ДЫЯЛОГАВАЯ ПЛЯЦОЎКА: ТВОЙ ВЫБАР – ФІЛФАК БДУ

Добра быць у дарозе, якую ты сам сабе выбіраеш.

Якуб Колас

28 красавіка адбылася дыялогавая пляцоўка выкладчыкаў філалагічнага факультэта БДУ з навучэнцамі 10–11 класаў школ №№ 135, 186, 200, 210 г. Мінска.

У госці да выпускнікоў прыехалі загадчыца кафедры рыторыкі і методыкі выкладання мовы і літаратуры Таццяна Уладзіміраўна Рубанік і прафесар кафедры Вольга Уладзіміраўна Праскаловіч.

Абітурыенты атрымалі ўнікальную магчымасць даведацца пра філалагічны факультэт Беларускага дзяржаўнага ўніверсітэта ад яго выкладчыкаў і пагаварыць з прафесарам В. У. Праскаловіч – аўтарам вучэбна-метадычнага забеспячэння па беларускай літаратуры для ўстаноў агульнай сярэдняй адукацыі.

Выступоўцы распавялі пра правілы прыёму ва ўстанову вышэйшай адукацыі, прапанаваныя спецыяльнасці, перспектывы далейшага працаўладкавання.

Дырэктар СШ № 186 Максім Валер’евіч Баравік, выпускнік філфака БДУ, падзяліўся сваімі ўспамінамі пра студэнцкія гады, распавёў навучэнцам пра цікавыя напрамкі лінгвістыкі – лінгвакрыміналістыку, камп’ютарную лінгвістыку, дакументазнаўства і інш.

Навучэнцы актыўна задавалі пытанні пра магчымасці вывучэння кітайскай мовы і стажыровак ва ўніверсітэтах іншых краін, прахадных балах на спецыяльнасці філалагічнага факультэта БДУ. Акрамя таго, у фармаце дыялогу былі абмеркаваны праблемы лінгваэкалогіі – маўленчай культуры моладзі, будучыні друкаваных выданняў у кантэксце лічбавізацыі жыцця чалавека, а таксама пытанні міжнароднага супрацоўніцтва на аснове вывучэння моў і культур розных краін.

Для навучэнцаў і іх настаўнікаў была арганізавана выстава кніг супрацоўнікаў філалагічнага факультэта БДУ. Удзельнікі мерапрыемства маглі абраць у падарунак упадабанае выданне і атрымаць пісьмовае пажаданне на памяць ад гасцей-філолагаў.

20210428 141515

20210428 144903

20210428 145010

IMG 2a7fd21ae52ce137b660d42f99d2e2db V