BY 
20 сакавіка 2026 года на базе гістарычнага факультэта БДУ па запрашэнні факультэта сацыякультурных камунікацый БДУ студыяй-тэатрам ФДБАУ ВА “Маскоўскі дзяржаўны лінгвістычны ўніверсітэт” быў арганізаваны паказ спектакля-рэканструкцыі “Нюрнбергскі прысуд: урокі гісторыі для сучаснасці і будучыні”.
Падчас спектакля-рэканструкцыі былі адноўлены фрагменты пасяджэнняў міжнароднага трыбунала ў зале Палаца правасуддзя ў Нюрнбергу з моманту прад’яўлення абвінавачання нацысцкім злачынцам да вынясення ім прысуду. Спектакль-рэканструкцыю суправаджаў сінхронны пераклад з англійскай, нямецкай і французскай моў на рускую, які ажыццяўлялі студэнты перакладчыцкага факультэта МДЛУ.
Аўтары ідэі выкарыстоўвалі стваральны патэнцыял перакладу, ператварыўшы суд ў сцэнічнае дзейства.
Стваральнікі гістарычнай рэканструкцы імкнуліся да поўнай аўтэнтычнасці і паказалі гісторыю прафесійнага подзвігу перакладчыкаў як рэальную драматычную падзею, прычым сітуацыя шматбаковага перакладу ў экстрэмальных умовах была ўзнолена максімальна дакладна. Гледачы належным чынам ацанілі вялізную псіхалагічную нагрузку, якую адчулі акцёры, студэнты і выкладчыкі Маскоўскага дзяржаўнага лінгвістычнага ўніверсітэта. Інсцэніроўка ў суправаджэнні жудасных кадраў з архіва ваеннай хронікі актывізавала эмацыйныя адчуванні і пачуццё суперажывання, многія ўзгадалі аповеды старэйшых сваякоў і сямейныя трагедыі.
Спектакль наведалі студэнты 3 курса спецыяльнасці “Рамана-германская філалогія” філалагічнага факультэта БДУ пад кіраўніцтвам выкладчыкаў. Дэлегацыя спецыяльнасці “Рамана-германская (французская) філалогія” прыняла рашэнне апрануцца цалкам у чорнае, каб не толькі прытрымлівацца прафесійнага этыкету, але і аддаць даніну павагі памяці перакладчыкаў, журналістаў, разведчыкаў, для якіх галоўнай зброяй Перамогі было слова.
Пасля прагляду і вяртання ў навучальную аўдыторыю адбылася рэфлексія. Студэнты 3 курса спецыяльнасці “Рамана-германская (французская) філалогія” адчулі захапленне мужнасцю і сілай духа людзей, якія забяспечвалі пераклад судовых пасяджэнняў «ад першай асобы». Студэнты ацанілі выключна цяжкія ўмовы працы сінхраністаў: працоўнае месца знаходзілася не «за кулісамі», а зусім побач з лавамі падсудных, што адыграла эмацыйную ролю, тым больш, што спектакль, як сеанс працы аднаго перакладчыка на Нюрнбергскім працэсе, доўжыўся больш за гадзіну. Гледачы перажылі «эфект прысутнасці»: падсудныя спрабавалі апраўдацца, крычалі, парушалі пратакол пасяджэння, сведкі абвінавачання давалі паказанні. У канцы рэфлексіі студэнткі адзначылі, што менавіта падчас Нюрнбергскага трыбунала савецкія спецыялісты разбурылі стэрэатып аб зусім не жаночай прафесіі ваеннага перакладчыка.
Наведванне “гістарычнай рэканструкцыі” Нюрнбергскага працэсу спрыяла выхаванню пачуцця гонару і павагі да гісторыі нашай краіны. Мерапрыемства практыка-арыентаванага характару дапоўніла веды студэнтаў па курсе тэорыі і практыкі перакладу, які вывучаўся ў папярэднім навучальным семестры. На прыкладзе гэтай культурнай падзеі будучыя перакладчыкі пераканаліся ў тым, што пераклад як від дзейнасці, які прадугледжвае пастаянны пошук і прыняцце рашэнняў, носіць ярка выражаны эўрыстычны характар.
