BY 
Веліч чалавека, які ў полымі вайны застаецца сумленным абаронцам сваёй Айчыны, – вось галоўная тэма сусветна вядомага мастака слова, Народнага пісьменніка Беларусі Васіля Быкава. У гонар пісьменніка-ветэрана доктар філалагічных навук, прафесар кафедры тэарэтычнага і беларускага літаратуразнаўства Людміла Сінькова 16 красавіка прачытала лекцыю пра яго жыццё і творчасць групе студэнтаў аддзяленняў славянскай (3 курс) і беларускай (2 курс) філалогіі.
Лектар расказала пра сустрэчу з Васілём Быкавым на філалагічным факультэце БДУ ў 1986 г., падкрэсліла важнасць жыццёвага вопыту Васіля Быкава для яго творчасці, аўтабіяграфічныя рысы ў вобразах юнакоў-беларусаў, заўважныя ў “франтавых” аповесцях пісьменніка, падкрэсліла яго глыбокую культурна-гістарычную дасведчанасць, выяўленую ў хрэстаматыйным творы “Знак бяды”. Прэзентацыю да лекцыі на базе матэрыялаў вучэбнай аўдыторыі інавацыйнага навучання “Народныя паэты і пісьменнікі Беларусі” (кіраўнік – прафесар, доктар філалагічных навук Алесь Бельскі) падрыхтавала аспірант кафедры Кацярына Крыцук-Тарасава; у дыялогах з лектарам і студэнтамі ўдзельнічала дацэнт кафедры тэарэтычнага і беларускага літаратуразнаўства, кандыдат філалагічных навук Лада Алейнік. Мужнае і праўдзівае слова Васіля Быкава, да якога звярнуліся выкладчыкі і студэнты, яшчэ раз пацвердзіла вялікую сілу сапраўднага мастацтва.
