Мова старадаўніх абразоў

Кожны народ размаўляе з сусветам на мове свайго мастацтва.    

Спасцігнуць семіётыку народных абразоў, паспрабаваць раскадаваць усе яе сэнсы – вельмі карысны вопыт для зацікаўленага філолага.

Менавіта з мэтай спасціжэння спецыфікі мастацкай мовы традыцыйнага іканапісу як аднаго з відаў сярэднявечнага мастацтва дацэнты кафедры рускай літаратуры А.С.Іванова і Л.В.Камлюк-Ярашэнка са студэнтамі 2 курса беларускай філалогіі і 1 курса рускай філалогіі наведалі 24 лістапада і 6 снежня Хрысціянскі Сацыяльны Цэнтр. Пад яго ўтульным дахам разам са шматлікім цікавым скарбам беларусаў размешчаны музей хатніх ікон "Нябёсная варта", якія выраблялі майстры Беларусі. Гісторык, экскурсавод і краязнаўца Павал Каралёў падрабязна расказаў пра асаблівасці іканапісу розных беларускіх рэгіёнаў, падзяліўся сваімі ўражаннямі аб арганізацыі дадзенай выставы. Экскурсія праходзіла ў інтэрактыўнай форме: студэнты не толькі патрымалі ў руках старадаўнія дошкі з нанесенымі іканапіснымі лікамі, але і пагарталі маленькую, літаральна ў паўсантыметра кніжачку з тэкстам, надрукаваным на розных мовах, удзельнічалі ў тэматычных гульнях, дзе прадэманстравалі бліскучыя веды ў галіне беларускай культуры, унеслі ўклад у стварэнне рукапіснай Бібліі. Адбылася і кранальная сустрэча двух стагоддзяў: у драўляны ранец школьніка пачатку ХХ стагоддзя выдатна змясціўся сучасны айпад.

Не менш цікавай была сустрэча з другім прадстаўніком Хрысціянскага сацыяльнага цэнтра Таццянай Сапегай, якая мае грунтоўны вопыта працы ў Нацыянальнай бібліятэцы Беларусі. Яна паведаміла студэнтам цікавыя і малавядомыя факты з жыцця гуманіста і вучонага Францыска Скарыны. Студэнты атрымалі вялікія ўражанні ад наведвання Хрысціянскага цэнтра і плануюць у хуткім  часе наведаць яго зноў.