BY 
14 лістапада напярэдадні 85-годдзя філалагічнага факультэта ў аўдыторыі імя Ларысы Аляксандраўны Мурынай, вучонага ў галіне педагогікі, мовазнаўцы, член-карэспандэнта Беларускай акадэміі адукацыі, адбылося ўшаноўванне выпускнікоў аспірантуры і дактарантуры 2024 года і ўключэнне ў навуковую супольнасць факультэта аспірантаў, дактарантаў і саіскальнікаў, залічаных на першы курс для атрымання навукова-арыентаванай адукацыі. Дыпломы даследчыка былі ўручаны дзевяці выпускнікам аспірантуры, дакументы аб завяршэнні навукова-арыентаванай адукацыі другой ступені (дактарантуры) – пяці вучоным, якія працуюць над дысертацыямі на саісканне вучонай ступені доктара навук. З прамовай да маладых даследчыкаў звярнуліся дэкан філалагічнага факультэта Сяргей Аляксандравіч Важнік і намеснік дэкана па навуковай рабоце Таццяна Васільеўна Мальцэвіч. Выступоўцы павіншавалі выпускнікоў з важнай падзеяй у іх жыцці, пажадалі далейшых творчых поспехаў, новых навуковых дасягненняў і хуткай абароны дысертацый.
