Жанчына года БДУ – 2021 Пераможца конкурсу ў намінацыі “Вучэбна-метадычная работа”

29 красавіка 2021 года адбыўся фінал конкурсу “Жанчына года БДУ – 2021”, прысвечанага 100-годдзю ўніверсітэта. Конкурс праходзіў па 5 намінацыях: навуковая работа, вучэбна-метадычная работа, работа са студэнтамі, лепшы кіраўнік, лепшы работнік.

У намінацыі “Вучэбна-метадычная работа” лепшай стала доктар педагагічных навук, прафесар кафедры рыторыкі і методыкі выкладання мовы і літаратуры філалагічнага факультэта Вольга Уладзіміраўна Праскаловіч.

Пасля заканчэння з залатым медалём СШ № 89 г. Мінска тады яшчэ Вольга Кудзелка паступіла на беларуска-рускае аддзяленне філалагічнага факультэта Беларускага дзяржаўнага ўніверсітэта. Сваю прафесійную дзейнасць Вольга Уладзіміраўна Праскаловіч пачала як настаўнік беларускай мовы і літаратуры сталічнай школы № 133. Калі ў Мінску стварылася навучальная ўстанова новага тыпу, сярэдняя спецыялізаваная школа пры Беларускім дзяржаўным універсітэце (цяпер – ліцэй БДУ), то перайшла туды працаваць. Паралельна выкладала на кафедры і вучылася ў аспірантуры па спецыяльнасці “Тэорыя і методыка навучання і выхавання (беларуская літаратура)”. Пасля абароны кандыдацкай дысертацыі стала выкладаць методыку навучання беларускай літаратуры, а пазней – рыторыку (аратарскае майстэрства) на ўсіх факультэтах сацыягуманітарнага цыкла БДУ, назаўсёды звязаўшы лёс са сваёй Аlma Mater.

“Для мяне Беларускі дзяржаўны ўніверсітэт не толькі месца працы, але і сапраўдны дом, у якім дойлідамі будучыні былі і застаюцца выкладчыкі, а любімымі дзецьмі былі і застаюцца студэнты,” – адзначае пераможца конкурсу “Жанчына года БДУ – 2021”. І працягвае: “Стаць настаўнікам – мара дзяцінства. Пачуццё гонару за выбраную прафесію ўзмацняецца з кожным годам. Вельмі прыемна і радасна ўсведамляць, што дапамагла стаць на крыло многім маладым філолагам. Вельмі ганаруся тым, што многім дапамагла сцвердзіцца ў метадычнай навуцы і адукацыйнай практыцы. А яшчэ больш ганаруся тым, што вучыла і вучу сваіх выхаванцаў культуры педагагічных зносін, удзячным адносінам да выкладчыцкай працы, да настаўнікаў. У сваім прафесійным жыцці кіруюся дэвізам: “Трэба любіць тое, што выкладаеш, і любіць тых, каму выкладаеш!” Сваім прафесійным поспехам я абавязана Настаўнікам, якія навучылі мяне служыць метадычнай навуцы і ад гэтага адчуваць сябе шчаслівай. А конкурс стаў для мяне дадатковым стымулам для далейшай плённай працы. Я ўдзячна кафедры і факультэту за падтрымку і веру ў маю перамогу!

Хочацца ўсіх павіншаваць са 100-гадовым Юбілеем нашай Аlma Mater, пажадаць нам плёну, росквіту, новых перамог!!!

Не сумняваюся, што (як цяпер, так і ў будучым) БДУ застанецца флагманам беларускай унiверсiтэцкай адукацыi i навукi, вядучым ВНУ краіны. Да свайго 100-годдзя БДУ трапіць у рэйтынгі 100 лепшых ВНУ свету (паводле QS World University Rankings).

У гэта веру!”

DSC 7768

DSC 7790

DSC 7802