Падарожжа па свеце міфалагічнай спадчыны ў Нацыянальнай бібліятэцы Беларусі

10 сакавіка студэнты 1 курса спецыяльнасці «Класічная філалогія» разам з заг. кафедры А. У. Кірычэнкі, куратарам К.В. Стрыга і старшым выкладчыкам А.С. Лявончык наведалі выставачны праект «Код міфаў» у Нацыянальнай бібліятэцы Беларусі і здзейснілі падарожжа па свеце міфалагічнай спадчыны, якая раскрывае сувязь антычнай і беларускай культур. Студэнты і выкладчыкі ўбачылі, як сюжэты і вобразы антычнай міфалогіі знайшлі адлюстраванне і атрымалі арыгінальнае пераасэнсаванне ў беларускім мастацтве, архітэктуры, арнаменце і традыцыях. У экспазіцыі прадстаўлена мноства экспанатаў: кнігі, мастацкія работы і артэфакты беларускага паходжання, сярод якіх нацыянальныя касцюмы з арнаментам «меандр», рэканструкцыі слуцкіх паясоў з відарысам старажытнагрэчаскай амфары, ручнікі XIX–ХХ стагоддзяў з інтэрпрэтацыямі грэчаскіх арнаментаў.