Пазааўдыторны занятак “Мой Мінск”

16.04.2026 у рамках заняткаў па англійскай мове дацэнт кафедры германскага мовазнаўства М.Л. Савасцюк са студэнтамі 3 курса аддзялення «ўсходняя філалогія» правяла пазааўдыторнае мерапрыемства «Мой Мінск».

Мэта мерапрыемства – выхаванне пачуцця патрыятызму, любові да сталіцы, беражлівага стаўлення да культурнай спадчыны краіны; фарміраванне агульнакультурных кампетэнцый; пашырэнне кругагляду; развіццё камунікатыўных здольнасцей студэнтаў, навыкаў маўлення на англійскай мове, актывізацыя лексікі па тэмах “Гісторыя і культура Рэспублікі Беларусь” і “Праблемы сучаснага горада”.

Мерапрыемства прайшло ў форме экскурсійнай прагулкі па Мінску, да якой студэнты загадзя падрыхтавалі інфармацыю аб любімых месцах у цэнтры горада. Падчас занятку студэнты па чарзе выступалі ў ролі экскурсавода, а таксама разам з выкладчыкам рэфлексавалі пра свае дзіцячыя ўражанні ад Мінска, пра мерапрыемствы, тэатральныя пастаноўкі, убачаныя на сцэнах горада, эмоцыі, з якімі ў іх звязаны розныя яго куткі. Прыемны і пазнавальны шпацыр, безумоўна, дапоўніць «скарбонку» ўспамінаў студэнтаў пра Мінск – утульны, шматгранны, поўны водараў вясны.