BY 
22 сакавіка 2023 года замежныя студэнты 2 курса спецыяльнасці «Рамана-германская (англійская) філалогія» і выкладчык кафедры тэарэтычнага і славянскага літаратуразнаўства Ганна Альшэўская наведалі экспазіцыю Музея сучаснай беларускай дзяржаўнасці.
Падчас экскурсіі замежныя студэнты пазнаёміліся з гісторыяй Канстытуцыі Рэспублікі Беларусь, з падпісаным Прэзідэнтам Аляксандрам Лукашэнка Законам «Аб генацыдзе беларускага народа», далучыліся да Рэспубліканскай хвіліны маўчання ў памяць аб ахвярах Хатынскай трагедыі, што адбылася роўна 80 гадоў таму, – 22 сакавіка 1943 года.
Замежныя студэнты праявілі вялікую цікавасць да гісторыі станаўлення і развіцця беларускага рубля. Студэнтаў уразілі прадстаўленыя на выставе дасягненні медыцыны. Не пакінуў абыякавым і стэнд, на якім былі прадстаўлены ўзнагароды ў сферы адукацыі, а таксама стэнды, прысвечаныя беларускім спартсменам, убранню і ўзнагародам дзеячаў культуры і мастацтваў.
Вялікі эмацыйны водгук выклікалі ў замежных студэнтаў сувеніры, падораныя Прэзідэнту Рэспублікі Беларусь замежнымі дэлегацыямі.
