BY 
26 сакавіка ў межах дысцыпліны «Гісторыя рускай літаратуры ХХ–ХХІ ст.» адбыўся інтэрактыўны занятак «Свет-тэкст: сучасная паэзія праз прызму семіётыкі», які аб’яднаў студэнтаў 2 курса спецыяльнасці «Усходняя філалогія» і школьнікаў – удзельнікаў праекта «Студэнт на тыдзень».
Занятак распрацавала і правяла дацэнт кафедры рускай літаратуры Л. В. Камлюк-Ярашэнка ў фармаце коворкінгу, што дазваляе сцерці межы паміж тэорыяй і практыкай, навучаннем і даследаваннем, дае магчымасць кожнаму ўдзельніку адкрыць у тэксце новыя сэнсы.
Метадалагічнай асновай працы з сучаснымі перформансамі стаў семіятычны падыход, паводле якога мастацкі тэкст разглядаецца як свет, насычаны кодамі, зашыфраванымі сэнсамі і інтэртэкстуальнымі сувязямі. Матэрыялам для разважанняў стала сучасная паэзія А. Сілівончык, якая балансуе паміж традыцыяй і эксперыментам, уключае элементы фэнтэзі, фольк-хорару і нават перформансу. Удзельнікі даследавалі, як слова, выходзячы за межы літаральнага значэння, пераўтвараецца ў мастацкі вобраз, становіцца часткай шматслойнага наратыву.
Фармат каворкінгу дазволіў выбудаваць прадуктыўны дыялог: школьнікі і студэнты працавалі ў групах зменнага складу, што садзейнічала абмену ідэямі і нечаканым інсайтам. Гульнявыя прыёмы і інтэрмедыяльныя сродкі рабілі аналіз тэксту жывым і пластычным: вобразы нараджаліся не толькі ў словах, але і ў візуальных і гукавых асацыяцыях. Гэта дазволіла выйсці за межы традыцыйнага чытання і наноў адчуць, як тэкст становіцца прасторай, у якой пераплятаюцца розныя культурныя коды-«галасы» (паводле Р. Барта), ствараючы дынамічны, шматмерны сэнс.
Такія фарматы заняткаў адкрываюць магчымасці для новага погляду на літаратуру: тэкст не проста вывучаецца, але перажываецца, становіцца асабістым досведам.
Філалагічны факультэт працягне шукаць і прапаноўваць формы ўзаемадзеяння з мастацкай літаратурай, якія натхняюць, развіваюць крытычнае мысленне і абуджаюць творчую інтуіцыю. Новы досвед чытання заўсёды чакае за даляглядам – варта толькі зрабіць крок насустрач.
