізацыі адукацыі С.М. Ходзін, дэкан філалагічнага факультэта І.С. Роўда, намеснік дырэктара Нацыянальнага інстытута адукацыі па навукова-даследчай рабоце В.У. Зелянко, намеснік начальніка інфармацыйна-аналітычнага ўпраўлення Міністэрства інфармацыі Рэспублікі Беларусь Г.В. Гусакова, галоўны спецыяліст Галоўнага ўпраўлення агульнай сярэдняй, дашкольнай і спецыяльнай адукацыі Міністэрства адукацыі Рэспублікі Беларусь І.У. Булаўкіна, беларускі паэт, празаік, перакладчык В.А. Шніп, намеснік начальніка Ваеннага факультэта Беларускай дзяржаўнай акадэміі авіяцыі А.В. Ермаловіч.

Літаратурна-музычная кампазіцыя «У роднай мове – цэлы свет…» была прадстаўлена творчымі нумарамі студэнтаў і стажораў на мовах, якія прафесійна вывучаюцца на філалагічным факультэце. Свае творчыя здольнасці прадэманстравалі курсанты ваеннага факультэта Беларускай дзяржаўнай акадэміі авіяцыі, ансамбль «Жалейка», прадстаўнікі Рэспубліканскай гімназіі-каледжа пры Беларускай дзяржаўнай акадэміі музыкі.

22 лютага ў традыцыйнай сустрэчы, прысвечанай беларускаму перакладу, прымеркавай да выдання тэкстаў Новага Запавета і Псалтыра ў перакладзе на сучасную беларускую мову, прынялі ўдзел прафесар І.А. Чарота і выкладчык-метадыст беларускай мовы і літаратуры, выдатнік народнай асветы Беларусі, супрацоўнік групы вучоных-філолагаў пры Мінскім касцёле Святога Сымона і Святой Алены па перакладзе рэлігійнай літаратуры на сучасную беларускую літаратурную мову В.К. Раманцэвіч. Студэнты філалагічнага факультэта прачыталі вершы народнага паэта Беларусі, эсэіста і перакладчыка Рыгора Барадуліна.

23 лютага ў інтэлектуальна-пазнавальнай гульні «Філалогія і Я» прынялі ўдзел студэнты 1 курсаў спецыяльнасцей «Беларуская філалогія», «Руская філалогія» і «Славянская філалогія». Адбыліся рэкламны, вітальны, паэтычны, граматычны, песенны і іншыя конкурсы, якія прадэманстравалі высокі крэатыўны і эўрыстычны патэнцыял першакурснікаў. Да ўдзельнікаў мерапрыемства з цёплымі словамі звярнуўся беларускі паэт, перакладчык і выкладчык Мікола Шабовіч, які прачытаў некалькі сваіх вершаў. Пераможцамі ў гульні стала каманда студэнтаў-першакурснікаў спецыяльнасці «Беларуская філалогія».

Ролі і значэнню кітайскай культуры ў Беларусі, узаемадзеянню кітайскай і беларускай моў было прысвечана мерапрыемства, якое прайшло 26 лютага. Намеснік дэкана, загадчык кафедры кітайскай філалогіі М.М. Хмяльніцкі адзначыў дасягненні кафедры ў галіне вывучэння кітайскай мовы і літаратуры. Выкладчыкі кафедры кітайскай філалогіі Г.С. Холева і В.В. Жукавец правялі прэзентацыю ўнікальнага гуртка “Дыялог”. Былі заслуханы пераклады на беларускую мову, прачытаныя студэнтамі-першакурснікамі. Выкладчыкі кафедры кітайскай філалогіі падзяліліся з прысутнымі трыма ўлюбёнымі іерогліфамі – 好 (добра), 春 (вясна) і 爱 (каханне). Гурток кітайскай каліграфіі “Цан Цзэ” прадставіла яго кіраўнік, выкладчык кітайскай мовы Фу Сюеін. Адказны сакратар часопіса «Полымя» Юлія Алейчанка прадставіла серыю кніг «Светлыя знакі. Паэты Кітая».

27 лютага ў межах Лінгвістычна-мастацка-дыскусійнай гасцёўні на тэму «Яны змаглі, а ТЫ зможаш?» арыгінальнымі ідэямі папулярызацыі беларускай мовы сярод моладзі падзяліўся сузаснавальнік камунікацыйнай кампаніі GBS Дзмітрый Гмыза.