Сустрэча з АГіМ Маскоўскага раёна

8 мая для замежных студэнтаў 1 і 2 курсаў спецыяльнасці «Руская філалогія» была арганізавана сустрэча з прадстаўнікамі Аддзела па грамадзянстве і міграцыі Маскоўскага раёна г. Мінска.

На пытанні студэнтаў адказваў намеснік начальніка АГіМ Маскоўскага РУУС, падпалкоўнік міліцыі Сяргей Алегавіч Судакевіч. Асаблівую ўвагу ў сваім выступленні ён акцэнтаваў на пытаннях міграцыйнага заканадаўства (міграцыя па краіне з мэтай турызму і афармленне дакументаў на выезд на аздараўленне і ў перыяд канікул), палітыкі ў сферы легальнага працаўладкавання замежных грамадзян і пытаннях прафілактыкі правапарушэнняў (са статыстыкай і пералікам асноўных відаў адказнасці).

Студэнты таксама маглі пракансультавацца па пытаннях знаходжання ў краіне з намеснікам начальніка аддзела па грамадзянстве і міграцыі ўпраўлення міжнародных сувязей БДУ Аляксеем Пятровічам Багамазавым і задаць пытанні па арганізацыі адукацыйнага працэсу на філалагічным факультэце намесніку дэкана па агульных пытаннях і працы з замежнымі студэнтамі Дзмітрыю Андрэевічу С’янаву і метадысту па рабоце з замежнымі студэнтамі Таццяне Іосіфаўне Місько.

Таксама студэнтам нагадалі ў перадсвяточны перыяд Дня Перамогі аб неабходнасці выканання правілаў паводзінаў у грамадскіх месцах падчас святочных мерапрыемстваў.

Такія сустрэчы па тлумачэнні правілаў знаходжання, працоўнай дзейнасці і выканання міграцыйнага заканадаўства рэгулярна праводзяцца на факультэце і дапамагаюць студэнтам хутчэй адаптавацца і пазбегнуць магчымых парушэнняў заканадаўства падчас навучання.