BY 
11 лістапада 2025 года на філалагічным факультэце пад кіраўніцтвам дацэнта кафедры рускай мовы А. А. Мацюновай адбылося пасяджэнне моўнага клуба «Асенні вянок слоў: дыялог культур». Ініцыятарамі і галоўнымі ўдзельнікамі сустрэчы сталі туркменскія студэнты другога курса, якія навучаюцца на спецыяльнасці «Руская філалогія».
Фармат клуба прадугледжваў жывую размову ўдзельнікаў. Студэнты выступілі ў ролі дакладчыкаў, падрыхтавалі падрабязныя прэзентацыі аб творчасці рускіх, беларускіх і туркменскіх паэтаў.
Мэта была не проста прачытаць вядомыя радкі. Другакурснікі падышлі да задачы як сапраўдныя даследчыкі: яны аналізавалі тэксты, імкнуліся зразумець логіку вобразаў, якія выкарыстоўвалі аўтары. У рамках адной сустрэчы прагучалі вершы беларускіх класікаў Уладзіміра Дубоўкі і Янкі Купалы. Следам за імі — радкі Аляксандра Пушкіна і Сяргея Ясеніна. Важнай часткай пасяджэння стаў зварот да роднай літаратуры навучэнцаў — творчасці Гурбанназара Эзізава.
Студэнты параўноўвалі, як у розных культурах паэты пішуць пра вечныя тэмы, шукалі агульныя матывы і нацыянальныя асаблівасці. Удзельнікаў захапіў этымалагічны аналіз. Будучыя філолагі каменціравалі паходжанне асобных слоў, адсочвалі, як мянялася іх значэнне і які дадатковы сэнс яны прыўносілі ў паэтычны тэкст.
Галоўным вынікам мерапрыемства стала не колькасць слайдаў у прэзентацыях, а агульнае і аднадушнае меркаванне: гэтага было мала. Размова пра паэзію, якая аб’яднала тры народы, аказалася настолькі захапляльнай, што яе захацелася працягнуць.
