BY 
12 мая 2025 года на адукацыйным партале філалагічнага факультэта БДУ, у раздзеле «Вучэбна-навуковая лабараторыя беларускага фальклору» кафедры тэарэтычнага і беларускага літаратуразнаўства, адбылася віртуальная прэзентацыя «Беларускія народныя традыцыі і святы».
Дадзенае мерапрыемства было арганізавана супрацоўнікамі вучэбна-навуковай лабараторыі беларускага фальклору БДУ на чале з загадчыкам Верай Дзянісенка з мэтай падрыхтоўкі да правядзення фальклорнай практыкі 2024 – 2025 навучальнага года.
Пачынаецца віртуальная прэзентацыя раздзелам «У свеце свят», які знаёміць з кнігай Васіля Ліцьвінкі «Святы і абрады беларусаў». Яе аўтар не толькі дэталёва аналізуе традыцыйныя святы і абрады, але і спалучае навуковы падыход з глыбокім разуменнем мясцовых традыцый, даследуе іх гістарычныя карані, сімволіку і значэнне ў сучасным жыцці беларусаў.
Кожнае свята ў беларускім календары – гэта не проста падзея, а своеасаблівы код, які захоўвае ў сабе веды пра прыроду, сямейныя адносіны і каштоўнасці, мудрасць продкаў. Таму чатыры наступныя блокі віртуальнай прэзентацыі прысвечаны падрабязнаму разгляду цыклаў каляндарна-абрадавага фальклору беларусаў: зімовага, веснавога, летняга і восеньскага. Тэматычны пошук, адбор і рэтраканверсія архіўных фальклорных запісаў праводзіліся супрацоўнікамі лабараторыі – спецыялістамі па забеспячэнні вучэбнага працэсу Кацярынай Батура і Анастасіяй Сцельмашук.
Распрацоўшчыкі прэзентацыі акцэнтуюць увагу на тое, як каляндарна-абрадавы фальклор спрыяе захаванню нацыянальнай ідэнтычнасці беларусаў у сучасным свеце, як гэтыя традыцыі перадаюцца з пакалення ў пакаленне і якія новыя формы яны прымаюць у наш час. Таму асобнае месца ў віртуальнай вандроўцы адводзіцца тым мерапрыемствам, ініцыятарам якіх на працягу некалькіх гадоў выступала вучэбна-навуковая лабараторыя беларускага фальклору, – серыі майстар-класаў «Каля Калядаў», фальклорнаму фэсту «Гуканне вясны», прэзентацыі першай батлейкі на філфаку «Казачны куфар».
Пазнаёміцца з віртуальнай прэзентацыяй можна па спасылцы https://eduphil.bsu.by/course/view.php?id=3261, якая будзе актыўна да 12 ліпеня 2025 года.
