BY 
22 студзеня 2026 года супрацоўнікі кафедры тэарэтычнага і беларускага літаратуразнаўства і вучэбна-навуковай лабараторыі беларускага фальклору філалагічнага факультэта БДУ наведалі выставу дасягненняў суверэннай Беларусі «Мая Беларусь». Свае незабыўныя ўражанні і эмоцыі супрацоўнікі захавалі ў шматлікіх фатаграфіях і захапляльных водгуках.
Дар’я Рукавішнікава
Выстаўка “Мая Беларусь” уражвае сваім маштабам і прадуманым дызайнам, ператвараючы знаёмства з дасягненнямі нашай краіны ў прыгожае і захапляльнае падарожжа. Інтэрактыўны фармат робіць экспазіцыі максімальна даступнымі, дазваляючы наведвальнікам усіх узростаў напрамую далучыцца да нашых поспехаў. Гэтая натхняльная прастора дорыць шчырае пачуццё гонару за Радзіму і веру ў яе паспяховую будучыню.
Лізавета Шуцько
Выстава “Мая Беларусь” уразіла мяне сваёй маштабнасцю і жывой падачай гісторыі і дасягненняў краіны. Асабліва мне запомнілася, як праз яскравыя мастацкія вобразы, архіўныя фатаграфіі і элементы народнай творчасці раскрываецца характар і душа роднага краю. Я з цікавасцю пагрузілася ў віртуальныя падарожжы і інтэрактыўныя зоны, якія робяць гісторыю і культуру Беларусі па-сапраўднаму жывымі і даступнымі. Прыемна здзівіла разнастайнасць фарматаў – ад пазнавальных даследчых станцый да экалагічных усталёвак і насычанай культурнай праграмы. Пасля наведвання выставы застаецца пачуццё гонару за краіну і шчырае жаданне даведацца пра яе яшчэ больш.
Марыя Садчанка
На выставе “Мая Беларусь” для наведвальнікаў адкрыта мноства залаў і інтэрактываў, якія акунаюць у гісторыю і культуру нашай краіны, а таксама паказваюць перспектывы развіцця. Усе пляцоўкі па-свойму ўнікальныя і маляўнічыя, асабліва запомніўся інтэрактыў «Поры года». Выдатнае месца, каб даведацца пра тое, чым жыве наша краіна.
Ганна Іванова
Адной з добрых якасцяў выставы сталі разнастайныя экспазіцыі, якія прадстаўляюць як традыцыйную беларускую культуру, так і сучасныя інавацыі. Асабліва ўразілі інтэрактыўныя зоны, дзе наведвальнікі маглі пазнаёміцца з рознымі сферамі жыцця нашай краіны: спортам, навукай, медыцынай, сферай адпачынку і г.д.
Для мяне выстава стала выдатнай магчымасцю для знаёмства з тым, што робіць нашу краіну ўнікальнай. Яна стварыла прастору для дыялогу паміж пакаленнямі і натхніла на далейшае знаёмства з дасягненнямі нашай дзяржавы.
