BY 
10 снежня 2024 года на філалагічным факультэце БДУ адбылося мерапрыемства, прысвечанае фантастычнай літаратуры і асаблівасцям пісьменніцкай творчасці ў гэтай сферы мастацкай славеснасці. Мерапрыемства было прымеркавана да значных памятных дат, якія адзначаліся ў 2024 годзе – 230-годдзя з дня нараджэння Яна Баршчэўскага і 90-годдзя з дня нараджэння Кіра Булычова – класікаў фантастычнай літаратуры. Мерапрыемства было арганізавана кафедрай тэарэтычнага і беларускага літаратуразнаўства і праводзілася ў рамках вывучэння дысцыпліны "Псіхалогія літаратурнай творчасці" на 2 курсе спецыяльнасці "Руская філалогія". Прысутнічалі і студэнты з іншых курсаў і спецыяльнасцей, а таксама выкладчыкі кафедры тэарэтычнага і беларускага літаратуразнаўства - загадчыца кафедры Т.А. Марозава, дацэнты А.У. Прыемка, Л.В. Алейнік, С.В. Шамякіна.
С.В. Шамякіна ўзяла ўступнае слова, у якім агучыла прычыны выбару тэмы мерапрыемства, звязаныя са значнасцю і спецыфікай фантастычнай літаратуры, а таксама правяла агляд біяграфіі і творчасці Яна Баршчэўскага і Кіра Булычова. Акрамя таго, студэнтам была прадэманстравана прэзентацыя, прысвечаная гісторыі развіцця фантастыкі ў беларускай літаратуры, падрыхтаваная кандыдатам філалагічных навук, старшым навуковым супрацоўнікам Нацыянальнай акадэміі навук Беларусі Марыяй Вячаславаўнай Шамякінай, якая займаецца вывучэннем гэтага пытання ў рамках сваёй доктарскай дысертацыі.
Ключавой падзеяй мерапрыемства стала сустрэча студэнтаў і выкладчыкаў з беларускімі пісьменнікамі-фантастамі – Анатолем Яўгенавічам Матвіенка (членам Саюза пісьменнікаў Беларусі і Саюза пісьменнікаў Саюзнай дзяржавы, аўтарам больш за 50 літаратурных твораў і кінасцэнарыяў, кандыдатам юрыдычных навук) і Наталляй Вітальеўнай Мазуркевіч (аўтарам больш за 18 фантастастычных раманаў, выпускніцай філалагічнага факультэта БДУ).
Пісьменнікі правялі інтэрактыўную гутарку са студэнтамі і выкладчыкамі, у якой былі ўзняты многія важныя тэмы, што датычацца пісьменніцкай працы: асаблівасці творчага працэсу ў галіне фантастыкі, праблемы псіхалогіі літаратурнай творчасці, спецыфіка работы пісьменніка ў сучасных умовах, у тым ліку ўзаемадзеяння аўтараў з рэдактарамі і выдавецтвамі, магчымасці камерцыялізацыі і папулярызацыі сваіх твораў, пытанні, звязаныя з выкарыстаннем сучаснымі пісьменнікамі інтэрнэт-рэсурсаў і нейрасетак.
Прысутныя на мерапрыемстве мелі магчымасць азнаёміцца з кнігамі пісьменнікаў-спікераў. Студэнты і выкладчыкі актыўна задавалі пытанні, размова з пісьменнікамі праходзіла ў свабоднай і нязмушанай атмасферы.
