12 лютага 2026 года супрацоўнікі кафедры тэарэтычнага і беларускага літаратуразнаўства філалагічнага факультэта БДУ старшы выкладчык Святлана Крылова разам з загадчыкам кафедры дацэнтам Таццянай Марозавай наведалі творчую сустрэчу з беларускім паэтам, празаікам, перакладчыкам, публіцыстам, лаўрэатам Нацыянальнай літаратурнай прэміі Беларусі, аўтарам больш васьмідзесяці кніг на беларускай і рускай мове Міхаілам Пазняковым, якая адбылася ў галерэі «Лабірынт» Нацыянальнай бібліятэкі Беларусі. Гэта мерапрыемства было прымеркавана да 75-годдзя Міхаіла Паўлавіча. У цяперашні час Міхаіл Пазнякоў з’яўляецца старшынёй Мінскага гарадскога аддзялення Саюза пісьменнікаў Беларусі.

Ушанаваць вядомага літаратурнага і культурнага дзеяча Беларусі сабралася вялікая колькасць гасцей, прыхільнікаў таленту паэта: прадстаўнікі грамадскіх арганізацый, члены Саюза пісьменнікаў Беларусі, артысты, яго блізкія сябры.

Памятны падарунак Міхаілу Паўлавічу ўручыў старшыня Дзяржаўнага пагранкамітэта Рэспублікі Беларусь генерал-маёр Канстанцін Моластаў. Было адзначана, што Міхаіл Паўлавіч у свой час служыў у пагранвойсках і мае ганаровае званне «Выдатнік пагранічнай службы».

Першы намеснік Саюза пісьменнікаў Беларусі Алена Стэльмах уручыла Ганаровую грамату Саюза пісьменнікаў Беларусі.

Было сказана шмат цёплых слоў падзякі ў адрас Міхаіла Паўлавіча за яго выдатныя творы, за яго грамадскую дзейнасць, за яго любоў да роднага беларускага слова.

Выступілі артысты Мінскага гарадскога Тэатра паэзіі, у выкананні якіх прагучалі ўрыўкі з празаічных твораў пісьменніка, песні на вершы паэта.

Атмасфера творчай сустрэчы была цёплай і шчырай, напоўненай успамінамі пра дзіцінства, пра студэнцкія гады на філалагічным факультэце БДУ. Паэт пранікнёна распавядаў пра сваю малую радзіму, пра маці, чытаў вершы, якія ёй прысвяціў, у якіх стараўся перадаць усе тыя светлыя і незабыўныя моманты, звязаныя з дарагім яму чалавекам. Гучалі ў выкананні паэта і вершы, прысвечаныя роднай Беларусі і яго малой радзіме. Былі паказаны кадры з фільма «Слова паэта», прысвечанага творчасці Міхаіла Пазнякова, яго глыбокім філасофскім роздумам аб жыцці, аб ролі паэта, аб творчасці, аб роднай вёсцы, аб бацькоўскай хаце.

У канцы сустрэчы школьнікі і студэнты чыталі вершы паэта, задавалі яму пытанні.