BY 
02.04.26 у рамках педагагічнай практыкі студэнткі 4 курса спецыяльнасці «рамана-германская (нямецкая) філалогія» Анастасія Васількова, Яна Галец і Паліна Валадзько (кіраўнік практыкі – дацэнт кафедры германскага мовазнаўства С.С. Катоўская) правялі прафарыентацыйную сустрэчу з вучнямі 9-х класаў ДУА «Сярэдняя школа № 73 імя М.Ф. Шмырова г. Мінска».
Мэта мерапрыемства – пазнаёміць старшакласнікаў школы з філалагічным факультэтам БДУ, праінфармаваць аб напрамках падрыхтоўкі спецыялістаў і спецыфіцы навучання на факультэце вядучай ВНУ краіны.
Сустрэча суправаджалася мультымедыйнай прэзентацыяй філалагічнага факультэта. Студэнткі расказалі аб перспектывах навучання на філалагічным факультэце, дысцыплінах, якія вывучаюцца, і насычаным студэнцкім жыцці. Школьнікаў цікавілі тэрміны навучання, магчымасці вывучэння другой замежнай мовы, месцы размеркавання. Падчас гутаркі высветлілася, што вучні крыху спалоханыя высокімі прахаднымі баламі на спецыяльнасць «рамана-германская філалогія». Тым не менш, ім было цікава даведацца пра вопыт студэнтак: ці падабаецца ім вучыцца на філалагічным факультэце і дзе цікавей: ва ўніверсітэце ці ў школе. Мерапрыемства прайшло ў спакойнай, сяброӯскай атмасферы, паколькі студэнткі паспелі заслужыць аўтарытэт і павагу ў школьнікаў за час праведзеных з імі ўрокаў.
Кіраўніцтва школы і вучні падзякавалі арганізатарам сустрэчы за магчымасць атрымаць інфармацыю пра філалагічную адукацыю з першых вуснаў і стымул яшчэ раз задумацца пра выбар прафесіі.
