BY 
18 сакавіка ў ДУА «Сярэдняя школа № 27 г. Мінска» прайшоў штогадовы конкурс чытальнікаў пад назвай «Усё пачынаецца з любові…». На гэты раз школа гасцінна расчыніла свае дзверы перад студэнтамі філалагічнага факультэта, якія разам з дацэнтам кафедры рускай літаратуры Таццянай Сідаравай прыйшлі ў якасці гасцей свята, каб вярнуцца ў школьныя гады цудоўныя і, вядома, паказаць свае ўменні ў чытанні вершаў, у тым ліку ўласнага сачынення.
Так, студэнты Вераніка Булько (4 курс рамана-германскай філалогіі) і Валерыя Валкавец (2 курс рускай філалогіі) прачыталі вядомыя класічныя творы пра каханне: Э. Асадава і С. Грахоўскага. Пра вышэйшае значэнне пачуцця, дзе Бог ёсць Любоў, расказала ў сваім творы «Гарчычнае зерне» студэнтка 2 курса беларускай філалогіі Яўгенія Касіловіч. Аб каханні маці і сіле яе блаславення прагучаў верш на італьянскай мове «Мama mia» у выкананні студэнткі 1 курса рамана-германскай філалогіі Галіны Пятровай. Тэму філасофіі кахання закранулі ў сваіх глыбокіх вершах студэнт 1 курса рамана-германскай філалогіі Сяргей Звяруга («Упартасць прыгожага дня») і студэнтка 2 курса рускага аддзялення Паліна Зотава («Фронт пусткі»). Завяршыла маленькі канцэрт філолагаў выступленне студэнткі 2 курса славянскай філалогіі Паліны Барташэвіч, якая, акрамя верша «А палюбяць цябе абавязкова за іншае», выканала пад гітару песню на верш С. Ясеніна «Ліст да жанчыны».
Студэнты-філолагі набылі ўдзячную аўдыторыю з лiку прадстаўнiкоў адміністрацыі, педагагічнага калектыву школы № 27, бацькоў і навучэнцаў, якія прысутнічалі на свяце.
«Вы ўбачылі, колькі таленавітых людзей вучацца на філалагічным факультэце, – звярнулася да прысутных Таццяна Сідарава, – прыходзьце да нас і Вашы здольнасці памножацца!» Таццяна Сідарава расказала аб спецыяльнасцях філалагічнага факультэта, аб магчымасцях творчага і навуковага росту маладых людзей пад апекай добрых і мудрых выкладчыкаў; раздала буклеты старшакласнікам.
Спадзяемся, што сустрэча, якая адбылася, – гэта пачатак вялікага сяброўства паміж БДУ і школай г. Мінска, сярод выпускнікоў якой – акцёры тэатра і кіно! Спадзяемся, што плёнам гэтага сяброўства, у тым ліку, стануць абітурыенты філалагічнага факультэта вядучай ВНУ краіны.
Мяркуючы па тым, як не хацелася ўсім удзельнікам развітвацца па заканчэнні мерапрыемства, можна з упэўненасцю сцвярджаць, што новыя сустрэчы яшчэ наперадзе. Бо дзе маладосць, там каханне, а дзе філолагі – там імпрэза Слова і вера ў прыгажосць чалавека!
