BY 
16–18 верасня ў Нацыянальнай акадэміі навук Беларусі прайшла XXII Міжнародная навуковая канферэнцыя маладых вучоных «Моладзь у навуцы – 2025». Канферэнцыя традыцыйна збірае таленавітых даследчыкаў з усяго свету, становіцца пляцоўкай для абмену навуковымі ідэямі і смелымі адкрыццямі.
Сёлета ў канферэнцыі прынялі ўдзел больш за 560 чалавек: вучоныя, аспіранты, магістранты і студэнты з Беларусі, Расіі, Узбекістана, Туркменістана, Кыргызстана, Азербайджана, Арменіі, Турцыі, Кубы. Удзельнікі працавалі ў межах 25 секцый, якія ахоплівалі асноўныя напрамкі сучаснай навукі: фізіка-матэматычныя, хімічныя, біялагічныя, аграрныя, медыцынскія, гуманітарныя.
Філалагічны факультэт годна прадставіла студэнтка 3 курса Февронія Бегіян (навуковы кіраўнік — к.ф.н., дацэнт Л.В. Камлюк-Ярашэнка). Яе даклад «“Народжанае ад плоці” і “народжанае ад Духа”: евангельская цытата як ключ да духоўнай драмы героя рамана Н. Аляксеевай “Полунощница”» прагучаў у секцыі «Філалогія, фальклор, мастацтва».
Даследаванне Февроніі заснавана на міждысцыплінарным падыходзе: літаратуразнаўчы аналіз спалучаецца з багаслоўскай экзегезай. Такі сінтэз адпавядае сучасным тэндэнцыям гуманітарнай навукі, дзе пошук сэнсаў у мастацкіх тэкстах усё часцей звязваецца з дыялогам з сакральнымі тэкстамі. Тэкстуальна-семантычны аналіз евангельскай цытаты быў прапанаваны як сістэмаўтваральны для інтэрпрэтацыі ўсяго рамана.
Дакладчыца паказала, што ключавая біблейская формула можа быць ключом да разумення духоўнай трансфармацыі героя. Канфлікт паміж прафесійным прызваннем (голас як «плоть») і аскетычным ідэалам («дух») быў разгледжаны праз прызму патрыстычнай антрапалогіі, што зрабіла даследаванне не толькі наватарскім, але і глыбока асэнсаваным.
Удзел Февроніі Бегіян стаў не толькі прадстаўленнем філалагічнага факультэта, але і яскравым прыкладам таго, што студэнцкая навука здольная адкрываць новыя гарызонты – і ў асабістых даследаваннях, і ў развіцці сучаснай гуманітарнай думкі.
