BY З 9 па 11 красавіка на базе САК «Брыганціна» прайшоў штогадовы выязны адукацыйны Форум творчай моладзі-2019. Самыя актыўныя прадстаўнікі Творчага саюза БДУ на працягу двух дзён змагаліся за званне самых творчых, знаёміліся з новай структурай арганізацыі, падводзілі вынікі навучальнага года.
Адбыўся адкрыты дыялог і канферэнцыя на тэму «Новая структура Творчага саюза БДУ». Якім чынам будзе працаваць арганізацыя ў будучым? На якіх умовах можна патрапіць у аргкамітэт? Як гэтыя змены адлюструюцца на арганізацыях факультэтаў? На гэтыя і іншыя пытанні адказалі старшыня і куратары напрамкаў PR, канферанс, харэаграфія, тэхнічнае забеспячэнне, дэкор і інструментальнага напрамку.
Акрамя таго, прайшлі перавыбары старшыні Творчага саюза БДУ: на змену Лідзіі Заблоцкай, студэнткі 4 курса факультэта журналістыкі, прыйшла Ангеліна Федасенка, студэнтка 3 курса філалагічнага факультэта, раней - намеснік старшыні і выконваючая абавязкі Творчага саюза БДУ.
Праграма форума ўключала творчыя і спартыўныя спаборніцтвы, караоке- і dance-батл, музычны квіз, квэст-гонку, тэматычны конкурс відэаролікаў «БДУ запрашае на II Еўрапейскія гульні», а таксама штогадовы конкурс творчых праектаў. Пераможцам у намінацыі «Лепшы творчы праект» стаў праект аўтарскай песні.
Па традыцыі, ярка і пад гукі песні «This is me and you, this is BSU» ў выкананні Ліды Заблоцкай і Алега Шчуцкага прайшла цырымонія закрыцця Форума творчай моладзі.
