BY 
З мэтай папулярызацыі беларускай культуры і беларускай адукацыі ў рамках узаемадзеяння кафедры рыторыкі і методыкі выкладання мовы і літаратуры з Саюзам пісьменнікаў Беларусі было арганізавана наведванне кітайскімі магістрантамі ХХХ Мінскай міжнароднай кніжнай выставы-кірмашу «Свет кнігі без межаў». Магістранты сустрэліся з прадстаўнікамі беларускай і расійскай творчай інтэлігенцыі.
У прыватнасці, пры непасрэдным удзеле выкладчыка кафедры Надзеі Ніжнёвай-Ксенафонтавай магістранты змаглі пагутарыць са старшынёй Саюза пісьменнікаў Беларусі Аляксандрам Мікалаевічам Карлюкевічам і старшынёй Саюза пісьменнікаў Расіі Мікалаем Фёдаравічам Івановым.
Дырэктар выдавецтва «Мастацкая літаратура» Аляксандр Мікалаевіч Бадак распавёў магістрантам аб творчым працэсе ў выдавецтве і супрацоўніцтве з Кітаем у літаратурнай сферы.
Таксама кітайскія магістранты пагутарылі з дырэктарам выдавецтва «Вышэйшая школа» Аляксандрам Пятровічам Нячаем. Магістранты праявілі жывую цікавасць да кніг, якія выпускаюцца выдавецтвам.
Старшыня Мінскага гарадскога аддзялення Саюза пісьменнікаў Беларусі Міхаіл Паўлавіч Пазнякоў распавёў магістрантам пра сваю кнігу «Прагулкі па Мінску», у якой распавядаецца пра гісторыю і легенды нашай сталіцы.
Потым кітайскія магістранты пазнаёміліся з экспазіцыямі Нацыянальнай бібліятэкі Беларусі і Прэзідэнцкай бібліятэкі Беларусі, каб яшчэ больш глыбока спазнаць нашу багатую духоўную культуру, традыцыі і ўбачыць стаўленне беларускага народа да памяці пакаленняў, якія забяспечылі нам мірнае і стваральнае жыццё.
Магістрантка спецыяльнасці «Мовазнаўства» філалагічнага факультэта БДУ Чао Чэньяо:
"Я была вельмі рада бачыць кітайскія і беларускія кнігі на ХХХ Мінскай міжнароднай кніжнай выставе-кірмашы свет «Кнігі без межаў». Мы пазнаёміліся з некаторымі пісьменнікамі на выставе. Даведаўшыся, што мы выбралі навучанне ў Беларусі, пісьменнікі пажадалі нам поспехаў.
Супрацоўнікі Прэзідэнцкай бібліятэкі Рэспублікі Беларусь паказалі нам факсіміле беларускіх кніг шаснаццатага стагоддзя. Кнігі былі цалкам адрэстаўраваны, з прыгожымі тытульнымі лістамі, драўлянымі вокладкамі і каменнымі ўпрыгожваннямі на іх.
Я спадзяюся, што адносіны паміж Беларуссю і Кітаем застануцца такімі ж добрымі, што будзе яшчэ больш магчымасцяў для культурнага абмену.
На памяць пра наведванне выставы я набыла кнігу «Прагулкі па Мінску» Міхаіла Пазнякова».
Магістрант спецыяльнасці «Тэорыя і методыка навучання» філалагічнага факультэта БДУ Чжу Шэнмінь:
«На ХХХ Мінскай міжнароднай кніжнай выставе-кірмашы мы пазнаёміліся з некалькімі вядомымі беларускімі пісьменнікамі. Я быў вельмі рады з імі паразмаўляць і даведацца, што яны знаёмыя з творчасцю кітайскіх аўтараў. Мы змаглі абмеркаваць беларускую і кітайскую культуру. Гэта быў сапраўдны дыялог культур!
На выставе я купіў кнігу «Гісторыя з вуснаў Сі Цзіньпіна». Мне цікава прачытаць яе менавіта на рускай мове.
Я вельмі ўдзячны нашаму кіраўніку Надзеі Леанідаўне Ніжневай-Ксенафонтавай за тое, што яна арганізавала для нас наведванне выставы і сустрэчы з вядомымі беларускімі пісьменнікамі».
Магістрантка спецыяльнасці «Тэорыя і методыка навучання» філалагічнага факультэта БДУ Сянь Нань:
"Я наведала 30-ы Мінскі міжнародны кніжны кірмаш.
Я змагла даведацца пра апошнія публікацыі і тэндэнцыі выдавецкай справы ў Беларусі як на мясцовым, так і на міжнародным узроўнях. Прадстаўленыя кнігі і часопісы ахопліваюць самыя розныя тэмы і вобласці: ад літаратуры, мастацтва і гісторыі да навукі, тэхналогій і бізнесу. Гэтыя экспанаты прапануюць наведвальнікам зазірнуць у думкі і культурную спадчыну аўтараў і выдаўцоў.
Для нас выстава стала камунікацыйнай платформай для зносін з беларускімі пісьменнікамі.
Выстава дапамагла мне лепш зразумець культуры і гісторыі розных краін і рэгіёнаў. Таксама я больш даведалася пра беларускую культуру і гісторыю.
Вялікі дзякуй майму выкладчыку Надзеі Леанідаўне Ніжневай-Ксенафонтавай за тое, што мы змаглі не толькі наведаць выставу, але і пагутарыць з беларускімі пісьменнікамі!»
