Экскурсія ў Парк Перамогі

22 мая дацэнт кафедры тэорыі і методыкі выкладання рускай мовы як замежнай Міхалёва А.М. з замежнымі студэнтамі 1 курса факультэта філасофіі і сацыяльных навук наведалі Парк Перамогі – адно з найпрыгажэйшых месцаў Мінска, дзе так любяць адпачываць беларусы і госці сталіцы.

Студэнты з Кітая дакрануліся да старонак гісторыі легендарнага парку. Даведаліся, што яго будаўніцтва пачыналася ў далёкім 1941-м годзе са стварэння вадасховішча, у 1945-м – на пустку прывезлі 2 тыс. маладых дрэў, а ў 1970-м годзе парк ператварыўся ў “зялёнае мора” (мінчанамі было высаджана 33 тыс. дрэў розных парод і 25 тыс. кустоў). Палюбаваліся маляўнічымі відамі, люстраной роўняддзю Камсамольскага возера, востравам птушак, фантанам Перамогі і галоўнай славутасцю парку – будынкам Беларускага дзяржаўнага музея гісторыі Вялікай Айчыннай вайны, дзе кожны ўдзельнік ужо пабываў раней.

 Студэнты і выкладчык засталіся вельмі задаволеныя: здзейснілі пешую прагулку, падыхалі свежым паветрам, атрымалі масу прыемных уражанняў, вывучылі назвы мясцовых дрэў, даведаліся шмат новага пра Парк, які захоўвае памяць аб Вялікай Перамозе ў гады Вялікай Айчыннай вайны.