Падведзены вынікі штогадовага агульнаўніверсітэцкага конкурсу творчых работ студэнтаў «Культурная спадчына Антычнасці і сучаснасць»

У конкурсе прыняла ўдзел больш за 70 студэнтаў розных факультэтаў БДУ (філалагічны, гістарычны, юрыдычны, біялагічны, хімічны, факультэт міжнародных адносін, факультэт філасофіі і сацыяльных навук) і іншых ВНУ (Мінская духоўная акадэмія, Беларускі дзяржаўны медыцынскі ўніверсітэт), а таксама навучэнцы школ і каледжаў г. Мінска (ДУА СШ № 66, Мінскі дзяржаўны медыцынскі каледж).

Арганізатарамі конкурсу выступілі кафедра класічнай філалогіі БДУ і ГА «Саюз жанчын БДУ». Мэтай конкурсу з’яўляецца папулярызацыя вывучэння антычнай спадчыны і выяўленне яе ўплыву на еўрапейскую і беларускую культуру. Асэнсоўваючы месца антычнай спадчыны ў беларускай і – шырэй – еўрапейскай культуры, студэнты, якія вывучаюць лацінскую мову і антычную літаратуру, падрыхтавалі ўласныя творчыя «адукацыйныя прадукты».

У камісію конкурсу ўвайшлі супрацоўнікі кафедры класічнай філалогіі: загадчык кафедры В. Г. Пракапчук, вядучы спецыяліст кабінета грэчаскай філалогіі дацэнт В. С. Зарэмба, старшыя выкладчыкі Дз. Г. Мінкевіч, Н. В. Пратасевіч і Ю. А. Сядзініна-Баркоўская. Удзельнікі камісіі адзначылі традыцыйна высокі ўзровень крэатыўнасці ўдзельнікаў. Работы студэнтаў ацэньваліся ў намінацыях «Малюнак», «Плакат»,«Паэзія», «Эсэ».

У намінацыі «Малюнак» дыплом I ступені атрымаў Міхаіл Дырко (гістарычны факультэт, 1 курс) за трыпціх «Грэчаскія воіны», дыплом II ступені – іерэй Віктар Кулічэнка (Мінская духоўная акадэмія, магістрант) за працу «Атлант», дыпломы III ступені – Анастасія Чаховіч (хімічны факультэт, 1 курс) за малюнак «Гаргона», а таксама студэнткі 1-га курса філалагічнага факультэта Аляксандра Барычэўская і Юлія Гурыновіч за калектыўную працу «Адысей і Пенелопа».

Вельмі шмат работ было прадстаўлена ў намінацыі «Плакат». Галоўную ўзнагароду ў гэтай намінацыі за працу «Судовыя працэсы ў Старажытным Рыме» атрымала студэнтка факультэта міжнародных адносін Марыя Вазнюк (1 курс), якая ярка і наглядна прадставіла інфармацыю, засвоеную на занятках па лацінскай мове і рымскім праве. Дыпломы II ступені атрымалі Таісія Кароткіх (Беларускі дзяржаўны медыцынскі ўніверсітэт, 1 курс) з працай «Мы падобныя да карлікаў на плячах гігантаў...», а таксама Сафія Тужыкава і Соф’я Яўменава (факультэт міжнародных адносін, 1 курс) з іранічным плакатам пра Цэзара «Alea jacta est». Трэцяе месца падзялілі Юлія Грыц (гістарычны факультэт, 1 курс), Вераніка Лысенка (юрыдычны факультэт, 1 курс) і Дар’я Грыгарук (Мінскі дзяржаўны медыцынскі каледж, 1 курс).

Члены камісіі высока ацанілі прадстаўленыя на конкурс паэтычныя працы, прыемна здзівіўшыя глыбінёй зместу і дасканаласцю формы. У намінацыі «Паэзія» дыпломам I ступені за серыю вершаў на беларускай мове ўзнагароджана Дар’я Вараб’ёва (філалагічны факультэт, 3 курс), прадэманстраваўшая тонкі псіхалагізм і сапраўдную эмпатыю да перажыванняў антычных герояў. Дыпломы II ступені атрымалі Дар’я Талалаева (філалагічны факультэт, 3 курс) за верш «Малітва Пігмаліёна» і Сафія Андрон (філалагічны факультэт, 1 курс), убачыўшая і па-мастацку адлюстраваўшая карцінкі з антычнай міфалогіі падчас будзённай паездкі ў метро. Дыпломы III ступені атрымалі Ганна Малітвік (філалагічны факультэт, 1 курс) за верш «Отчего так печально на сердце?» і Анастасія Макоўчык (філалагічны факультэт, 1 курс) за верш «Rosmarinus».

Дыплом I ступені ў намінацыі «Эсэ» атрымаў Дзмітрый Суднік (філалагічны факультэт, 1 курс) за аналіз экалагічнай праблематыкі ў «Буколіках» Феакрыта, дыплом II ступені – Андрэй Кучар (гістарычны факультэт, 1 курс) за эсэ «Всё дальше и дальше от нас мир Древней Эллады», у якім апісаў сваё знаёмства з антычнай гісторыяй і культурай і іх месца ў сучасным свеце, а таксама Ганна Белая (філалагічны факультэт, 1 курс), якая абрала прадметам свайго разважання лекцыю персанажа кнігі Донны Тарт «Таемная гісторыя» Джуліяна Мораў, выкладчыка старажытнагрэчаскай мовы і антычнай культуры. Трэцяе месца падзялілі студэнты 1-га курса юрыдычнага факультэта Лізавета Кісялёва з разважаннем «Антычная міфалогія ў сучасным свеце» і Даніла Штрапаў, які прысвяціў сваю працу аналізу дзяржаўна-прававога ўплыву Рымскай дзяржавы на сучаснасць.

Работы школьнікаў былі прадстаўлены ў спецыяльнай намінацыі «Знаёмства з Антычнасцю». У гэтай намінацыі дыпломамі I ступені за свае малюнкі ўзнагароджаны Анастасія Кавалёнак (ДУА «СШ № 66 г. Мінска», 6 клас), Ганна Пратасевіч (ДУА «СШ № 66 г. Мінска», 6 клас) і Дыяна Хмыз (ДУА «СШ № 66 г. Мінска», 7 клас). Дыпломы II i III ступені было вырашана не ўручаць.

Пераможцы былі ўзнагароджаны дыпломамі і памятнымі прызамі. Работы пераможцаў конкурсу ў бліжэйшы час будуць апублікаваныя на старонках кафедры класічнай філалогіі ў сацыяльных сетках Facebook (https://www.facebook.com/graecolatini/) і Вконтакте (https://vk.com/classica_bsu).

Даведка. Больш падрабязна з гісторыяй конкурсу можна азнаёміцца на партале «Метадалогія, змест, практыка крэатыўнай адукацыі»: http://didact.bsu.by/item/classic_phil_contest

ФМО

филфак2

филфак4

филфак5

юрфак2

002 (1)

Дирко Михаил

Куличенко Виктор