КЛАСІКІ Ў НОВЫМ ФАРМАЦЕ: МІНІ-ПРЭЗЕНТАЦЫЯ

10 мая адбылася міні-прэзентацыя «Класікі ў новым фармаце», у ходзе якой студэнты 3 курса спецыяльнасці «Беларуская філалогія» пазнаёміліся з электроннымі тэкставымі і мультымедыйнымі матэрыяламі пра Янку Купалу і Якуба Коласа на сайтах «Народныя паэты і пісьменнікі Беларусі» і «Бібліятэка філолага». Гэта мерапрыемства прымеркавана да 140-годдзя з дня нараджэння народных паэтаў.

Распачынаючы прэзентацыю, загадчык кафедры гісторыі беларускай літаратуры прафесар А. І. Бельскі адзначыў, што стварэнне новых тэхналагічных платформ, якімі і з’яўляюцца сайты «Народныя паэты і пісьменнікі Беларусі» і «Бібліятэка філолага», – гэта факты інавацыйнага развіцця адукацыі на сучасным этапе, пашырэння інфармацыйна-культурнага поля. Размяшчэнне электронных рэсурсаў дае магчымасць выкарыстоўваць іх у анлайн-рэжыме на занятках, у працэсе самападрыхтоўкі, дазваляе зрабіць спасылкі на цікавую і патрэбную інфармацыю.

Кафедрай гісторыі беларускай літаратуры вядзецца актыўная праца па напаўненні названых сайтаў. Прыкметную частку кантэнту складаюць відэа, фота- і тэкставыя матэрыялы пра Янку Купалу і Якуба Коласа: «Спадчына: відэафільм пра Янку Купалу і Якуба Коласа», «Янка Купала, Якуб Колас і БДУ», «Літаратуразнаўцы БДУ пра Янку Купалу», «Літаратуразнаўцы БДУ пра Якуба Коласа», «Літаратуразнавец Ігар Жук чытае Янку Купалу», «З сямейнага архіва (Якуб Колас)», «Мова і стыль Янкі Купалы», «Мова і стыль Якуба Коласа», рэпрадукцыі мастацкіх партрэтаў народных паэтаў, артыкулы У. А. Навумовіча, З. І. Бадзевіч, А. Л. Вераб’я, А. І. Бельскага, А. Э. Сабуць, Ж. С. Шаладонавай, Г. М. Мятліцкай і інш.

Студэнты паглядзелі фрагменты відэа пра Янку Купалу і Якуба Коласа, падзяліліся ўражаннямі. Трэцякурснікі атрымалі творчыя заданні і ўжо рыхтуюць уласныя праекты і матэрыялы для сайтаў «Народныя паэты і пісьменнікі Беларусі» і «Бібліятэка філолага». Сярод іх прац будуць тэматычныя падборкі вершаў, у тым ліку лепшых паэтычных твораў, прысвечаных Янку Купалу і Якубу Коласу.

Сярод удзельнікаў прэзентацыі былі галоўны рэдактар часопіса «Роднае слова» Н. М. Шапран, прафесар, старшыня Саюза жанчын БДУ І. В. Казакова і інш.