BY 14 мая 2021 года прайшла патрыятычна-асветніцкая акцыя «Вязынка–2021» – свята філалагічнага факультэта БДУ і ўсяго Універсітэта. Менавіта ў Вязынцы нарадзіўся Ясь Луцэвіч, будучы Народны паэт Беларусі Янка Купала (1882 – 1942). У гэтым годзе акцыя была прымеркавана да 100-годдзя Беларускага дзяржаўнага ўніверсітэта.
Традыцыя правядзення злётаў на радзіме Янкі Купалы была закладзена студэнтамі і выкладчыкамі філалагічнага факультэта яшчэ ў далёкім 1976 годзе. Акцыя адрадзілася ў 90-я гады ХХ ст., а статус агульнаўніверсітэцкай набыла на пачатку ХХІ ст.
Лідары студэнцкіх арганізацый філалагічнага факультэта наведалі музей Янкі Купалы і ўсклалі кветкі да помніка Песняру. Урачыстую частку традыцыйна адкрыў гімн студэнцтва “Gaudeamus” у выкананні актывістаў Творчага саюза. З прывітальным словам выступілі дэкан філалагічнага факультэта Сяргей Аляксандравіч Важнік і загадчык кафедры рускай мовы Іван Сямёнавіч Роўда.
Гэтая “Вязынка” па-сапраўднаму запомніцца ўсім яркімі нумарамі, якія падрыхтавалі актывісты філалагічнага і ваеннага факультэтаў. У выкананні замежных студэнтаў з Кітая і Туркменістана прагучалі нацыянальныя кампазіцыі і беларускія народныя песні. На свята завітаў аўтар слоў гімна філалагічнага факультэта Канстанцін Пятровіч Цыбульскі. Студэнткі Ганна Зыкава і Кацярына Шохан выканалі гімн разам з ім. Праз дрэннае надвор’е спартыўна-забаўляльная частка мерапрыемсятва была перанесена на іншы дзень.
Усмешкі студэнтаў і выкладчыкаў змаглі ператварыць пахмурны дзень у адзін з найбольш яскравых і незабыўных. Менавіта такой насычанай і душэўнай запомніцца “Вязынка–2021”.
