BY 
Да Дня беларускай навукі на філалагічным факультэце падрыхтавана 16 навукова-практычных мерапрыемстваў: пасяджэнні круглых сталоў, навуковых і навукова-метадычных семінараў, прысвечаных актуальным пытанням мовазнаўства, літаратуразнаўства і методыкі выкладання філалагічных дысцыплін, выставы навуковых і вучэбна-метадычных прац выкладчыкаў факультэта, майстар-класы па метадалогіі навуковай дзейнасці для студэнтаў і аспірантаў, а таксама пазнавальныя мерапрыемствы для замежных студэнтаў.
Кафедра рускай мовы запрашае на навуковы семінар «Актуальныя пытанні лінгвістычных даследаванняў у сінхраніі і дыяхраніі», прысвечаны 100-годдзю прафесара Паўла Паўлавіча Шубы. На семінары будуць заслуханы выступленні вучоных кафедры аб навуковых і навукова-метадычных дасягненнях прафесара П.П.Шубы, які амаль 40 гадоў працаваў на кафедры рускай мовы. Выстава работ прафесара адкрыта ў чытальнай зале бібліятэкі філалагічнага факультэта.
У межах круглага стала «Падзяка майму Настаўніку» даследчыкі кафедры тэарэтычнага і славянскага мовазнаўства падзеляцца асабістымі жыццёвымі гісторыямі, звязанымі з любімымі выкладчыкамі, якія калісьці аказалі ўплыў на іх навуковы светапогляд.
Кафедра класічнай філалогіі на пасяджэнні міжуніверсітэцкага круглага стала «Класічныя мовы і антычная культура: рэцэпцыя, методыка выкладання» прапануе да абмеркавання стан і перспектывы развіцця класічнай філалогіі на сучасным этапе, пытанні рэцэпцыі антычнай спадчыны ў рускай і беларускай культуры, аспекты методыкі выкладання класічных моў у ВНУ і каледжах рознай накіраванасці.
Круглы стол «Актуальныя праблемы даследавання і выкладання рускай літаратуры – 2026» праводзіць кафедра рускай літаратуры. На навукова-практычны семінар «Інавацыі ў выкладанні філалагічных дысцыплін» запрашае кафедра рыторыкі і методыкі выкладання мовы і літаратуры. Пасяджэнне дыскусійнага клуба кафедры тэорыі і методыкі выкладання рускай мовы як замежнай прысвечана праблемам развіцця стратэгічнай лінгвадыдактыкі.
На навуковым семінары кафедры кітайскай філалогіі «Актуальныя праблемы вывучэння кітайскай мовы і літаратуры» будуць разгледжаны актуальныя тэндэнцыі ў даследаванні кітайскай мовы і літаратуры, а таксама падрыхтавана прэзентацыя актуальных выданняў і публікацый, выкананых студэнтамі і супрацоўнікамі кафедры.
Кафедра тэарэтычнага і беларускага літаратуразнаўства запрашае маладых вучоных і выкладчыкаў да ўдзелу ў пасяджэнні круглага стала «Праблемнае поле беларускай і кітайскай фалькларыстыкі» (з анлайн-удзелам кітайскіх калег, спікер – прафесар І.В. Казакова), а таксама да абмеркавання актуальных пытанняў беларускага літаратуразнаўства на ІV-м Навуковым семінары «Беларуская літаратура ў свеце камунікацый».
Кафедра беларускага мовазнаўства запрашае азнаёміцца з выставай навуковых і вучэбна-метадычных работ выкладчыкаў «Плён думкі нашай» і наведаць публічную лекцыю прафесара М.Р. Прыгодзіча «Беларускае пісьменства: ад старажытнасці да нашых дзён». Мэта мерапрыемства – вызначыць ролю беларускай мовы ў гістарычным развіцці беларусаў, станаўленні і захаванні нацыянальнай культуры і фарміраванні нацыянальнай адметнасці і свядомасці, выявіць месца беларускай мовы ў сучаснай моўнай сітуацыі, яе запатрабаванасць у розных камунікатыўных сферах, акрэсліць гістарычныя этапы з’яўлення і развіцця пісьменства ва ўсходніх славян, прадэманстраваць спецыфіку кірыліцы, лацінкі і арабікі – трох графічных сістэм, што ў розныя часы былі ва ўжытку пры пісьме па-беларуску.
Для замежных студэнтаў кафедра прыкладной лінгвістыкі арганізуе «Інтэрв'ю з вучоным»: пасяджэнне размоўнага клуба, прысвечанае прафесійнаму станаўленню філолагаў, кар'ерным перспектывам і магчымасцям прафесійнага развіцця. Запрошаны спікер – прафесар Т.М. Саўчук. У ходзе сустрэчы студэнты 4 курса і магістранты будуць мець магчымасць задаць спікеру тэматычныя пытанні аб навуковай і прафесійнай дзейнасці, аб кар'еры вучонага-філолага ў акадэмічнай сферы, аб рускай мове і вопыце яе выкладання.
Замежныя студэнты запрашаюцца на экскурсію-віктарыну «Святкуем Дзень навукі»: студэнты наведаюць аддзел рэдкай кнігі і падрыхтаваную да Дня навукі кніжную выставу ў Цэнтральнай навуковай бібліятэцы імя Якуба Коласа НАН Беларусі, пазнаёмяцца з дасягненнямі сучаснай беларускай навукі, структурай навуковых цэнтраў і інш.
Актуальныя пытанні міжкультурнай камунікацыі і педагагічнага майстэрства будуць абмяркоўвацца за круглым сталом навуковых студэнцкіх аб'яднанняў кафедры раманскага мовазнаўства: удзельнікі студэнцкіх навуковых гурткоў «Творчая майстэрня перакладчыка», «Літара», «Майстэрня перакладу» і СНДЛ «Лабараторыя педагагічнага майстэрства» сканцэнтруюць увагу на тэорыі перакладу і характары заканамернасцей лінгвістычнага аналізу розных тыпаў дыскурсу.
Вопытам падрыхтоўкі навуковых работ і напісання дысертацый падзеляцца са студэнтамі, магістрантамі, аспірантамі навукоўцы факультэта. Кафедра тэарэтычнага і славянскага мовазнаўства чакае маладых лінгвістаў на навукова-метадычным семінары «Першыя крокі ў навуку». Кафедра замежнай літаратуры запрашае маладых літаратуразнаўцаў на «Аспіранцкі марафон: канцэпцыі, тэзы, дыскусіі» – навуковую дыскусію, скіраваную на ўдакладненне канцэпцыі дысертацыі, вызначэнне логікі даследавання, фарміраванне культуры навуковага дыялогу.
Філалагічны факультэт запрашае ўсіх зацікаўленых да ўдзелу ў навукова-практычных мерапрыемствах, прысвечаных Дню беларускай навукі - 2026!
Больш падрабязна з праграмай мерапрыемстваў можна азнаёміцца тут.
