BY 
15 лютага ст. выкладчыкам кафедры англійскага мовазнаўства М.Л. Савасцюк было праведзена мерапрыемства на англійскай мове з замежнымі і беларускімі студэнтамі 3 курса аддзяленняў “Рамана-германская філалогія” і “Усходняя філалогія”. Мэта мерапрыемства – развіццё камунікатыўных здольнасцей, сацыяльная інтэграцыя студэнтаў розных нацыянальнасцей, знаёмства з асаблівасцямі заходняй і ўсходняй культур, пераадоленне культурнага бар’ера, дапамога замежным студэнтам ва ўстанаўленні сацыяльных сувязей з беларускімі студэнтамі.
Настольныя гульні паслужылі інструментам, з аднаго боку, для стварэння давернай атмасферы, з другога, спосабам выканаць шэраг педагагічных задач: стварыць умовы для камунікацыі беларускіх і замежных студэнтаў на англійскай мове, прастымуляваць іх вербальнае ўзаемадзеянне праз неабходнасць дапамагаць адзін аднаму, развіць здольнасць працаваць у групе з прадстаўнікамі іншых культур для дасягнення агульнай мэты (выйгрышу).
Мерапрыемства прайшло ў нязмушанай атмасферы, студэнты з задавальненнем узаемадзейнічалі адзін з адным, былі зацікаўленыя ва ўстанаўленні кантакту. Асабліва задаволеныя знаёмствам з беларусамі былі студэнты з Кітая, паколькі моўны бар’ер часта пазбаўляе іх магчымасці ў поўнай меры адаптавацца ва ўніверсітэце і сфарміраваць устойлівыя сацыяльныя сувязі з беларускімі студэнтамі. Студэнты аддзялення “Усходняя філалогія” таксама былі зацікаўленыя ў знаёмстве з кітайскімі студэнтамі як з прадстаўнікамі культуры вывучаемай мовы.
